Génesis 12
12
Isabenö Jo̧ Dios Abramnö itebotjö laebobö weina jawa
1..Ja̧danö, Isabenö Jo̧ Diosma webijetö Abramnöma:
—Abram, kwitebotjö labebi jelobekwö kwi̧'yo. Kwömöledötjö 'da̧bachibö jelobekwö kwi̧'yo. Ja̧danö, yö̧ne kwömöledö kwabe'do ejunö ju̧kwadötjöbi 'da̧bachibö jelobekwö kwi̧'yo. Kwi̧'yakobe nijima wajwiköbijayonö chi̧sebakobe— webijetö Isabenö Jo̧ Diosma.
2Ina jö̧ba̧lijetö Isabenö Jo̧ Diosma Abramnöma:
—Abram, ökwötjö tupadanö jojodönöma, tjitebonö ba̧jekwachö juluwadö batjibobö dösölö̧jinö edö pjatatakwo̧sa. Ja̧danö Abram, ökwönö otiwanö kwö̧jobö dösölö̧jinö edö pjatatakwo̧sa. Jejenö pjatatobetjö̧ okobe deinö bö̧jenö ju̧kwadöma jojodö yötjawi̧ a̧ja̧kwö tjöwaisachibakwedö, Abramma Dios dösölö̧jinö edö pjaatökwe, jö̧ba̧lö. Ja̧danö Abram, ökwönö dösölö̧jinö edö pjatatobetjö̧, ökwönödamaö̧kö̧, okobe deinö böjȩnö ju̧kwadönö dösölö̧jinö edö pjatatocha— yöba̧lijetö Isabenö Jo̧ Diosma Abramnöma.
3Ina yöba̧lijetö:
—Abram, yötawakwö. Ökwönö dösölö̧jinö edö pjabatadönöma dösölö̧jinö edö pjatatakwo̧sa. Jo̧kwaijayonö ökwönö öpöjödinö edö sulabenö omukwato̧nöma öpöjödinö edö lȩtebakwo̧— yöba̧lijetö—. Ja̧danö, Abram, ökwönö dösölö̧jinö edö pjatatobetjö̧ ju'wedönö, bakwasokwena jojodönöbi ötjö dösölö̧jinö edö pjatatakwawö̧ tjuju̧kwakwedö— yöba̧lijetö Isabenö Jo̧ Diosma Abramnöma.
Abram itebotjö laebina jawa, Isabenö Jo̧ Dios weinadanö
4Ja̧danö, Isabenö Jo̧ Diosma Abramnö, Kwi̧'yo, jö̧ba̧lö, weökwe Harántjö labebö 'yi̧jetö, Isabenö Jo̧ Dios wei̧danö. Öjawo̧ itji̧ Lotbi 'yi̧jetö, Abramkwö. Abramma jobetjö laebena setenta y cinco a̧yo juna̧lijetö. 5Ja̧danö, Harántjö labebö 'yi̧jetö Abramma, öjawo̧mine itji̧ Lotkwö, ja̧danö, ilekwo Saraikwö. Ja̧danö, okobe jwiinö tjiteabi, tja̧jwi̧munöbi, Harántjö midö tjeminawö̧ tjömöayedönöbi öbibö 'yi̧jadötö Canaán nijibe. 'Ya̧jadöma Canaán nijinö ichibijadötö. 6Ichibajadöma okobe jwiinö Canaán nijinö kwebachijadötö, Siquem comunidad tjichibenanö kabatö. Jobema towi nöowi ji̧jetö Moré mikwowi. Ja̧danö, ja̧ mölema jobema Canaán jojodöbi ju̧kwijadötö.
7Ja̧danö, jobetjö Isabenö Jo̧ Diosma öwawachijetö Abramnöma. Öwawachö jö̧ba̧lijetö:
—Abram, bemi nijima chiyocha ökwötjö tupadanö jojodönö— jö̧ba̧lijetö Isabenö Jo̧ Diosma. Ikenama Abramma Isabenö Jo̧ Dios öwawachajena inawiya wanabinö juwö iyawemi otidijetö, juwö iyobö Diosnö ösödö. 8Ikenama jobetjö labebö 'yi̧jetö Abramma, öibajawö̧kwö mö'ösa'iju ju̧kwobekwö, Betel comunidadtjö ja̧wo̧ laebobekwö. Jobetjöma isa̧do̧tjö ejudanö debatö otidijetö. Jado̧ debatö otidajelöma ja̧wo̧ meajobekwö Betel comunidad ji̧jetö. Ja̧danö, ja̧wo̧ laebobekwö Ai comunidad ji̧jetö. Jobetjö, ju'wi juwö iyawemi otidijetö. Otidajo̧, Isabenö Jo̧ Dios chösödakwö, jö̧ba̧lö juwö iyijetö Isabenö Jo̧ Diosnö. 9Ikenama ju'wi möle Abramma öibajawö̧kwö jobetjö labebö abiabö 'yi̧jetö a̧li̧kwö, Neguev niji ichibenanö kabatö.
