Jɛ́nɛ́sì 19
19
Sáɖɔ̀ùn kè Gòmɔ́ɖɔ̀-hwɔ̀ɖɔ̀ ɓěɔ̀ mú-gbɔɔ̀-gbɔɔ̀
1Hwɛ̀ ké ínjà sɔ̃́ ɓěɔ̀ nyini ma ɖé Sáɖɔ̀ùn-hwɔ̀ɖɔ̀ɔ̀ mú ɓó hwìo. Ɓó tia ɓaɖaa, Ɖáà kò ma ɓó hwɔɖɔɔ̀ gmɔ-wɔ̃̀ɔ̀ gbo dyi. Ti ɓɛ́ ɔ dyé ma wa kɛɛ, ɔ sɔ̀ dyí, ké ɔ mu ma wa hwìǐ, ké ɔ taɓa ma dú hwuɖu ɓó wa dyúa. 2Ké ɔ ɖá, “Ɓɔ̌ɔ̀ ɓě, ní ɓaà ɓě ní, ɓě pàìn ɖé mɔ̄ mɔ̀à ɓěɛ̀ gbo-nì-dyùɔ̀ kɛɛ ɓíɖí-taún, ɓɛ́ ɓě ké dèɖè, ɓɛ́ ɓě ké ɖé pɛ̃́, nìí ɓɛ́ gànà-kṹún mɛ̀nɛ̀ɛ̀ ní, ɓě ké ɓěɛ̀ hwìèɔ̀ kɔ̃ kpá ɖe.”
Kɛɛ wa ɖá, “Gbào, à mu dà hwɔɖɔɛ̀ píé hwòɖǒǔn pɛ̃́ìn.”
3Kɛɛ ɔ nɛ́ ma wa kɔ̃ mìɔ jèɛɛ, wa wɔ̃́ ma ní, ké wa kè ɔ mu ma ɖé ɔ ɓíɖí-taún. Ké ɔ nyu ma ɖii-ɖɛ̀ ɓó wa bìì. Ɔ nyu ma bɛɖɛɛ̀ se dyáìn-ɖɛ̀ gbo nìɛ, ké wa ɖiɛ ma.
4Hwɛ̀ ɓɛ́ wa ké ma dyi pɛ̃́ɛ, gàa séín ɓě ɓɛ́ wa sɔ̀ìn ma Sáɖɔ̀ùn-hwɔ̀ɖɔ̀ɔ̀ dà séín nyɛɛ, waà nyɔ gmɔ̀ kè nyɔ sùà ɓěɔ̀ dɛ́ɖɛ́ ma gbǒɔ̀. 5Ké wa ɖá ma Ɖáà, ké wa ɖá, “Dɛ̌ gàa ɓě dyià dà m̀ gbo pɛ̃́ìn ɓó máaǔn wɛ̃ɛ nì kɛ́? Síìn wa píé nɔ̄ à gbo, ɓɛ́ à kè wa ké ɓó da nì.”#19:5 Ɖɛ nìà kɛ xwíníín mɔ̀ wa ké waà mǔè-gàà nyɔ́nɔ́ mú nyu.
6Ké Ɖáà sí ma píé ɖé wa gbo, ké ɔ kã ma gbǒɔ̀. 7Ké ɔ cɛ̃ɛ ma wa gbo, ké ɔ ɖá, “Gbào, ɖíí ɓě, ní ɓaà ɓě ní, ɓě mɛ ɓɔ́ hwòɖǒ-kɔ̃in-nyìnììn-ɖɛ̀ nì kàà kɛɛ nyuɛ. 8Gmɔ̀ nɔ̄, ḿ ɓéɖé dyú-màà sɔ̃́ ɓɛ́ wa séè gàa jè dyuòɛ. Ḿ mɛ síìn wa píé nɔ̄ ɓě gbo, ɓɛ́ ɓě ké ɖɛ dè ɓěɛ̀ hwòɖǒ dyiɛɛ wa bũ̌ nyu. Kɛɛ ɓě ɓɔ́ gàa ɓěɛ̀ ɖɛ ɖò bũ̌ nyuɛ, sepóɛɖé wa mɔ̀ ní ɖéè ɓě, ké ḿ ɓéɖé ɓɛ́ ḿ ké wa dyí gmɔ̀.”
