Ɖúù 23
23
Wa kpa Jízɛ̀ Páɖè dyúa
(Máfíò 27:1-2, 11-14; Máà 15:1-5; Jɔ̃́ɔ́ 18:28-38)
1Ké nyɔ kúɖúú ɓěɔ̀ sɔ̀ ma dyí, ké wa kpa ma Jízɛ̀ Páɖè dyúa. 2Ké wa ɖú ma ɔ ɖɛ dúún po kpàǐ kà ɓɛ́ ɔ ɖǎ ma ɖɛ gbà nyuɛ, ké wa ɖá, “À dyéɛ, ké gàaɔ̀ nì à nyɔ ɓěɔ̀ hwìǐ zàǐn. Ɔ nìɛ̀ ma wa gbo cɛ̃iń, ɓɛ́ wa ké se tácì Síízɛ̀ dyéɖéín pɛ́ɛ̀ìn, ké ɔ nìɛ̀ ma cɛ̃iń kà ɔ mɔ̀ Kɛ́ɖɛ́ì mɔ̀à kã́áɔ̀ kɛ.”
3Ké Páɖè diè ma ɔ dyi, ké ɔ ɖá, “Mɔ̀ mɔ̀à Júù-nyɔ̀ ɓěɔ̀ kã́áɔ̀ kɛɛ̀?”
Ké Jízɛ̀ zà ɖé wuɖu, ké ɔ ɖá, “Mɔ̀ mɔ̀ nyɔ cɛ̃ɛ.”
4Hwɛ̀ ké Páɖè cɛ̃ɛ ma sáa-zà-nyɔ̀ kpa ɖɛ ɓěɔ̀ kè nyɔ kúɖúú ɓěɔ̀ gbo, ké ɔ ɖá, “Ḿ se gàa nìà kɛ ɖɛ gbà ɖò mú dyé.”
5Kɛɛ wa cɛ̃ɛ ma gana-kà, ké wa ɖá, “Ɖɛ ɔ nì nyɔǔn tɛ̀mɛ̀ǐn nyɛɛ po zàǔn-zàǔn ɓáún-ɓáún dyi nɔ̄ Júɖìà-ɓòɖòɛ̀ dà séín. Ɔ dèìn ma ɖé Gáɖàɖíì-ɓòɖòɔ̀ kɔ̃ gbɔ, ké ɔ ɖǎ nɔ̄ hwɔɖɔɛ̀ mú nyini.”
Wa tò Jízɛ̀ ɖé Hɛ́wɔ̀ɖɔ̀ gbo
6Ti Páɖè wɔ̃́ ma ɖɛa kɛɛ, ɔ diè ma wa dyi, ké ɔ ɖá, “Gàa nìà kɛ sɔ̀ ɖé Gáɖàɖíì-ɓòɖòɔ̀ kɔ̃ɔ̀?” 7Ti ɓɛ́ ɔ wɔ̃́ɔ ma kà Jízɛ̀ sɔ̀ ma ɖé pá kɔ̃̀ mú ɓɛ́ Hɛ́wɔ̀ɖɔ̀ kɔ̃̀ ma kà wuɖuíɛɛ, ɔ tò ma ɔ ɖé Hɛ́wɔ̀ɖɔ̀ gbo. Hɛ́wɔ̀ɖɔ̀ nì ma Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɓó tia ɓaɖa. 8Ti ɓɛ́ Hɛ́wɔ̀ɖɔ̀ dyé ma Jízɛ̀ kɛɛ, ɔ hwòɖǒ dè ma dyi mìɔ, sepóɛɖé ɔ ɖǎ ma ɔ jè wɔ̃́, ké ɔ mɔ́ ɓɛ́ ɔ ké ma ɔ dyé ɓó ti ɓáún-ɓáún xwíníín. Ɔ nìɛ̀ ma hwòɖǒ kɔ̃ dèɛ̌n, ɓɛ́ ɔ ké ma Jízɛ̀ zɛ̃̀ìn-ɖɛ̀ ɖò nyuɛ dyé. 