John Nallunairun
Nallunairun
John-aam Igallran nasvagaa Jesus-aaq: nangyuilnguq Agayutem Qaneryaraa, “wangkucicetun kemgurtellruuq akunlemten̄i-llu uitaluni.” Kalikat qanerutkaat: Tau͡gaam makut igausngaut ukveresqelluci Jesus-aaq Christ-aucianek, Agayutmun-llu Qetunraqucianek, elpeci-llu ukvelriani atrakun unguvakangesqelluci. (20.31)
Qanrutkerraarluku Jesus-aaq, nangyuilnguq Agayutem Qaneryaraa, uum Gospel-aam qanrutkai ayuqenrilnguut irr'inarqelriit Jesus-aam pillri, tamakut-llu nallunairaat Jesus-aaq Anirturten͞gucia akqutkumalleq. Makut kinguatgun nalqigtai irr'inarqelriatgun nallunairumallret. Uum nalliini kalikat qanrutkait qaillun yuut ilait ukvengellrat Jesus-aamun ellii-llu maliggluku, allat tau͡gken inglulirluku qessakluku ukveqlerkaa. Chapter-aani 13-17 qanrutkenqegcaararaa Jesus-aam elitnaurani-llu ilakuyun atullrat tuani unugmi Jesus-aam tunumatkaani, qanellri-llu elitnaurani upluki, eguaqurluki-llu tuani ussukcausngallerkami eruyutiini. Nangenrita chapter-aat qanrutkaat Jesus-aam tegumallra qanercetaarumallra-llu, ussukcausngallra tuqumek-llu maktellra, elitnauraminun-llu tangercet'lallra maktellmi kinguani.
Qanemciq arnamek akusarutekevkallermek, Jesus-aamun ullautellratnek, igausngalartuq bracket-aat [ ] iluatni, amllerni kalikarni, mumigcimaqerraallerni-llu igausngaksaituq, allat tau͡gken ilakaqluku allamun ellilluku.
John-aam Igallran qanrutkenqegcaraa cikiun unguvamek Christ-akun, cikiun ayagnilria waniwa watua, tailalria-llu kinkunun ciuniurtainun Jesus-aam tumyaraucian, piciunrucian, unguvaucian-llu. John-aam Igallrin arcaqerluni kesianek tangrruulrianek cuqyucirluni qanrutkai anernellaat, makutgun: meq, kelipaq, tanqik, qusngiliurta qusngii-llu, wine-arkat napat atsait-llu.
Kalikam Imaa
Ayagniun 1.1-18
John-aaq Angllurcecista Jesus-aam-llu elitnaurai ciuqliit 1.19-51
Jesus-aam yugni kevgiullra 2.1—12.50
Nangneqliit erenret Jerusalem-aami canimeskiini-llu 13.1—19.42
Atanrem maktellra alaillra-llu 20.1-31
Nangneq: alla alaillra Galilee-ami 21.1-25
נבחרו כעת:
John Nallunairun: YPK
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Yupik Bible © 2012 American Bible Society. All rights reserved.