9Ké wa ɖá, “Sɔ̀ìn à hwìǐ. M̀ mɔ̀ ɖéè, ké m̀ dyi à hwìɛ̀, ké ɓó kàǔn wɛ̃ɛ, m̀ mɔ́ ɓɛ́ m̀ ké à kɔ̃in nìì? Sɔ̀ìn à hwìǐ. Ɔ se ná nìǐn, nìí, à mu m̀ ɖɛ nyìnììn dyíin mìɔ kɛɛ bũ̌ nyuùn ɓɛ́ ɔ ké nyɔ à kéà wa bũ̌ nyuɛɛ dyí zi.” Ké wa cṹ ma ɔ wáká, ké wa xwɛ̃́ìn ma ɓó dyi, ɓɛ́ wa ké ma xwìɖìɔ̀ wa. 10Hwɛ̀ ké ínjà ɓě nìà ɖé gbǒɔ̀ múɛɛ jiɖi ma Ɖáà, ké wa po ɔ ɖé gbǒɔ̀ mú, ké wa kã ma gbǒɔ̀. 11Ké wa nyuɛ ké gàa ɓě nì ma kà ɓó gbǒ-wɔ̃̀ɔ̀ gboɛɛ, waà nyɔ gmɔ̀ kè nyɔ sùà séín ɓěɔ̀ kpè ma dyéɖéín dyi, ké wa se ma gbǒ-wɔ̃̀ɔ̀ da dyuò ɖe.
12Hwɛ̀ ké ínjà ɓěɔ̀ diè ma Ɖáà dyi, ké wa ɖá, “M̀ ɓéɖé nyɔ ɖíɛ́ ɓě ɖeè? M̀ ɓéɖé dyúɛ̀ dyú-ɓǎ mɔɔ dyú-gàà mɔɔ dyú-màà ɓě mɔɔ nyɔ kà kò ɖò hwɔɖɔɛ̀ mú ɖeè? M̀ mɛ zà nɔ̄ wa wàɖà cá, 13sepóɛɖé à nì pá nìà kɛ mú gbɔɔ̀ǔn dyiɛń. Gèɖèpɔ́ɔ̀ ɖǎ zaa-dè-wùɖù ɓáún-ɓáún wɔ̃́ ɓá nyɔ ɓěɔ̀ nyuu-nàmàǔn kúɖúú ɓěɔ̀ jè dyí. Ɔ jèɛɛ, ɔ ɖǎ à ɖoɓo, ɓɛ́ à kéɛ mú gbɔɔ̀.”
14Hwɛ̀ ké Ɖáà mu, ké ɔ cɛ̃ɛ ma gàa-dyù ɓě ké ma ɔ dyú-màà ɓěɔ̀ dyi kpɔ̃ɛɛ gbo, ké ɔ ɖá, “Ɓě fṹà, ɓɛ́ ɓě ké pá nìà kɛ mú sɔ̀, sepóɛɖé Bounɓoɔ̀ nì hwɔɖɔɛ̀ mú gbɔɔ̀ǔn dyiɛń.” Kɛɛ gàa-dyù ɓěɔ̀ hwòɖǒ ɖá ɔ nì ma dyɔ́-ɖɛ̀ nyuɛń.
15Ti ɓɛ́ zɔ̃ nìǎ ma zɔ̃uń wɛ̃ɛ, ínjà ɓěɔ̀ dè ma Ɖáà kɔ̃, ké wa ɖá, “Fṹà, ɓɛ́ m̀ ké nì gmàà kè nì dyú-màà sɔ̃́ ɓěɛ̀ dyí ɖú, ɓɛ́ ɓě ké mu wàɖà, ɓɛ́ ɓě ní kɔ̃̀ ɖà mɛ́, ti ɓɛ́ hwɔɖɔɛ̀ muà mú gbɔɔ̀ùn wɛ̃.” 16Kɛɛ ɔ nì ma dyi bũɛń. Ɔ jèɛɛ, ínjà ɓěɔ̀ kpɔ̃ ma ɔ kè ɔ gmààɔ̀ kè ɔ dyú-màà sɔ̃́ ɓěɔ̀ sɔ̃in, ké wa zà ma wa hwɔɖɔɔ̀ mú, sepóɛɖé Bounɓoɔ̀ dyé ma wa wìǐn jè. 17Ti ínjà ɓěɔ̀ ɖǎ ma wa hwɔɖɔɔ̀ mú zà kɛɛ, ínjà ɓěɔ̀ ɖò ɖá, “Ɓě kpa peɖeɛ, ɓɛ́ ɓě ní kɔ̃̀ ɖà mɛ́, ké ɓě mɛ ɓɔ́ ɖe gmɔ̀ɔ̀o. Ɓě mɛ ɓɔ́ ɓo dɔ̀ɔ̀ ɖé bɔɔ-kpàɔ̀ kɔ̃ dà ɖò, kɛɛ ɓě mɛ kpa peɖeɛ, ɓɛ́ ɓě ké ɖé toɖo ɓěɔ̀ gbo mu, ɓěǐn kɔ̃̀ ɖà mú gbɔɔ̀.”
