Jɔ̃́ɔ́ 6
6
Jízɛ̀ nyí gàa táázĩ̀ìn hm̀m̌ ɖii-ɖɛ̀
(Máfíò 14:13-21; Máà 6:30-44; Ɖúù 9:10-17)
1Ti ɖɛa ɖǎ ma dyi ziɛɛ, Jízɛ̀ mu ma Gáɖàɖíì Dòùnɓìǎ mɔ̀à Tàbíwìɖìà kɛɛ ɖeín. 2Ké nyɔ kúɖúú ɓě sí ma ɔ kíɖíí, sepóɛɖé wa dyé zɛ̃̀ìn-ɖɛ̀ ɓě ɓɛ́ ɔ nyu ma ɓá wɛ́-nyɔ̀ ɓě ɓɛ́ ɔ kánáìn ma kà dyiɛɛ jè dyíɛɛ ní. 3Jízɛ̀ mu ma toɖo ɖò dya, ké ɔ kè ɔ ɖeín-nà-nyɔ̀ ɓěɔ̀ kò ma ɖé dyi. 4Ɔ mɔ̀ ma ti ɓɛ́ Júù-nyɔ̀ ɓěɔ̀ kéá Zĩ̀ìn-Kɔ̃in-hwɔ̀ɔ̀ pa. 5Jízɛ̀ gmɔìn ma dyi, ké ɔ dyéɛ ma kà nyɔ kúɖúú ɓě nì ma ɔ gbo dyiɛń nyɛ. Ɔ jèɛɛ, ɔ diè ma Féɖò dyi, ké ɔ ɖá, “Dɛ̌ à ɓɛ́ìn ɖii-ɖɛ̀ dɔ̃ɔ, ɓɛ́ nyɔ kúɖúú ɓěɛ̀ kéɛ ɖiɛ́?” 6Ɔ cɛ̃ ma ɖɛa, ɓɛ́ ɔ ké ma Féɖò mú dɔ̃̌, sepóɛɖé ɔ mìɔùn dyuò ɖɛ ɔ mu ma nyuùn wɛ̃.
7Ké Féɖò zà ma ɖé wuɖu, ké ɔ ɖá, “Nyɔ nì kũ̀à nyuɛń nyɛɛ dɛ̀nɛ̀ mɛ̀nɛ̌ìn-tãà wíɖí se bɛɖɛɛ̀ jĩ̀ kà ké nyɔ ɓěɛ̀ dyí gbɛ̌ɛ dɔ̃ɔ ɓɛ́ìn, ɓɛ́ nyɔ séín kéɛ ɖò wè dyé dyɛ mɔ̀ùn.”
8Púɛɛ, Ã́dòɖò mɔ̀à Jízɛ̀ɛ̀ ɖeín-nà-nyɔ̀ ɓěɔ̀ ɖò, ɓɛ́ ɔ mɔ̀à Sã́ɓò Píɖɛ̀ɛ̀ ɖíí-gààɔ̀ kɛɛ cɛ̃ɛ ma ɔ gbo, ké ɔ ɖá, 9“Gàa-dyù ɖò nì dà ɓó, ké ɔ ɓéɖé báɖè-bɛ̀ɖɛ̀ɛ̀-kpò hm̀m̌ kè zimii-dyù sɔ̃́. Kɛɛ ɖɛ́ wa ɓɛ́ìn nyɔ jĩ̀ kà ɓěɛ̀ dyí nyuɛ kɛ́?”
10Ké Jízɛ̀ ɖá, “Ɓě nyuɛ ɓɛ́ nyɔ ɓěɔ̀ ké dyi kò.” Pìǐ pàɖǎ nì ma ɓó páɔ̀ mú. Nyɔ séín ɓěɔ̀ kò ma dyi. Gàa ɓěɔ̀ ɓɛ́ìn ma gàa táázĩ̀ìn hm̀m̌ jǔɛ. 11Jízɛ̀ ɖú ma bɛɖɛɛ̀ɔ̀ dyí, ké ɔ po ma Gèɖèpɔ́ɔ̀ zùo, ké ɔ geɛ̀n ma nyɔ ɓě ɓɛ́ wa koìn ma kà dyiɛɛ múin. Kǎà ɔ nyu ma zimiiɔ̀ ɖekè. Ké wa séín ɖi ma ɔ jĩ̀ kà wa ɓɛ́ìn ma ɖiɛ kɛ. 12Ti ɓɛ́ wa ɖǎ ma ɖoɓo kɛɛ, Jízɛ̀ cɛ̃ɛ ma ɔ ɖeín-nà-nyɔ̀ ɓěɔ̀ gbo, ké ɔ ɖá, “Ɓě poìn bɛɖɛɛ̀ɔ̀ kè zimiiɔ̀ nyɔ sèà dyiɛɛ dyí, ɓɛ́ ɖò ní kɔ̃̀ ɖà mú gbɔɔ̀.” 13Ɔ jèɛɛ, wa poìn ma ɔ séín dyí. Ké báɖè-bɛ̀ɖɛ̀ɛ̀-kpò hm̀m̌ ɓɛ́ nyɔ ɓěɔ̀ ɖi ma kà kɛɛ, ɔ nyɔ sè ma kà dyiɛɛ dyí ma tìě ɓaɖa-bùè sè sɔ̃́.
14Ti nyɔ ɓě nì ma ɖéɛɛ dyé ma zɛ̃̀ìn-ɖɛ̀ ɓɛ́ Jízɛ̀ nyu ma kà kɛɛ, wa ɖá, “Kpáá-ɖɛ̀-cɛ̃-nyɔ̀ ɓɛ́ ɔ ké ma kà ɓóɖó-kpàà kɔ̃ dyiɛɛ, ɔ nìà kɛ̀ jǎà.” 15Jízɛ̀ dyuòɛ̀ ma dyí kà nyɔ ɓěɔ̀ nì ma dyiɛń, ɓɛ́ wa ké ma ɔ kpɔ̃, ɓɛ́ wa ké ma ɔ waà kã́á mú nyuɛ. Ɔ jèɛɛ, ɔ ɖòùn mu ma ɖé toɖo ɓěɔ̀ dya.
Jízɛ̀ nà ní kɔ̃in
(Máfíò 14:22-33; Máà 6:45-52)
16Ti hwìo ɖǎ ma jǔɛɛ, Jízɛ̀ɛ̀ ɖeín-nà-nyɔ̀ ɓěɔ̀ mu ma ɖé dòùnɓìǎɔ̀ wĩín. 17Ké wa dyá ma ɓáɖáà ɖò mú, ké wa nì ma ɖé Kɔ̀pánìà-hwɔ̀ɖɔ̀ ɓɛ́ ɔ nì ma ɖé dòùnɓìǎɔ̀ ɖeín nyɛɛ mú muɛń. Tíe ɖǎ ma kpɔ̃, ké Jízɛ̀ séè ma ɖé wa gbo mu ke. 18Dìì nì ma dyiɛń, ké ɔ nyuɛ ké níɔ̀ nì ma dyi túòɛ̌n. 19Ti ɖeín-nà-nyɔ̀ ɓěɔ̀ ɓɛ́àìn ma máa tã mɔɔ máa hĩinyɛ ɓìɖìɛ̀n nyɛɛ, púɛɛ, wa dyé ma Jízɛ̀, ké ɔ nì ma níɔ̀ kɔ̃in nàǔn. Ti ɔ nìǎ ma ɓáɖáàɔ̀ bũ̌in xwɛ̃́ǐn nyɛɛ, díɖí taɓa ma wa mìɔ. 20Ké Jízɛ̀ cɛ̃ɛ ma wa gbo, ké ɔ ɖá, “Ɔ mɔ̀ mɔ̄. Ɓě ɓɔ́ fɛ̃̀ìn.” 21Púɛɛ, wa wɔ̃́ ɓɛ́ wa ké ma ɖé ɔ ɓáɖáàɔ̀ mú dyáìn. Ké wàɖà cá kɛɛ, ɓáɖáàɔ̀ nyini ma dɛ̀ wa nì ma kà muɛń nyɛ.
