LUK 10
10
Jisu Le Temi Hentsenyü Nikeshü
1Lo Jisu le jo tsü zoshü kela sika temi kechanyu hentsenyü kejülo-o tsüdan nyu mihvu hvu nipe anyugun no a-le gü titse kebin rünyi aphu ka lo bin aphu nyu shü. 2Tson-o a-le anyugun ka, “Low we chonsa, ai thakethyü nyu le rho; tsügenyu hagun low Npugü no lothonyu nipe a-low nyu shülo nrün genyu a-ka hilo chi. 3Hagun le tsonchüshü chi; hire, tanyü le teken dan ka kegü hontse ale hagun nishü güzhü nyo. 4Hagun le pisa khin, nmvue thakhvü, nmvue phaje nme-e sen nya; lo tsonne nyu temi nme-e kelu bin nya. 5Tson-o hagun le ka lika hika yülo jochü pe ka tsünyu shülo terilo. 6Lo jochü hyulo kekü le ka tsü nyu bin yatselo hagun jochü tsüle a-ge bin lo ti; ai tsonmvu yatselo hagun ge nigun ryü lati. 7Lo ka tsünyu tsü bin-o mele tha khikeshü tsü tyülo. Kechamvule tha thyü kehünyu le a-chün hyutyü zü kethyü genyu. Lo nme ka nyu bin tseo kelani sen-o kechanyu kanyu nigun la nya. 8Lo hagun le rünyi lika hika güo mele hagun zenlo yatselo, mele tha khipe hagun ketsü dan tsü tyütsülo. 9Lo rünyi tsünyu kehokenyü le bin yatselo thyü kesherhün shülo, tson-o anyugun ka, ‘Sunggigü keda le ryüo hagun khonni bin laso,’ tsonkethyü zoshü. 10Ai hagun rünyi lika hikae yüo mele hagun zenlo mvulo, tsonda nyu gü temi tsüdan ka, hagun rünyi nyu nnyon le apha nsü kelo hi-e hagun kemu genyu agun le tsüe kenishü lati tse binla sele nye. 11‘Ai Sunggigü keda we ryüo a-khonni bin laso, jo tsü shalo chi, tsonkethyü zoshü nye!’. 12Ale hagun ka zoshü ti, tsünyü rünyi tsügü rüla nyeki Sodom kazü nyu kenjün kethyü khvü gü we pvü nshe kvu ti.
Nyunkelulo Kemvu Rünyi dan
(Mt 11:2-24)
13“Che, Korasin, nwe thyülo tiso! Che, Betsaida, nko thyülo tiso! Hai rünyi nyu tha keda thyükeshü tsü nduka Tur lo Sidon rünyi nyu thyüshü yatselo, au ai ronphi lo jonbü sen-o nduka nyu au nyunkelulo lati atale. 14Tsügenyu ketso nrün nyü we hai nyeki Tur lo Sidon au khvü we nshen kvu ti. 15Lo, Kapernaum, nthyü nso pe tsang tun ti tse bin le? Nthyü ketsenyo pe Hades ki shü lati!”
16Jisu le a-le senthyükelonyu ju ka zo, “Temi lihigüe hagun khwenyü kehünyu le a-khwen-e nyü hünyo; lo temi lihigüe hagun keni kehünyu le akeni hünyo; lo temi lihigüe akeni kehünyu le a nikeshügüe kenila hünyo.”
Temi Hentsenyü dan Le Rani Keryü
17Tsüselo temi hentsenyü dan tsüle ryüo anyugun shekerhün thyüo zo, “Npugü, tero gwakemvu dan-e nzan nyu agun jo zenlo le!” tson. 18Tsüselo Jisu le anyugun ka zo, “Ale tsangge satan le tsangkekechwe hontse tsükeryü hyuso! 19Hire, ale hagun no peri lo zukeshon nyu kedülo nrün, lo shwikerüchün nyu so kekvu aphu khipe hagun tsüla sele nye! Tsügenyu tsüdan nme-e hagun nthyü ndon keloi ndi! 20Ai kapu dan le hagun jo zenkelo genyu we hagun sherhün nya, ai hagun zan thu pe tsangge bin kela genyu hagun sherhünlo chi,” tsonshü.
Jisu Shekerhün Jo
(Mt 11:25-27; 13:16-17)
21Tsükatsü a-le Kenshün Kapu nyu a-sherhün-o zo, “Hie, Apvü, tsang lo kazü Npugü, Nle thakesha kerüchün kegwa nyu ka we jo hidan hi kebu njüo pe nyupin nyuhonyu dan teshakeshü genyu ale nshwen hünyo; ketsin, Apvü, Nyhühyu ka le hihontse kethyü hile nkendo genyu.