18Kɛɛ Ɖáà cɛ̃ɛ ma wa gbo, ké ɔ ɖá, “Ɓɔ̌ɔ̀ ɓě, ní ɓaà ɓě ní, ɔ mɛ ɓɔ́ ná nìɛ̀. 19Ɓěɛ̀ hwòɖǒ ɖǎ mɔ̄ mɔ̀à ɓěɛ̀ gbo-nì-dyùɔ̀ kɛɛ múin dèìn, ké ɓě ɖǎ ḿ kpeɖe nɔ̀mɔ̀ dyíin vɛ̀nɛ̀ dyí tɛ̀mɛ̀ìn dyììn ɖé ní fɛ̀ɛ̀ɔ̀ póìn-póìn mú. Kɛɛ ḿ se ɖé toɖo ɓěɔ̀ gbo muɛ ɓɛ́ìn. Ḿ dyi ɖé muín, nìí, ɖɛ gbàɔ̀ mu ḿ hwìèɔ̀ kɔ̃ dyi dyɛ̀ìn, ké ní mu mɛ́ìn. 20Dyé hwɔɖɔ nìà ɖé dyúa kɛ. Ɔ xwɛ̃́ìn dyi ɓɛ́ ḿ ké ɖé gbǔɛ kpa. Ɔ mɔ̀ hwɔɖɔ ɓěɔ̀ ɖò dyɛo, kɛɛ ní ɓaà ɓě ní, ḿ mɛ pèɖèìn ɖé, nìí, ní fɛ̀ɛ̀ɔ̀ mu póùn. Má, ɔ mɔ̀ hwɔɖɔ-dyù wè pūe?”
21Hwɛ̀ ké ínjà ɓěɔ̀ dyúáɖò cɛ̃ɛ ma ɔ gbo, ké ɔ ɖá, “À wɔ̃́ ní. À se hwɔɖɔ kɔ̃̀ jè m̀ cɛ̃à kɛɛ wáɖáa mu. 22Kɛɛ m̀ mɛ mu ɖé wàɖà, sepóɛɖé à se ɖɛ ɖò nyuɛ ɓɛ́ìn, ké m̀ nyini ɖé hwɛ̀.”
Ɔ jèɛɛ, wa ɖáìn ma hwɔɖɔɔ̀ Zóà kɔ̃̀ xwíníín mɔ̀à tííwè kɛ.
23Ti ɓɛ́ Ɖáà nyini ma Zóà-hwɔ̀ɖɔ̀ɔ̀ múɛɛ, dyóɖóɔ̀ wóɖó ma xwáɖáún. 24Púɛɛ, Bounɓoɔ̀ nyuɛ ké sɔ́fà-sɔ̀ɔ̌ ɓɛ́ ɔ nì ma kà nyɛ-kɛ̀nɛ̀ nìà kɛɛ sɔ̀ ma ɖé dyɔún, ké ɔ wáɖáìn ma Sáɖɔ̀ùn kè Gòmɔ́ɖɔ̀-hwɔ̀ɖɔ̀ ɓěɔ̀ kɔ̃in kà ní ɖaɓaà kɛ, 25ké ɔ gbɔɔ̀ ma bɔɔ-kpà gànáɔ̀ hwɔɖɔ ɓěɔ̀ kè nyɔ séín ɓě cĩ́ ma ɖé hwɔɖɔ ɓěɔ̀ múɛ ɔ kè ɖɛ séín mɛ ma ɖé ɓóɖóɔ̀ múɛɛ mú. 26Kɛɛ Ɖáà gmààɔ̀ gmɔ̀ ma ɖe, ké ɔ zɛ̃̀ìn ma tɔ̃́-tòɖò mú.
27Wéɔ̀ nyɔ kɔ ma ɓó dyíɛɛ gànà-kṹún mɛ̀nɛ̀ɛ̀ kɛɛ, Ééɓòɖòhɛ̃́ɛ̀ sɔ̀ ma dyí, ké ɔ mu ma ɖé pá kɔ̃̀ mú ɓɛ́ ɔ ɖǎ ma kà ɓó Bounɓoɔ̀ dyúa dyi nyànà kĩ́ín nyɛ. 28Ké ɔ gmɔìn ma Sáɖɔ̀ùn kè Gòmɔ́ɖɔ̀-hwɔ̀ɖɔ̀ ɓěɔ̀ kè bɔɔ-kpà gànáɔ̀ kɔ̃in, ké ɔ dyé ma ɖé nyànà-sò kuún-kuún kà nyànà-sò sɔ̀à nyɛ-ɓɔ́ɔ́ vɛ̀nɛ̀ ɖò múɛɛ nìà kɛ. 29Kɛɛ ti ɓɛ́ Gèɖèpɔ́ɔ̀ gbɔɔ̀ ma kà hwɔɖɔ ɓě nì ma kà ɖé bɔɔ-kpàɔ̀ kɔ̃ɛ múɛɛ, Ééɓòɖòhɛ̃́ɛ̀ jè nì ma ɔ hwìɖǐi, ké ɔ póìn ma Ɖáà, ké Ɖáà se ma mú gbɔɔ̀, ti ɓɛ́ ɔ gbɔɔ̀ ma kà hwɔɖɔ ɓě kɔ̃̀ mú Ɖáà cĩ́ ma kà kɛɛ múɛ.