9Ɔ jèɛɛ, Hɛ́wɔ̀ɖɔ̀ diè ma Jízɛ̀ dyi goun, kɛɛ Jízɛ̀ se ma ɖɛ ɖò cɛ̃ fɔɔ. 10Ɓó tia ɓaɖaa, sáa-zà-nyɔ̀ kpa ɖɛ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ nyànà ma ɓó dyi, ké wa cɛ̃ɛ ma gana-kà kà ɓɛ́ Jízɛ̀ ɖǎ ma ɖɛ gbà nyuɛ. 11Ké Hɛ́wɔ̀ɖɔ̀ kè ɔ sójà ɓěɔ̀ ɓaɖa ma Jízɛ̀ dyɔ́, ké wa zàìn ma ɔ zùǔn. Wa po ma ɔ ɖɔ nɔ̀mɔ̀ dyíin ɖò mú, ké wa tò ma ɔ ɖé Páɖè gbo ɖe. 12Ɓó wé jɛ́ɛ́ nìà kɛ xwíníín nyɛɛ, Hɛ́wɔ̀ɖɔ̀ kè Páɖè ɖɛ̀ɓɛ̀ìn ma mú cá. Wa nyɛ́ìn ma mú kĩ́ín.
Wa ɖá Jízɛ̀ ɓéɖé ɓɛ́ ɔ ké mɛ́
(Máfíò 27:15-26; Máà 15:6-15; Jɔ̃́ɔ́ 18:39–19:16)
13Ti ɓɛ́ wa tò ma Jízɛ̀ ɖé Páɖè gbo ɖeɛɛ, Páɖè ɖá ma sáa-zà-nyɔ̀ kpa ɖɛ ɓěɔ̀ kè nàìn-nyɔ̀ ɓěɔ̀ ɔ kè nyɔ tɔ̀ɔ̀ ɓěɔ̀, 14ké ɔ cɛ̃ɛ ma wa gbo, ké ɔ ɖá, “Ɓě dyà gàa nìà kɛ ḿ gbo, ké ɓě ɖá ɔ zàìn nyɔ ɓěɔ̀ hwìǐ. Ḿ ɖǎ ɔ zaaɔ̀ múin gmɔìn dà ɓó ɓě séín dyúa. Ɖɛ gbà ɓě ɓɛ́ ɓě ɖá ɔ nyuà kɛɛ zaa se ɔ kpɔ̃ ɓó wa nyu jè. 15Ké Hɛ́wɔ̀ɖɔ̀ mɔ̀ùn se ma ɔ zaa kpɔ̃̀ìn ɖekè, sepóɛɖé ɔ ɖoɓo ma ɔ à gbo ɖe. Ḿ ɖáo, gàa nìà kɛ se ɖɛ kɔ̃̀ jè ɔ ké mɛ́ kɛɛ ɖò nyu. 16Ɔ jèɛɛ, ní mu ɔ gbàtò ɓàɖàìn, ɓɛ́ ḿ ké ɔ buɛ̀.”
[ 17Zĩ̀ìn-Kɔ̃in-hwɔ̀ɔ̀ ti séín ní, Páɖè ɓéɖé ɓɛ́ ɔ ké ma kpɔɖɔ-ɖeín-nì-nyɔ̀ ɖò buɛ̀ ɓó nyɔ ɓěɔ̀ bìì.] 18Ké nyɔ séín ɓěɔ̀ páná ma mú, ké wa ɖá, “Ɖáɓá ɔ. Buɛ̀ à bìì Bàwáɖáɓà.” 19Kĩ́ín-kĩ́ín nyɛɛ, wa po ma Bàwáɖáɓà kpɔɖɔ ɖeín, sepóɛɖé ɔ vɔ̃ ma gɔ̌mànàɔ̀ gbo ɖé hwɔɖɔɔ̀ mú, ké ɔ ɖáɓá ma kú.