Nyɔ ɓěɔ̀ mɔ́ Jízɛ̀ dyi
22Wéɔ̀ nyɔ kɔ ma ɓó dyíɛɛ, nyɔ ɓě ɓɛ́ wa sè ma kà ɖé dòùnɓìǎɔ̀ ɖeín nyɛɛ, wa dyuòɛ̀ kà ɓɛ́ ɓáɖáà dyúáɖò nyɛ̀nɛ̀ɛ̀ mɔ̀ ɖɛ nì ma ɓó kɛ. Wa dyuòɛ̀ kà Jízɛ̀ se ma ɖé ɓáɖáà dyúáɖò kɔ̃̀ mú ɓɛ́ ɔ ɖeín-nà-nyɔ̀ ɓěɔ̀ dyá ma kà kɛɛ mú dyáa. Wa dyuò kà ɔ ɖeín-nà-nyɔ̀ ɓěɔ̀ ɖòùn mu ma kɛ. 23Ɓáɖáà tɔ̀ɔ̀ ɓě ɓɛ́ wa sɔ̀ìn Tàbíwìɖìà-hwɔ̀ɖɔ̀ɔ̀ mú kɛɛ mu ma kpóóɔ̀ dyéɖéí. Ɔ xwɛ̃́ìn ma dɛ̀ ɓɛ́ Bounɓoɔ̀ ɖǎ ma kà Gèɖèpɔ́ɔ̀ zùo po, ké nyɔ ɓěɔ̀ ɖǎ ma kà bɛɖɛɛ̀ɔ̀ ɖiɛɛ dyi. 24Ti nyɔ kúɖúú ɓěɔ̀ dyéɛ ma kà Jízɛ̀ kè ɔ ɖeín-nà-nyɔ̀ ɓěɔ̀ se ma ɓó nì ɖeɛɛ, púɛɛ, wa dyá ma ɓáɖáà ɓěɔ̀ mú, ké wa mu ma ɖé Kɔ̀pánìà-hwɔ̀ɖɔ̀ɔ̀ mú, ké wa kpa ma Jízɛ̀ dyi mɔ́ɔ.
Jízɛ̀ mɔ̀ bɛɖɛɛ̀ nyíà nyɔǔn fɛ̀ɛ̀ kɛ
25Ti nyɔ ɓěɔ̀ dyé ma Jízɛ̀ ɖé dòùnɓìǎɔ̀ wáká tɔ̀ɔ̀ kɔ̃ɛɛ, wa diè ma ɔ dyi, ké wa ɖá, “Nyɔ-ɖɛ-tɛ̀mɛ̀ìn-nyɔ̀, tiɔ̀ nyɛ́ m̀ dyi ma nɔ̄ kɛ́?”
26Ké Jízɛ̀ zà ma ɖé wuɖu, ké ɔ ɖá, “Ḿ cɛ̃ ɓě jǎà gbo, ɓě nì ḿ dyi mɔ́uń, sepóɛɖé ɓě ɖi ma bɛɖɛɛ̀ɔ̀, ké ɓě ɖoɓo ma jè. Ɔ se zɛ̃̀ìn-ɖɛ̀ ɓě ɓɛ́ ɓě dyé ma ḿ nyuɛ kɛɛ jè. 27Ɓěǐn ɖá ɓɛ́ ɓě ké ɖii-ɖɛ̀ ɓɛ́ ɔ ɓɛ́ìn kà mú gbɔɔ̀ kɛɛ jè kũ̀à nyu. Kɛɛ ɓě mɛ nyu kũ̀à ɓó ɖii-ɖɛ̀ɔ̀ nyɔ muà nììn ɓó sè-ná-sèɛ̀ fɛ̀ɛ̀ jèɛɛ bìì. Mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ mu ɓě ɖii-ɖɛ̀ nìà kɛ nyíìn, sepóɛɖé Gèɖèpɔ́ɔ̀ mɔ̀à Ɓǎɔ̀ kɛɛ ɖǎ ɔ dyí-dyuòìn-bɛ̃̀ɔ̀ ḿ kɔ̃ po.”
28Púɛɛ, wa diè ma ɔ dyi, ké wa ɖá, “Ɖɛ́ à ɓɛ́ìn nyuɛ ɓɛ́ à ké Gèɖèpɔ́ɔ̀ kũ̀à ɓě nyuɛ́?”
29Ké Jízɛ̀ zà ma ɖé wuɖu, ké ɔ ɖá, “Kũ̀à ɓɛ́ Gèɖèpɔ́ɔ̀ mɔ́ ɓɛ́ ɓě ké nyuɛɛ, ɔ kɛ̀. Ɔ mɔ̀ ɓě ké nyɔ ɓɛ́ ɔ ɖǎà ɖoɓo kɛɛ hwìɖǐǐ taɓa.”
30Ké wa cɛ̃ɛ ɖe, ké wa ɖá, “Zɛ̃̀ìn-ɖɛ̀ɔ̀ nyɛ́ nì mu nyuùn, ɓɛ́ à kéɛ dyé, ɓɛ́ à ké m̀ hwìɖǐǐ taɓaá? Ɖɛ́ nì mu nyuùn wɛ̃́? 31À ɓǎ nììn ɓǎ ɓěɔ̀ ɖi ma mánà ɖé gbǎùn-fúɖúáɔ̀ kɔ̃ kà Gèɖèpɔ́ɔ̀-cèè-ɖɛ̀ɔ̀ nyuà cɛ̃ɛ kɛ. Ɔ ɖá, ‘Ɔ nyí ma wa bɛɖɛɛ̀ sɔ̀ìn ɖé dyɔún wɛ̃, ɓɛ́ wa kéɛ ɖi.’ ”
32Hwɛ̀ ké Jízɛ̀ cɛ̃ɛ ma wa gbo, ké ɔ ɖá, “Ḿ cɛ̃ ɓě jǎà gbo, ɖɛ Mózè nyí ma kà ɓěɛɛ, ɔ se bɛɖɛɛ̀ sɔ̀ìn kà ɖé dyɔún wɛ̃. Ḿ Ɓǎ mɔ̀ nyɔ nyí ɓě bɛɖɛɛ̀ jɛ́ɛ́ sɔ̀ìn kà ɖé dyɔún wɛ̃. 33Sepóɛɖé bɛɖɛɛ̀ ɓɛ́ Gèɖèpɔ́ɔ̀ tòɛɛ, ɔ mɔ̀ nyɔ ɓɛ́ ɔ sɔ̀à ɖé dyɔún, ké ɔ nyíà ɓóɖó-kpàà nyɔ ɓě fɛ̀ɛ̀ kɛ̀.”
34Ké wa cɛ̃ɛ ma ɔ gbo, ké wa ɖá, “Ɓɔ̌ɔ̀, nyí à bɛɖɛɛ̀ɔ̀ tee.”
