Ɖúù 8
8
Màa ɓě ɓɛ́ wa sí ma Jízɛ̀ kíɖííɛ
1Sɔ̀ìn ɓóɛ gboɛɛ, Jízɛ̀ kpa ma bɔ̃̌ nɔ̀mɔ̀ dyíin ɓá Gèɖèpɔ́ɔ̀ kã́á-ɓòɖòɔ̀ jè dyíɛɛ cɛ̃ɛ ɖé hwɔɖɔ ɓěɔ̀ mú ɔ kè ɖé hwɔɖɔ-kpàǎ ɓěɔ̀ kɔ̃in. Ɔ kè ɔ ɖeín-nà-nyɔ̀ ɓaɖa-bùè sè sɔ̃́ ɓěɔ̀ mu ma. 2Ké màa ɖíɛ́ ɓě ɓɛ́ wa ɓéɖé ma zùù gbà kè wɛ́-dù kò-kò ɓě, ké Jízɛ̀ ɖǎ ma wa dyi kánáìn nyɛɛ mu ma ɖekè. Wa mɔ̀ ma Meɖé ɓɛ́ wa ɖáìn Máɖèɖà-nyɔ̀ kɔ̃̀ mú ɓɛ́ Jízɛ̀ zà ma zùù gbà mɛ̀nɛ̌ìn-sɔ̃́ kɛ 3kè Jòánà mɔ̀ ma Cúzà mɔ̀ ma Hɛ́wɔ̀ɖɔ̀ɛ̀ gbo-nì-nyɔ̀ kɛɛ gmàà kɛ kè Zùzánà ɔ kè màa kúɖúú tɔ̀ɔ̀ ɓě ɓɛ́ wa kpá ma Jízɛ̀ kè ɔ ɖeín-nà-nyɔ̀ ɓěɔ̀ gbo ɖé ɖɛ ɓě ɓɛ́ wa ɓéɖé ma kɛɛ múɛ.
Nɔ́ɔ́ ɓá ɖɛ-ɓá-nyɔ̀ ɖò jè dyíɛ
(Máfíò 13:1-9; Máà 4:1-9)
4Ɓó tia ɓaɖaa, nyɔ ɓě nì ma Jízɛ̀ gbo dyiɛń sɔ̀ìn ɖé hwɔɖɔ ɖò-ɖò ɓě mú. Ti ɓɛ́ nyɔ kúɖúú ɓě poìn ma dyíɛɛ, Jízɛ̀ po ma nɔ́ɔ́ nìà kɛ wa gbo, ké ɔ ɖá, 5“Gàa ɖò sɔ̀ ma dyí, ké ɔ mu ma ɓáá-ɖɛ̀ ɓáùn. Ti ɔ nì ma ɓáá-ɖɛ̀-dyùàɔ̀ mɛ́nɛ́iń nyɛɛ, ɔ dyúàɔ̀ ɖíɛ́ ɓě wáɖá ma ɓó hwìèɔ̀ gbìǐ dyi, ké nyɔǔn síɛ̀n kɔ̃in, ké naà ɓě dyi, ké wa manaa ma. 6Ké ɖíɛ́ ɓě kpá ma ɓó ɓóɖó wè ɓáìn sɔ́ɔ́-pìɔ̌ kɔ̃in nyɛɛ mú. Ké ti wa gbǎ ma kɔ̃́ɔ́ kɛɛ, wa mɛ́ ma, sepóɛɖé ní ɖò se ma ɓó nì. 7Ké ɓáá-ɖɛ̀-dyùàɔ̀ ɖíɛ́ ɓě kpá ma dɛ̀ ɓɛ́ wí-gbǎ ɓě nì ma kɛ, ké wa kè wí ɓěɔ̀ mɛ ma, ké wí ɓěɔ̀ taɓaìn ma ɓáá-ɖɛ̀ ɓěɔ̀ dyi. 8Ké ɓáá-ɖɛ̀-dyùàɔ̀ ɖíɛ́ ɓě kpá ɓóɖó bùɛ̀-bùɛ̀ mú, ké wa gbǎ ma kɔ̃́ɔ́, ké wa mɛ, ké wa zaìn dúún. Wa tòɖò ma ɓo hɔ̃dɛ̀ɖɛ̀ ɖò.”