20Páɖè mɔ́ ɓɛ́ ɔ ké ma Jízɛ̀ buɛ̀ jèɛɛ, ɔ wùɖù ma nyɔ ɓěɔ̀ gbo ɖe. 21Kɛɛ wa páná ma mú, ké wa ɖá, “Kɔ̀ìn ɔ kɔ́ɖɔ́sì kɔ̃in. Kɔ̀ìn ɔ kɔ́ɖɔ́sì kɔ̃in.”
22Ké Páɖè diè ma wa dyi ɖe kpa tã nììn, ké ɔ ɖá, “Ɖɛ́ kɔ̃̀ jèɛ́? Ɖɛ́ mɔ̀ ɖɛ gbà ɓɛ́ ɔ ɖǎ nyuɛ́? Ḿ se ɖɛ ɖò ɓɛ́ ɔ ɖǎ nyuín, ɓɛ́ ɔ kéɛ dyí mɛ́ɛ ɔ mú dyé. Ɔ jèɛɛ, ní mu ɔ gbàtò ɓàɖàìn, ɓɛ́ ḿ ké ɔ buɛ̀.”
23Kɛɛ wa páná ma mú zoo kà ɓɛ́ ɔ ɓéɖé ɓɛ́ ɔ ké ma Jízɛ̀ kɔ́ɖɔ́sìɔ̀ kɔ̃in kɔ̀ìn nyɛ. Wa mú-páná-pánáɔ̀ nyuɛ ké Páɖè tò ma wa gbo ɖùǔ. 24Ké ɔ cɛ̃ɛ ma kà ɔ ɓéɖé ɓɛ́ ɔ ké ma nì kà wa nyuɛ ma kà mɔ́ɔ kɛ. 25Ɔ buɛ̀ ma nyɔ wa mɔ́ ma kà kɛ. Ɔ mɔ̀ nyɔ ɓɛ́ wa po ma kà kpɔɖɔ ɖeín ɓó gɔ̌mànàɔ̀ gbo vɔ̃ jè ɔ kè kú ɖáɓá jèɛ. Ké ɔ zàìn ma wa Jízɛ̀ xwáɖáún, ɓɛ́ wa ké ɖɛ wa mɔ́ ma kɛɛ nyu.
Wa kɔ̀ìn Jízɛ̀ kɔ́ɖɔ́sìɔ̀ kɔ̃in
(Máfíò 27:32-44; Máà 15:21-32; Jɔ̃́ɔ́ 19:17-27)
26Ti ɓɛ́ wa nì ma Jízɛ̀ kpauń, ɓɛ́ wa ké ma ɔ kɔ́ɖɔ́sìɔ̀ kɔ̃in kɔ̀ìn nyɛɛ, wa dyé ma gàa ɖò kɔ̃̀ nyɛ́nɛ́ mɔ̀ ma Sã́ɓò, ɓɛ́ ɔ sɔ̀ìn ma ɖé Sàwíɖíìn-hwɔ̀ɖɔ̀ɔ̀ múɛ. Ɔ nì ma pá ɓě nì ma Jùɖúsɛ̀ɖɛ̀ìn-hwɔ̀ɖɔ̀ɔ̀ ɖeiɛɛ ɖò mú sɔ̀ǔn, ké ɔ nì ma hwɔɖɔɔ̀ mú muɛń. Wa pɛ̃́ìn ma ɔ Jízɛ̀ɛ̀ kɔ́ɖɔ́sìɔ̀ kɔún, ɓɛ́ ɔ kéɛ ma Jízɛ̀ ɖeín ɓéɖé.