35Ké Jízɛ̀ cɛ̃ɛ ma wa gbo, ké ɔ ɖá, “Mɔ̄ mɔ̀ bɛɖɛɛ̀ nyíà nyɔǔn fɛ̀ɛ̀ kɛ. Nyɔ mɔ̀ nyɔ dyi ḿ gbo kɛɛ, mɔ́ se ɔ nyuɛ́ mu. Ké nyɔ mɔ̀ nyɔ taɓa ḿ hwìɖǐǐɛɛ, ní-ná-tò se ɔ nyuɛ́ mu fɔɔ. 36Ḿ cɛ̃ɛ ma ɓě gbo kà ɓɛ́ ɓě ɖǎ ma ḿ dyéɛ, kɛɛ ɓě se ḿ hwìɖǐǐ taɓa. 37Nyɔǔn séín ɓě ɓɛ́ ḿ Ɓǎ nyíín nyɛɛ mu ḿ gbo dyiìn, ké ḿ se nyɔ ɓě ɓɛ́ wa mu ḿ gbo dyiìn nyɛɛ ɓɔ́ɔ mu. 38Sepóɛɖé ḿ sɔ̀ ɖé dyɔún, ké ḿ dyi ɓíɖíi, ɓɛ́ ḿ ké nyɔ ɖoɓoà ḿ wɛ̃ɛ mɔ́ɔ́-ɖɛ̀ nyu. Ḿ se dyi, ɓɛ́ ḿ ké ḿ mìɔùn nììn mɔ́ɔ́-ɖɛ̀ nyu. 39Ɖɛ ɓɛ́ nyɔ ɖoɓoà ḿ wɛ̃ɛ mɔ́ ɓɛ́ ḿ ké nyuɛɛ kɛà kɛ̀. Ɔ mɔ̀, ɓɛ́ ḿ ké se nyɔǔn séín ɓě ɓɛ́ ɔ ɖǎ ma ḿ nyíɛɛ ɖò xwáɖáún sè. Ɔ mɔ́, ɓɛ́ ḿ ké wa séín gĩɔ zà ɖé wé hwɛ̀ìn-gbɔɔ̀ mú. 40Ɖɛ ḿ Ɓǎ mɔ́ kɛɛ kɛà kɛ̀. Ɔ mɔ̀, ɓɛ́ nyɔǔn séín ɓɛ́ wa dyé Dyú-gààɔ̀, ké wa taɓa ɔ hwìɖǐǐɛɛ ké sè-ná-sèɛ̀ fɛ̀ɛ̀ ɓéɖé. Ní mu wa gĩɔ zàùn ɖé wé hwɛ̀ìn-gbɔɔ̀ mú.”
41Ɓó tia ɓaɖaa, Júù-nyɔ̀ ɓěɔ̀ ɖú ma jɛ kpàǐ, sepóɛɖé ɔ ɖá, “Mɔ̄ mɔ̀ bɛɖɛɛ̀ ɓɛ́ ɔ sɔ̀ìn kà ɖé dyɔún wɛ̃.” 42Wa ɖá, “Gàa nìà kɛ se Jízɛ̀ mɔ̀à Jòséɛ̀ dyú-gààɔ̀ kɛɛ̀? À dyuò ɔ ɖe kè ɔ ɓǎ dyí. Kà ɔ nìà náa, nìí, xwɛ̌ ɔ nyuà cɛ̃ɛ kàǔn kà ɓɛ́ ɔ sɔ̀ ɖé dyɔún wɛ̃́?”
43Ké Jízɛ̀ cɛ̃ɛ ma wa gbo, ké ɔ ɖá, “Ɓě mɛ ɓɔ́ jɛɛ ɓó ɓě mìɔùn pṹa dyi. 44Nyɔ ɖò se ḿ gbo dyiɛ ɓɛ́ìn, ḿ Ɓǎ mɔ̀ nyɔ ɖoɓoà ḿ wɛ̃ɛ dyà dyɛ ɔ ḿ gbo hwɛ̀. Ké ní mu ɔ gĩɔ zàùn ɖé wé hwɛ̀ìn-gbɔɔ̀ mú. 45Ɖɛ kpáá-ɖɛ̀-cɛ̃-nyɔ̀ ɓěɔ̀ céè ma kɛɛ kɛà kɛ̀. Ɔ mɔ̀, ‘Gèɖèpɔ́ɔ̀ mɔ̀ nyɔ mu nyɔǔn séín ɖɛ tɛ̀mɛ̀ìn.’ Nyɔǔn séín ɓě ɓɛ́ wa wɔ̃́ Ɓǎɔ̀ wuɖu, ké ɔ tɛ̀mɛ̀ìn wa ɖɛ kɛɛ mɔ̀ nyɔ dyi ḿ gbo. 46Ɔ xwíníín se mɔ̀ kà ɓɛ́ nyɔ ɖò ɖǎ Ɓǎɔ̀ dyéɛ. Nyɔ mɔ̀ nyɔ sɔ̀ìn kà ɖé Gèɖèpɔ́ɔ̀ gboɛɛ ɖòùn mɔ̀ nyɔ ɖǎ Ɓǎɔ̀ dyé. 47Ḿ cɛ̃ ɓě jǎà gbo, nyɔ mɔ̀ nyɔ ɓɛ́ ɔ taɓa ḿ hwìɖǐǐɛɛ ɓéɖé sè-ná-sèɛ̀ fɛ̀ɛ̀. 48Mɔ̄ mɔ̀ bɛɖɛɛ̀ nyíà nyɔǔn fɛ̀ɛ̀ kɛ. 49Ɓě ɓǎ nììn ɓǎ ɓěɔ̀ ɖi ma mánàɔ̀ ɖé gbǎùn-fúɖúáɔ̀ kɔ̃, kɛɛ wa mɛ́ ma ní. 50Kɛɛ kà bɛɖɛɛ̀ ɓɛ́ ɔ sɔ̀ìn kà ɖé dyɔún wɛ̃ɛ nyu nìɛ̀ kɛɛ, ɔ kɔ̃̀ jè nyɔ ɖiɛ kɛɛ se mɛ́ɛ mu. 51Mɔ̄ mɔ̀ bɛɖɛɛ̀ ɓéɖé fɛ̀ɛ̀ ɓɛ́ ɔ sɔ̀ìn kà ɖé dyɔún wɛ̃. Nyɔ ɖò dyi bɛɖɛɛ̀ nìà kɛ ɖiín, ɔ mu cĩ́ìn ɓó sè-ná-sèɛ̀ tiín. Ké bɛɖɛɛ̀ ɓɛ́ ní muà ɔ nyíìn nyɛɛ, ɔ mɔ̀ ní fɔ́ ɓɛ́ ḿ tòà, ɓɛ́ ɓóɖó-kpàà nyɔ ɓě kéà fɛ̀ɛ̀ ɓéɖéɛ.”
52Púɛɛ, Júù-nyɔ̀ ɓěɔ̀ ɖú ma dòǐn zà kpàǐ ɖé wa mìɔùn hwìɛ̀. Wa cɛ̃ɛ, ké wa ɖá, “Xwɛ̌ gàa nìà kɛ ɓɛ́ìn ɔ fɔ́ɔ̀ à nyíɛ, ɓɛ́ à kéɛ tà kɛ́?”
