Mâk 2
2
Yɛso bǎaŋ kə̀ŋgwûndughu
(Mat 9:18; Lûk 5:17-26)
1A m bùghò tsuʼu n lǒʼ n tsəghà tsughu, Yɛso ŋ kòom nùghù ndùw è bàm aŋ Kàpɛnòm, ghe n nàʼà ndùw enyəa ù ŋ kwə̄n nyə̄. 2Ghî ghə̀ n ndùw tsuŋ tsughu fughu enyə, buʼù fə tsəa fə n tə̀ghà fə̀ m buw, kɛ̀sò dzì alebùʼù tsə̀ghàa sə a beē, zə̀ m buw daŋso. Ù ŋ kə̂a ghee â shwaʼ u Kəzə̀ wò. 3Ghî à li gho a chìakò n ndùw bòʼò wò ghùw mò ù lò kəkə̀ŋlò a vʉ̀a wə̄n. 4A m bùghò dzì sò buw â ghee aletsə̀ghàa nyəā kôʼ Yɛso, ghî a màʼa fə̀ ŋge tsūŋ, ghe n tsʉ sə kɔʼ tuw kə ndughu edzūŋ an tuw kə wə̄n, a m bùghò ghe ghəə̄ŋ nyə̄ tsughu wô bûʼ kǒ fughu, ghe n nì zə̀ghàa nyə̀ tsùghù wò kə̀mbùŋ à kə̀əŋ chì ko a te. 5A m bùghò Yɛso kǒʼ fə̀ŋ zəla ghe ki ghè zò, ù n dzɛ̀ â kə̀əŋ chi ko enyəa, “Ŋ wɛ̄, Zə̀ kə̀ m bòo tə̀ghà tə̀ ghuuw màʼà.”
6Ghê dèekə̀làŋ à li ghə n doʼ fughu, bvʉnlo àghəa nʉghànʉghà enyəa, 7“Ghùw wən ghəa a kə̂a ènzə̂n enyəa à? Zən lò e sûwnlò â Zə̀ kò! À lò ndughoo ù lò aleghuūw maʼà bòo tə aghì a, mò à yò ko Kə̀zə̀ a?”
8Aŋghəa Yɛso lǒ mò ù ŋ kele moʼnlò e ghee zo enyəa ghe bvʉnlô àghəa nʉghànʉghà, ù n daŋso dzɛ̀ â ghee enyəa, “Ghɛ̀ tuw ko a, ghɛ̀ kəŋo, ghɛ̀ kəŋo aŋ kwò à? 9À bùghuun tsə̀ghà è ghɛ zo a, aledzàa tsughu â kə̀ŋgwûundughu kə te ko enyəa, ‘Ghe m bòo tə̀gha tə̀ ghuuw màʼà.’ Ŋkāa aledzàa tsughu enyəa, ‘Nùghu nǐi kɔʼ mbùŋ kə̀a kò, ghù bwii sə nduw a?’ 10À lò ko enyəa ghɛ̀ kele tsughu enyəa Wɛ̀ ù ghùw kì kədaʼa fɛ aŋ ghueekətsə̄ aleghuuw maʼn bôo tə aghì tò.” Ù n dzɛ̀ â kə̀ŋgwûndughu chi ko enyəa, 11“Ǹ dzɛ̂ â ghù enyəa ghù nughu ni kɔʼ mbùŋ kə̀a kò, ghù nduw alô ghù.”
12Ù n nùghù è kɔʼ, tsu kɔʼ mbùŋ kə wə̄n, mgbàŋ nùghù sə̀ ndùw enyə an sə kə ghì yì à dzə̀m; dzughu zə n zum ghee a te gho a dzə̀m, ghe ŋ kɛ̄ɛ Kə̀zə̀, dzàa tsùghuu enyəa, “A kaām ghəa è li e kôʼ kòʼ tò zən!”
13Yɛso n nùghù kpèʼe è tsughu, ndùw a ŋgùŋ è dzùghùntsòʼ, saʼ kə aghì chì kə̀ dzə̀m n nyə̀ŋ ndùw zùuŋ ŋgəa kɔ̌ʼ wə̄n, ù ŋ kàʼ ndùw ghee a lùʼù zoʼn wo. 14A m bùghò Yɛso tsə̀ghaa dzì è wə̄n, ù ŋ kòʼ tsùghù Lɛvì, Wɛ̀ ù Afìus, mò vʉ̀a ù dǒʼ an lùʼù kə kəfwàʼ kə wə̄n kə̀ dzə̀akə̀mwàʼsò kò, Yɛso n dzɛ̀ â wən enyəa, “Nùghuu wò a bǎà mùghò.” Lɛvì n sə̀ sùghò a bàâ wə̄n.