Abram Egiptonö ö̧jina jawa
10Ja̧ mölema jobe Canaán nijima okobe jwiinö batjiju junawa wobö loobetjö̧ kwakwawa yelösöda jwiijetö. Jwiobetjö̧ jojodöma a̧wi̧chö tjöbijadötö. Ja̧danö, jobetjö a̧wi̧chilö̧jawö̧ Abramma i̧'yajawö̧kwö u'da 'yi̧jetö Egiptobe, jobeda ö̧jobö ja'yubeda lekwe. 11Tjichibakwa̧ ja'yubeda jwiena Abramma jö̧ba̧lijetö ilekwo Sarainö:
—Sarai, ö'wiawakwawalö̧jönö a̧ja̧kwitjö. Cho̧'wo̧ tjo̧bekwö chö̧ja, ökwöma jwiinö kwotiwobetjö̧. 12Ja̧danö, Egipto jojodö ömadöma ökwönö edinö, otiwuju, jö̧ba̧lö, tjo̧'wo̧ sulinö tjedakobe ötjönöma, Iteda ilekwo, jö̧ba̧lö. Jejenö tjedobetjö̧ ökwö kwö̧jibinö wetjonö ötjönö kwabö lotjakobe, ökwönö tjemobö. 13Chilekwo, ötjönö otiwanö baledakobetjö̧, ja̧danö, ötjönö kwabö lotjökakobetjö̧, yökawo jobadö Egipto jojodönö, ötjöma bite öjawujusa, jö̧ba̧lö— jö̧ba̧lijetö Abramma Sarainö.
14Ja̧danö, Egiptonö tjichibena Egipto jojodö ömadöma Sarainö edinö, jwiinö otiwuju, jö̧ba̧lö, eda̧lijadötö. 15Ja̧danö, Egipto jojodö tjuluwo̧ma faraón ötjabinökwe. Jo̧ba faraón ömöayedöma Sarainö, jwiinö otiwuju, jö̧ba̧lö, edajadö faraón ö̧jobekwö ȩwa̧jijadötö, Sarai jotiwi̧ma jo̧banö yötjawobö. Jejenö yötjawiökwe jobujunö tjichejebobö webijetö faraónma, iteda ilekwo baibanö emobö. Jejenö weawö̧ faraón ömöayedö Sarai jö̧jobekwö 'ya̧jadöma jobujunö öbibö ȩwa̧jijadötö faraón ejube. 16Ja̧danö, faraónma Sarainö jwiinö ösödijetö. Jo̧kwaobetjö̧ otiwanö iyijetö Abramnöma, bisu jöpöe, jö̧ba̧lö. O̧bȩja̧dönöbi, pa̧ka̧yö̧nöbi, ömöayedö ömadönöbi ya̧dönöbi, bu̧lu̧dö ömadönöbi ya̧dönöbi, ka̧mȩyu̧dönöbi iyijetö faraónma Abramnöma.
17Jo̧kwaijayonö faraón Sarainö emiökwe Isabenö Jo̧ Diosma öpöjödö jwiinö sulabenö tjö'wöchi̧ jawa webijetö faraónnöbi, ömöledö jo̧bakwö ju̧kwadönöbi. 18Ja̧danö faraónma waisachibijetö, jelo̧ ilekwonö cheminobetjö̧ dö'wöchi̧ jawa baiba, jö̧ba̧lö. Jo̧kwaobetjö̧ jwöbijetö Abramnöma ö̧jobekwö ichobö. Ichibajo̧nö labinö jwöbeba̧lijetö:
—Ökwöma jwiinö sulabenö kwöwaedijatö ötjönöma. Jweinö yökawinotö, chilekwo, jö̧ba̧lö— jwöbeba̧lijetö—. 19Chöjawuju, jö̧ba̧lö, yökawijatö. ¿Tajawedö jejenö yökawinada, ötjö chilekwo baibanö cheminöma? Tjo̧wi̧, kwilekwonöma tjetatakwö. Jobujunö öbibö labebö da̧ji— webijetö faraónma Abramnöma.
20Ikenama faraónma ömöayedönö webijetö Abramnö, ilekwonö okobe jwiinö tjiteakwö, tja̧jwi̧mukwö, tjömöayedökwö tjitebotjö a'dewö lotjobö. Jejenö weiawö̧ jobadönö öbibö a'dewö lobijadötö tjitjebotjö, Egiptobetjö.
