Juan 14
14
Ja ri Jesús ri bꞌey chin ngabꞌeqaqa apeꞌ kꞌo ri Dios
1Ri Jesús xubꞌij: Ma tichꞌujrisaj iwiꞌ, xa kin tikuqubꞌaꞌ ikꞌuꞌx rikꞌin ri Dios y tikuqubꞌaꞌ chuqaꞌ ikꞌuꞌx wikꞌin riyin. 2Chikaj apeꞌ kꞌo ri Nataꞌ Dios kꞌiy achoch#2Co. 5:1 ekꞌo chin ngekꞌojeꞌ ri ngebꞌeqaqa chiriꞌ. Si ma ke ta riꞌ, man ta xinbꞌij chiwa chi ngibꞌa y nebꞌanaꞌ rukꞌojlen apeꞌ ngixbꞌekꞌojeꞌ rix. 3Y atoq xibꞌa yan, y nubꞌanun chik rukꞌojlen ri apeꞌ ngixbꞌekꞌojeꞌ, nginuqaqa chik jumbꞌey#Hch. 1:11 y ngixunkꞌamaꞌ qa, chin keriꞌ ri apeꞌ yinkꞌo riyin, ngixbꞌekꞌojeꞌ chuqaꞌ rix.#1Ts. 4:17 4Rix iwetaman ri apeꞌ ngibꞌa riyin, y iwetaman chuqaꞌ ri bꞌey.
5Ri Tomás xubꞌij chare ri Jesús: Ajaw, roj nixta qetaman apeꞌ ngabꞌa. ¿Achike modo xtiqetamaj ri bꞌey?
6Y ri Jesús xubꞌij: Ja riyin ri bꞌey, ja riyin ri qetzij#Jn. 1:17; 8:32 y ja riyin ri kꞌaslen,#Jn. 1:4; 6:35 nixta jun nditiker ndeqaqa apeꞌ kꞌo ri Tataꞌaj Dios, si ma ngirutaqij ta riyin.#Ro. 5:1, 2 7Xa ta rix iwetaman nunoꞌoj, iwetaman ta chuqaꞌ runoꞌoj ri Nataꞌ Dios.#Jn. 8:19 Y xe jampeꞌ wokami xiwetamaj runoꞌoj y xitzꞌet ruwech.
8Ri Felipe kereꞌ xubꞌij chare ri Jesús: Ajaw, takꞌutuꞌ ri Tataꞌaj Dios chiqawech, y rikꞌin riꞌ ndikuqer qa qakꞌuꞌx.
9Y ri Jesús xubꞌij: Felipe, riyin santienta chik qꞌij kikꞌojeꞌ iwikꞌin, ¿y kꞌajani tawetamaj achike riyin? Ri yin rutzꞌeton riyin, rutzꞌeton chuqaꞌ ruwech ri Tataꞌaj Dios.#Col. 1:15; He. 1:3 ¿Achike roma ndabꞌij chi ndawojoꞌ nikꞌut ri Tataꞌaj Dios chiwech? 10¿Ma ndataqij ta chi riyin jun nubꞌanun rikꞌin ri Tataꞌaj Dios, y rijaꞌ jun rubꞌanun wikꞌin?#Jn. 10:38; 17:21 Ri tzij ri nibꞌij chiwa, ma nuyon ta chinuwech enutzꞌukun qa, y keriꞌ chuqaꞌ ja ri Tataꞌaj Dios ri jun ránima rubꞌanun wikꞌin ri ndikusan wichin chin ngerubꞌen ri nimalej teq achike eꞌitzꞌeton pe. 11Kinitaqij kꞌa chi riyin jun nubꞌanun rikꞌin ri Tataꞌaj Dios, y rijaꞌ jun rubꞌanun wikꞌin. Y si ma nditaqij ta re nibꞌij chiwa, kinitaqij roma ri nimalej teq achike ngenbꞌen chiwech.#Jn. 5:36 12Kin qetzij nibꞌij chiwa: Ri ngirutaqij, kin xkerubꞌanalaꞌ chuqaꞌ ri nimalej teq achike ngenbꞌen yin, y más nimalej teq achike ri xkerubꞌanalaꞌ, porque riyin ngibꞌa apeꞌ kꞌo ri Tataꞌaj Dios. 13Y nojel ri ndikꞌutuj rix pa nubꞌiꞌ riyin, kin nibꞌen wi, chin keriꞌ ndiqꞌalajin ruqꞌij ri Tataꞌaj Dios woma riyin ri Rukꞌajol. 14Si kꞌo jun achike ndikꞌutuj chuwa pa nubꞌiꞌ, riyin kin nibꞌen wi.