53Ké Jízɛ̀ cɛ̃ɛ ma wa gbo, ké ɔ ɖá, “Ḿ cɛ̃ ɓě jǎà gbo, ɔ jǔ ké ɓě se mɔ̄ Nyɔǔn-dyùɛ̀ Dyú-gààɔ̀ fɔ́ɔ̀ tà, ké ɓě se ní nyɔmɔɔ̀ náín, fɛ̀ɛ̀ se ɖé ɓě mú nìɛ̌ mu. 54Nyɔ mɔ̀ nyɔ tà ní fɔ́ɔ̀, ké ɔ ná ní nyɔmɔɔ̀ kɛɛ ɓéɖé sè-ná-sèɛ̀ fɛ̀ɛ̀, ké ní mu ɔ gĩɔ zàùn ɖé wé hwɛ̀ìn-gbɔɔ̀ mú. 55Sepóɛɖé ní fɔ́ɔ̀ mɔ̀ ɖii-ɖɛ̀ jǎà, ké ní nyɔmɔɔ̀ mɔ̀ náá-ɖɛ̀ jǎà. 56Nyɔ mɔ̀ nyɔ tà ní fɔ́ɔ̀, ké ɔ ná ní nyɔmɔɔ̀ kɛɛ cĩ́ ɖé ḿ mú, ké ḿ cĩ́ ɖé ɔ mɔ̀ùn mú. 57Kà ḿ Ɓǎ mɔ̀ nyɔ cĩ́à kɛɛ ɖoɓoà ḿ, ké ɔ nyuɛ ké ḿ cĩ́à kɛɛ, kà dyúáɖòɔ̀ kǎà nyɔ mɔ̀ nyɔ mu ḿ tàùn wɛ̃ɛ, ní muɛ nyuùn ɓɛ́ ɔ ké cĩ́ ɖekè. 58Ɖɛ nìà kɛ mɔ̀ bɛɖɛɛ̀ ɓɛ́ ɔ sɔ̀ìn kà ɖé dyɔún wɛ̃. Ɔ se nì kà bɛɖɛɛ̀ ɓɛ́ ɓě ɓǎ nììn ɓǎ ɓěɔ̀ ɖi ma kà ké wa mɛ́ ma kà kɛɛ nìà kɛ. Nyɔ mɔ̀ nyɔ mu bɛɖɛɛ̀ɔ̀ nyɔ nìà kɛ ɖiìn nyɛɛ, ɔ mu cĩ́ìn kánáá pū.”
59Jízɛ̀ cɛ̃ ma ɖɛ nìà kɛ ti ɓɛ́ ɔ nì ma nyɔ ɓěɔ̀ ɖɛ tɛ̀mɛ̀ǐn ɖé Júù-nyɔ̀ ɓěɔ̀ cɔ́cì-gbòɔ̀ mú ɖé Kɔ̀pánìà-hwɔ̀ɖɔ̀ɔ̀ múɛ.
Sè-ná-sèɛ̀ fɛ̀ɛ̀-wùɖùɔ̀
60Ti ɓɛ́ Jízɛ̀ɛ̀ ɖeín-nà-nyɔ̀ ɓěɔ̀ pàɖǎ wɔ̃́ ma ɖɛa kɛɛ, wa cɛ̃ɛ ma, ké wa ɖá, “Tɛ̀mɛ̀ìn-ɖɛ̀ nìà kɛ zi mú kàmàǔn mìɔ. Nyɛ́ ɓɛ́ìn múin wɔ̃́ɔ kɛ́?”
61Nyɔ ɖò se ma Jízɛ̀ ɖɛa gbo cɛ̃, kɛɛ ɔ dyuò kà ɔ ɖeín-nà-nyɔ̀ ɓěɔ̀ nì ma jɛiń ɓóɛ jè kɛ. Ɔ jèɛɛ, ɔ diè ma wa dyi, ké ɔ ɖá, “Ɖɛ nìà kɛ nyuɛ ké ɓě mɔ́ ɓɛ́ ɓě ké saà? 62Ɓě dyiɔ́ mɔ̄ Nyɔǔn-dyùɛ̀ Dyú-gààɔ̀ dyé, ké ḿ dyiɔ́ ɖé dyií dɛ̀ ɓɛ́ ḿ nì ma kĩ́ín nyɛɛ muɛń nìǐn, nìí, xwɛ̌ ɔ jè mu nììn nyɛ́? 63Ɖɛ nyí nyɔǔn fɛ̀ɛ̀ kɛɛ, ɔ mɔ̀ Zùùɔ̀. Fɔ́ɔ̀ se ɖɛ ɖò nyuɛ ɓɛ́ìn fɔɔ. Wuɖu ɓě ɓɛ́ ḿ cɛ̃à ɓě gbo kɛɛ, wa mɔ̀ Zùù kè fɛ̀ɛ̀. 64Kɛɛ ɓě ɖíɛ́ ɓě se hwìɖǐǐ-taɓa-taɓa ɓéɖé.” Sepóɛɖé Jízɛ̀ dyuò ma nyɔ ɓě ɓɛ́ wa se ma ɔ hwìɖǐǐ taɓaá muɛ kè nyɔ ɓɛ́ ɔ mu ma ɔ ɔ mú-nyɛ́-nyɔ̀ ɓěɔ̀ xwáɖáún zàìn nyɛɛ dyí kĩ́ín. 65Ké ɔ ɖá, “Ɖɛ kɔ̃̀ jè ḿ cɛ̃à ɓě gbo kà ɓɛ́ nyɔ ɖò se ḿ gbo dyiɛ ɓɛ́ìn, Ɓǎɔ̀ nyuɛ ké ɔ dyi dyɛ ḿ gbo hwɛ̀ɛ nìàǒ wɛ̀.”
66Ɓó ɖɛa jèɛɛ, ɔ ɖeín-nà-nyɔ̀ ɓěɔ̀ pàɖǎ kɔ́ìn ma ɖe, ké wa kèɔ̀ kè se ma mú naìn ɖe. 67Púɛɛ, Jízɛ̀ diè ma ɖeín-nà-nyɔ̀ ɓaɖa-bùè sè sɔ̃́ ɓěɔ̀ dyi, ké ɔ ɖá, “Ɓě mɔ̀ùn mɔ́ ɓɛ́ ɓě ké mu ɖekèè?”
68Ké Sã́ɓò Píɖɛ̀ zà ma ɖé wuɖu, ké ɔ ɖá, “Bounɓo, nyɛ́ à ké gbo muɛ́? Mɔ̀ mɔ̀ nyɔ ɓéɖé wuɖu ɓě nyíà nyɔǔn sè-ná-sèɛ̀ fɛ̀ɛ̀ kɛ. 69Ké à poɛ jǎà, ké à dyuòɛ̀ kà mɔ̀ mɔ̀ Mú-hwɛ̀-nyɔ̀ sɔ̀ìn kà ɖé Gèɖèpɔ́ɔ̀ gboɛ.”
70Púɛɛ, Jízɛ̀ zà ma ɖé wuɖu, ké ɔ ɖá, “Má, ɓě mɔ̀ nyɔ-kpò ɓaɖa-bùè sè sɔ̃́, ké ḿ gã ɓěe? Kɛɛ dyéɛ, ɓě dyúáɖò mɔ̀ nɔɔ́-nàmàǔn.” 71Ɔ nì ma Júdà mɔ̀à Sã́ɓò Ɛ́sìkáɖìɔ̀ dyú-gààɔ̀ kɛɛ jè cɛ̃iń. Sepóɛɖé Júdà mɔ̀ ma ɖeín-nà-nyɔ̀ ɓaɖa-bùè sè sɔ̃́ ɓěɔ̀ ɖò dyɛo, kɛɛ ɔ mu ma Jízɛ̀ ɔ mú-nyɛ́-nyɔ̀ ɓěɔ̀ xwáɖáún zàìn.
Bassa Bible © Bible Society Liberia, 2002.
