Jɛnɛsis 7
7
Nu afua lɛ
(Luka 17.26-27)
1Kɛkɛ ni Yehowa kɛɛ Noa akɛ, “Bo kɛ owe lɛ fɛɛ nyɛbotea adeka lɛ mli ejaakɛ bo ji mɔ ni mina akɛ jalɔ yɛ mihiɛ yɛ yinɔ nɛɛ mli. 2#Jɛn 8.20; Lev 11.1-47 Ŋɔɔ kooloi ni he tse lɛ fɛɛ ateŋ kpawokpawo, nuu kɛ yoo, kɛ kooloi ni he tseee lɛ enyɔɔnyɔɔnyɔ, nuu kɛ yoo, 3kɛ loofɔji hu kpawokpawo, nuu kɛ yoo, ofata ohe koni akɛhere amɛshwiei fɛɛ ayiwala yɛ shikpɔŋ lɛ fɛɛ nɔ. 4Shi eshwɛ gbii kpawo ni mahã nu aba abanɛ yɛ shikpɔŋ lɛ nɔ shwaneshwane kɛ nyɔɔŋnyɔɔŋ fɛɛ gbii nyɔŋmai ejwɛ, ni makpãtã nɔ fɛɛ nɔ ni hiɛ kã ni mibɔ lɛ hiɛ yɛ shikpɔŋ lɛ nɔ.” 5#Jɛn 6.22 Noa fee bɔ ni Nyɔŋmɔ fã lɛ lɛ fɛɛ pɛpɛɛpɛ.
6Noa eye afii ohai ekpaa be ni nu afua lɛ ba shikpɔŋ lɛ nɔ lɛ. 7#1 Pet 3.20; Mat 24.38-39; Luk 17.27 Noa kɛ eŋa kɛ ebihii kɛ ebii lɛ aŋamɛi lɛ bote adeka lɛ mli yɛ nu afua lɛ hewɔ. 8Kooloi ni he tse kɛ kooloi ni he tseee kɛ loofɔji kɛ nii ni wamɔɔ yɛ shikpɔŋ lɛ nɔ, 9#Jɛn 6.19 enyɔɔnyɔɔnyɔ, nuu kɛ yoo, kɛ Noa tee adeka lɛ mli tamɔ bɔ ni Nyɔŋmɔ fã lɛ lɛ. 10Gbii kpawo lɛ sɛɛ lɛ, nu afua lɛ ba shikpɔŋ lɛ nɔ.
11Noa wala be mli afi ni ji ohai ekpaa lɛ mli, yɛ nyɔŋ ni ji enyɔ lɛ nɔ gbi ni ji nyɔŋma kɛ kpawo lɛ nɔ, ni bu wulu kwɔŋkwɔŋ lɛ hiŋmɛii fɛɛ fɛlɛ, ni agbele ŋwɛi samfɛji lɛ; 12#2 Pet 3.6 ni nu tue ni enɛ yɛ shikpɔŋ lɛ nɔ shwaneshwane kɛ nyɔɔŋnyɔɔŋ fɛɛ gbii nyɔŋmai ejwɛ.
13Nakai gbi lɛ nɔ nɔŋŋ Noa kɛ ebii lɛ, Shem kɛ Ham kɛ Yafet, kɛ Noa ŋa lɛ kɛ ebihii etɛ̃ lɛ aŋamɛi etɛ̃ lɛ, bote adeka lɛ mli, 14amɛ kɛ ŋaŋ kooloi fɛɛ yɛ amɛhenɔ, kɛ shĩa kooloi fɛɛ yɛ amɛhenɔ, kɛ waamɔ nii fɛɛ ni wamɔɔ yɛ shikpɔŋ lɛ nɔ yɛ amɛhenɔ, kɛ loofɔji fɛɛ yɛ amɛhenɔ. Fijiatsɛmɛi fɛɛ kɛ filikilɔi fɛɛ bote adeka lɛ mli. 15Bɔɔnii fɛɛ ni wala yɔɔ amɛmli lɛ ateŋ enyɔɔnyɔɔnyɔ kɛ Noa tee adeka lɛ mli. 16Heloo fɛɛ heloo ni hiɛ kã, nuu kɛ yoo, tee adeka lɛ mli taakɛ bɔ ni Nyɔŋmɔ efã lɛ lɛ. Ni Yehowa ŋa Noa yi.
17Nu afua lɛ damɔ shikpɔŋ lɛ nɔ gbii nyɔŋmai ejwɛ. Nu lɛ fa, ni ewo adeka lɛ nɔ, ni adeka lɛ shi shikpɔŋ. 18Nu lɛ he shi, ni efa babaoo yɛ shikpɔŋ lɛ nɔ, ni adeka lɛ tɛo nu lɛ hiɛ. 19Nu lɛ he shi yɛ shikpɔŋ lɛ nɔ aahu po ni eha shikpɔŋ lɛ nɔ gɔji ni kwɔlɔ fɛɛ nɔ. 20Nu lɛ kwɔ kɛtee ŋwɛi ni esu gɔji lɛ ninetalɔi nyɔŋma kɛ enumɔ. 21Bɔɔnii fɛɛ ni yɔɔ shikpɔŋ lɛ nɔ, loofɔji kɛ shĩa kooloi kɛ ŋa nɔ kooloi kɛ waamɔ nii kɛ gbɔmɛi fɛɛ plene. 22#Hiob 22.15, 16; 2 Pet 3.6 Bɔɔnii fɛɛ ni muɔ ni yɔɔ shikpɔŋ gbiŋ nɔ lɛ gboi. 23Akpãtã nibii fɛɛ ni hiɛ kã ni yɔɔ shikpɔŋ lɛ nɔ lɛ hiɛ, kɛjɛ gbɔmɔ nɔ kɛyashi kooloi kɛ waamɔ nii kɛ loofɔji anɔ; akpãtã amɛhiɛ yɛ shikpɔŋ lɛ nɔ ni eshwɛ Noa kɛ mɛi ni kɛ lɛ yɔɔ adeka lɛ mli lɛ pɛ. 24Nu lɛ damɔ shikpɔŋ lɛ nɔ gbii oha kɛ nyɔŋmai enumɔ.
נבחרו כעת:
Jɛnɛsis 7: NEGAB
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Bible in Ga Language © Bible Society of Ghana, 2020.