Mt 23
23
Yeso nyaʼa patɨ bə̂d dè məchwiə̀ rɨ̀kə̌ mbɨ mɨ̀Farisiî
(Mk 12.38-39; Lk 11.43, 46; 20.45-46)
1Yeso nyaʼa ghà əmbɨ mɨnɔ̂n bə̂d bə̀ fɔrɨ əmbɨ mbi mə̀mə̀ə̀nɨ̀-ɨnû ni, 2“Məchwiə̀ rɨ̀kə̌ mbɨ mɨ̀Farisiî yɨə bə̂d mbe nɨ nɨŋ tɨmbin ə Mose nɨ toʼrɨ tɨkə rɨ Ŋwiə̀. 3Əne mbə̀ berɨ zuunɨ mɨ̀mə̌d bə̀ ghɨ̀ ɨnû jìm mbe nɨ mbɨ gha ɨ nən. Àyɨə tɨ mbə̀ ghɨ ə ɨnû mbe nɨ mɨ̀mə̌d ə ghɨ̀ə̀, ɨmbə̀ʼ ɨghəm nɨ ka ɨ mbɨə ghɨ̀ ə ɨnû mbe nɨ mbɨə ghàə̀. 4Ɨ mbɨə kod ɨghɨ nɨ nirɨ, zab ə mbə̀ʼ bə̂d cherə, àyɨə chəi mbɨ ə chà fi əbɔ ɨ weerɨ ghɨ ni ɨghɨ mbe zamə. 5Ɨ mbɨə ghɨ̀ ɨnû jìm ɨmbə̀ʼ bə̂d zə mɨ̀mə̌d. Ɨ mbɨə tekɨə mbə mbɨ̀rɨkub gôb nɨ mbɨ zɨ ɨŋgam Ŋwiə̀ ɨŋga ni mbɨ kaŋ faŋ. Ɨ mbɨə nyaʼə taə tə ngywɨ̌ ghɨ̀ rɨtɔŋ jeŋgɨ sà. 6Ɨ mbɨə ghaʼ ɨsɨ ɨwumnɨ ənɨ mbɨ kaʼ ɨchwɨ̂. Mbɨ bə̀ ghaʼ ənû nɨ chub ɨgun ɨtən mbe nɨ yeʼ ɨfě ɨŋga nəb tɨ ə̀kàtɨ̀. 7Ɨ mbɨə ghaʼə ni bə̂d chaʼrɨ əwən ɨŋga mɨ̀wǐn mbɨ ɨwumnɨ. Ɨ mbɨə bə̀ ghaʼə ni bə̂d tɔŋ əwən ni 'Əchwiə̀-ɨnû.' 8Tɨ mbə̀ ben ə ni bə̂d tɔŋ əwən ni 'Əchwiə̀-ɨnû', ɨmbə̀ʼ ɨghəm nɨ mbə̀n mɨjìm yɨə bɔŋgɔb, əne mbə̀ berɨ àmei Əchwiə̀-ɨnû mɔʼ. 9Tɨ mbə̀ tɔŋ ə wə̀d mɔʼɔ ɨgwɨ ə si ni 'mbǎʼ', ɨmbə̀ʼ ɨghəm nɨ mbə̀ berɨ àmei Mbǎʼ mɔʼ. Məd wɨ ɨkaŋ. 10Tɨ mbə̀ bɨ ben ə ni bə̂d tɔŋ əwən ni 'mɨ̀masà', ɨmbə̀ʼ ɨghəm nɨ mbə berɨ àmei 'Masà' mɔʼ. Məd yɨə Kristo. 11Wə̀d we nɨ yeʼ wɨ kyeŋ əkaʼ nən berɨ yeʼ we nɨə fàʼ ɨ nən. 12Wə̀d jìm we nɨ nɔ i ɨnyod, Ŋwìə̀ bɨrɨ swi əməd, we nɨ swi i ɨnyod, Ŋwìə̀ bɨrɨ nɔ əməd.