Ri Jesús ndubꞌij chi nduteq pe ri Espíritu Santo
15Ri Jesús xubꞌij chuqaꞌ: Ri retal chi qetzij nginiwojoꞌ, ja ri ngeꞌinimaj ri nu-mandamientos. 16Y riyin kin xtinkꞌutuj chare ri Tataꞌaj Dios, y rijaꞌ nduteq pe jun chik Bꞌochinel chin ndikꞌojeꞌ jumul iwikꞌin. 17Y riꞌ ja ri Espíritu Santo, ri ndiqꞌalajrisan ri qetzij. Ri Espíritu riꞌ, maneq cheꞌel ndikikꞌen apu pa kánima ri wineq ma nginikitaqij ta, porque ma ndikitzꞌet ta nixta ketaman runoꞌoj, pero rix iwetaman runoꞌoj roma kꞌo iwikꞌin wokami, y más chiwech apu, kin ndikꞌojeꞌ#1Jn. 2:27 jumul pa iwánima.
18Riyin ma ngixinyaꞌ ta kan iyon achel ta rix mebꞌaꞌ keriꞌ, porque nginuqaqa chik jumbꞌey chiꞌikajal. 19Jubꞌaꞌ chik qꞌij ndirajoꞌ chi ri wineq ri ma nginikitaqij ta ma nginikitzꞌet ta chik, pero rix kꞌa nginitzꞌet. Y roma kꞌo nukꞌaslen riyin, rix chuqaꞌ ndikꞌojeꞌ ikꞌaslen chin jumul.#1Co. 15:20 20Y chupan ri qꞌij riꞌ, kin ndiqꞌalajin chiwech chi riyin xe jun nubꞌanun rikꞌin ri Nataꞌ,#Jn. 10:38; 17:21 y rix xe jun ibꞌanun wikꞌin, y riyin iwikꞌin rix. 21Ri wineq ri kꞌo ri nu-mandamientos pa ránima y ndubꞌen ri ndikibꞌij ri mandamientos riꞌ, kin ngirajoꞌ, y ri ngirajoꞌ, ndojowex roma ri Nataꞌ. Y riyin chuqaꞌ niwojoꞌ y niqꞌalajrisaj wiꞌ chuwech.
22Ja atoq riꞌ ri discípulo rubꞌiniꞌan Judas,#Lc. 6:16 pero ma ja ta ri Judas Iscariote, xubꞌij chare ri Jesús: Ajaw, ¿achike roma xaxe chiqawech roj ndaqꞌalajrisaj awiꞌ y ma ndaqꞌalajrisaj ta awiꞌ chikiwech ri wineq ri ma rat kitaqin ta?
23Y ri Jesús xubꞌij chare: Si jun wineq qetzij ngirajoꞌ, ndubꞌen ri nubꞌiꞌin kan y ndojowex roma ri Nataꞌ. Y ri Nataꞌ y riyin ngojuqaqa chin ndiqabꞌen qachoch chare ri ránima. 24Pero ri ma ngirajoꞌ ta, ma ndunimaj ta ri tzij nibꞌij. Y ri tzij ri nibꞌij ri ndiwakꞌaxaj rix, ma wichin ta riyin, xa kin richin ri Tataꞌaj Dios ri taqayon pe wichin.
25Nojel re ngitajin chubꞌixik chiwa, nubꞌiꞌin utz kꞌa yinkꞌo iwikꞌin. 26Y ri Espíritu Santo ri Bꞌochinel ri nditaq pe#Lc. 24:49 roma ri Tataꞌaj Dios pa nubꞌiꞌ, ngixurutijoj#1Jn. 2:27 rikꞌin nojel y ndurukꞌuxlaꞌaj nojel ri nubꞌiꞌin kan chiwa.
27Riyin niyaꞌ kan uxlanen#Fil. 4:7 pa iwánima, achel ri uxlanen kꞌo pa wánima riyin, y ri uxlanen niyaꞌ kan pa iwánima, ma ngetiker ta ndikiyaꞌ ri wineq. Ma tichꞌujrisaj iwiꞌ, y ma tixibꞌij iwiꞌ. 28Rix xiwakꞌaxaj chi riyin nubꞌiꞌin chiwa chi ngibꞌa, y nginuqaqa chik jumbꞌey iwikꞌin. Xa ta rix nginiwojoꞌ, ngixkikot ta roma xinbꞌij chiwa chi ngibꞌa rikꞌin ri Tataꞌaj Dios,#Jn. 14:12 porque rijaꞌ más nimalej ruqꞌij ke chinuwech riyin. 29Ninabꞌeyaj apu rubꞌixik reꞌ chiwa, chin keriꞌ atoq ndibꞌanatej, rix más ngixtaqin pa iwánima.
30Ma kꞌiy chi ta tzij nibꞌij kan chiwa, porque ri itzel ri rajawal#Jn. 12:31 re rochꞌulew, jubꞌaꞌ chik ndirajoꞌ chin nduqaqa, pero xa ma jun ruqꞌaꞌ chuwa. 31Pero ndikꞌatzin chi ri wineq ndiketamaj chi riyin niwojoꞌ ri Tataꞌaj Dios, y kin nibꞌen achel rubꞌiꞌin pe chuwa. ¡Kixyakatej, qojel e waweꞌ!
© 2015, Wycliffe Bible Translators, Inc. All rights reserved.