22“Apvü le tha aphu pe aben nyu shü laso; lo Pvügü kemvu we temi nme-e Nyugü sha hümvu; tsühontse Nyugü, lo Nyu tsügü le tsinpe hikeshünyu kemvu we temi nme-e Pvügü le segü yo sha hümvu,” tsonshü.
23Tsüselo a-le ranigü senthyükelo nyu dan nrio anyugun ka, “Hagun le kehyu hi a-yhütyü no kehyu nyu dan le jochü kepvü tsin. 24Kechamvule ale hagun ka zo shüti, sidyükeshanyu lo rajanyu kechon le ntsoka hagun le hyu kehü hi hyushü nyü ho ryü, ai hyu mvu laso; lo anyugun le ntsoka hagun le nyü kehü dan hi nyüshü nyü ho ryü, ai nyülo mvu laso,” tsonshü.
Samaria nyu Nme Rüla Jokejvü
25Tsüselo tejvü keshanyu nme le soryüo Jisu semen-o zo, “Senkethyü gü, ale kethonthen kerhün hyulo nrün genyu nyu thyülo mvulo shvula?” tson-o ketsoshü.
26Jisu le a-ka, “Ketsin lesü ka nyu thu njü nla? Nle nyu rüchün-o swü hü nla?” tson-o a-ketso nishü.
27Lo temi tsügü ko zo, “Nle nnyun aphu, nkeyhun aphu, lo nkekvu aphu, lo nkerüchün aphu sen-o Npugü so lo rühvu lochi; lo nkazonkazin so pe n npvü nkeso hontselo chi,” tson.
28Tsüselo Jisu le, “Nle zoto shü laso; tsühontse le, tsonlo yatselo nle rhünlo ti.”
29Ai temi tsügü le a-le njü letse lonyüo, Jisu ka zoni, “Tsonlo segü le akazonkazin la?” tson-o ketsoni.
30Jisu le zo, “Nduka temi nme le Jerusalem nyu bin tseo Jeriko ki nshye zhü, tsüka mehon seketyü nyu dan me le a-nrhisülo njüo tsüdan le a-phi a-nya rholo la-o a-vü, tson-o a-boshvu kesala njüo a-khelao tinla. 31Tsükatsü peshükedanyu nme le tsü tson kipon n shyeryü laryü; temi tsügü le a-hyushü njüo a-terhon-o kecha kipon tinla. 32Lo tsühontse Levinyu nme ko n shyeryüo a-hyushü njüo a-nrhi sen-o kecha kipon tinla. 33Ai Samarianyu nme le njwen ryüo a-kebin bin tilo ntsin a-hyushüo a-shwipe a-nyun kenjünthyü la. 34Tson-o a-khoka ryüo a-ge tejünshvu tsü terzü lo vain zu jape yün shüo phin küshü; tson-o a-khipe a-gada ge shülo-o a-khipvüo tesinka nme nyu gü a-nucha bin. 35Lo tsüsinyü ko a-le jonhvu chün khi nipe tesinka kekhwen gü tsüshüo, ‘Nle nucha binlo nye; lo nle hinyeki tha le nichwila yatselo ale hisiki niryü kethyü ka khinipe ntsüla ti.’ ”
36Jisu le jo kenkhin zo-o, “Kha, anyugun mishen dan nyu segü le mehon seketyünyu dan le nrhisülo-o a-vü kelagü kazon gü letse kethyü nle rüchün bin nla?” tson-o ketso.
37Tsontsin tejvü kesha gü le zo, “A-shwinjün keshü gü le teso.”
Tsügenyu Jisu le a-ka zo, “Nko gungü tsühontse thyülo chi,” tsonshü.
Jisu Le Martha Lo Maria Au Kanyu Kegun
38Tsüselo anyugun le gun titse kebin nme ki gunzhü kethyü ka a-le rünyi nme nyu yü; lo tsünyu a-zan le Martha tse kethyü tenunyu nme le a-nsinlo. 39Lo tenunyu tsügi le a-sikezen gi a-zan le Maria tsekethyü nme le bin, a-le Npugü pha nyu bin-o a-jonyü bin. 40Ai Martha we tha aphu thyüo ra bin; tsügenyu a-le ryüo, “Npugü, a-sikezen gi le tinlao ano anpvü ra kebin hi nle rüchün bin mvu ole? Tsügenyu nle a-nishüo a-no ryüo acheo tha rashülo.”
41Ai Npugü le a-ka zoshü, “Martha, Martha, nle tha kechon thyülo nyüo nnyun kenjün thyü bin nyo. 42Ai thyükezü gü le nme nti le; Maria we tha kegwa tsin thame kae a-ben nyu se sentin lalo keho gü kejülo laso.”