Jɔ̃́ɔ́ 6
6
Jízɛ̀ nyí gàa táázĩ̀ìn hm̀m̌ ɖii-ɖɛ̀
(Máfíò 14:13-21; Máà 6:30-44; Ɖúù 9:10-17)
1Ti ɖɛa ɖǎ ma dyi ziɛɛ, Jízɛ̀ mu ma Gáɖàɖíì Dòùnɓìǎ mɔ̀à Tàbíwìɖìà kɛɛ ɖeín. 2Ké nyɔ kúɖúú ɓě sí ma ɔ kíɖíí, sepóɛɖé wa dyé zɛ̃̀ìn-ɖɛ̀ ɓě ɓɛ́ ɔ nyu ma ɓá wɛ́-nyɔ̀ ɓě ɓɛ́ ɔ kánáìn ma kà dyiɛɛ jè dyíɛɛ ní. 3Jízɛ̀ mu ma toɖo ɖò dya, ké ɔ kè ɔ ɖeín-nà-nyɔ̀ ɓěɔ̀ kò ma ɖé dyi. 4Ɔ mɔ̀ ma ti ɓɛ́ Júù-nyɔ̀ ɓěɔ̀ kéá Zĩ̀ìn-Kɔ̃in-hwɔ̀ɔ̀ pa. 5Jízɛ̀ gmɔìn ma dyi, ké ɔ dyéɛ ma kà nyɔ kúɖúú ɓě nì ma ɔ gbo dyiɛń nyɛ. Ɔ jèɛɛ, ɔ diè ma Féɖò dyi, ké ɔ ɖá, “Dɛ̌ à ɓɛ́ìn ɖii-ɖɛ̀ dɔ̃ɔ, ɓɛ́ nyɔ kúɖúú ɓěɛ̀ kéɛ ɖiɛ́?” 6Ɔ cɛ̃ ma ɖɛa, ɓɛ́ ɔ ké ma Féɖò mú dɔ̃̌, sepóɛɖé ɔ mìɔùn dyuò ɖɛ ɔ mu ma nyuùn wɛ̃.
7Ké Féɖò zà ma ɖé wuɖu, ké ɔ ɖá, “Nyɔ nì kũ̀à nyuɛń nyɛɛ dɛ̀nɛ̀ mɛ̀nɛ̌ìn-tãà wíɖí se bɛɖɛɛ̀ jĩ̀ kà ké nyɔ ɓěɛ̀ dyí gbɛ̌ɛ dɔ̃ɔ ɓɛ́ìn, ɓɛ́ nyɔ séín kéɛ ɖò wè dyé dyɛ mɔ̀ùn.”
8Púɛɛ, Ã́dòɖò mɔ̀à Jízɛ̀ɛ̀ ɖeín-nà-nyɔ̀ ɓěɔ̀ ɖò, ɓɛ́ ɔ mɔ̀à Sã́ɓò Píɖɛ̀ɛ̀ ɖíí-gààɔ̀ kɛɛ cɛ̃ɛ ma ɔ gbo, ké ɔ ɖá, 9“Gàa-dyù ɖò nì dà ɓó, ké ɔ ɓéɖé báɖè-bɛ̀ɖɛ̀ɛ̀-kpò hm̀m̌ kè zimii-dyù sɔ̃́. Kɛɛ ɖɛ́ wa ɓɛ́ìn nyɔ jĩ̀ kà ɓěɛ̀ dyí nyuɛ kɛ́?”
10Ké Jízɛ̀ ɖá, “Ɓě nyuɛ ɓɛ́ nyɔ ɓěɔ̀ ké dyi kò.” Pìǐ pàɖǎ nì ma ɓó páɔ̀ mú. Nyɔ séín ɓěɔ̀ kò ma dyi. Gàa ɓěɔ̀ ɓɛ́ìn ma gàa táázĩ̀ìn hm̀m̌ jǔɛ. 11Jízɛ̀ ɖú ma bɛɖɛɛ̀ɔ̀ dyí, ké ɔ po ma Gèɖèpɔ́ɔ̀ zùo, ké ɔ geɛ̀n ma nyɔ ɓě ɓɛ́ wa koìn ma kà dyiɛɛ múin. Kǎà ɔ nyu ma zimiiɔ̀ ɖekè. Ké wa séín ɖi ma ɔ jĩ̀ kà wa ɓɛ́ìn ma ɖiɛ kɛ. 12Ti ɓɛ́ wa ɖǎ ma ɖoɓo kɛɛ, Jízɛ̀ cɛ̃ɛ ma ɔ ɖeín-nà-nyɔ̀ ɓěɔ̀ gbo, ké ɔ ɖá, “Ɓě poìn bɛɖɛɛ̀ɔ̀ kè zimiiɔ̀ nyɔ sèà dyiɛɛ dyí, ɓɛ́ ɖò ní kɔ̃̀ ɖà mú gbɔɔ̀.” 13Ɔ jèɛɛ, wa poìn ma ɔ séín dyí. Ké báɖè-bɛ̀ɖɛ̀ɛ̀-kpò hm̀m̌ ɓɛ́ nyɔ ɓěɔ̀ ɖi ma kà kɛɛ, ɔ nyɔ sè ma kà dyiɛɛ dyí ma tìě ɓaɖa-bùè sè sɔ̃́.
14Ti nyɔ ɓě nì ma ɖéɛɛ dyé ma zɛ̃̀ìn-ɖɛ̀ ɓɛ́ Jízɛ̀ nyu ma kà kɛɛ, wa ɖá, “Kpáá-ɖɛ̀-cɛ̃-nyɔ̀ ɓɛ́ ɔ ké ma kà ɓóɖó-kpàà kɔ̃ dyiɛɛ, ɔ nìà kɛ̀ jǎà.” 15Jízɛ̀ dyuòɛ̀ ma dyí kà nyɔ ɓěɔ̀ nì ma dyiɛń, ɓɛ́ wa ké ma ɔ kpɔ̃, ɓɛ́ wa ké ma ɔ waà kã́á mú nyuɛ. Ɔ jèɛɛ, ɔ ɖòùn mu ma ɖé toɖo ɓěɔ̀ dya.
Jízɛ̀ nà ní kɔ̃in
(Máfíò 14:22-33; Máà 6:45-52)
16Ti hwìo ɖǎ ma jǔɛɛ, Jízɛ̀ɛ̀ ɖeín-nà-nyɔ̀ ɓěɔ̀ mu ma ɖé dòùnɓìǎɔ̀ wĩín. 17Ké wa dyá ma ɓáɖáà ɖò mú, ké wa nì ma ɖé Kɔ̀pánìà-hwɔ̀ɖɔ̀ ɓɛ́ ɔ nì ma ɖé dòùnɓìǎɔ̀ ɖeín nyɛɛ mú muɛń. Tíe ɖǎ ma kpɔ̃, ké Jízɛ̀ séè ma ɖé wa gbo mu ke. 18Dìì nì ma dyiɛń, ké ɔ nyuɛ ké níɔ̀ nì ma dyi túòɛ̌n. 19Ti ɖeín-nà-nyɔ̀ ɓěɔ̀ ɓɛ́àìn ma máa tã mɔɔ máa hĩinyɛ ɓìɖìɛ̀n nyɛɛ, púɛɛ, wa dyé ma Jízɛ̀, ké ɔ nì ma níɔ̀ kɔ̃in nàǔn. Ti ɔ nìǎ ma ɓáɖáàɔ̀ bũ̌in xwɛ̃́ǐn nyɛɛ, díɖí taɓa ma wa mìɔ. 20Ké Jízɛ̀ cɛ̃ɛ ma wa gbo, ké ɔ ɖá, “Ɔ mɔ̀ mɔ̄. Ɓě ɓɔ́ fɛ̃̀ìn.” 21Púɛɛ, wa wɔ̃́ ɓɛ́ wa ké ma ɖé ɔ ɓáɖáàɔ̀ mú dyáìn. Ké wàɖà cá kɛɛ, ɓáɖáàɔ̀ nyini ma dɛ̀ wa nì ma kà muɛń nyɛ.