נבחרו כעת:
Génesis 12: WPC
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
©2021, All Rights Reserved
Génesis 12
12
Isabenö Jo̧ Dios Abramnö itebotjö laebobö weina jawa
1..Ja̧danö, Isabenö Jo̧ Diosma webijetö Abramnöma:
—Abram, kwitebotjö labebi jelobekwö kwi̧'yo. Kwömöledötjö 'da̧bachibö jelobekwö kwi̧'yo. Ja̧danö, yö̧ne kwömöledö kwabe'do ejunö ju̧kwadötjöbi 'da̧bachibö jelobekwö kwi̧'yo. Kwi̧'yakobe nijima wajwiköbijayonö chi̧sebakobe— webijetö Isabenö Jo̧ Diosma.
2Ina jö̧ba̧lijetö Isabenö Jo̧ Diosma Abramnöma:
—Abram, ökwötjö tupadanö jojodönöma, tjitebonö ba̧jekwachö juluwadö batjibobö dösölö̧jinö edö pjatatakwo̧sa. Ja̧danö Abram, ökwönö otiwanö kwö̧jobö dösölö̧jinö edö pjatatakwo̧sa. Jejenö pjatatobetjö̧ okobe deinö bö̧jenö ju̧kwadöma jojodö yötjawi̧ a̧ja̧kwö tjöwaisachibakwedö, Abramma Dios dösölö̧jinö edö pjaatökwe, jö̧ba̧lö. Ja̧danö Abram, ökwönö dösölö̧jinö edö pjatatobetjö̧, ökwönödamaö̧kö̧, okobe deinö böjȩnö ju̧kwadönö dösölö̧jinö edö pjatatocha— yöba̧lijetö Isabenö Jo̧ Diosma Abramnöma.
3Ina yöba̧lijetö:
—Abram, yötawakwö. Ökwönö dösölö̧jinö edö pjabatadönöma dösölö̧jinö edö pjatatakwo̧sa. Jo̧kwaijayonö ökwönö öpöjödinö edö sulabenö omukwato̧nöma öpöjödinö edö lȩtebakwo̧— yöba̧lijetö—. Ja̧danö, Abram, ökwönö dösölö̧jinö edö pjatatobetjö̧ ju'wedönö, bakwasokwena jojodönöbi ötjö dösölö̧jinö edö pjatatakwawö̧ tjuju̧kwakwedö— yöba̧lijetö Isabenö Jo̧ Diosma Abramnöma.
Abram itebotjö laebina jawa, Isabenö Jo̧ Dios weinadanö
4Ja̧danö, Isabenö Jo̧ Diosma Abramnö, Kwi̧'yo, jö̧ba̧lö, weökwe Harántjö labebö 'yi̧jetö, Isabenö Jo̧ Dios wei̧danö. Öjawo̧ itji̧ Lotbi 'yi̧jetö, Abramkwö. Abramma jobetjö laebena setenta y cinco a̧yo juna̧lijetö. 5Ja̧danö, Harántjö labebö 'yi̧jetö Abramma, öjawo̧mine itji̧ Lotkwö, ja̧danö, ilekwo Saraikwö. Ja̧danö, okobe jwiinö tjiteabi, tja̧jwi̧munöbi, Harántjö midö tjeminawö̧ tjömöayedönöbi öbibö 'yi̧jadötö Canaán nijibe. 'Ya̧jadöma Canaán nijinö ichibijadötö. 6Ichibajadöma okobe jwiinö Canaán nijinö kwebachijadötö, Siquem comunidad tjichibenanö kabatö. Jobema towi nöowi ji̧jetö Moré mikwowi. Ja̧danö, ja̧ mölema jobema Canaán jojodöbi ju̧kwijadötö.
7Ja̧danö, jobetjö Isabenö Jo̧ Diosma öwawachijetö Abramnöma. Öwawachö jö̧ba̧lijetö:
—Abram, bemi nijima chiyocha ökwötjö tupadanö jojodönö— jö̧ba̧lijetö Isabenö Jo̧ Diosma. Ikenama Abramma Isabenö Jo̧ Dios öwawachajena inawiya wanabinö juwö iyawemi otidijetö, juwö iyobö Diosnö ösödö. 8Ikenama jobetjö labebö 'yi̧jetö Abramma, öibajawö̧kwö mö'ösa'iju ju̧kwobekwö, Betel comunidadtjö ja̧wo̧ laebobekwö. Jobetjöma isa̧do̧tjö ejudanö debatö otidijetö. Jado̧ debatö otidajelöma ja̧wo̧ meajobekwö Betel comunidad ji̧jetö. Ja̧danö, ja̧wo̧ laebobekwö Ai comunidad ji̧jetö. Jobetjö, ju'wi juwö iyawemi otidijetö. Otidajo̧, Isabenö Jo̧ Dios chösödakwö, jö̧ba̧lö juwö iyijetö Isabenö Jo̧ Diosnö. 9Ikenama ju'wi möle Abramma öibajawö̧kwö jobetjö labebö abiabö 'yi̧jetö a̧li̧kwö, Neguev niji ichibenanö kabatö.