נבחרו כעת:
LUK 10: REGSBSI
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
LUK 10
10
Jisu Le Temi Hentsenyü Nikeshü
1Lo Jisu le jo tsü zoshü kela sika temi kechanyu hentsenyü kejülo-o tsüdan nyu mihvu hvu nipe anyugun no a-le gü titse kebin rünyi aphu ka lo bin aphu nyu shü. 2Tson-o a-le anyugun ka, “Low we chonsa, ai thakethyü nyu le rho; tsügenyu hagun low Npugü no lothonyu nipe a-low nyu shülo nrün genyu a-ka hilo chi. 3Hagun le tsonchüshü chi; hire, tanyü le teken dan ka kegü hontse ale hagun nishü güzhü nyo. 4Hagun le pisa khin, nmvue thakhvü, nmvue phaje nme-e sen nya; lo tsonne nyu temi nme-e kelu bin nya. 5Tson-o hagun le ka lika hika yülo jochü pe ka tsünyu shülo terilo. 6Lo jochü hyulo kekü le ka tsü nyu bin yatselo hagun jochü tsüle a-ge bin lo ti; ai tsonmvu yatselo hagun ge nigun ryü lati. 7Lo ka tsünyu tsü bin-o mele tha khikeshü tsü tyülo. Kechamvule tha thyü kehünyu le a-chün hyutyü zü kethyü genyu. Lo nme ka nyu bin tseo kelani sen-o kechanyu kanyu nigun la nya. 8Lo hagun le rünyi lika hika güo mele hagun zenlo yatselo, mele tha khipe hagun ketsü dan tsü tyütsülo. 9Lo rünyi tsünyu kehokenyü le bin yatselo thyü kesherhün shülo, tson-o anyugun ka, ‘Sunggigü keda le ryüo hagun khonni bin laso,’ tsonkethyü zoshü. 10Ai hagun rünyi lika hikae yüo mele hagun zenlo mvulo, tsonda nyu gü temi tsüdan ka, hagun rünyi nyu nnyon le apha nsü kelo hi-e hagun kemu genyu agun le tsüe kenishü lati tse binla sele nye. 11‘Ai Sunggigü keda we ryüo a-khonni bin laso, jo tsü shalo chi, tsonkethyü zoshü nye!’. 12Ale hagun ka zoshü ti, tsünyü rünyi tsügü rüla nyeki Sodom kazü nyu kenjün kethyü khvü gü we pvü nshe kvu ti.
Nyunkelulo Kemvu Rünyi dan
(Mt 11:2-24)
13“Che, Korasin, nwe thyülo tiso! Che, Betsaida, nko thyülo tiso! Hai rünyi nyu tha keda thyükeshü tsü nduka Tur lo Sidon rünyi nyu thyüshü yatselo, au ai ronphi lo jonbü sen-o nduka nyu au nyunkelulo lati atale. 14Tsügenyu ketso nrün nyü we hai nyeki Tur lo Sidon au khvü we nshen kvu ti. 15Lo, Kapernaum, nthyü nso pe tsang tun ti tse bin le? Nthyü ketsenyo pe Hades ki shü lati!”
16Jisu le a-le senthyükelonyu ju ka zo, “Temi lihigüe hagun khwenyü kehünyu le a-khwen-e nyü hünyo; lo temi lihigüe hagun keni kehünyu le akeni hünyo; lo temi lihigüe akeni kehünyu le a nikeshügüe kenila hünyo.”
Temi Hentsenyü dan Le Rani Keryü
17Tsüselo temi hentsenyü dan tsüle ryüo anyugun shekerhün thyüo zo, “Npugü, tero gwakemvu dan-e nzan nyu agun jo zenlo le!” tson. 18Tsüselo Jisu le anyugun ka zo, “Ale tsangge satan le tsangkekechwe hontse tsükeryü hyuso! 19Hire, ale hagun no peri lo zukeshon nyu kedülo nrün, lo shwikerüchün nyu so kekvu aphu khipe hagun tsüla sele nye! Tsügenyu tsüdan nme-e hagun nthyü ndon keloi ndi! 20Ai kapu dan le hagun jo zenkelo genyu we hagun sherhün nya, ai hagun zan thu pe tsangge bin kela genyu hagun sherhünlo chi,” tsonshü.
Jisu Shekerhün Jo
(Mt 11:25-27; 13:16-17)
21Tsükatsü a-le Kenshün Kapu nyu a-sherhün-o zo, “Hie, Apvü, tsang lo kazü Npugü, Nle thakesha kerüchün kegwa nyu ka we jo hidan hi kebu njüo pe nyupin nyuhonyu dan teshakeshü genyu ale nshwen hünyo; ketsin, Apvü, Nyhühyu ka le hihontse kethyü hile nkendo genyu.