Nyɔ ɓěɔ̀ mɔ́ Jízɛ̀ dyi
22Wéɔ̀ nyɔ kɔ ma ɓó dyíɛɛ, nyɔ ɓě ɓɛ́ wa sè ma kà ɖé dòùnɓìǎɔ̀ ɖeín nyɛɛ, wa dyuòɛ̀ kà ɓɛ́ ɓáɖáà dyúáɖò nyɛ̀nɛ̀ɛ̀ mɔ̀ ɖɛ nì ma ɓó kɛ. Wa dyuòɛ̀ kà Jízɛ̀ se ma ɖé ɓáɖáà dyúáɖò kɔ̃̀ mú ɓɛ́ ɔ ɖeín-nà-nyɔ̀ ɓěɔ̀ dyá ma kà kɛɛ mú dyáa. Wa dyuò kà ɔ ɖeín-nà-nyɔ̀ ɓěɔ̀ ɖòùn mu ma kɛ. 23Ɓáɖáà tɔ̀ɔ̀ ɓě ɓɛ́ wa sɔ̀ìn Tàbíwìɖìà-hwɔ̀ɖɔ̀ɔ̀ mú kɛɛ mu ma kpóóɔ̀ dyéɖéí. Ɔ xwɛ̃́ìn ma dɛ̀ ɓɛ́ Bounɓoɔ̀ ɖǎ ma kà Gèɖèpɔ́ɔ̀ zùo po, ké nyɔ ɓěɔ̀ ɖǎ ma kà bɛɖɛɛ̀ɔ̀ ɖiɛɛ dyi. 24Ti nyɔ kúɖúú ɓěɔ̀ dyéɛ ma kà Jízɛ̀ kè ɔ ɖeín-nà-nyɔ̀ ɓěɔ̀ se ma ɓó nì ɖeɛɛ, púɛɛ, wa dyá ma ɓáɖáà ɓěɔ̀ mú, ké wa mu ma ɖé Kɔ̀pánìà-hwɔ̀ɖɔ̀ɔ̀ mú, ké wa kpa ma Jízɛ̀ dyi mɔ́ɔ.
Jízɛ̀ mɔ̀ bɛɖɛɛ̀ nyíà nyɔǔn fɛ̀ɛ̀ kɛ
25Ti nyɔ ɓěɔ̀ dyé ma Jízɛ̀ ɖé dòùnɓìǎɔ̀ wáká tɔ̀ɔ̀ kɔ̃ɛɛ, wa diè ma ɔ dyi, ké wa ɖá, “Nyɔ-ɖɛ-tɛ̀mɛ̀ìn-nyɔ̀, tiɔ̀ nyɛ́ m̀ dyi ma nɔ̄ kɛ́?”
26Ké Jízɛ̀ zà ma ɖé wuɖu, ké ɔ ɖá, “Ḿ cɛ̃ ɓě jǎà gbo, ɓě nì ḿ dyi mɔ́uń, sepóɛɖé ɓě ɖi ma bɛɖɛɛ̀ɔ̀, ké ɓě ɖoɓo ma jè. Ɔ se zɛ̃̀ìn-ɖɛ̀ ɓě ɓɛ́ ɓě dyé ma ḿ nyuɛ kɛɛ jè. 27Ɓěǐn ɖá ɓɛ́ ɓě ké ɖii-ɖɛ̀ ɓɛ́ ɔ ɓɛ́ìn kà mú gbɔɔ̀ kɛɛ jè kũ̀à nyu. Kɛɛ ɓě mɛ nyu kũ̀à ɓó ɖii-ɖɛ̀ɔ̀ nyɔ muà nììn ɓó sè-ná-sèɛ̀ fɛ̀ɛ̀ jèɛɛ bìì. Mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ mu ɓě ɖii-ɖɛ̀ nìà kɛ nyíìn, sepóɛɖé Gèɖèpɔ́ɔ̀ mɔ̀à Ɓǎɔ̀ kɛɛ ɖǎ ɔ dyí-dyuòìn-bɛ̃̀ɔ̀ ḿ kɔ̃ po.”
28Púɛɛ, wa diè ma ɔ dyi, ké wa ɖá, “Ɖɛ́ à ɓɛ́ìn nyuɛ ɓɛ́ à ké Gèɖèpɔ́ɔ̀ kũ̀à ɓě nyuɛ́?”
29Ké Jízɛ̀ zà ma ɖé wuɖu, ké ɔ ɖá, “Kũ̀à ɓɛ́ Gèɖèpɔ́ɔ̀ mɔ́ ɓɛ́ ɓě ké nyuɛɛ, ɔ kɛ̀. Ɔ mɔ̀ ɓě ké nyɔ ɓɛ́ ɔ ɖǎà ɖoɓo kɛɛ hwìɖǐǐ taɓa.”
30Ké wa cɛ̃ɛ ɖe, ké wa ɖá, “Zɛ̃̀ìn-ɖɛ̀ɔ̀ nyɛ́ nì mu nyuùn, ɓɛ́ à kéɛ dyé, ɓɛ́ à ké m̀ hwìɖǐǐ taɓaá? Ɖɛ́ nì mu nyuùn wɛ̃́? 31À ɓǎ nììn ɓǎ ɓěɔ̀ ɖi ma mánà ɖé gbǎùn-fúɖúáɔ̀ kɔ̃ kà Gèɖèpɔ́ɔ̀-cèè-ɖɛ̀ɔ̀ nyuà cɛ̃ɛ kɛ. Ɔ ɖá, ‘Ɔ nyí ma wa bɛɖɛɛ̀ sɔ̀ìn ɖé dyɔún wɛ̃, ɓɛ́ wa kéɛ ɖi.’ ”
32Hwɛ̀ ké Jízɛ̀ cɛ̃ɛ ma wa gbo, ké ɔ ɖá, “Ḿ cɛ̃ ɓě jǎà gbo, ɖɛ Mózè nyí ma kà ɓěɛɛ, ɔ se bɛɖɛɛ̀ sɔ̀ìn kà ɖé dyɔún wɛ̃. Ḿ Ɓǎ mɔ̀ nyɔ nyí ɓě bɛɖɛɛ̀ jɛ́ɛ́ sɔ̀ìn kà ɖé dyɔún wɛ̃. 33Sepóɛɖé bɛɖɛɛ̀ ɓɛ́ Gèɖèpɔ́ɔ̀ tòɛɛ, ɔ mɔ̀ nyɔ ɓɛ́ ɔ sɔ̀à ɖé dyɔún, ké ɔ nyíà ɓóɖó-kpàà nyɔ ɓě fɛ̀ɛ̀ kɛ̀.”
34Ké wa cɛ̃ɛ ma ɔ gbo, ké wa ɖá, “Ɓɔ̌ɔ̀, nyí à bɛɖɛɛ̀ɔ̀ tee.”