Ti Jízɛ̀ ɖǎ ma ɖɛa cɛ̃ kɛɛ, ɔ kpa ma wuɖu dyií, ké ɔ ɖá, “Nyɔ ɓɛ́ ɔ ɓéɖé ɖùǔ ɓɛ́ ɔ ké dyi wɔ̃́ɛɛ, ɔ mɛ tò ɖùǔ.”
Xwíníín kɔ̃̀ jè Jízɛ̀ poà nɔ́ɔ́ kɛ
(Máfíò 13:10-17; Máà 4:10-12)
9Sɔ̀ìn ɓóɛ gboɛɛ, Jízɛ̀ɛ̀ ɖeín-nà-nyɔ̀ ɓěɔ̀ diè ma ɔ dyi ɓá nɔ́ɔ̀ jè dyí. 10Ké Jízɛ̀ ɖá, “Gèɖèpɔ́ɔ̀ ɖǎa nyu ɓɛ́ ɓě ké ɖɛ ɓě vǐè ma kĩ́ín ɓá ɔ kã́á-ɓòɖòɔ̀ jè dyíɛɛ dyí dyuò. Kɛɛ ɓó nyɔ tɔ̀ɔ̀ ɓěɔ̀ mɔ̀ùn bììɛɛ, vǐè-ɖɛ̀ ɓěɔ̀ dyììn nɔ́ɔ́ mú ɖé wa gbo, ɓɛ́ wa kéɛ gmɔ̀, ɓɛ́ wa ké seɛ múin dyé, ɔ kè ɓɛ́ wa kéɛ wɔ̃́, ɓɛ́ wa ké seɛ múin wɔ̃́.
Jízɛ̀ zà nɔ́ɔ́ ɓá ɖɛ-ɓá-nyɔ̀ɔ̀ jè dyíɛɛ xwíníín mú
(Máfíò 13:18-23; Máà 4:13-20)
11“Nɔ́ɔ̀ xwíníínɔ̀ kɛà kɛ̀. Ɓáá-ɖɛ̀-dyùàɔ̀ mɔ̀ Gèɖèpɔ́ɔ̀-wùɖùɔ̀. 12Ɓáá-ɖɛ̀-dyùà ɓě ɓɛ́ wa wáɖáìn ma kà hwìèɔ̀ gbìǐ dyiɛɛ, wa mɔ̀ nyɔ ɓě wɔ̃́ bɔ̃̌ nɔ̀mɔ̀ dyíinɔ̀, kɛɛ Nɔɔ́-nàmàǔn dyi, ké ɔ bǎ bɔ̃̌ nɔ̀mɔ̀ dyíinɔ̀ ɖé wa hwòɖǒ-dyùàɔ̀ mú, ɓɛ́ wa ní kɔ̃̀ɔ̀ ɖà hwìɖǐǐ taɓa, ɓɛ́ wa ní kɔ̃̀ ɖà póɛ. 13Ɓáá-ɖɛ̀-dyùàɔ̀ nyɔ kpáà ɓó sɔ́ɔ́-pìɔ̌ɔ̀ kɔ̃ɛɛ, ɔ mɔ̀ nyɔ ɓě ɓɛ́ wa wɔ̃́ bɔ̃̌ nɔ̀mɔ̀ dyíinɔ̀, ké wa kpá múàǔn, ké wa kpɔ̃ ɔ jè dyiɛ. Kɛɛ wuɖuɔ̀ se ɖé waà fɛ̀ɛ̀ɔ̀ mú kpá jɛ́ɛ́ cá. Wa taɓaa hwìɖǐǐ kpã́ún pū. Ti ɓɛ́ mú-dɔ̃̌-dɔ̃̌ dyiɛɛ, wa táà ɔ jè dyi wàɖà. 14Ɓáá-ɖɛ̀-dyùàɔ̀ nyɔ kpáà wí-gbǎɔ̀ múɛɛ, ɔ mɔ̀ nyɔ ɓě ɓɛ́ wa wɔ̃́ bɔ̃̌ nɔ̀mɔ̀ dyíinɔ̀, ké kà wa mu dyúa kɛɛ, wa poìn ɓóɖó-kpàà jè hwìɖǐi mìɔ, ké bã jè kpɔ̃ wa hwòɖǒ, ké wuɖuɔ̀ se ɖɛ ɖò nyu ɖé waà fɛ̀ɛ̀ɔ̀ múɛ. 15Ké ɓáá-ɖɛ̀-dyùàɔ̀ nyɔ kpáà ɓóɖó bùɛ̀-bùɛ̀ múɛɛ, ɔ mɔ̀ nyɔ ɓě ɓɛ́ wa wɔ̃́ bɔ̃̌ nɔ̀mɔ̀ dyíinɔ̀, ké wa kpɔ̃ɔ dyi kóɖó-kóɖó ɖé hwòɖǒ-dyùà nɔ̀mɔ̀ dyíin kè hwòɖǒ wáɖáá mú, ké wa ku dúún, ké bɔ̃̌ nɔ̀mɔ̀ dyíinɔ̀ tòɖò ɖé wa múɛ.