27Ké nyɔ kúɖúú ɓě sí ma Jízɛ̀ kíɖíí. Ɖé wa hwìɛ̀ kɛɛ, màa ɖíɛ́ ɓě nì ma ɖé, ké wa nì ma kpá hwòɖǒ taɓauń, ké wa nì ma vĩ̌ɛń. 28Jízɛ̀ gmɔ̀ìn ma ɖé wa gbo, ké ɔ ɖá, “Jùɖúsɛ̀ɖɛ̀ìn-màà ɓě, ɓě ní vĩ̌ ɓó ní jè, kɛɛ ɓě mɛ vĩ̌ ɓó ɓě kè ɓěɛ̀ dyú ɓě jè. 29Ḿ ɖáo, ti ɖò nì dyiɛń, ké nyɔ ɓě muɛ cɛ̃ìn, ɓɛ́ wa ké níiń, ‘Ɖàà-màà ɓěɔ̀ kè nyɔ ɓě séèà dyú wóɖóìn nyɛ ɔ kè nyɔ ɓě séèà dyú nyáìn ɖòɛɛ dyé mana.’ 30Ti ɓěa mú, ɖéɛ̀ nyɔ ɓěɔ̀ muà toɖo vɛ̀nɛ̀ ɓěɔ̀ gbo cɛ̃ɛ gbɔ dèìn, ɓɛ́ wa kéà níiń, ‘Kpá à kɔ̃.’ Wa muɛ toɖo-dyù ɓěɔ̀ gbo cɛ̃ìn, ɓɛ́ wa ké níiń, ‘Ɓáìn à kɔ̃in.’ 31Kà cuɔ̀ mɔ̀à ɔ dyɔɔ ke, ké wa nìà ɖɛ ɓě nì kà kɛɛ ɔ bũ̌ nyuɛń nyɛɛ, cuɔ̀ dyi dyɛín, ɖɛ́ muá kpáùn wɛ̃́?”
32Ti wa nìà muɛń nyɛɛ, wa kpa ma Jízɛ̀ kè gàa sɔ̃́ ɓě, ɓɛ́ wa ké ma wa séín ɖáɓá. Gàa ɓěɔ̀ mɔ̀ ma ɖɛ-gbà-nyu-nyɔ̀ ɓě. 33Ti wa nyini ma dɛ̀ ɓɛ́ wa ɖáìn “Nyɔǔn-dù-kpà” kɛɛ, ɖéɛ̀ wa kɔ̀ìn ma Jízɛ̀ kɔ́ɖɔ́sìɔ̀ kɔ̃in. Ké wa kɔ̀ìn ma ɖɛ-gbà-nyu-nyɔ̀ sɔ̃́ ɓěɔ̀ mɔ̀ùn kɔ́ɖɔ́sì kɔ̃in ɖekè. Ɖò nì ma Jízɛ̀ ɖiaún, ké ɖò nì ma ɔ kunuaún. 34Jízɛ̀ ɖá, “Ḿ Ɓǎ, zĩ̀ìn waà nyuu-ɖɛ̀ɔ̀ kɔ̃in, sepóɛɖé wa se ɖɛ wa nìà nyuɛń nyɛɛ dyi dyuò.”
Ké wa nyu ma gbo-ɖàɓàìn-ɖɛ̀, ɓɛ́ wa ké ma ɔ ɖɔɔ̀ wa mìɔùn múin geìn. 35Nyɔǔn ɓě nyànà ma ɓó dyi, ké wa nì ma ɖɛi dyéɛń. Ké Júù-nyɔ̀ ɓěɔ̀ nàìn-nyɔ̀ ɓěɔ̀ ɓaɖa ma ɔ dyɔ́, ké wa ɖá, “Ɔ póìn nyɔ kà kò ɖò ɓě. Ɔ dyi Kɛ́ɖɛ́ì ɓɛ́ Gèɖèpɔ́ɔ̀ ɖǎà gãa jǔǐn, ɔ mɛ póìn ɔ mìɔùn.”
36Sójà ɓěɔ̀ mɔ̀ùn ɓaɖa ma ɔ dyɔ́ ɖekè. Wa dyi ma ɓó ɔ gbo, ké wa nyí ma náá-ɖɛ̀ nya-nya ɖò. 37Ké wa ɖá, “M̀ dyi Júù-nyɔ̀ ɓěɔ̀ kã́áɔ̀ jǔǐn, nìí, póìn m̀ mìɔùn.” 38Wuɖu ɓě nìà kɛ céè ma ɓó Jízɛ̀ kɔ̃in ɓó kɔ́ɖɔ́sìɔ̀ kɔ̃. Wuɖu ɓěɔ̀ mɔ̀, “Nyɔ nìà kɛ mɔ̀ Júù-nyɔ̀ ɓěɔ̀ Kã́áɔ̀.”
