Matìo 24

Yɛso dzɛ̀ aŋghəa Ndùghù è Kə̀zə̀ e kê saʼnlo a te

(Mâk 13:12; Lûk 21:5-6)

1Aŋghəa Yɛso zə̀ghàa tsughu Ndùghù è Kə̀zə̀ e ne nùghùun ndùw, tsə̀təndə̄ghā tə wə̄n tə ŋ kəŋo wò a vʉ̀a wə̄n, dè ndùw wə̄n â dzɔ̀ɔdzɔ̀ tə təndughu təla tə lo am be kə̀ ne ko. 2Ù m fwə̀n nùghù dzɛ̀ tsughu â ghee enyəa, “Ghɛ̀ sô bəla koʼò fɛ, tia è li e yo fɛ am bʉgha u təndughu wə̄n e lo kôom nyaʼ tsəgha am bala e wə̄n; a dzə̀m lo tsughuu a ghueetsə̄.”

Utsû àsùghò alendzaŋso àghì

(Mâk 13:3-13; Lûk 21:7-19)

3A m bùghò Yɛso dòʼ aŋ kwàʼ u tə̀ Olèf, tsə̀təndə̄ghā tə wə̄n tə n tsɔ̀ŋ bùghò kòʼ wò wə̄n, bvʉ â wə̄n enyəa, “Mò à, ghəa ghən lô bala kə nîi a zə̀n, à lǒ tsə̌a è ghɛ zò è kè dêe tsughuu enyəa nəgha zəghà è koōm bugho ebàm zə̀ m kpe a, asùghò enyəa mbī fɛ so mîa a?”

4Yɛso n daŋso bɛ̀lɛ̀ tsùghu ghee enyəa, “Nì nlò nəgha zo, ghùw lò sêe məŋso ghɛ. 5Nu ndə̀mà tə aghì tə̀ lo ndùw bùghòo fɛ, ghe e dzaā wo enyəa ghe lo mugho. Chìa e ke dzaā tsughuu enyəa, ‘À lò mugho Kə̀lestò ù te.’ Ghe kê sêe məŋsō tsughu ndə̀mà tə aghì. 6Tsaā tə ke kuʼū kuu kaaŋ ko enyə am bùghù tɛʼɛ̄, ghɛ̀ lo e zūuw sugho làbəlà è tsaā təla ghî à kuʼù təma kaŋlo àsùghò təla tə lɔʼso kûu wo. Lo dzə̀la tsughu ko nlò fə̂ŋ tò; nu ghəa ghən ki nû alesə, à kè fi kuuwn kaam yò dzə̂ enyəa mbī s o e mîa. 7Nu naʼà tə̀ ke e buu kaaŋ ŋgè kò aŋ ghùe e ghee, dwə̀ŋ u tənàʼà wə̀ e ke zughū kaŋlo alo eghùe, dzə̀ŋ kè nyə alo enaʼ, bɔ̀ŋ e ke bɛlɛ maʼn kaaŋ luʼu to. 8Mo ghəa ghə̀n à dzə̀m fi tsô nǎam lò ko tò wɛ lô zeʼē chuūw tsughuu wìzən abugho ù də̀ghàan tsughu sôʼ zò.

9 # Mat 10:22 Ghe lo daŋso kaʼā tsughu, ghe e kwuun fughuu nduw ghɛ enyəa ghe ndzaŋso, ghe winlo; mbī zən è dzə̀m e kè baā ghɛ enyəa so à lò ghəa zāŋā. 10Ndəmà tə aghì tə̀ kê tiī zəghàa tsughu mugho, ghe lo e ki ghòʼ kò aŋ ghue e ghee, ghe e ke feēn fughuu sugho ghue e ghee zo. 11Ndə̀mà tə ghǐishʉ̀ghà tə agha tə kê nughù səghàan səa kɔʼ, ghe sêe məŋsō tsughu ndə̀mà tə aghì. 12Ghəa à biigh a kê dûuw tsəghàa tsughu tə luʼū, ghî ghə̀ e ke koōm tɔʼɔ̄ ləghaa yo waazə̀ ghò. 13#Mat 10:22 Ghùw wəla ù kuūwn kùum kɔlɔ tsugh fə̀ŋ ndùw tɛ̀ è nduw kê zə kətuw. 14Ghe lo naʼà tsughu làbəlà è dzùŋ zə̀n â nàʼà mə̀n n dzə̀m n dzə̀m, to ghî ghən à dzə̀m zuūw, sěe mbī lo daŋso bughò mîanlo.”

