Mataos 20
20
Osyɛl o mosa lé enʉŋɔ lé eto sea é peme motin mo orezɛŋ ɨ
1«Jwɨ̀ʼa mo Da, yé enwɨɨla ó e mʉr bɨpeme a pyal kʉl é dwine mɛn kuno, lé eto saa bɨlobila byé óto sea nye syɛɛ é peme motin mo orezɛŋ ye e. 2No ó, bé e boo nɔɔ, bé a di twii ó, bé ónʉa ó, mʉr ngwar saŋ denie ngwar é moho ntinɨ. Nye ntɔʼ lomo bɨlobila bye ó, byé toʼ é peme ye.
3«No ó, yé mu kunokuno e mowala bu mo mɛn nɛʼɛ, nyi ze bâʼle pyal kʉl, bee bʉʉ bʉr ofih lé encyehbe é l'ebɨm e nkana. 4Nye ó: “Bɨn bɛɛ nteme, laŋa ga. Toʼ, to sea ga é peme yam. Me ójɛna bɨn myɛna mé ójala e bɨn ɨ.” 5Bɛɛ nteme ze to.
«É jɔʼ yé a be, yé mu lé eto saa teme moho e, nye ze bâʼle pyal kʉl, sa njɨ jwɨʼ gwar. É mowala molɛl mo bii kʉʼ, nye ze bâʼle sa nteme jwɨʼ gwar yaa. 6Yé mu kunokuno e mowala motɛn mo bii kʉʼ nɛʼɛ, nyi ze bâʼle pyal kʉl, kœb bʉʉ bʉr ocɨcyel lé encyehbe. Nye ze dî e be ó: “Ebe yé bɨn lé edi wâʼ lé encyehbe, moho lé elaa bɨn mbɛh ɛ?” 7Bé ze bɨha e nye ó: “Ebe, mʉr baabaŋle bɨh bɛɛ ó, bɨh toʼ, to sea é peme ye.” Nye e be ó: “Bɨn bɛɛ nteme, laŋa ga. Toʼ, to sea ga é peme yam!”
8«No ó, é jɔʼ pum, wé a dwine e, mʉr peme ntɔʼ lɛɛ syɛl mosa we a dɨ jwɨ̀ʼ bʉʉ ó: “Jeba bɨlobila. Go à jɛna e be tɔɔ wɔɔ. Go ótaare jɛna ó e mʉr ze epihe e. Go òka to fwahle e waa ze efoʼ e.”
9«Baa b'a nʉŋɔ é mowala motɛn ɨ, ze pyal efoʼ. Bé a jɛna e be ó, mʉr ngwar, saŋ denie ngwar. 10Nye ze jebe bʉr o b'a taare nʉŋɔ ɛ. É jɔʼ bé a be lé eze e, bɛɛ, bé a dɨ bɛla ó, bé ókɛlɔ nuu ma sɔʼɔ tɨʼ kʉ. Sa gwar, bé nteme, bé a nʉa ó, njɨ mʉr, saŋ denie ngwar e ngwar. 11É jɔʼ bé a sil nʉa, mʉr nyiwɛh we saŋ denie e, bé ze tooro mʉr peme. 12Bé e nye ó: “Bʉr o ndɨ mopihe ba, bé kʉ ka sea ó njɨ ewala egwar! Go bana ó, kʉ jɛna bɨh bɨbɛh jwɨʼ gwar, bɨh bɛɛ si jaʼra e syɛɛ moho ntinɨ le esia e bim dwehe yaa yiyɛh!” 13Nye ze bɨha e mʉr ngwar é sama bʉr baa ó: “Wɛɛ, ntʉʼ ebebe me a sa go e! Bɨna e go komlo ó, me ójɛna go saŋ denie ngwar é moho. Yé baabe no? 14Nʉŋa myɛna mo, go laŋa me é mih. Me egwɨm jɛna e mʉr pyal epihe nwaʼ ó, bim me jɛna nteme e go e. 15Zê me aka be e nkul ó, me biʼe bɨsa byam é mpʉ me lé egwɨm ɨ? Ebe yé go lé ejoʼo me ebebe é lɔb ncwɨncwɨa wam ɨ?”
16«É mbi waa ó wé ósaŋɔ bʉr o ndɨ “mopihe” e. Bé ócyɛb mofoʼ. Baa ndɨ bananaʼ “mofoʼ” e, bɛɛ, bé óliʼ pihe.»
Yesʉs lé ebal ompʉn be é lɔb efie le é jɔʼ lɛl
(Markus 10.32-34; Lʉkas 18.31-34)
17No ó bé a be-be ó, lé ebere, lé eto Yerʉsalɛm. Yesʉs ze to e l'esama le ompʉn be ewʉm e l'oba é bʉm. Nye e be ó: 18«Mbe ga: bɨna mu ó lé eto ga Yerʉsalɛm ó yi! Bʉr, bé ókɛha Mwan mo Mʉr boo ojwɨɨ be opara ndwe e l'oyeʼle o motie. Bé ótiʼe lɔb we, ntɔʼ dwe nye mobe mo jala e l'efie e. 19Bé òkɛha nteme nye boo bʉr o bɨkul#20.19 «Bʉr o bɨkul», bé ó bʉr o ndɨ abe oYʉden ɨ. é l'efu ó, bé kpeʼla nye, le efuura nye mɨmbihe le ecyèl nye é klos kʉ. Nye òbula pàh é l'elu elɛl.»