22“Apvü le tha aphu pe aben nyu shü laso; lo Pvügü kemvu we temi nme-e Nyugü sha hümvu; tsühontse Nyugü, lo Nyu tsügü le tsinpe hikeshünyu kemvu we temi nme-e Pvügü le segü yo sha hümvu,” tsonshü.
23Tsüselo a-le ranigü senthyükelo nyu dan nrio anyugun ka, “Hagun le kehyu hi a-yhütyü no kehyu nyu dan le jochü kepvü tsin. 24Kechamvule ale hagun ka zo shüti, sidyükeshanyu lo rajanyu kechon le ntsoka hagun le hyu kehü hi hyushü nyü ho ryü, ai hyu mvu laso; lo anyugun le ntsoka hagun le nyü kehü dan hi nyüshü nyü ho ryü, ai nyülo mvu laso,” tsonshü.
Samaria nyu Nme Rüla Jokejvü
25Tsüselo tejvü keshanyu nme le soryüo Jisu semen-o zo, “Senkethyü gü, ale kethonthen kerhün hyulo nrün genyu nyu thyülo mvulo shvula?” tson-o ketsoshü.
26Jisu le a-ka, “Ketsin lesü ka nyu thu njü nla? Nle nyu rüchün-o swü hü nla?” tson-o a-ketso nishü.
27Lo temi tsügü ko zo, “Nle nnyun aphu, nkeyhun aphu, lo nkekvu aphu, lo nkerüchün aphu sen-o Npugü so lo rühvu lochi; lo nkazonkazin so pe n npvü nkeso hontselo chi,” tson.
28Tsüselo Jisu le, “Nle zoto shü laso; tsühontse le, tsonlo yatselo nle rhünlo ti.”
29Ai temi tsügü le a-le njü letse lonyüo, Jisu ka zoni, “Tsonlo segü le akazonkazin la?” tson-o ketsoni.
30Jisu le zo, “Nduka temi nme le Jerusalem nyu bin tseo Jeriko ki nshye zhü, tsüka mehon seketyü nyu dan me le a-nrhisülo njüo tsüdan le a-phi a-nya rholo la-o a-vü, tson-o a-boshvu kesala njüo a-khelao tinla. 31Tsükatsü peshükedanyu nme le tsü tson kipon n shyeryü laryü; temi tsügü le a-hyushü njüo a-terhon-o kecha kipon tinla. 32Lo tsühontse Levinyu nme ko n shyeryüo a-hyushü njüo a-nrhi sen-o kecha kipon tinla. 33Ai Samarianyu nme le njwen ryüo a-kebin bin tilo ntsin a-hyushüo a-shwipe a-nyun kenjünthyü la. 34Tson-o a-khoka ryüo a-ge tejünshvu tsü terzü lo vain zu jape yün shüo phin küshü; tson-o a-khipe a-gada ge shülo-o a-khipvüo tesinka nme nyu gü a-nucha bin. 35Lo tsüsinyü ko a-le jonhvu chün khi nipe tesinka kekhwen gü tsüshüo, ‘Nle nucha binlo nye; lo nle hinyeki tha le nichwila yatselo ale hisiki niryü kethyü ka khinipe ntsüla ti.’ ”
36Jisu le jo kenkhin zo-o, “Kha, anyugun mishen dan nyu segü le mehon seketyünyu dan le nrhisülo-o a-vü kelagü kazon gü letse kethyü nle rüchün bin nla?” tson-o ketso.
37Tsontsin tejvü kesha gü le zo, “A-shwinjün keshü gü le teso.”
Tsügenyu Jisu le a-ka zo, “Nko gungü tsühontse thyülo chi,” tsonshü.
Jisu Le Martha Lo Maria Au Kanyu Kegun
38Tsüselo anyugun le gun titse kebin nme ki gunzhü kethyü ka a-le rünyi nme nyu yü; lo tsünyu a-zan le Martha tse kethyü tenunyu nme le a-nsinlo. 39Lo tenunyu tsügi le a-sikezen gi a-zan le Maria tsekethyü nme le bin, a-le Npugü pha nyu bin-o a-jonyü bin. 40Ai Martha we tha aphu thyüo ra bin; tsügenyu a-le ryüo, “Npugü, a-sikezen gi le tinlao ano anpvü ra kebin hi nle rüchün bin mvu ole? Tsügenyu nle a-nishüo a-no ryüo acheo tha rashülo.”
41Ai Npugü le a-ka zoshü, “Martha, Martha, nle tha kechon thyülo nyüo nnyun kenjün thyü bin nyo. 42Ai thyükezü gü le nme nti le; Maria we tha kegwa tsin thame kae a-ben nyu se sentin lalo keho gü kejülo laso.”
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.