Ɖáà kè ɔ dyú-màà ɓěɔ̀
30Hwɛ̀ ké Ɖáà kè ɔ dyú-màà sɔ̃́ ɓěɔ̀ sɔ̀ ma ɖé Zóà-hwɔ̀ɖɔ̀ɔ̀ mú, ké wa cĩ́ ma ɖé toɖo ɓěɔ̀ ɖò gbo, sepóɛɖé wa fɛ̃̀ìn ma ɓɛ́ wa ké ma ɖé Zóà-hwɔ̀ɖɔ̀ɔ̀ mú cĩ́. Ɔ kè ɔ dyú-màà sɔ̃́ ɓěɔ̀ cĩ́ ma ɖé ɓí vɛ̀nɛ̀ ɖò mú. 31Wé ɖòɛ̀ ɓaɖaa, Ɖáà nyíɔ́-dyùɔ̀ cɛ̃ɛ ma nyɔ dyùwèɔ̀ gbo, ké ɔ ɖá, “Dyéɛ, à ɓǎ ɖǎ nyɛ, ké gàa ɖò se nì ɓɛ́ à kè wa ké ɓó da nì kà nyɔ séín nyuà ɓóɖó-kpàà kɔ̃ɛ. 32Dyi, ɓɛ́ à ké à ɓǎ wã́ìn ɓáún-ɓáún nyí, ɓɛ́ ɔ ké ɔ nyu, nìí ɓɛ́ à kè ɔ ké ɓó da nì, ɓɛ́ à kè à ɓǎ ké dyú wóɖóìn.” 33Ɔ jèɛɛ, wa nyuɛ ké wa ɓǎ ná ma wã́ìn ɓáún-ɓáún ɓó máaún-hwùɖùɔ̀ mú. Ké ɔ nyíɔ́-dyùɔ̀ mu, ké ɔ kè ɔ ɓǎ nì ma ɓó da. Kɛɛ ɔ se ma ti ɔ dyú-mààɔ̀ pɛ̃́ ma dyiɛ mɔɔ ti ɔ sɔ̀ ma dyíɛɛ dyí dyuò.
34Wéɔ̀ nyɔ kɔ ma ɓó dyíɛɛ, ɔ nyíɔ́-dyùɔ̀ cɛ̃ɛ ma nyɔ dyùwèɔ̀ gbo, ké ɔ ɖá, “Dyéɛ, ḿ kè ḿ ɓǎ nì ɓó da ɓó máaún-hwùɖù zià dyiɛɛ mú. À mɛ nyuɛ ɓɛ́ ɔ ké wã́ìn ɓáún-ɓáún ná ɖe ɓó máaǔn, nìí ɓɛ́ mɔ̀ùn ké mu, ɓɛ́ m̀ kè ɔ ké ɓó da nì ɖekè, ɓɛ́ à kè à ɓǎ ké dyú wóɖóìn.” 35Ɔ jèɛɛ, wa nyuɛ ké wa ɓǎ ná ma wã́ìn ɓáún-ɓáún ɓó máaún-hwùɖùɔ̀ dyɛ mɔ̀ɔ̀ mú ɖekè. Ké ɔ dyú-màà dyùwèɔ̀ mu, ké ɔ kè ɔ ɓǎ nì ma ɓó da. Kɛɛ ɔ se ma ti ɔ dyú-màà dyùwèɔ̀ pɛ̃́ ma dyiɛ mɔɔ ti ɔ sɔ̀ ma dyíɛɛ dyí dyuò. 36Hwɛ̀ ké Ɖáà dyú-màà sɔ̃́ ɓěɔ̀ nì ma zùù kɔ̃ dyììn ɖé wa ɓǎɔ̀ mú. 37Ké ɔ nyíɔ́-dyùɔ̀ wóɖóìn ma gàa-dyù ɖò. Ké ɔ jǔìn ma ɔ Móà-nyɛ̀nɛ̀.#19:37 Móà-nyɛ̀nɛ̀ɔ̀ xwíníín mɔ̀ sɔ̀ ɖé ɓǎ mú. Ɔ mɔ̀à Móà-nyɔ̀ ɓěɔ̀ ɓǎ kɛ̀. 38Ɔ dyú-màà dyùwèɔ̀ mɔ̀ùn wóɖóìn ma gàa-dyù ɖò ɖekè. Ké ɔ jǔìn ma ɔ Bɛ̃̀námì-nyɛ̀nɛ̀.#19:38 Bɛ̃̀námì-nyɛ̀nɛ̀ɔ̀ xwíníín mɔ̀ ní nyɔ ɓěɔ̀ dyú. Ɔ mɔ̀à Ámànà-nyɔ̀ ɓěɔ̀ ɓǎ kɛ̀.
נבחרו כעת:
Jɛ́nɛ́sì 19: ƁB02
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Bassa Bible © Bible Society Liberia, 2002.