39Ɖɛ-gbà-nyu-nyɔ̀ ɓě ɓɛ́ wa ɓá ma kà ɓó dyiíɛɛ ɖò ɖaɓa ma ɔ wuɖu, ké ɔ ɖá, “M̀ se Kɛ́ɖɛ́ìɔ̀ɔ̀? Póìn m̀ mìɔùn, ɓɛ́ m̀ ké à mɔ̀ùn póìn ɖekè.”
40Kɛɛ ɔ mǔèɔ̀ po ma ɔ ɓɔ́í, ké ɔ ɖá, “M̀ se Gèɖèpɔ́ɔ̀ dyi fɛ̃̀ìne? Kà wa wáɖáà ɔ zaa dúún wɛ̃ɛ, kǎà wa wáɖáà à mɔ̀ùn dúún ɖekè. 41Zaa wa wáɖáà à dúún wɛ̃ɛ sɛ́ɖɛ́ìn dyí ɓɛ́ ɔ ké ná nì, sepóɛɖé pɛ́ɛ̀-ɖɛ̀ ɓɛ́ à ɓéɖé ɓɛ́ à kéɔ́ dyé ɓó ɖɛ à nyuà kɛ jèɛɛ, ɖé à nìà dyéɛń nyɛ̀. Kɛɛ ɔ mɔ̀ùn se ɖɛ gbà ɖò nyu.” 42Ké ɔ cɛ̃ɛ Jízɛ̀ gbo, ké ɔ ɖá, “Ní jè mɛ nì m̀ hwìɖǐi, ti nì mu nì kã́á-ɓòɖòɔ̀ kɔ̃ muùn wɛ̃.”
43Ké Jízɛ̀ cɛ̃ɛ ma ɔ gbo, ké ɔ ɖá, “Ḿ cɛ̃ m̀ jǎà gbo, zɛ̃̌ɛ̀ nìà kɛɛ, nì mu ɖé ḿ gbo nììn ɖé pá nɔ̀mɔ̀ dyíin mɔ̀à dyɔún wɛ̃.”
Jízɛ̀ɛ̀ mɛ́ jè
(Máfíò 27:45-56; Máà 15:33-41; Jɔ̃́ɔ́ 19:28-30)
44Ɔ ɓɛ́ìn ma dyóɖó-kò-dú-hwìɛ̀ jǔɛ, ké tíe kpɔ̃ ma ɓóɖó-kpàà dà séín tee, ké ɔ dyɛ̀ìn ma zii-dyòɖò-gbo-dyòɖòàǔn. 45Dyóɖóɔ̀ ɓɔ́ ma fãa. Ké faà-ɖɔ̀ ɓɛ́ ɔ ɓá ma ɖé Gèɖèpɔ́ɔ̀ gbǒɔ̀ mú dyiíɛɛ fá ma mú. 46Ɓó tia ɓaɖaa, Jízɛ̀ páná ma mú ɖé wuɖu zoo mú, ké ɔ ɖá, “Ḿ Ɓǎ, ḿ nyí ḿ mìɔùn m̀ xwa.” Ti ɔ cɛ̃ ma ɖɛa kɛɛ, púɛɛ, ɔ zà ma hwòɖǒ dya.
47Ti ɓɛ́ gàa ɓɛ́ ɔ kɔ̃̀ sójà hɔ̃dɛ̀ɖɛ̀ ɖò wuɖuíɛɛ dyé ɖɛ ɖǎ ma kà kpá kɛɛ, ɔ nyí ma Gèɖèpɔ́ɔ̀ ɓàìn-ɓàìn, ké ɔ ɖá, “Gàa nìà kɛ mɔ̀ dyí-sɛ́ɖɛ́ìn-nyɔ̀ jǎà.”