35Ké Jízɛ̀ cɛ̃ɛ ma wa gbo, ké ɔ ɖá, “Mɔ̄ mɔ̀ bɛɖɛɛ̀ nyíà nyɔǔn fɛ̀ɛ̀ kɛ. Nyɔ mɔ̀ nyɔ dyi ḿ gbo kɛɛ, mɔ́ se ɔ nyuɛ́ mu. Ké nyɔ mɔ̀ nyɔ taɓa ḿ hwìɖǐǐɛɛ, ní-ná-tò se ɔ nyuɛ́ mu fɔɔ. 36Ḿ cɛ̃ɛ ma ɓě gbo kà ɓɛ́ ɓě ɖǎ ma ḿ dyéɛ, kɛɛ ɓě se ḿ hwìɖǐǐ taɓa. 37Nyɔǔn séín ɓě ɓɛ́ ḿ Ɓǎ nyíín nyɛɛ mu ḿ gbo dyiìn, ké ḿ se nyɔ ɓě ɓɛ́ wa mu ḿ gbo dyiìn nyɛɛ ɓɔ́ɔ mu. 38Sepóɛɖé ḿ sɔ̀ ɖé dyɔún, ké ḿ dyi ɓíɖíi, ɓɛ́ ḿ ké nyɔ ɖoɓoà ḿ wɛ̃ɛ mɔ́ɔ́-ɖɛ̀ nyu. Ḿ se dyi, ɓɛ́ ḿ ké ḿ mìɔùn nììn mɔ́ɔ́-ɖɛ̀ nyu. 39Ɖɛ ɓɛ́ nyɔ ɖoɓoà ḿ wɛ̃ɛ mɔ́ ɓɛ́ ḿ ké nyuɛɛ kɛà kɛ̀. Ɔ mɔ̀, ɓɛ́ ḿ ké se nyɔǔn séín ɓě ɓɛ́ ɔ ɖǎ ma ḿ nyíɛɛ ɖò xwáɖáún sè. Ɔ mɔ́, ɓɛ́ ḿ ké wa séín gĩɔ zà ɖé wé hwɛ̀ìn-gbɔɔ̀ mú. 40Ɖɛ ḿ Ɓǎ mɔ́ kɛɛ kɛà kɛ̀. Ɔ mɔ̀, ɓɛ́ nyɔǔn séín ɓɛ́ wa dyé Dyú-gààɔ̀, ké wa taɓa ɔ hwìɖǐǐɛɛ ké sè-ná-sèɛ̀ fɛ̀ɛ̀ ɓéɖé. Ní mu wa gĩɔ zàùn ɖé wé hwɛ̀ìn-gbɔɔ̀ mú.”
41Ɓó tia ɓaɖaa, Júù-nyɔ̀ ɓěɔ̀ ɖú ma jɛ kpàǐ, sepóɛɖé ɔ ɖá, “Mɔ̄ mɔ̀ bɛɖɛɛ̀ ɓɛ́ ɔ sɔ̀ìn kà ɖé dyɔún wɛ̃.” 42Wa ɖá, “Gàa nìà kɛ se Jízɛ̀ mɔ̀à Jòséɛ̀ dyú-gààɔ̀ kɛɛ̀? À dyuò ɔ ɖe kè ɔ ɓǎ dyí. Kà ɔ nìà náa, nìí, xwɛ̌ ɔ nyuà cɛ̃ɛ kàǔn kà ɓɛ́ ɔ sɔ̀ ɖé dyɔún wɛ̃́?”
43Ké Jízɛ̀ cɛ̃ɛ ma wa gbo, ké ɔ ɖá, “Ɓě mɛ ɓɔ́ jɛɛ ɓó ɓě mìɔùn pṹa dyi. 44Nyɔ ɖò se ḿ gbo dyiɛ ɓɛ́ìn, ḿ Ɓǎ mɔ̀ nyɔ ɖoɓoà ḿ wɛ̃ɛ dyà dyɛ ɔ ḿ gbo hwɛ̀. Ké ní mu ɔ gĩɔ zàùn ɖé wé hwɛ̀ìn-gbɔɔ̀ mú. 45Ɖɛ kpáá-ɖɛ̀-cɛ̃-nyɔ̀ ɓěɔ̀ céè ma kɛɛ kɛà kɛ̀. Ɔ mɔ̀, ‘Gèɖèpɔ́ɔ̀ mɔ̀ nyɔ mu nyɔǔn séín ɖɛ tɛ̀mɛ̀ìn.’ Nyɔǔn séín ɓě ɓɛ́ wa wɔ̃́ Ɓǎɔ̀ wuɖu, ké ɔ tɛ̀mɛ̀ìn wa ɖɛ kɛɛ mɔ̀ nyɔ dyi ḿ gbo. 46Ɔ xwíníín se mɔ̀ kà ɓɛ́ nyɔ ɖò ɖǎ Ɓǎɔ̀ dyéɛ. Nyɔ mɔ̀ nyɔ sɔ̀ìn kà ɖé Gèɖèpɔ́ɔ̀ gboɛɛ ɖòùn mɔ̀ nyɔ ɖǎ Ɓǎɔ̀ dyé. 47Ḿ cɛ̃ ɓě jǎà gbo, nyɔ mɔ̀ nyɔ ɓɛ́ ɔ taɓa ḿ hwìɖǐǐɛɛ ɓéɖé sè-ná-sèɛ̀ fɛ̀ɛ̀. 48Mɔ̄ mɔ̀ bɛɖɛɛ̀ nyíà nyɔǔn fɛ̀ɛ̀ kɛ. 49Ɓě ɓǎ nììn ɓǎ ɓěɔ̀ ɖi ma mánàɔ̀ ɖé gbǎùn-fúɖúáɔ̀ kɔ̃, kɛɛ wa mɛ́ ma ní. 50Kɛɛ kà bɛɖɛɛ̀ ɓɛ́ ɔ sɔ̀ìn kà ɖé dyɔún wɛ̃ɛ nyu nìɛ̀ kɛɛ, ɔ kɔ̃̀ jè nyɔ ɖiɛ kɛɛ se mɛ́ɛ mu. 51Mɔ̄ mɔ̀ bɛɖɛɛ̀ ɓéɖé fɛ̀ɛ̀ ɓɛ́ ɔ sɔ̀ìn kà ɖé dyɔún wɛ̃. Nyɔ ɖò dyi bɛɖɛɛ̀ nìà kɛ ɖiín, ɔ mu cĩ́ìn ɓó sè-ná-sèɛ̀ tiín. Ké bɛɖɛɛ̀ ɓɛ́ ní muà ɔ nyíìn nyɛɛ, ɔ mɔ̀ ní fɔ́ ɓɛ́ ḿ tòà, ɓɛ́ ɓóɖó-kpàà nyɔ ɓě kéà fɛ̀ɛ̀ ɓéɖéɛ.”
52Púɛɛ, Júù-nyɔ̀ ɓěɔ̀ ɖú ma dòǐn zà kpàǐ ɖé wa mìɔùn hwìɛ̀. Wa cɛ̃ɛ, ké wa ɖá, “Xwɛ̌ gàa nìà kɛ ɓɛ́ìn ɔ fɔ́ɔ̀ à nyíɛ, ɓɛ́ à kéɛ tà kɛ́?”