Fɛ̀ɛn kə eghəa kə̀ kɛɛn kə ughùe kò

(Mâk 13:14-23; Lûk 21:20-24)

15 # Dan 9:27; 11:31; 12:11 “Ghɛ̀ kê kôʼ fɛ̀ɛn kə kəfəgha kə̀ kɛɛn kə ughùe ko kə̀ ti an lùʼu kə̀ baa ko aŋghəa ghùwshʉ̀ghà Danìa fə̀ dzɛ̂ naŋa. (Â ghùw wəla ù tɔɔ̄ŋ ghəa a te gho: e tɔʼ lo alezuūwkɛlɛ̂ ghəa a te gho). 16Ghɛ̀ yìa ghɛ̀ lo an Dzùdîa, ghɛ̀ ki aletiī kɔʼ alo təkàʼà. 17#Lûk 17:31 Ghùw wəla ù lò an tuw kə ndughu kə wə̄n, ù ka kôom lɛ̀so sə̀ tsùghù wò dzə̀ enyəa e se tsughuu nî fəgha kə̀ li ko an ndughu. 18Ghùw wəla ù lò an usum ka kôom lɛ̀so kwə̀n nì zěe sùgho ndzʉ̄ to. 19An tsuʼu n te mò, yîzən a nə̀ghà mə̀ awɛ, àsùghò ghəla ghe nyɔŋso wɛ gho, ghe kê lò an tsù! 20E gɔɔ̄ŋ tsughuu kɔ Zə̀ kò enyəa ghù lò so e tii nùghùnlò mo a lo an Ndzɔŋ zə̀ è təfʉ̀ghàdzughù ŋkāa mò à lò Tsuʼntsə̄ u Tə̀dzûu. 21#Dan 12:1; Edê 7:14 Nu ŋgòʼ è ùtsù wəla u kê lo, u kaām bûʼ dòʼò kòʼ tsə̀ghà aŋghəa mbī fə̀ kaʼ tsughu bùghò sə kɔʼ nɛ, ŋgòʼ è ùtsù u te u kê kòom sə̀ kòʼ sùghò yò. 22Abugho Zə̀ kə̀ mô tâʼkè ghəə̄ŋ tsughu enyəa tî kə te kə ka lo dòʼò dàan ndùw, ghùw mɔʼɔ̄ mô yò alezə̄ kətuw; Zə̀ kə̀ lô tsùʼù mən fɛ gbôo kə̂a tsughuu wô bòʼ ghì a wə̄n ghəla ù tsɔʼ kɔʼ.

23Abugho ghùw kè dzɛ̂ â ghɛ̀ an tì kə te ko enyəa, ‘Kòʼo nlò, Kə̀lestò ù te wəlà!’ Ŋkāa enyəa, ‘U vʉ̂a a fî!’ E kwo ghɛ̀ lô so e boom fughuu nù. 24Tɔŋlo enyəa, Kə̀lestò tə agha tə lo səa kɔʼɔ nù, àsùghò ghǐishùghà ghə agha gho, ghe e deē tsə̌a tə̀ fɛɛ̄n to, à sə̀ghà mò, enyəa abugho dzì lǒ, ghe buʼù sêe məŋsō ghì ghəla Zə̀ kə̀ tsɔʼ kɔʼ. 25Zuw nlò ghɛ a! Mùghò n dzɛ̀ zìi nàŋa wò â ghɛ̀ tò nəgha e te zə e buʼù bùghò.

26 # Lûk 17:23, 24 À fi lo enyəa, abugho ghùw dzɛ̀ â ghɛ̀ enyəa, ‘Kòʼo nlò, ù lò aŋ ŋgwə̄n — kà nlò a fughu ndûw.’ Mo ghe dzɛ̂ enyəa, ‘Ù nàn dòʼò fɛ — kà nlò zuw.’ 27Bughò e Wɛ̀ ù Ghùw kê bɔ̌ɔm lò ko an ndɛ tǒ ghuuw e lô mwâa ŋgəaa wô wala ko kə dzə̀m, alekaʼā nughùu tsughu an tsə kə̀ səa ko m bùghò tsə̀ghà kùm wò an tsə kə̀ bəŋo ko.

28 # Lûk 17:37 Abugho fəgha kə kpuw doʼò alo kəlùʼu, dzʉghadzʉgha wə ŋ ghə̂aa kǎaŋ ko fughu.”