Jɛ́nɛ́sì 19
19
Sáɖɔ̀ùn kè Gòmɔ́ɖɔ̀-hwɔ̀ɖɔ̀ ɓěɔ̀ mú-gbɔɔ̀-gbɔɔ̀
1Hwɛ̀ ké ínjà sɔ̃́ ɓěɔ̀ nyini ma ɖé Sáɖɔ̀ùn-hwɔ̀ɖɔ̀ɔ̀ mú ɓó hwìo. Ɓó tia ɓaɖaa, Ɖáà kò ma ɓó hwɔɖɔɔ̀ gmɔ-wɔ̃̀ɔ̀ gbo dyi. Ti ɓɛ́ ɔ dyé ma wa kɛɛ, ɔ sɔ̀ dyí, ké ɔ mu ma wa hwìǐ, ké ɔ taɓa ma dú hwuɖu ɓó wa dyúa. 2Ké ɔ ɖá, “Ɓɔ̌ɔ̀ ɓě, ní ɓaà ɓě ní, ɓě pàìn ɖé mɔ̄ mɔ̀à ɓěɛ̀ gbo-nì-dyùɔ̀ kɛɛ ɓíɖí-taún, ɓɛ́ ɓě ké dèɖè, ɓɛ́ ɓě ké ɖé pɛ̃́, nìí ɓɛ́ gànà-kṹún mɛ̀nɛ̀ɛ̀ ní, ɓě ké ɓěɛ̀ hwìèɔ̀ kɔ̃ kpá ɖe.”
Kɛɛ wa ɖá, “Gbào, à mu dà hwɔɖɔɛ̀ píé hwòɖǒǔn pɛ̃́ìn.”
3Kɛɛ ɔ nɛ́ ma wa kɔ̃ mìɔ jèɛɛ, wa wɔ̃́ ma ní, ké wa kè ɔ mu ma ɖé ɔ ɓíɖí-taún. Ké ɔ nyu ma ɖii-ɖɛ̀ ɓó wa bìì. Ɔ nyu ma bɛɖɛɛ̀ se dyáìn-ɖɛ̀ gbo nìɛ, ké wa ɖiɛ ma.
4Hwɛ̀ ɓɛ́ wa ké ma dyi pɛ̃́ɛ, gàa séín ɓě ɓɛ́ wa sɔ̀ìn ma Sáɖɔ̀ùn-hwɔ̀ɖɔ̀ɔ̀ dà séín nyɛɛ, waà nyɔ gmɔ̀ kè nyɔ sùà ɓěɔ̀ dɛ́ɖɛ́ ma gbǒɔ̀. 5Ké wa ɖá ma Ɖáà, ké wa ɖá, “Dɛ̌ gàa ɓě dyià dà m̀ gbo pɛ̃́ìn ɓó máaǔn wɛ̃ɛ nì kɛ́? Síìn wa píé nɔ̄ à gbo, ɓɛ́ à kè wa ké ɓó da nì.”#19:5 Ɖɛ nìà kɛ xwíníín mɔ̀ wa ké waà mǔè-gàà nyɔ́nɔ́ mú nyu.
6Ké Ɖáà sí ma píé ɖé wa gbo, ké ɔ kã ma gbǒɔ̀. 7Ké ɔ cɛ̃ɛ ma wa gbo, ké ɔ ɖá, “Gbào, ɖíí ɓě, ní ɓaà ɓě ní, ɓě mɛ ɓɔ́ hwòɖǒ-kɔ̃in-nyìnììn-ɖɛ̀ nì kàà kɛɛ nyuɛ. 8Gmɔ̀ nɔ̄, ḿ ɓéɖé dyú-màà sɔ̃́ ɓɛ́ wa séè gàa jè dyuòɛ. Ḿ mɛ síìn wa píé nɔ̄ ɓě gbo, ɓɛ́ ɓě ké ɖɛ dè ɓěɛ̀ hwòɖǒ dyiɛɛ wa bũ̌ nyu. Kɛɛ ɓě ɓɔ́ gàa ɓěɛ̀ ɖɛ ɖò bũ̌ nyuɛ, sepóɛɖé wa mɔ̀ ní ɖéè ɓě, ké ḿ ɓéɖé ɓɛ́ ḿ ké wa dyí gmɔ̀.”
