Luka 16
16
Ntharika ya mulinda wakuchenjera
1 Yesu wakaŵaphaliraso ŵasambiri ŵakhe wakati, “Kukaŵa munthu musambazi, mweneuyo wakaŵa na msungiliri wa vyuma vyakhe. Ŵanthu ŵakamupachanga kuti wakusakaza vyuma vya sekuru wakhe. 2Sekuru wakhe wakamuchema na kumufumba kuti, ‘Kasi nchichi icho nkhupulika na vya iwe? Undipe karata wa kendeskero ka usungiriri wako, pakuti ungaŵaso msungiliri wa vyuma vyane chara.’ 3Msungiliri yura wakati mu mtima wakhe, ‘Kasi ndichitechi pakuti sekuru wane wakundiwuskapo pa usungiriri wane? Ndilije nkhongono zakulimira ndiposo ndili na soni kupemphapempha. 4Sono ndachimanya icho nditi ndichite, mwakuti para ndachimbizgika pa usungiriri wane, ŵanthu ŵakandipokererenge mu nyumba zawo.’
5“Ntheura wakachema yumozayumoza wa awo ŵakaŵa na ngongole kwa sekuru wakhe. Wakamufumba wakudanga wakati, ‘Ngongole yako kwa sekuru wane yili uli unandi wakhe?’ 6Iyo wakati, ‘Miyeso ya mafuta 100.’ Ndipo wakayowoya nayo wakati, ‘Uyu karata wako wa ngongole. Khara pasi luŵiro ndipo ulembepo miyeso 50.’ 7Ndipo wakati ku munyakhe, ‘Kasi iwe unandi wa ngongole yako ndi uli?’ Iyo wakati, ‘Vidunga vya tirigu 100.’ Wakamuphalira wakati, ‘Uyu karata wako wa ngongole ndipo ulembepo 80.’
8“Ntheura sekuru wakhe wakarumba msungiliri wa vyuma wambula kugomezgeka yura, chifukwa wakaghanaghana makora. Pakuti ŵanthu ŵa muwiro uwu mbakuchenjera mu kendeskero ka vinthu vyawo kwakuruska ŵanthu awo mba mu ungweru.
9“Ntheura nkhumuphalirani kuti, jisangirani ŵabwezi ŵinu na usambazi wa ubendezi, mwakuti para usambazi uwu wamara, mukapokerereke mu chikaya cha muyirayira. 10Yose uyo ngwa kugomezgeka mu vichoko, ndiyo ngwa kugomezgekaso mu vikuru. Ndipo yose uyo ngwambula kugomezgeka mu vikuru, ngwambula kugomezgekaso mu vinandi. 11Ntheura usange imwe muli ŵambula kugomezgeka pa usambazi wa kubendera, ndi njani uyo wangamugomezgani na usambazi wenecho? 12Usange muli ŵambula kugomezgeka pa icho nchaŵene, ndi njani uyo wamkumupani icho nchinu?
13“Palije muteŵeti uyo wangateŵetera ŵene-nchito ŵaŵiri. Chifukwa panyakhe wati watinkhenge yumoza na kutemwa munyakhe. Panji wati waskepereranenge na yumoza, na kumusunjizga munyakhe. Ntheura mulije kumanya kuteŵetera Chiuta na usambazi.”#Mat 6.24
Dango na Ufumu wa Chiuta
(Mat 11.12-13, 5.31-32; Mrk 10.11-12)
14 ŴaFarisi awo ŵakaŵa ŵakutemwa ndarama, ŵakati ŵapulika makani ghose gheneagha, ŵakamuhoya Yesu. 15Ntheura Yesu wakati kwa iwo, “Imwe ndimwe mukujirunjiska mwekha pa maso pa ŵanthu. Kweni Chiuta wakuyimanya mitima yinu. Pakuti icho ŵanthu ŵakuti nchakuzirwa, nchanthontho pa maso pa Chiuta.