Tia nyɔŋ bwan mo Zebede
(Markus 10.35-45; Lʉkas 22.25-27)
20No ó nyɔŋ bwan mo Zebede a ze to nko Yesʉs a be e, e bwan be, bɨʼ mpom we si é mih me, ó bé jaʼ ó nye sɔʼɔ. 21Yesʉs, nye e nyɔŋ wɔɔ ó: «Go egwɨm yé?» Mʉma, nye e Yesʉs ó: «Dweʼ nkul ó, é jɔʼ go óbe, go mu é dia taʼa yo e, bwan bam oba ba, bé diʼe kunokuno e go: nwaʼ, é mbo ejʉm; nuu, é mbo emyɛl.» 22Yesʉs ze lɛɛ ó: «Bɨn bé agʉa sa bɨn lé edî me nɨ. Zê bɨn bé ó e nkul edihbe mɨtuu me mu kunokuno le esia e mye miʼ ɛ?» Bé ze bɨha e nye ó: «Bɨh bé e nkul edihbe mye!» 23Yesʉs, nye e be ó: «Yé ó no: bɨn bé ódihbe mɨtuu me mu kunokuno le esia e mye e. Sa gwar, é nko paʼ edi é mbo ejʉm wam, nkʉ é mbo emyɛl wam ɨ, ntʉʼ mɛm tiʼe wiha lɔb. Bɨdia byaa, byé ebono ó, baa Sɔŋ wam a bɛa komlo bye é l'efu lɔɔ ɛ.»
24No ó, é jɔʼ bʉʉ ompʉn ewʉm, bé a joʼo lɔb waa ɛ, bé ze joʼo obɨɔ oba baa ebebe, ze dweŋɔ be mobe. 25Yesʉs ze jebe bɨbɛh. Nye ó: «Bɨn bé ekʉ gʉa ó, bʉr o ndɨ mɨnjwɨɨbʉr é byʉʉ bɨkul ɨ, bé elɛʼle bʉr mpel é bebebebe. Osabene bɔɔ, bé ekpɛl tíile bʉr o ndɨ é mpoʼo wɔɔ ɛ. 26Sa gwar, mbi syɛɛla wɔɔ nɨ, wé ajala le enyin é paʼ win. ǃƗ mʉr ngwar é l'esama lɨn si kpɛl nyin mʉr nɨnɨ nɛʼɛ, nye diʼe syɛl mosa win. 27ǃƗ mʉr ngwar é l'esama lɨn nteme si kpɛl cyɛb efoʼ nɛʼɛ, nye diʼe syɛl mosa win, bɨn bɨbɛh, 28ebe, Mwan mo Mʉr nye mʉr tɨʼ a baaze ó, bʉr sea e nye. Nye a ze ó, lé eze sea e bʉr, ndwe le ekɛha tiʼ ye lé ejala e mobebe mɔɔ, le ekʉr be.»
Yesʉs lé etiʼ ontim oba
(Markus 10.46-52; Lʉkas 18.35-43)
29No ó, é jɔʼ Yesʉs bé e l'ompʉn be, bé a duho Yeriko e, mpampaʼ bʉr, bé a be lé edu nye é koo pihe. 30To kœb ó, ontim oba, bé a be ó ondindil é nkpah mpaʼa bé a cwɨɨ ɨ. É jɔʼ bé a joʼo ó, Yesʉs a be ó lé elaa ɛ, bé ze lwib lé eyɨm twii ó: «Da ɔɔ! Mwan mo David ɔɔ! Jwɨʼɨ bɨh nkoo ɔɔ!» 31Mpampaʼ bʉr ze bâm e be, ó bé diʼe titil, bɛɛ yɛɛ kʉ lɛɛ okʉkʉ ó: «Da ɔɔ! Mwan mo David ɔɔ! Jwɨʼɨ bɨh ekpaa nkoo ɔɔ!» 32Yesʉs ze cyɛb, ntɔʼ jebe be. Nye ze dî e be ó: «Bɨn bé egwɨm ó, me saʼ bɨn yé?» 33Bé e nye ó: «Da, paʼ kʉ sa ó, mih mɨh, mé beŋɨ ʉʉ!» 34Ebe njwɨʼa-nkoo we, Yesʉs ntɔʼ kuna e be é mih. Cye e cye yaa, bé ntɔʼ bana bee, ze taarɔ lé edu Yesʉs é koo pihe.
נבחרו כעת:
Mataos 20: ozmBad
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2002, Wycliffe Bible Translators, Inc. All rights reserved.