9Ké wa ɖá, “Sɔ̀ìn à hwìǐ. M̀ mɔ̀ ɖéè, ké m̀ dyi à hwìɛ̀, ké ɓó kàǔn wɛ̃ɛ, m̀ mɔ́ ɓɛ́ m̀ ké à kɔ̃in nìì? Sɔ̀ìn à hwìǐ. Ɔ se ná nìǐn, nìí, à mu m̀ ɖɛ nyìnììn dyíin mìɔ kɛɛ bũ̌ nyuùn ɓɛ́ ɔ ké nyɔ à kéà wa bũ̌ nyuɛɛ dyí zi.” Ké wa cṹ ma ɔ wáká, ké wa xwɛ̃́ìn ma ɓó dyi, ɓɛ́ wa ké ma xwìɖìɔ̀ wa. 10Hwɛ̀ ké ínjà ɓě nìà ɖé gbǒɔ̀ múɛɛ jiɖi ma Ɖáà, ké wa po ɔ ɖé gbǒɔ̀ mú, ké wa kã ma gbǒɔ̀. 11Ké wa nyuɛ ké gàa ɓě nì ma kà ɓó gbǒ-wɔ̃̀ɔ̀ gboɛɛ, waà nyɔ gmɔ̀ kè nyɔ sùà séín ɓěɔ̀ kpè ma dyéɖéín dyi, ké wa se ma gbǒ-wɔ̃̀ɔ̀ da dyuò ɖe.
12Hwɛ̀ ké ínjà ɓěɔ̀ diè ma Ɖáà dyi, ké wa ɖá, “M̀ ɓéɖé nyɔ ɖíɛ́ ɓě ɖeè? M̀ ɓéɖé dyúɛ̀ dyú-ɓǎ mɔɔ dyú-gàà mɔɔ dyú-màà ɓě mɔɔ nyɔ kà kò ɖò hwɔɖɔɛ̀ mú ɖeè? M̀ mɛ zà nɔ̄ wa wàɖà cá, 13sepóɛɖé à nì pá nìà kɛ mú gbɔɔ̀ǔn dyiɛń. Gèɖèpɔ́ɔ̀ ɖǎ zaa-dè-wùɖù ɓáún-ɓáún wɔ̃́ ɓá nyɔ ɓěɔ̀ nyuu-nàmàǔn kúɖúú ɓěɔ̀ jè dyí. Ɔ jèɛɛ, ɔ ɖǎ à ɖoɓo, ɓɛ́ à kéɛ mú gbɔɔ̀.”
14Hwɛ̀ ké Ɖáà mu, ké ɔ cɛ̃ɛ ma gàa-dyù ɓě ké ma ɔ dyú-màà ɓěɔ̀ dyi kpɔ̃ɛɛ gbo, ké ɔ ɖá, “Ɓě fṹà, ɓɛ́ ɓě ké pá nìà kɛ mú sɔ̀, sepóɛɖé Bounɓoɔ̀ nì hwɔɖɔɛ̀ mú gbɔɔ̀ǔn dyiɛń.” Kɛɛ gàa-dyù ɓěɔ̀ hwòɖǒ ɖá ɔ nì ma dyɔ́-ɖɛ̀ nyuɛń.
15Ti ɓɛ́ zɔ̃ nìǎ ma zɔ̃uń wɛ̃ɛ, ínjà ɓěɔ̀ dè ma Ɖáà kɔ̃, ké wa ɖá, “Fṹà, ɓɛ́ m̀ ké nì gmàà kè nì dyú-màà sɔ̃́ ɓěɛ̀ dyí ɖú, ɓɛ́ ɓě ké mu wàɖà, ɓɛ́ ɓě ní kɔ̃̀ ɖà mɛ́, ti ɓɛ́ hwɔɖɔɛ̀ muà mú gbɔɔ̀ùn wɛ̃.” 16Kɛɛ ɔ nì ma dyi bũɛń. Ɔ jèɛɛ, ínjà ɓěɔ̀ kpɔ̃ ma ɔ kè ɔ gmààɔ̀ kè ɔ dyú-màà sɔ̃́ ɓěɔ̀ sɔ̃in, ké wa zà ma wa hwɔɖɔɔ̀ mú, sepóɛɖé Bounɓoɔ̀ dyé ma wa wìǐn jè. 17Ti ínjà ɓěɔ̀ ɖǎ ma wa hwɔɖɔɔ̀ mú zà kɛɛ, ínjà ɓěɔ̀ ɖò ɖá, “Ɓě kpa peɖeɛ, ɓɛ́ ɓě ní kɔ̃̀ ɖà mɛ́, ké ɓě mɛ ɓɔ́ ɖe gmɔ̀ɔ̀o. Ɓě mɛ ɓɔ́ ɓo dɔ̀ɔ̀ ɖé bɔɔ-kpàɔ̀ kɔ̃ dà ɖò, kɛɛ ɓě mɛ kpa peɖeɛ, ɓɛ́ ɓě ké ɖé toɖo ɓěɔ̀ gbo mu, ɓěǐn kɔ̃̀ ɖà mú gbɔɔ̀.”