48Ti nyɔ ɓě poìn ma kà ɖé dyí, ɓɛ́ wa ké ma kà ɖɛi dyéɛɛ dyé ma ɖɛ ɖǎ ma kà kpáa, wa kpa ma kpá hwòɖǒ taɓaa ɖé wìì mú, ké wa mu ma wa ɓíɖí-taún. 49Nyɔ séín ɓě dyuò ma Jízɛ̀ dyíɛ kè màa ɓě ɓɛ́ ɔ kè wa ɖǎ ma mú naìn sɔ̀ìn ɖé Gáɖàɖíì-ɓòɖòɔ̀ kɔ̃ɛɛ nyànà ma ɖé nya vɛ̃in, ké wa dyé ma ɖɛ ɓě nìà kɛ.
Wa zà Jízɛ̀ dyóɖóún
(Máfíò 27:57-61; Máà 15:42-47; Jɔ̃́ɔ́ 19:38-42)
50-51Gàa ɖò kɔ̃̀ nyɛ́nɛ́ mɔ̀ ma Jòsé, ɓɛ́ ɔ sɔ̀ ma ɖé Júù-nyɔ̀ ɓěɔ̀ hwɔɖɔ ɖò ɓɛ́ wa ɖáìn Áɖémàtíà kɛ múɛɛ nì ma ɓó. Ɔ mɔ̀ ma dyí-sɛ́ɖɛ́ìn-nyɔ̀, ké ɔ nì ma Gèɖèpɔ́ɔ̀ kã́á-ɓòɖòɔ̀ jè hwìǐ gmɔ̀ǔn. Ɔ mɔ̀ ma tɔ̀ɔ̀-ɓìɔ̀ ɓěɔ̀ ɖò, kɛɛ ɔ se ma ɖɛ wa poìn ma kà hwìɖǐiɛ kè ɖɛ wa nyu ma kà kɛɛ gbo wɔ̃́ìn. 52Gàa nìà kɛ mu ma ɖé Páɖè gbo, ké ɔ zɔ̀ ma Jízɛ̀ɛ̀ xwɛ́ɔ̀. 53Ké ɔ zà ma xwɛ́ɔ̀ dyií, ké ɔ bĩìn ma ɔ ɖénì-ɖɔ̀ ɖò dyi, ké ɔ pɛ̃́ìn ma Jízɛ̀ɛ̀ xwɛ́ɔ̀ ɖé ɓí ɓɛ́ wa ɖǎ ma ɓúɖú ɖé sɔ́ɔ́ ɖò dyéɖéín, dɛ̀ ɓɛ́ wa séè ma xwɛ́ ɖò po ɖòɛɛ mú dyi. 54Ɔ mɔ̀ ma Gèɖèpɔ́ɔ̀ fɔ̀-wèɔ̀ jè naɓaà-tì, ké Gèɖèpɔ́ɔ̀ fɔ̀-wèɔ̀ nìǎ ma dyiɛń.
55Màa ɓě ɓɛ́ wa kè Jízɛ̀ ɖǎ ma mú naìn sɔ̀ìn ɖé Gáɖàɖíì-ɓòɖòɔ̀ kɔ̃ɛɛ sí ma Jòsé kíɖíí. Wa dyé ma xwɛ́-ɓìɔ̀, ké wa dyé kà wa nyu ma ɖé Jízɛ̀ɛ̀ xwɛ́ɔ̀ dyi pɛ̃́ìn nyɛ. 56Ké wa mu ma hwɔɖɔún ɖe, ké wa dyéìn ma cáná nɔ̀mɔ̀ nyɔ́ún kè cáná tɔ̀ɔ̀ ɓě ti ɓó Jízɛ̀ɛ̀ xwɛ́ɔ̀ jè. Kɛɛ ɓó Gèɖèpɔ́ɔ̀ fɔ̀-wèɔ̀ ɓaɖaa, wa fɔ̀ ma kà ɓɛ́ gmaɔ̀ nyuà cɛ̃ɛ kɛ.
Bassa Bible © Bible Society Liberia, 2002.