Matìo 14
14
Ghe wi Dzɔ̌n Fùghùu mùghù ŋ Kə̀zə̀
(Mâk 6:14-29; Lûk 9:7-9)
1An tì kə te ko, Hɛlɔ̀d, tɔɔŋ ghùw wəla ù fə̀ lo tuw ko am bà kə enaʼ kə̀ li ko am mbùʼ è Galèlîi n zuw tsughu zwɔ̂ŋ u Yɛso, 2ù n dzɛ̀ â kɔ̀ɔ ŋ wə̄n mò enyəa, “Wə̄n lǒ Dzɔ̌n Fùghùu mùghù ŋ Kə̀zə̀ ù zòo nughù kɔʼ alo evʉ̄; zən lǒ e ghee ù ki dwaʼa wo alefwàʼ ghəa ghəla u fwàʼa â ghè ghò.”
3 #
Lûk 3:19, 20 À n lo êzə̀ mo Hɛlɔ̀d mafə̄ tsəghàsò lâŋ kò enyəa ghe kûm Dzɔ̌n alo tətsāʼ, ghe tum an ndùghùtsāʼ enyəa a so à lò ghəa e wìzən ù lì ghe fə̀ tɔɔŋ tsəgha enyəa à lǒ Hɛ̀lodìa. Wìzən wən fə̀ niī tsəgha Felèp, wàatsele ù Hɛlɔ̀d, Hɛlɔ̀d m bùghò tsʉ̀ʉn nì nùghù è kɔʼ. 4#Lɛv 18:16; 20:21Hɛlɔ̀d fə̀ ghəa ghən ghəŋlo a zəŋò Dzɔ̌n, bòʼ Dzɔ̌n màʼà mgbɛɛ̄ kpoʼō zeē ko â wə̄n enyəa, “À tɔ̀ʼ lǒ ghəa è biigh zo â ghù aletsʉ̀ʉn nî wi ù wàatsùghò.” 5Hɛlɔ̀d fə̀ mgbaŋa kii ləghaa ko nû alewi Dzɔ̌n, ù ŋ kuuwn tsəŋo ghaʼa àghì, ghe màʼâ fə̀ kwo Dzɔ̌n tǒ ghùwshʉ̀ghà.
6A m bughò ghuw ghə edzə̄ a Hɛlɔ̀d à tsəghà kpe wo, wɛ fə Hɛ̀lodìas fə̀ zən fə m bən laaŋ tsughu a fughu an sə kə aghì enyə, bǐibǐi tə ŋ kɔʼ Hɛlɔ̀d, 7ù n to tsughu kətō, kɛ̀ tsughu enyəa abugho wɛ ù te bvʉ ko kwò kò, e fughuu nù.
8Zə̂ n tsʉ̀ tsùghu wɛ fə te fo enyəa fə bvʉ̂a ndûw tuw Dzɔ̌n fùghùu mùghù ŋ Kə̀zə̀, fə dzɛ̀ â Hɛlɔ̀d enyəa, “Êzəŋo aŋghəa a ti fɛ, bùghò mugho â tuw kə Dzɔ̌n Fùghùu mùghù ŋ Kə̀zə̀ ko aŋ kwônɛ̀lɛ.”
9Ghue wə m kpuw lɔŋe tsughu dəŋ chi ko enyə̄, ù n tsə̀ghàsò tsùghù kəlâŋ enyəa e doʼò ko aŋghəa zən fə tə bvʉ wo, ù màʼâ fə̀ lo mò ù ŋ kɛ̀ bòʼnlo an sə kə aghì a dzə̀m. 10Ù n tum tsughu aghî, ghe n ndûw gbò wò tuw kə Dzɔ̌n an ndùghùtsāʼ. 11Ghe m bòʼò wò sùghò â tuw kə te ko aŋ kwònɛ̀lɛ, bùghò fughu wò â wɛ̂ɛzən vʉ̀, wɛ vʉ ndùw fùghù ndùw â zə̀. 12Tsə̀təndə̄ghā tə Dzɔ̌n tə n daŋso bùghò bòʼò tsə̀la tsughu gwən e wə̄n; ghe n ndùw dzɛ̀ ndùw ghəa a te gho â Yɛso.