18Kɛɛ Ɖáà cɛ̃ɛ ma wa gbo, ké ɔ ɖá, “Ɓɔ̌ɔ̀ ɓě, ní ɓaà ɓě ní, ɔ mɛ ɓɔ́ ná nìɛ̀. 19Ɓěɛ̀ hwòɖǒ ɖǎ mɔ̄ mɔ̀à ɓěɛ̀ gbo-nì-dyùɔ̀ kɛɛ múin dèìn, ké ɓě ɖǎ ḿ kpeɖe nɔ̀mɔ̀ dyíin vɛ̀nɛ̀ dyí tɛ̀mɛ̀ìn dyììn ɖé ní fɛ̀ɛ̀ɔ̀ póìn-póìn mú. Kɛɛ ḿ se ɖé toɖo ɓěɔ̀ gbo muɛ ɓɛ́ìn. Ḿ dyi ɖé muín, nìí, ɖɛ gbàɔ̀ mu ḿ hwìèɔ̀ kɔ̃ dyi dyɛ̀ìn, ké ní mu mɛ́ìn. 20Dyé hwɔɖɔ nìà ɖé dyúa kɛ. Ɔ xwɛ̃́ìn dyi ɓɛ́ ḿ ké ɖé gbǔɛ kpa. Ɔ mɔ̀ hwɔɖɔ ɓěɔ̀ ɖò dyɛo, kɛɛ ní ɓaà ɓě ní, ḿ mɛ pèɖèìn ɖé, nìí, ní fɛ̀ɛ̀ɔ̀ mu póùn. Má, ɔ mɔ̀ hwɔɖɔ-dyù wè pūe?”
21Hwɛ̀ ké ínjà ɓěɔ̀ dyúáɖò cɛ̃ɛ ma ɔ gbo, ké ɔ ɖá, “À wɔ̃́ ní. À se hwɔɖɔ kɔ̃̀ jè m̀ cɛ̃à kɛɛ wáɖáa mu. 22Kɛɛ m̀ mɛ mu ɖé wàɖà, sepóɛɖé à se ɖɛ ɖò nyuɛ ɓɛ́ìn, ké m̀ nyini ɖé hwɛ̀.”
Ɔ jèɛɛ, wa ɖáìn ma hwɔɖɔɔ̀ Zóà kɔ̃̀ xwíníín mɔ̀à tííwè kɛ.
23Ti ɓɛ́ Ɖáà nyini ma Zóà-hwɔ̀ɖɔ̀ɔ̀ múɛɛ, dyóɖóɔ̀ wóɖó ma xwáɖáún. 24Púɛɛ, Bounɓoɔ̀ nyuɛ ké sɔ́fà-sɔ̀ɔ̌ ɓɛ́ ɔ nì ma kà nyɛ-kɛ̀nɛ̀ nìà kɛɛ sɔ̀ ma ɖé dyɔún, ké ɔ wáɖáìn ma Sáɖɔ̀ùn kè Gòmɔ́ɖɔ̀-hwɔ̀ɖɔ̀ ɓěɔ̀ kɔ̃in kà ní ɖaɓaà kɛ, 25ké ɔ gbɔɔ̀ ma bɔɔ-kpà gànáɔ̀ hwɔɖɔ ɓěɔ̀ kè nyɔ séín ɓě cĩ́ ma ɖé hwɔɖɔ ɓěɔ̀ múɛ ɔ kè ɖɛ séín mɛ ma ɖé ɓóɖóɔ̀ múɛɛ mú. 26Kɛɛ Ɖáà gmààɔ̀ gmɔ̀ ma ɖe, ké ɔ zɛ̃̀ìn ma tɔ̃́-tòɖò mú.
27Wéɔ̀ nyɔ kɔ ma ɓó dyíɛɛ gànà-kṹún mɛ̀nɛ̀ɛ̀ kɛɛ, Ééɓòɖòhɛ̃́ɛ̀ sɔ̀ ma dyí, ké ɔ mu ma ɖé pá kɔ̃̀ mú ɓɛ́ ɔ ɖǎ ma kà ɓó Bounɓoɔ̀ dyúa dyi nyànà kĩ́ín nyɛ. 28Ké ɔ gmɔìn ma Sáɖɔ̀ùn kè Gòmɔ́ɖɔ̀-hwɔ̀ɖɔ̀ ɓěɔ̀ kè bɔɔ-kpà gànáɔ̀ kɔ̃in, ké ɔ dyé ma ɖé nyànà-sò kuún-kuún kà nyànà-sò sɔ̀à nyɛ-ɓɔ́ɔ́ vɛ̀nɛ̀ ɖò múɛɛ nìà kɛ. 29Kɛɛ ti ɓɛ́ Gèɖèpɔ́ɔ̀ gbɔɔ̀ ma kà hwɔɖɔ ɓě nì ma kà ɖé bɔɔ-kpàɔ̀ kɔ̃ɛ múɛɛ, Ééɓòɖòhɛ̃́ɛ̀ jè nì ma ɔ hwìɖǐi, ké ɔ póìn ma Ɖáà, ké Ɖáà se ma mú gbɔɔ̀, ti ɓɛ́ ɔ gbɔɔ̀ ma kà hwɔɖɔ ɓě kɔ̃̀ mú Ɖáà cĩ́ ma kà kɛɛ múɛ.