Yeso nyaʼa ton ɨchî nɨ məchwiə̀ rɨ̀kə̌ mbɨ mɨ̀Farisiî nyaʼə bègrə̀
(Mk 12.40; Lk 11.39-42, 44, 52; 20.47)
13“Ŋgəʼ kyeŋ bɨrɨ nyɨ ɨgwɨ nən, mbə̀nə məchwiə̀ rɨ̀kə̌ bə̀ nyɨ ɨgwɨ nən mbə̀nə mɨ̀Farisiî. Mbə̀ yɨ ɨbekɨ bə̂d! Zɨ̀ bɨrɨ nyɨ ɨmbə̀ʼ ɨghəm nɨ mbə mbɨə wùb ɨchû ɨkam ənû ɨfɔ̀n rɨkaŋ ni tɨ̀ bə̂d nyɨ ə ɨŋga, àyɨə chəi mbən ə bə̀ nyɨə, kɨ̀ bè sàŋ ni mbe nɨə kə̀b nyɨ mbɨ nyɨ. 14[Ŋgəʼ kyeŋ bɨrɨ nyɨ ɨgwɨ nən mbə̀nə məchwiə̀ rɨ̀kə̌ bə̀ nyɨ ɨgwɨ nən mbə̀nə mɨ̀Farisiî. Mbə̀ yɨ ɨbekɨ bə̂d! Zɨ̀ bɨrɨ nyɨ ɨmbə̀ʼ ɨghəm nɨ mbə mbɨə tambɨə mɨku əyi ɨmbə̀ʼ fe ɨghɨ mɨ̀mə̌d. Mbə mɨ nɨə ghɨ̀ əne, mbə sɨ bègrɨ̀ kɔ̀ŋgɨ̀ ə Ŋwiə̀ ənɨ əgha ə se. Ŋwiə̀ bɨrɨ zɨ ɨsaʼi nɨ chè əbɔ ɨgwɨ nən.]
15“Ŋgəʼ kyeŋ bɨrɨ nyɨ ɨgwɨ nən mbə̀nə məchwiə̀ rɨ̀kə̌ bə̀ nyɨ ɨgwɨ nən mbə̀nə mɨ̀Farisiî. Mbə̀ yɨ ɨbekɨ bə̂d! Zɨ̀ bɨrɨ nyɨ ɨmbə̀ʼ ɨghəm nɨ mbə mbɨə baanɨ rɨ̀bàà bə̀ yèn ɨbeŋ jìm ɨmbə̀ʼ beŋ wə̀d mɔʼ ni wɨ̀ ben ənû ə Ŋwiə̀. Ənɨ wɨ̀ benɨ, mbə ghɨ̀ wɨ̀ kùʼ nɨ nyɨ ɨŋga əsɨ ɨchə chè əwən ɨghəm be.
16“Ŋgəʼ kyeŋ bɨrɨ nyɨ ɨgwɨ nən mbə̀nə mɨfɨgɨ̀ nɨə chàə̀ bə̂d. Mbə mbɨə ghàə̀ ni, 'Wə̀d mɨ kàn tɔŋ mbàn Ŋwìə̀, ənû ze ə chè ətu ə̀kǒ, àyɨə wɨ̀ mɨ kàn tɔŋ ə gôl we nɨ yeʼ ɨŋga mbàn Ŋwìə̀, əne wɨ̀ fə ghɨ ənû ze nɨ wɨ̀ kànɨ.' 17Mbə yɨ mɨfɨgɨ̀, bə̀ yeʼ ɨneŋ! Əghɨ ze nɨ chè əzɨ ə cherə kɨ əzi ə? À kɨə gôl kɨ̀ à kɨə mbàn Ŋwìə̀ ze nɨ ghɨ ni gôl we sɨ əghɨ ə Ŋwiə̀ ə? 18Mbə mbɨə ghàə̀ ni, 'Wə̀d mɨ kàn ɨgun ɨkwi ɨjə̀ŋ ə̀fà, ənû ze ə chè ətu ə̀kǒ, àyɨə wɨ̀ mɨ kàn ɨgwɨ ɨghɨ mbe nɨ mbɨ nuŋ ɨgun ɨkwi ɨjə̀ŋ ə̀fà, wɨ̀ berɨ ghɨ ənû ze nɨ wɨ̀ kànɨ.' 19Mbə yɨə kaŋ mɨfɨgɨ̀! Əghɨ ze nɨ che əzɨ ə cherə kɨ əzi ə? À kɨ ɨghɨ ə̀fà kɨ̀ ɨkwi ɨjə̀ŋ ə̀fà we nɨ ghɨ ni ɨghɨ mbe sɨ ɨghɨ Ŋwiə̀ ə? 20Mbə̀ kyerɨ ni wə̀d mɨ kàn ɨgun ɨkwi ɨjə̀ŋ ə̀fà, əne wɨ̀ fə kàn ɨgwɨ ɨkwi ɨjə̀ŋ we bə̀ kàn ɨgwɨ ɨghɨjìm mbe nɨ yeʼ ɨgun. 21Mbə̀ bə kyerɨ ni wə̀d mɨ kàn tɔŋ mbàn Ŋwìə̀, əne wɨ̀ fə kàn mbàn ze bə̀ kàn wə̀d we nɨə chub ɨŋga. 22Wə̀d mɨ kàn tɔŋ ɨkaŋ, əne wɨ̀ fə kàn ətən ə Ŋwiə̀ bə̀ kàn wə̀d we nɨə chub ɨgun.