Yɛso fùghu aghî à fʉ̀ghàzəa wo mo ghe n tsə̀ghàsə kam tə àghì tò tə tɛ̀
(Mâk 6:30-44; Lûk 9:10-17; Dzn 6:1-14)
13A m bùghò Yɛso n zuw tsughu ghəa a te gho, ù n daŋso nì kɔʼ kəkwə̀n ndùw sàŋe dòʼò ndùw wə̄n à nəŋ ko. Ndə̀mà tə aghì tə̀ n zuw tsughu enyəa ù a fughu, ghe n zəghàan tsùghû nàʼà ŋ ghee, səa kwuu ndùw ko dzì alo kəghùw, ghe dzûum nduw wə̄n. 14A m bùghò ù sə tsughu alo kəkwə̀n, ù ŋ kòʼ saʼ kə aghì kə te ko, se zə ŋ kwu wə̄n a zəŋò ghee, ù m baaŋ tsughu ghəla ghe fə̀ dzaŋā a te.
15A m bùghò tsuʼ u nyəŋo nyəghàan wo, tsə̀təndə̄ghā tə̀ m bùghò dzɛ̀ â wə̄n enyəa, “Tsuʼ wə ndùw, a fɛ lo sugho an saŋe kə kəlùʼù, dzɛ̀ enyəa ghî à nughù nyəā ndûw an nàʼà mən ghe ndûw zuū kɔʼ fəgha kə̀ zəa ko aŋ ghùe e ghee.”
16Yɛso n dzɛ̀ â ghee enyəa, “Ghe ki yo alendòʼò nughù; fughu tsughu nlǒ ghee â fəgha to ghe zə.”
17Ghe n dzɛ̀ â wə̄n enyəa, “Ghàʼ fɛ lɛɛn ki ko ghoo tə ugbɛ tə tɛ̀ àsùghò tsəghaa to tə bə̀gha”
18Ù n daŋso dzɛ̀ enyəa, “Bùghò nlò â ghè wò fɛ a vʉ̀a mùghò.” 19Ù daŋso dzɛ̀ tsughu enyəa ghî à tsughuu doʼò tsughu an zwǐi. Ù n nì kɔʼ ghoo tə ugbɛ ti to tə̀ tɛ̀ àsùghò tsəgha ti to tə bə̀ghà, ù n lɛɛn kɔ̀ʼ ndùw kəwālā, fùghù ndùw kəzɔ̀ŋlò â Zə̀ kò, boʼn fughu tsughu gbɛ vʉ̀ â tsə̀təndə̄ghā tə wə̄n, ghe n nì dzùghùu ndùw â ghì yì. 20Ghe a dzə̀m mo è zə, zə̀ è kuw. Tsə̀təndə̄ghā tə̀ n zùuŋ kǎaŋ wo bòʼò mə̀ m bàa mìa n səa tsughu àsùghò sugho tə te to, dzə̀n tsùghù alo ukʉ̌aa, kʉ̌aa wə n lue kɔʼ eghə̄m à ghè wò u bʉ̀ghà. 21Abugho a bâʼ naŋā kɔʼ wɛghêtùghu gho ghèe ghê yìzən gho, à mò lo nû to kam tə ayìnû#14:21 ayìnû ghe fə̀ niī yo yîzən gho a n taŋ, ghe fə̀ niī tsəgha ko ayînû. tə tɛ̀ ghe mò zə fʉghàzə u te wo.