Ɖáùnpò nì gbǎ-wĩín ɖò xwíɖíiɛ
(Máà 4:21-25)
16“Nyɔ ɖò ní kpɔ̃̀ìn ɖáùnpò dyí, ké ɔ ní dèɛ̀ gbǎ-wĩín xwíɖíi, ké ɔ ní dèɛ̀ gbɛ xwíɖíi. Kɛɛ ɔ dèɛ̀ ɖáùnpò-kɔ̃-dè-ɖɛ̀ kɔ̃, ɓɛ́ nyɔǔn ɓě dyi ɖé gbǒɔ̀ mú dyáuń nìǐn, ɓɛ́ wa kéɛ ceɔ̀ dyé. 17Ɖɛ séín ɓě ɓɛ́ nyɔǔn vǐè kɛɛ mu píé wóɖóùn, ké ɖɛ séín ɓě ɓɛ́ wa gàìn nyɛɛ, nyɔǔn mu wa dyí dyuòùn, ké wa mu ce dyí dyiìn.
18“Ɓě ma mú ɓó kà ɓě mu ɖùǔ tòɛ̀ nyuùn wɛ̃, sepóɛɖé nyɔ mɔ̀ nyɔ ɓɛ́ ɔ ɓéɖé ɖɛ ɖò kɛɛ, ɔ mu ɖò dyéìn ɖe, kɛɛ nyɔ mɔ̀ nyɔ ɓɛ́ ɔ se ɖò ɓéɖéɛɛ, ɔ nyɔ ɓɛ́ ɔ ɖá ɔ ɓéɖéà kɛɛ mu ɔ xwa sɔ̀ùn.”
Jízɛ̀ ɖe kè ɔ ɖíí-gàà ɓě
(Máfíò 12:46-50; Máà 3:31-35)
19Sɔ̀ìn ɓóɛ gboɛɛ, Jízɛ̀ ɖe kè ɔ ɖíí-gàà ɓěɔ̀ dyi ma ɔ gbo, kɛɛ wa se ma ɖé ɔ gbo nyiniɛ ɓɛ́ìn ɓó nyɔ kúɖúú ɓěɔ̀ jè. 20Ké nyɔ ɓěɔ̀ cɛ̃ɛ ma ɔ gbo, ké wa ɖá, “Gmɔ̀ nɔ̄, m̀ ɖe kè nì ɖíí-gàà ɓě nyànà ɖé píé dyi, ké wa mɔ́ ɓɛ́ wa ké m̀ dyé.”
21Kɛɛ Jízɛ̀ cɛ̃ɛ ma wa gbo, ké ɔ ɖá, “Nyɔ ɓě mɔ̀ nyɔ ɓɛ́ wa wɔ̃́ Gèɖèpɔ́ɔ̀-wùɖùɔ̀, ké wa nyuɛ kɛɛ, wa mɔ̀ ḿ ɖe kè ḿ ɖíí ɓěɔ̀ jɛ́ɛ́.”
Jízɛ̀ po dìì ɖò ɓɔ́í
(Máfíò 8:23-27; Máà 4:35-41)
22Wé ɖòɛ̀ ɓaɖaa, Jízɛ̀ kè ɔ ɖeín-nà-nyɔ̀ ɓěɔ̀ dyá ma ɓáɖáà ɖò mú, ké ɔ cɛ̃ɛ ma wa gbo, ké ɔ ɖá, “Ɓěà mu ɖé dòùnɓìǎɔ̀ ɖeín.” Ké wa ɖú ma mu kpàǐ. 23Ti wa nì ma muɛń nyɛɛ, Jízɛ̀ kpá ma nyíɔún. Ké dìì vɛ̀nɛ̀ ɖò dyi ma ɖé dòùnɓìǎɔ̀ kɔ̃, ké ní ɖú ma ɓáɖáàɔ̀ mú wáɖá kpàǐ, ké wa nì ma nàdǐ mú. 24Ké wa mu ma, ké wa túò ma Jízɛ̀, ké wa ɖá, “Ɓɔ̌ɔ̀, à nìǎ mú gbɔɔ̀ǔno.”