23“Ŋgəʼ kyeŋ bɨrɨ nyɨ ɨgwɨ nən mbə̀nə məchwiə̀ rɨ̀kə̌ bə̀ nyɨ ɨgwɨ nən mbə̀nə mɨ̀Farisiî. Mbə̀ yɨ ɨbekɨ bə̂d! Zɨ̀ bɨrɨ nyɨ ɨmbə̀ʼ ɨghəm nɨ mbə mbɨə ghàpə̀ tɨtiirɨ te nɨ mbɨə tɔŋ ənɨ ə mint fɔrɨ ə dill bə̀ fɔrɨ ə kumìn ɨsɨ wum, əne nàʼ əsɨ ə fibɨ̀ əmbɨ ə Ŋwìə̀. Àyɨə mbə mbɨə waʼ ɨnû kyeŋ mbe nɨ yeʼ ɨŋga rɨ̀kə̌, ɨghabɨ ənû nɨ ghɨ̀ mbɨ ə bə̂d ɨchî nɨ kuʼnɨ, ənû nɨ diirɨ bə̂d mbɨ ənû ɨmbə̀ʼ ɨbenɨ. Zɨə bɔ̀ŋ ni mbə̀ ghɨ ɨnû mbɔ̂ jìm zɨ rɨ waʼ mbɨ mɔʼɔ. 24Mbə yɨ mɨfɨgɨ̀ nɨə chàə̀ bə̂d! Mbə mbɨə kyèŋə̀ fɨ̀jɨ̀ rɨŋga mɨ̀nòʼ, àyɨə mbə mbɨə mèd ə kàmel!
25“Ŋgəʼ kyeŋ bɨrɨ nyɨ ɨgwɨ nən mbə̀nə məchwiə̀ rɨ̀kə̌ bə̀ nyɨ ɨgwɨ nən mbə̀nə mɨ̀Farisiî. Mbə̀ yɨ ɨbekɨ bə̂d! Zɨ̀ bɨrɨ nyɨ ɨmbə̀ʼ ɨghəm nɨ mbə mbɨə sòə̀ njìm toʼ bə̀ sòə̀ njìm əkaŋ, àyɨə ɨghɨ mbe nɨ swi ɨŋga ɨghɨ mbɔ̂ yɨ ɨghɨ nɨ mbə̀ fe ənɨ ɨka mbɨ mbe nɨ mbə̀ berɨ ənɨ əjə. 26Mbə̀n mɨ̀Farisiî yɨə kaŋ mɨfɨgɨ̀! Mbə be sò toʼ fɔrɨ əkaŋ əbà rɨŋga, əne njìm bɨrɨ bə̀ sɨ zeŋ i.
27“Ŋgəʼ kyeŋ bɨrɨ nyɨ ɨgwɨ nən mbə̀nə məchwiə̀ rɨ̀kə̌ bə̀ nyɨ ɨgwɨ nən mbə̀nə mɨ̀Farisiî. Mbə̀ yɨ ɨbekɨ bə̂d! Zɨ̀ bɨrɨ nyɨ ɨmbə̀ʼ ɨghəm nɨ mbə yɨ ɨghabɨ ɨtu ɨsì nɨ mbɨ zɔʼ ənɨ ə mbǒm, mbɨ bɔ̀ŋ əbà rɨ ə sàŋ, àyɨə əbà rɨŋga, mbɨ swi mbɨ ɨwu ɨvɨ bə̂d fɔrɨ ɨbɔb ɨghɨ cherə. 28Əbà rɨ əsaŋ, mbə yɨ ɨghabɨ ə bə̂d nɨə ghɨ̀ ɨnû nɨ kuʼnɨ, àyɨə əbà rɨŋga, ɨbekɨ fɔrɨ ɨnû rɨbɔ̀ŋ swi ɨŋga nən.”