Yɛso bwìi an tuw kə mmùghu
(Mâk 6:45-52; Dzn 6:15-21)
22Yɛso n daŋso ghəəŋ tsughu enyəa tsə̀təndə̄ghā tə̀ wə̄n nyəā kɔʼ alo kəkwə̀n ghe nughù ndûw èsə â daŋ zò, to e kuūwn ghəə̄ŋ tsughu enyəa ghî â sɛ̂ɛ tsughu. 23Ghəa ù ghəə̄ŋ tsughu ghî à sɛ̂ɛ tsughu, ù ŋ kɔ̀ʼ kàʼ ndùw ègɔ̀ŋlò aŋ ukwàʼ wə̄n â nəŋ ko. Tsuʼ wə m bùghò nyəghàan kwǔun tsughu wə̄n â nəŋ ko a fughu. 24À n lo êzə̄ŋ mò kwə̀n kə̀ n lɔʼso nyə kəŋo ndùw alo enyʉ̀, tùŋutùŋu kə n tûuŋ kǎaŋ tsə̀ghà; nu kǔɛɛ kə mò təə̄m tsəghàa wo an sə kə ghee.
25Ù n ndùw bùghò â lə̌əmlə̌əm tə utsuʼ to, mò ù bwìi kə̌əŋ wò an tuw kə mmùghu. 26A m bùghò tsə̀təndə̄ghā tə wə̄n tə kôʼ nduw aŋghəa ù bwìi kəə̄ŋ wo a te an tuw kə mmùghu, fə̂ŋ tə̀ n sə ghee, ghe n dzɛ̀ enyəa, “À lò zəŋso kə ghûw ù kpǔuw.” Ghe ŋ kàʼ ndùw a alebuʼn səa kɔʼɔ bɔ̀ŋ mò mo alo etsə̄ŋ.
27Ù n daŋso mbà kə̀a sə ndùw ghee â ghəa gho enyəa, “Kɔlɔ tsughu nlò fə̂ŋ tò, à lò mugho; kà nlò tsəŋ.”
28Pìtà n daŋso bɛ̀lɛ̀ ndùw wə̄n enyəa, “Mughùbe, abugho à kùum lô ghû, dzǎa tsughù tò M̀ bwîi kəŋo wò a vʉ̀a ghù am tuw kə mmùghu kən.”
29Yɛso n dzɛ̀ tsùghù enyəa, “Bùghò.” Pità fi sə kɔʼ nû alo kəkwə̀n, kàʼ ndùw an tuw kə mmùghu alebwìi, kəəŋ ndùw a vʉ̀a Yɛso. 30A m bughò Pità kǒʼ kùɛɛ kə̀ ŋgeē tsəghaa, fə̀ŋ n sə tsughu wə̄n, ù ŋ kàʼ ndùw aleməən nyəa tsughuu ndùw an dzughù. Ù fi nughù dì sə kɔʼ nû enyəa, “Mughubè, bəghasə̄ mugho.”
31Yɛso n lùum dàan ndùw kə̀ghu, kwù ndùw wə̄n, dzɛ̀ â wə̄n enyəa, “À lǒ kwò ghù tàʼkè tɔʼɔ̀ boō fughu â mùghò a? À lo kwò tuw kə mô kpuūw ghû enyəa Ǹ yo aleghəŋlo enyəa ghù bwii kəŋo wo an tuw kə mmùghu a?”
32Aŋghəa ghe daŋso nyə kɔʼ alo kəkwə̀n, kùɛɛ kə te kə m bùghù è doʼo. 33Tsə̀təndə̄ghā tia tə mô kuūwn lô alo kəkwə̀n m fughu wə̄n â koʼ so mò, ghe n dzâa tsùghu enyəa, “Kùmkùm, ghù lǒ Wɛ ù Kə̀zə̀.”
Yɛso bǎaŋ ghì à dzaŋā gho an Dzɛ̀nɛ̀salɛ̀t
(Mâk 6:53-56)
34A m bùghò ghe dâŋ sə nduw, ghe ndùw sə tsughu an nāʼ e Dzɛ̀nɛ̀salɛ̀t. 35A m bùghò hî ghə enaʼ a te a kôʼkɛlɛ̄ kɔʼ wə̄n, ghe n tum nàʼà ndùw enyəa ghe nîi wô ghì à dzaŋā gho am mbùʼ è te e dzə̀m to bughò kôʼ Yɛso, 36ghe buʼu ndûw kəghu enyəa to ghe mô mɔ̀ɔ tsùghuu kô dzughu e təndzʉ̄ e wə̄n; ghuw wəla ù mò mɔ̂m dzə, ù mò è tughu.