Bughò e Wɛ̀ ù Ghùw

(Mâk 13:24-27; Lûk 21:25-28)

29 # Èzy 13:10; Dzw 2:10, 31; 3:15; Edê 6:12; Èzy 13:10; Ɛ̀zi 32:7; Dzw 2:10; 3:15; Èzy 34:4; Edê 6:13 “Abugho tsû vʉa an tì chi kê so e daŋso tsughuu bughuu tsughuu nù, tsə̀ è ke koōm tughuu yo, ndzɔŋ e ke kôom baŋa sugho yo, sə̀ghàbəlà ŋ kê tsɔʼn tsughuu wô alo kəwālā, fʉgha wən ù dzə̀m alo kəwālā kê nughù noʼò kaāŋ wô. 30#Dan 7:13; Zâk 12:10-14; Edê 1:7 Tsə̌a è Wɛ̀ ù ghùw kè daŋso dêe səā wô alo kəwālā, ghî à kê daŋso dîin kaaŋ wô an nàʼà mə̀n n dzə̀m n dzə̀m abugho ghe kê koʼ aŋghəa Wɛ̀ ù ghùw bùghoo a te am mbàʼ è kəwala an dwaʼa u wə̄n àsùghò an nsəghanyəgha ŋ Kə̀zə̀ n ne mò. 31Ghe lo daŋso tɔŋɔ nyəā ndûw mbuwlì, ù kè tuū səā wô tsə̀təndə̄ghā tə kə Kəzə̀ tə wə̄n aŋ kàlà tə mbī tən tə̀ chìakò enyəa ghe zûuŋ kaāŋ wô ghì a wə̄n ghəla ù tsɔʼ naŋā kaŋlō an lùʼù tən tə̀ dzə̀m.”

Tsʉ̂ e kàʼ fə Fîg

(Mâk 13:28-31; Lûk 21:29-33)

32“Ghɛ̀ zoʼn kɔʼ nlò ghəa zo aŋ kàʼ fə fîʼ: bugho fə̄ zûuw wo, ghɛ̀ ŋ daŋso kele tsughu enyəa ghuuw e so e tsughuu kwə̄n. 33À lò sugho eghəla abugho ghɛ̀ kê koʼ ghəa ghəla Ǹ dzɛ̀ â ghɛ̀ nìi bala ko, à fi lo enyəa Wɛ̀ ù Ghùw ŋ kuʼso. Ù lò a fǔ u mbɛ̀. 34M̀ fɛ kùu dzàa wò nù â ghɛ̀ enyəa, sɛ̀ a nɛ ghən lo tsə̀ghà mɛ̀ʼɛ̀ yò mo ghəa ghən kâ bala kə nî. 35Wala kə kê tsə̀ghàa mìan nù, àsùghò ghueekətsə̄ ko, shwaʼ waŋā u kê kǔuwn mìa kòʼ yò.”

Ghùw mɔʼɔ̄ kwo naŋa yo tsuʼ u te wo ŋkāa nəgha a te zo

(Mâk 13:32-37; Lûk 17:26-30, 34-36)

36“Ghùw mɔʼɔ̄ kwo naŋa yo tsuʼ u te wo ŋkāa nəgha e te zəla Wɛ ù Ghùw lo bughōo a te — ghuūghùe u Wɛ ù wə̄n ù nùu, ŋkāa tsə̀təndə̄ghā tə Kəzə̀ tə̀ kwo naŋa sugho yo. À bɔ̌ɔm kwo ko Tsele ù te. 37#Dzs 6:5-8 Wɛ̀ ù Ghùw kè bɔ̌ɔm bùghòo ko tò ghəa ghəla a fə̀ nî bəla an tì kə Nôa. 38An tì kə te ko, â fʉ̀ghàdzughù tə̀ è bughò sə, ghî a fə̀ zuʼso ko alezə̄, mʉa ndùw ùfʉgha, nyəa ndùw àyi, boom ndùw ànum, bùghò tɛ̀ wò tsuʼ wəla Nôa fə̀ nyə kɔʼ a te alo kəkwə̀n#24:38 ŋgɔ̀ʼɔ̀ kə kəkwə̀n mo ghe bɛ ŋguuŋ kɔʼ alo ŋkàʼ.. 39#Dzs 7:6-24Ghe kâ dɔ̀m kèle zìi enyəa fʉ̀ghàdzùghù tə̀ lo bùghò sə̌a nù, tə leŋe ghee. À kè bɔ̌ɔm lò sugho êzə̀ abugho Wɛ̀ ù Ghùw kè bughōo. 40A kê bugho an tsuʼ u te wo, ghî à ke lo a bə̀ghà an usum, ghe kê nîi nughù kɔʼ u mɔ̀ʼ, ghe naŋā taʼà tsughu ù lì. 41Yîzən ghə e ke lo sugho a bə̀ghà ghe gwuūn sò ghò, ghe kê nîi kɔʼ sughò ù mɔ̀ʼ, ghe naŋā taʼà tsughu ù lì.