15A mo e tsûuŋ tsughu, Yɛso n ndùw də̀ghàan ndùw èzə an ndughu alô Lɛvì ghèe ghê tsə̀təndə̄ghā tə wə̄n to. Ghe n dzeŋe zəa ghèe ghê ghì à dzəā a kəmwàʼsò ghò ghee ndə̀m, àsùghò ghì à biigh à li gho, ghèe ghee mò bughōo a dzə̀m. 16A m bùghò ghî a kəmwàʼsò a tə̀ Falàsîi à kôʼ tsughu enyəa ù zə̌a dzə̄əŋ ghèe ghêe ghì à biigh gho, à ghê dzə̀akə̀mwàʼsò, ghe m bvʉ̄ â tsə̀təndə̄ghā tə wə̄n to enyəa, “À lǒ kwò ù sò kôom zəā dzəə̄ŋ ghèe ghê dzə̀akə̀mwàʼsò àsùghò ghì à biigh gho a?” 17Ghəa Yɛso zuw ndûw ghəa yì, ù n dzɛ̀ ndùw â ghee enyəa, “Ghî ghəla ghe tughuu dzɔɔ̄, ghe ki yo ghəa è ghəəŋ zo ghèe ghêe ghùwŋgàŋ, à gɔ̀ʼɔ̀ ko ghəla ghe dzaŋā. Ŋ̀ ka mo bughò dzə̀ alebùghò tɔŋɔ̂ ghì à tsəghatsəgha gho, mùgho mò bugho à biigh gho.” 18A m bùghò tsuʼ ù li wo tsə̀təndə̄ghā tə ghì a Falàsîi àsùghò tə Dzɔ̌n wəla ù fə̀ fughuu ghî ghò â mùghù ŋ Kə̀zə̀ mò tə baā dzughu zo, ghî à li ghə m bùghò bvʉ̀ â Yɛso enyəa, “À lǒ kwò tsə̀təndə̄ghā tə Dzɔ̌n tə sô baā dzughu zo àsùghò tə ghì a Falàsî tò, təghà tia tə kuūwn baā yo à?” 19Yɛso m bɛ̀lɛ̀ ndùw ghee enyəa, “To fən a nùuwìzən ghə̂ n dzughu e bam a, mò nùuwìzən lǒ ghèe ghee a? Abugho nùuwìzən lò dzə ghèe ghee, ghe yo alebam edzughu. 20Tî kə lo bùghòo nù, ghe lo nîi nùghùun kɔʼɔ̄ nùuwìzən aŋ ghùu ghee, ghe ke baa nduw dzughu zo an tì kə̀ è chì. 21Ghùw yò dzə̂ alenìi kɔʼ bâ kə ndzʉ̄ kə̀ fughu ko, ù taā məghàa ndûw an ndzʉ̄ tə̀ wii to. Abugho ù fòʼ tsughu ghəa yì, bâ kə ndzʉ̄ kə̀ fughu chi sô pfʉ̌a nùghùun sə̌a wò nǔ ndzʉ tə̀ wii tì, bûʼ kə te kə kôom dûuw tsəghàa tsughu kə̀ wii ko. 22Ghùw yò sughò alenìi kɔʼ sə̀ŋ è nlʉ̀ ù dzə̀là tsughu an sùʼ#2:22 ghe fə̌ lʉ̀ ŋ ghee ŋ dzəla tsəgha an sūʼ mo ghe ta tsughu aŋ gûw è nyòm. è wǐi, bugho ù ghəəŋ tsughu êzə̀, lʉ̀ n te n sô buʼù maʼà tsughu sùʼ è te; lʉ̀ n sô kwəlà kɔʼ, suʼ boō kɔʼɔ̄ sughò. E laam lò enyəa a sə̀ŋ nlʉ̀ dzə̀là ko an sùʼ è fughu.”
23 #
Lwa 23:25
A m bùgho ko an Tsuʼntsə̄ u Tə̀dzûu ù li wo, Yɛso n tsəghàa dzì am bəghaa zo asāŋ è li zo ghèe ghê tsə̀təndə̄ghā tə wə̄n to. Ghəa ghe tsəghāa ezə̀, tsə̀təndə̄ghā tə wə̄n tə ŋ kàʼ ndùw saŋ à kəān pfʉ̄a gho. 24Ghî a Falàsîi ghə̀ m bvʉ â Yɛso enyəa, “Mò à, ghe kə chi ghəəŋ kə̀ kwò èzə̂a mo lâŋ kə̀ tsuʼntsə̄ kə kâ bǒo dzə̌ a?”
25Yɛso m bɛ̀lɛ̀ ndùw ghee enyəa, “Ghɛ̀ kaām tɔ̄ɔŋ kòʼ ghəa ghə̀là Dɛvìd fə ghəŋlo ghəa dzə̀ŋ fə̀ za tsughu wə̄n ghèe ghê ghì ghə̀là ghèe ghee mò lo a dzə̀m à, ù n laʼà kèe ùfʉ̀ghazəa a? 26#Lɛv 24:9#1Sa 21:1-6 An tì kə̀là Àbǐatà fə lo fɔ̀e è nē, Dɛvìd n nyə̀ ndùw an ndùghù è Kə̀zə̀, nyə̀ nì zə kɔʼ bɛ kə̀ baa kəla kə lɛɛ̄n ko fɔ̀e tò alezə̄, fùghù tsùghù sùghò ghì ghəla ghèe ghee mò lô a dzə̀m.”
27Yɛso n daŋso dzɛ̀ â ghee enyəa, “Ghe mò tsuʼntsə̄ u ghəəŋ tsughu â ghùw, ghe ka mo ghùw ghə̌əŋ tsùghù dzə̀ â tsuʼntsə̄ wo. 28À fi lo sugho enyəa Wɛ ù ghùw kì kədaʼa alefwàʼ fəgha kə̀là ù ləgha tsughu tsuʼntsə̄.”