Ɖáà kè ɔ dyú-màà ɓěɔ̀
30Hwɛ̀ ké Ɖáà kè ɔ dyú-màà sɔ̃́ ɓěɔ̀ sɔ̀ ma ɖé Zóà-hwɔ̀ɖɔ̀ɔ̀ mú, ké wa cĩ́ ma ɖé toɖo ɓěɔ̀ ɖò gbo, sepóɛɖé wa fɛ̃̀ìn ma ɓɛ́ wa ké ma ɖé Zóà-hwɔ̀ɖɔ̀ɔ̀ mú cĩ́. Ɔ kè ɔ dyú-màà sɔ̃́ ɓěɔ̀ cĩ́ ma ɖé ɓí vɛ̀nɛ̀ ɖò mú. 31Wé ɖòɛ̀ ɓaɖaa, Ɖáà nyíɔ́-dyùɔ̀ cɛ̃ɛ ma nyɔ dyùwèɔ̀ gbo, ké ɔ ɖá, “Dyéɛ, à ɓǎ ɖǎ nyɛ, ké gàa ɖò se nì ɓɛ́ à kè wa ké ɓó da nì kà nyɔ séín nyuà ɓóɖó-kpàà kɔ̃ɛ. 32Dyi, ɓɛ́ à ké à ɓǎ wã́ìn ɓáún-ɓáún nyí, ɓɛ́ ɔ ké ɔ nyu, nìí ɓɛ́ à kè ɔ ké ɓó da nì, ɓɛ́ à kè à ɓǎ ké dyú wóɖóìn.” 33Ɔ jèɛɛ, wa nyuɛ ké wa ɓǎ ná ma wã́ìn ɓáún-ɓáún ɓó máaún-hwùɖùɔ̀ mú. Ké ɔ nyíɔ́-dyùɔ̀ mu, ké ɔ kè ɔ ɓǎ nì ma ɓó da. Kɛɛ ɔ se ma ti ɔ dyú-mààɔ̀ pɛ̃́ ma dyiɛ mɔɔ ti ɔ sɔ̀ ma dyíɛɛ dyí dyuò.
34Wéɔ̀ nyɔ kɔ ma ɓó dyíɛɛ, ɔ nyíɔ́-dyùɔ̀ cɛ̃ɛ ma nyɔ dyùwèɔ̀ gbo, ké ɔ ɖá, “Dyéɛ, ḿ kè ḿ ɓǎ nì ɓó da ɓó máaún-hwùɖù zià dyiɛɛ mú. À mɛ nyuɛ ɓɛ́ ɔ ké wã́ìn ɓáún-ɓáún ná ɖe ɓó máaǔn, nìí ɓɛ́ mɔ̀ùn ké mu, ɓɛ́ m̀ kè ɔ ké ɓó da nì ɖekè, ɓɛ́ à kè à ɓǎ ké dyú wóɖóìn.” 35Ɔ jèɛɛ, wa nyuɛ ké wa ɓǎ ná ma wã́ìn ɓáún-ɓáún ɓó máaún-hwùɖùɔ̀ dyɛ mɔ̀ɔ̀ mú ɖekè. Ké ɔ dyú-màà dyùwèɔ̀ mu, ké ɔ kè ɔ ɓǎ nì ma ɓó da. Kɛɛ ɔ se ma ti ɔ dyú-màà dyùwèɔ̀ pɛ̃́ ma dyiɛ mɔɔ ti ɔ sɔ̀ ma dyíɛɛ dyí dyuò. 36Hwɛ̀ ké Ɖáà dyú-màà sɔ̃́ ɓěɔ̀ nì ma zùù kɔ̃ dyììn ɖé wa ɓǎɔ̀ mú. 37Ké ɔ nyíɔ́-dyùɔ̀ wóɖóìn ma gàa-dyù ɖò. Ké ɔ jǔìn ma ɔ Móà-nyɛ̀nɛ̀.#19:37 Móà-nyɛ̀nɛ̀ɔ̀ xwíníín mɔ̀ sɔ̀ ɖé ɓǎ mú. Ɔ mɔ̀à Móà-nyɔ̀ ɓěɔ̀ ɓǎ kɛ̀. 38Ɔ dyú-màà dyùwèɔ̀ mɔ̀ùn wóɖóìn ma gàa-dyù ɖò ɖekè. Ké ɔ jǔìn ma ɔ Bɛ̃̀námì-nyɛ̀nɛ̀.#19:38 Bɛ̃̀námì-nyɛ̀nɛ̀ɔ̀ xwíníín mɔ̀ ní nyɔ ɓěɔ̀ dyú. Ɔ mɔ̀à Ámànà-nyɔ̀ ɓěɔ̀ ɓǎ kɛ̀.
Bassa Bible © Bible Society Liberia, 2002.