42Nì nlò ghôom zò, tɔŋlo enyəa ghɛ̀ kwo naŋa yo tsuʼ wəla Mughùbè wɛʼɛ lo bughōo a te. 43#Lûk 12:39, 40 Ghɛ̀ kele tsughu enyəa, abugho mughù ndughu mô lo alekele nəgha zəla ghùwtsɔ̀ŋɔ lô alebùghò a te â tsuʼ wo, tò ù kà sə e mgbii e dɔ̂m kà, to ù bèe teē kɔʼɔ ko ghùwtsɔ̀ŋɔ ù te enyəa lò bughò gbɛlɛ̀ nyəā wo ndughu è wə̄n. 44À fi lo enyəa, e kwo ghɛ̀ lô nîizə̂a koʼò sughò ghue zɛʼɛ zo; nu Wɛ̀ ù Ghùw kè bùghòo an nə̀gha zəla ghɛ̀ kwo naŋā yo.”

Kɔ̂ɔ fə̀ dzûŋ fò àsùghò fə̀ biigh fo

(Lûk 12:41-48)

45“À kǔuwn lò kɔ̂ɔ fə̀ dzûŋ fə̀ ghɛ fo, mo fə tɔɔ sùghò nù a? À lo kɔ̂ɔ fəla mughùbè ù wə̄n nî naŋā tsughu enyəa fə è lɛɛn ndughu è wə̄n a, àsùghò kɔ̀ɔ n li mən alefughuu ghee â fʉ̀ghàzəa wò an nə̀gha zəla ghe ki alezəa a te. 46Dzɔ̀ lò â kɔ̂ɔ fə te fo abugho a mughùbè u wə̄n ndûw kwəlāa nyəā wo, ù m bùghò kòʼ wò mò kɔ̂ɔ fi fə fwaʼà fəgha kəla kə lo ghè kò. 47Kùmkùm, aŋghəa Ǹ dzâa wô fɛ â ghɛ̀, Mughu ù te lo naaŋ wə̄n ù è lɛɛn fʉgha u wə̄n wo u dzə̀m. 48Abugho à lǒ fə̀ biigh fo, fə n dzɛ̂ tsughu am fə̂ŋ è wən enyəa, ‘Mughùbè waŋā lo lōʼn nù a beē.’ 49Ù n də̀ghàan ndûw alebuu waazə̂ ghə ŋkɔ̀ɔ ghò à li ghən, ù n zəa, mʉa kala ghèe ghê ghì à kala gho. 50Mughùbè ù wə̄n lo tsôo gbəla səā kɔʼɔ ko an nə̀gha è li zo, an tsuʼ ù li wo mò kɔ̂ɔ fə te fə kwo naŋa yo. 51Mughùbè ù wə̄n ù te lo bughò dêe kûu ndûw wə̄n â mùlùŋ, ù ghəəŋ tsughu wə̄n, ù è zuuw ŋgōʼ zəla ghî a kə̀bàŋàdzə̀m à zuūw, a fia ghî à tɔʼɔ̀ dîi nəə̄ŋ ndûw ènyə, pfʉa sùghò àsɔŋ.”

נבחרו כעת:

Matìo 24: agq

הדגשה

שתף

העתק

רוצים לשמור את ההדגשות שלכם בכל המכשירים שלכם? הירשמו או היכנסו

2020

מידע נוסף אודות To kə Kəzə̀ kə̀ Fughu ko

Matìo 24

פסוקים פופולריים מ-
Matìo 24

כתבי הקודש:

Aghem

גרסה: To kə Kəzə̀ kə̀ Fughu ko - agq

Matìo 24

Matìo 24

פסוקים פופולריים מ- Matìo 24

כתבי הקודש:

Aghem

גרסה: To kə Kəzə̀ kə̀ Fughu ko - agq

Matìo 24

פסוקים פופולריים מ-
Matìo 24