Abram Egiptonö ö̧jina jawa
10Ja̧ mölema jobe Canaán nijima okobe jwiinö batjiju junawa wobö loobetjö̧ kwakwawa yelösöda jwiijetö. Jwiobetjö̧ jojodöma a̧wi̧chö tjöbijadötö. Ja̧danö, jobetjö a̧wi̧chilö̧jawö̧ Abramma i̧'yajawö̧kwö u'da 'yi̧jetö Egiptobe, jobeda ö̧jobö ja'yubeda lekwe. 11Tjichibakwa̧ ja'yubeda jwiena Abramma jö̧ba̧lijetö ilekwo Sarainö:
—Sarai, ö'wiawakwawalö̧jönö a̧ja̧kwitjö. Cho̧'wo̧ tjo̧bekwö chö̧ja, ökwöma jwiinö kwotiwobetjö̧. 12Ja̧danö, Egipto jojodö ömadöma ökwönö edinö, otiwuju, jö̧ba̧lö, tjo̧'wo̧ sulinö tjedakobe ötjönöma, Iteda ilekwo, jö̧ba̧lö. Jejenö tjedobetjö̧ ökwö kwö̧jibinö wetjonö ötjönö kwabö lotjakobe, ökwönö tjemobö. 13Chilekwo, ötjönö otiwanö baledakobetjö̧, ja̧danö, ötjönö kwabö lotjökakobetjö̧, yökawo jobadö Egipto jojodönö, ötjöma bite öjawujusa, jö̧ba̧lö— jö̧ba̧lijetö Abramma Sarainö.
14Ja̧danö, Egiptonö tjichibena Egipto jojodö ömadöma Sarainö edinö, jwiinö otiwuju, jö̧ba̧lö, eda̧lijadötö. 15Ja̧danö, Egipto jojodö tjuluwo̧ma faraón ötjabinökwe. Jo̧ba faraón ömöayedöma Sarainö, jwiinö otiwuju, jö̧ba̧lö, edajadö faraón ö̧jobekwö ȩwa̧jijadötö, Sarai jotiwi̧ma jo̧banö yötjawobö. Jejenö yötjawiökwe jobujunö tjichejebobö webijetö faraónma, iteda ilekwo baibanö emobö. Jejenö weawö̧ faraón ömöayedö Sarai jö̧jobekwö 'ya̧jadöma jobujunö öbibö ȩwa̧jijadötö faraón ejube. 16Ja̧danö, faraónma Sarainö jwiinö ösödijetö. Jo̧kwaobetjö̧ otiwanö iyijetö Abramnöma, bisu jöpöe, jö̧ba̧lö. O̧bȩja̧dönöbi, pa̧ka̧yö̧nöbi, ömöayedö ömadönöbi ya̧dönöbi, bu̧lu̧dö ömadönöbi ya̧dönöbi, ka̧mȩyu̧dönöbi iyijetö faraónma Abramnöma.
17Jo̧kwaijayonö faraón Sarainö emiökwe Isabenö Jo̧ Diosma öpöjödö jwiinö sulabenö tjö'wöchi̧ jawa webijetö faraónnöbi, ömöledö jo̧bakwö ju̧kwadönöbi. 18Ja̧danö faraónma waisachibijetö, jelo̧ ilekwonö cheminobetjö̧ dö'wöchi̧ jawa baiba, jö̧ba̧lö. Jo̧kwaobetjö̧ jwöbijetö Abramnöma ö̧jobekwö ichobö. Ichibajo̧nö labinö jwöbeba̧lijetö:
—Ökwöma jwiinö sulabenö kwöwaedijatö ötjönöma. Jweinö yökawinotö, chilekwo, jö̧ba̧lö— jwöbeba̧lijetö—. 19Chöjawuju, jö̧ba̧lö, yökawijatö. ¿Tajawedö jejenö yökawinada, ötjö chilekwo baibanö cheminöma? Tjo̧wi̧, kwilekwonöma tjetatakwö. Jobujunö öbibö labebö da̧ji— webijetö faraónma Abramnöma.
20Ikenama faraónma ömöayedönö webijetö Abramnö, ilekwonö okobe jwiinö tjiteakwö, tja̧jwi̧mukwö, tjömöayedökwö tjitebotjö a'dewö lotjobö. Jejenö weiawö̧ jobadönö öbibö a'dewö lobijadötö tjitjebotjö, Egiptobetjö.
©2021, All Rights Reserved