29“Ŋgəʼ kyeŋ bɨrɨ nyɨ ɨgwɨ nən mbə̀nə məchwiə̀ rɨ̀kə̌ bə̀ nyɨ ɨgwɨ nən mbə̀nə mɨ̀Farisiî. Mbə̀ yɨ ɨbekɨ bə̂d! Zɨ̀ bɨrɨ nyɨ ɨmbə̀ʼ ɨghəm nɨ mbə mbɨə bɔm ɨtu ɨsì bə̂d ɨ̀kə̀n Ŋwiə̀ bə̀ yèʼ ɨtu ɨsì bə̂d mbe nɨ ɨnû mɨ̀mə̌d kuʼnɨ. 30Mbə mɨ ghɨ̀ əne mbə̀ ghà ni, 'À kɨ nɨ tɨ̀ nyaʼa ənɨ ə nyùmə̀ mba mɨ̀mbǎʼ, njɨ chəi tɨ̀ nyaʼa fɔtɨ əbɔʼ mɨ̀mə̌d ɨ zwiirɨ bə̂d ɨ̀kə̀n Ŋwiə̀.' 31Mbə mɨ yeʼə ghà əne, njɨ mbə̀ fə kàŋ ben ni mbə yɨə bɔn tɨ ənɨ əghaŋ ə bə̂d mbe nɨ nyaʼa zwiirɨ bə̂d ɨ̀kə̀n Ŋwiə̀. 32Mbə̀ chè ɨmbì màànɨ̀ ə̀fàʼì ze nɨ mbə mɨ̀mbǎʼ rəŋwe nyaʼa kɔ. 33Mbə yɨə jɔ! Mbə yɨə kàŋ ə jɔ tɨ rɨbɔ̀ŋ! Mbə̀ kɨə wo chè rɨ yè bɔŋ vɨ rɨŋga əsɨ ɨchə ə? 34Mə bɨrɨ tom bə̂d ɨ̀kə̀n, tom bə̂d ɨwe bə̀ tom məchwiə̀ rɨ̀kə̌ əsɨ nən. Mbə bɨrɨ zwiirɨ mbɨ mɔʼɔ, kòmbɨ̀ mbɨ mɔʼɔ əzed ə baʼnɨ, te mbɨ mɔʼɔ ənɨ ə ŋgwad ɨŋga tə nəb ə̀kàtɨ̀, bə̀ nwèndɨ̀ tɨkyerɨ-ɨwu mbɨ mɔʼɔ, kɔ rɨŋga əsɨ ə fibɨ̀ wò pè ɨŋga əzɨ ə cherə, 35ɨmbə̀ʼ ənəm ə bə̂d mɨ̀jìm mbe nɨ nyaʼə ghɨ̀ ɨnû nɨ kuʼnɨ ɨgun ə si ə nyɨ ɨgwɨ nən, kɔ rɨ ənɨ ənəm ə Abèl we nɨ nyaʼə ghɨ̀ ənû nɨ kuʼnɨ wo pè ənɨ ənəm ə Zèkàriyà we nɨ nyaʼə wan Bèrekìà, nɨ mbə̀ nyaʼa zwiirɨ əsàn əsɨ ɨwumnɨ mbɨ ɨkwi ɨjə̀ŋ ə̀fà. 36Mə ghà rəsìʼ ɨ nən ni, ɨnû mbɔ̂ jìm bɨrɨ ghɨ̀ ɨgwɨ ɨghəm bə̂d wɔ̂ rɨ̀nîn.
Yeso nyaʼa kə̀n ɨgun ə Jèrusalèm
(Lk 13.34-35)
37“Wəi! Jèrusalèm, Jèrusalèm! À wɨə zwiirɨə bə̂d ɨ̀kə̀n Ŋwiə̀, bə̀ tumbɨə mbe nɨ mbɨ tom əsɨ ne ənɨ əti! À kɨ ɨghəm səʼə nɨ mə̀ fə kweʼ kə̀b ni njɨ mə fetɨ mbe bɔn ɨchî nɨ ɨŋgɔŋgub ə fetɨ mbi bɔn əton ti rɨbabɨ̀, àyɨə chəi à ben ni mə̀ ghɨ əne! 38Zə, Ŋwìə̀ fə sàŋ e nəb, zɨ fùm ə. 39Mə ghà ɨ ne ni chəi à bɨrɨ wɨrɨ zə əmɨ pè ənɨ à gha ni, 'Ŋwìə̀ zɨ əbɔrəbɔd ɨgun ə wə̀d we nɨə yeʼe ənɨ ɨkum Ə̀nùŋɨ̀sɨg.'”
© 2013, Cameroon Association for Bible Translation and Literacy