16“Ŵanthu ŵakapulika dango la Mozesi na mabuku gha nchimi mpaka kufikira pa nyengo ya Yohane Mubapatizi. Kufuma nyengo yeneyira Uthenga Uweme wa Ufumu wa Chiuta ukupharazgika, ndipo yose wakujiphapatizgamo waka pakunjira mu Ufumu wa Chiuta.#Mat 11.12-13 17Nchipusu chomene kuti kuchanya na pasi vimare, kuruska kuti kadontho kamoza ka marango kazgoke kawaka.#Mat 5.18
18“Yose uyo wakupata muwoli wakhe na kutora munyakhe, wakuleŵa. Ndipo yose uyo wakutora mwanakazi uyo wapatika na mufumu wakhe nayo wakuleŵa.”#Mat 5.32; 1 Kor 7.10-11
Musambazi na Lazaro
19“Kukaŵa munthu musambazi mweneuyo wakavwaranga salu zichesamu na za bafuta na za mtengo wa pachanya. Munthu uyu wakajikondweskanga na viweme zuŵa na zuŵa. 20Kukaŵaso munthu munyakhe mukavu zina lakhe Lazaro uyo wakaŵa na vilonda thupi lose. Ŵanthu ŵakamuŵikanga pa muryango wa nyumba ya musambazi yura. 21Wakadokanga kurya tumaluvuvu uto tukarakatanga kufuma pa thebulu la musambazi yura. Ndipo nanga ndi ncheŵe nazo, zikizanga na kumyanga vilonda vyakhe.
22“Munthu mukavu yura wakafwa, ndipo ŵangelo ŵakamuyeghera mu chipakato cha Abrahamu. Musambazi nayo wakafwa ndipo wakasungika. 23Para musambazi yura wakaŵa mu urwirwi ukuru chomene ku Gehena, wakalaŵiska kuchanya, wakawona Abrahamu kutali, na Lazaro mu chipakato chakhe. 24Ndipo musambazi wakachemerezga wakati, ‘Ŵadada Abrahamu, mundilengere lusungu. Mutume Lazaro uyo kuti wabizge munwe mu maji ku songo pera wize kandizizimiske pa lulimi. Pakuti ndili mu urwirwi ukuru wa mu moto uwu!’ 25Kweni Abrahamu wakazgora wakati, ‘Mwana wane, kumbuka kuti mu nyengo ya umoyo wako, iwe ukapokeranga viweme ndipo Lazaro wakapokeranga viheni. Kweni sono iyo wakusanguruskika kuno, apo iwe uli mu urwirwi ukuru. 26Ndiposo pa dera pa ichi pakatikati pa imwe na ise, pali kuŵikika chibuwu chikuru, mwakuti awo ŵakukhumba kwambukira kuno nawo ŵatondekenge, ndiposo ŵa uko awo ŵakukhumba kwambukira kuno nawo ŵatondekenge.’ 27Musambazi wakazgora wakati, ‘Nkhumuŵeyani ŵadada kuti mumutume Lazaro ku nyumba ya ŵadada. 28Pakuti ndili na ŵana ŵanyane ŵankhonde. Warute wakaŵachenjezge mwakuti nawo ŵareke kwiza mu malo agha gha urwirwi.’
29“Kweni Abrahamu wakati, ‘Ŵana ŵanyako ŵali na Mozesi na nchimi, ndipo ŵakwenera kuŵapulika.’ 30Musambazi yura wakazgora wakati, ‘Chara, ŵadada Abrahamu. Kweni usange yumoza wangafuma ku ŵakufwa na kuruta kwa iwo, apo ndipo ŵangang'anamuka ku zakwananga zawo.’ 31Abrahamu wakazgora wakati, ‘Usange ŵakureka kupulika Mozesi, na nchimi, nanga yumoza wawuke ku ŵakufwa, kuti ŵamkukhorwa nayo chara.’ ”
נבחרו כעת:
Luka 16: Tumbuka
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Bible Society of Malawi