Shiyanso 8

Kisheepukha kwa malenga ga noonya ni fisansa fya malenga

1Apo, uNguluvi wámusuukwa uNuhu, ni nkhanu soona isa mu lihakha ni sa kidiimwa fina akhandi nafyo mu shipugo. Wáleeta ilipepo ilikhali mu nyi, baheene amalenga gayansa kisheepukha. 2Wádinda ifisansa ifikhome ifya malenga na malyango ga noonya aga ku wulanga, inoonya wáyiyiimya. 3Amalenga gayitenekha kisheepukha, saganile kifikha nsiku ligana limo na mashumi gasaanu (150), kihuma inoonya yiyanse kitoonya, amalenga gaava gashepwishe mandu. 4Ilijuva lya ishumi ni fungati lya mwesi gwa fungati, ishipugo shasagama mu fidunda fya Alalati. 5Amalenga gayitenekha kisheepukha lushe lushe. Ilijuva lya wutasi lya mwesi gwa ishumi pashaanya pa fidunda pawonekha.

6Saganile kishila nsiku mashumi gana, uNuhu wádindula indwi ya shipugo yina akhandi atendile. 7Wáahumya inkhahoove panja, yoope yisikhatinile, yayitenekhaga kigulukha ukho na ukho mbakha amalenga gayuuma mu nyi.

8Baheene uNuhu wáahumya inkunda, kiija amanye amalenga nda gayuuma. 9Leelo, inkunda yila yisikhalwajile uluvala luna luvateeme, yaawuya ku shipugo kiiva amalenga gakhandi gashaanali gagubiishe inyi yoona. UNuhu wágolosa iliwokho, wáyikhata inkunda yila, wáyigomosa mu shipugo. 10Wáhepelesa insiku isinji fungati, khanji wáyihumya inkunda yila. 11Inkunda yaganaga kitina uluhaavi lwa shaamihe, yayinsa ni lihamba linya lulemba ilya mupishi gwa museyituni mu mulomo gwakwe. Baheene uNuhu wáamanya kiija amalenga gaasila mu nyi. 12UNuhu wáhepelesa khanji nsiku isinji fungati, wáyihumya inkunda yila, leelo yisikhatinile.

UNuhu iihuma mu shipugo

13UNuhu wáganile kifisa maakha magana mutanda nu gumo (601), ilijuva lya wutasi ilya mwesi gwa wutasi, amalenga gakhandi gayuumile nyi yoona. UNuhu wágubutula umugubishilo gwa shipugo, wáganile kiloleela wáawona inyi yiyuumile. 14Ilijuva lya mashumi gavili ni fungati ilya mwesi gwa wuvili, inyi yoona yikhandi yiyuumile.

15Apo baheene uNguluvi wámujovela uNuhu, 16“Huma mu shipugo owe, umudala waakho, avanaakho na vakhamwanaakho. 17Uhumye kunja inyuni, ifidiimwa, inkhanu, ni fiwumbwa fyona fina fitambala. Ifiwumbwa fyona, five fisavilana na kiyalaalila mu nyi yoona.”

18Baheene uNuhu wáahuma mu shipugo nu mudala waakwe, avanaakwe na vakhamwanaakwe. 19Ifidiimwa, inkhanu sa mu lihakha, inyuni ni fiinu fina fitambala fina fili paayo paayo, fyona fyahuma kwa kilunjilisania.

UNuhu iihumya ifyadanda kwa Nguluvi

20UNuhu wámusenjela uMutwa uNguluvi uluvala ulwa kihumisa ishadanda. Wáakhata shila nkhanu yimo ni nyuni yimo yina yifwaya ku mafuunyo, wáahumya kwa Nguluvi ifyadanda. 21UNguluvi wáyamba umununsi gwa shadanda sha Nuhu na wánojelwa, baheene wáaja, “Shiyooli, nisikhayiyiijila kwa kiyinanga inyi khanji kwa kiiva ya vaanu, kiiva naamanya inumbula ya muunu yina wunansi kihuma uwaana waakwe. Nisikhafibuda khanji ifiinu fina fyumi ngaja shina nagahaga.

22Nsiku soona mu nyi kukhava nu luhaavi ulwa,

kivyala na kikungula,

ishipepo ni lifushe,

ishifuku nu lujuva,

ishilo ni shiminsi,

shiyooli fisikhayiima.”

נבחרו כעת:

Shiyanso 8: Shisangu

הדגשה

שתף

העתק

רוצים לשמור את ההדגשות שלכם בכל המכשירים שלכם? הירשמו או היכנסו

מידע נוסף אודות IShiyanso nu Lufingo uLupya