53Ké Jízɛ̀ cɛ̃ɛ ma wa gbo, ké ɔ ɖá, “Ḿ cɛ̃ ɓě jǎà gbo, ɔ jǔ ké ɓě se mɔ̄ Nyɔǔn-dyùɛ̀ Dyú-gààɔ̀ fɔ́ɔ̀ tà, ké ɓě se ní nyɔmɔɔ̀ náín, fɛ̀ɛ̀ se ɖé ɓě mú nìɛ̌ mu. 54Nyɔ mɔ̀ nyɔ tà ní fɔ́ɔ̀, ké ɔ ná ní nyɔmɔɔ̀ kɛɛ ɓéɖé sè-ná-sèɛ̀ fɛ̀ɛ̀, ké ní mu ɔ gĩɔ zàùn ɖé wé hwɛ̀ìn-gbɔɔ̀ mú. 55Sepóɛɖé ní fɔ́ɔ̀ mɔ̀ ɖii-ɖɛ̀ jǎà, ké ní nyɔmɔɔ̀ mɔ̀ náá-ɖɛ̀ jǎà. 56Nyɔ mɔ̀ nyɔ tà ní fɔ́ɔ̀, ké ɔ ná ní nyɔmɔɔ̀ kɛɛ cĩ́ ɖé ḿ mú, ké ḿ cĩ́ ɖé ɔ mɔ̀ùn mú. 57Kà ḿ Ɓǎ mɔ̀ nyɔ cĩ́à kɛɛ ɖoɓoà ḿ, ké ɔ nyuɛ ké ḿ cĩ́à kɛɛ, kà dyúáɖòɔ̀ kǎà nyɔ mɔ̀ nyɔ mu ḿ tàùn wɛ̃ɛ, ní muɛ nyuùn ɓɛ́ ɔ ké cĩ́ ɖekè. 58Ɖɛ nìà kɛ mɔ̀ bɛɖɛɛ̀ ɓɛ́ ɔ sɔ̀ìn kà ɖé dyɔún wɛ̃. Ɔ se nì kà bɛɖɛɛ̀ ɓɛ́ ɓě ɓǎ nììn ɓǎ ɓěɔ̀ ɖi ma kà ké wa mɛ́ ma kà kɛɛ nìà kɛ. Nyɔ mɔ̀ nyɔ mu bɛɖɛɛ̀ɔ̀ nyɔ nìà kɛ ɖiìn nyɛɛ, ɔ mu cĩ́ìn kánáá pū.”
59Jízɛ̀ cɛ̃ ma ɖɛ nìà kɛ ti ɓɛ́ ɔ nì ma nyɔ ɓěɔ̀ ɖɛ tɛ̀mɛ̀ǐn ɖé Júù-nyɔ̀ ɓěɔ̀ cɔ́cì-gbòɔ̀ mú ɖé Kɔ̀pánìà-hwɔ̀ɖɔ̀ɔ̀ múɛ.
Sè-ná-sèɛ̀ fɛ̀ɛ̀-wùɖùɔ̀
60Ti ɓɛ́ Jízɛ̀ɛ̀ ɖeín-nà-nyɔ̀ ɓěɔ̀ pàɖǎ wɔ̃́ ma ɖɛa kɛɛ, wa cɛ̃ɛ ma, ké wa ɖá, “Tɛ̀mɛ̀ìn-ɖɛ̀ nìà kɛ zi mú kàmàǔn mìɔ. Nyɛ́ ɓɛ́ìn múin wɔ̃́ɔ kɛ́?”
61Nyɔ ɖò se ma Jízɛ̀ ɖɛa gbo cɛ̃, kɛɛ ɔ dyuò kà ɔ ɖeín-nà-nyɔ̀ ɓěɔ̀ nì ma jɛiń ɓóɛ jè kɛ. Ɔ jèɛɛ, ɔ diè ma wa dyi, ké ɔ ɖá, “Ɖɛ nìà kɛ nyuɛ ké ɓě mɔ́ ɓɛ́ ɓě ké saà? 62Ɓě dyiɔ́ mɔ̄ Nyɔǔn-dyùɛ̀ Dyú-gààɔ̀ dyé, ké ḿ dyiɔ́ ɖé dyií dɛ̀ ɓɛ́ ḿ nì ma kĩ́ín nyɛɛ muɛń nìǐn, nìí, xwɛ̌ ɔ jè mu nììn nyɛ́? 63Ɖɛ nyí nyɔǔn fɛ̀ɛ̀ kɛɛ, ɔ mɔ̀ Zùùɔ̀. Fɔ́ɔ̀ se ɖɛ ɖò nyuɛ ɓɛ́ìn fɔɔ. Wuɖu ɓě ɓɛ́ ḿ cɛ̃à ɓě gbo kɛɛ, wa mɔ̀ Zùù kè fɛ̀ɛ̀. 64Kɛɛ ɓě ɖíɛ́ ɓě se hwìɖǐǐ-taɓa-taɓa ɓéɖé.” Sepóɛɖé Jízɛ̀ dyuò ma nyɔ ɓě ɓɛ́ wa se ma ɔ hwìɖǐǐ taɓaá muɛ kè nyɔ ɓɛ́ ɔ mu ma ɔ ɔ mú-nyɛ́-nyɔ̀ ɓěɔ̀ xwáɖáún zàìn nyɛɛ dyí kĩ́ín. 65Ké ɔ ɖá, “Ɖɛ kɔ̃̀ jè ḿ cɛ̃à ɓě gbo kà ɓɛ́ nyɔ ɖò se ḿ gbo dyiɛ ɓɛ́ìn, Ɓǎɔ̀ nyuɛ ké ɔ dyi dyɛ ḿ gbo hwɛ̀ɛ nìàǒ wɛ̀.”
66Ɓó ɖɛa jèɛɛ, ɔ ɖeín-nà-nyɔ̀ ɓěɔ̀ pàɖǎ kɔ́ìn ma ɖe, ké wa kèɔ̀ kè se ma mú naìn ɖe. 67Púɛɛ, Jízɛ̀ diè ma ɖeín-nà-nyɔ̀ ɓaɖa-bùè sè sɔ̃́ ɓěɔ̀ dyi, ké ɔ ɖá, “Ɓě mɔ̀ùn mɔ́ ɓɛ́ ɓě ké mu ɖekèè?”
68Ké Sã́ɓò Píɖɛ̀ zà ma ɖé wuɖu, ké ɔ ɖá, “Bounɓo, nyɛ́ à ké gbo muɛ́? Mɔ̀ mɔ̀ nyɔ ɓéɖé wuɖu ɓě nyíà nyɔǔn sè-ná-sèɛ̀ fɛ̀ɛ̀ kɛ. 69Ké à poɛ jǎà, ké à dyuòɛ̀ kà mɔ̀ mɔ̀ Mú-hwɛ̀-nyɔ̀ sɔ̀ìn kà ɖé Gèɖèpɔ́ɔ̀ gboɛ.”
70Púɛɛ, Jízɛ̀ zà ma ɖé wuɖu, ké ɔ ɖá, “Má, ɓě mɔ̀ nyɔ-kpò ɓaɖa-bùè sè sɔ̃́, ké ḿ gã ɓěe? Kɛɛ dyéɛ, ɓě dyúáɖò mɔ̀ nɔɔ́-nàmàǔn.” 71Ɔ nì ma Júdà mɔ̀à Sã́ɓò Ɛ́sìkáɖìɔ̀ dyú-gààɔ̀ kɛɛ jè cɛ̃iń. Sepóɛɖé Júdà mɔ̀ ma ɖeín-nà-nyɔ̀ ɓaɖa-bùè sè sɔ̃́ ɓěɔ̀ ɖò dyɛo, kɛɛ ɔ mu ma Jízɛ̀ ɔ mú-nyɛ́-nyɔ̀ ɓěɔ̀ xwáɖáún zàìn.
Bassa Bible © Bible Society Liberia, 2002.