Ké ɔ sɔ̀ dyí, ké ɔ po dììɔ̀ kè dyóó-kpɛ̀ ku wɔ̃ ɓěɔ̀ ɓɔ́í. Ké wa ɓɔ́, ké níɔ̀ dè ma dyi dɔ̃̀ùn-dɔ̃̀ùn. 25Ké ɔ diè ma wa dyi, ké ɔ ɖá, “Dɛ̌ ɓěɛ̀ hwìɖǐǐ-taɓa-taɓaɔ̀ nìɛ́?”
Ké wa fɛ̃̀ìn ma, ké wa giniìn ma dyi, ké wa cɛ̃ìn cɛ̃̀ìn ma gbo, ké wa ɖá, “Gàaɔ̀ nyɛ́ nìà kà kɛ́? Ɔ wùɖù dìì kè dyóó-kpɛ̀ ɓěɔ̀ gbo, ké wa nyu ɔ wuɖu wà!”
Jízɛ̀ kánáìn gàa ɖò ɓɛ́ ɔ ɓéɖé zùù gbà ɓě kɛɛ dyi
(Máfíò 8:28-34; Máà 5:1-20)
26Ké Jízɛ̀ kè ɔ ɖeín-nà-nyɔ̀ ɓěɔ̀ nyini ma Gádàwíɖíìn-nyɔ̀ ɓěɔ̀ ɓíɖí-ɓòɖò ɓɛ́ ɔ nì ma ɖé Gáɖàɖíì-ɓòɖòɔ̀ ɖeín nyɛɛ kɔ̃. 27Ti ɓɛ́ Jízɛ̀ ɖǎ ma ɓáɖáàɔ̀ mú sɔ̀ kɛɛ, ɔ kè gàa ɖò ɓɛ́ zùù gbà nì ma mú, ké ɔ sɔ̀ ma ɖé hwɔɖɔɔ̀ múɛɛ gmɔ̌ìn ma. Ɔ ɖǎ hwèɖèìn, ké gàaɔ̀ séè ɖɔ mú po ɖò. Ɔ se ma ɖé ɔ ɓíɖí-taún cĩ́, kɛɛ ɔ cĩ́ ma ɖé kú-toɖoɔ̀ mú. 28Ti ɔ dyé ma Jízɛ̀ kɛɛ, ɔ páná ma mú, ké ɔ ɓùɖùìn ma ɓó ɔ ɓo zɔ̃̌, ké ɔ ɖá, “Jízɛ̀, mɔ̀ mɔ̀à Ɖɛɓíɔ́ Gèɖèpɔ́ɔ̀ Dyú-gààɔ̀ kɛɛ, ɖɛ́ kɔ̃̀ jè m̀ nì ḿ fũ̀à-fṹá nyùɛ̌n nyɛ́? Ní ɓaà m̀ ní, mɔ̀ǔn ɖá ɓɛ́ m̀ ké ḿ gǎ dyéìn.” 29Ɔ cɛ̃ ma ɖɛa, sepóɛɖé Jízɛ̀ ɖǎa ma zùù gbàɔ̀ gbo cɛ̃, ɓɛ́ ɔ ké ma gàaɔ̀ mú sɔ̀. Ti ɓáún-ɓáún xwíníín nyɛɛ, zùù gbàɔ̀ ɖǎ ma ɔ kɔ̃ kpá. Wa gmɔ̀ ma gàaɔ̀ dyí, ké wa sã̀ìn ma ɔ dyɔ̀ɔ̌ dyɛo, kɛɛ ɔ cɛ̃ìn ma dyɔ̀ɔ̌ ɓěɔ̀ dyi, ké zùù gbàɔ̀ kpa ma ɔ ɖé gbǎùn-fúɖúáɔ̀ kɔ̃.
30Ké Jízɛ̀ diè ma zùù gbàɔ̀ dyi, ké ɔ ɖá, “Xwɛ̌ nì nyɛ́nɛ́ jǔɛ́?”
Ké ɔ ɖá, “Ní nyɛ́nɛ́ mɔ̀ Vòò-nyɔ̀.” Ɔ cɛ̃ɛ ma náa, sepóɛɖé zùù gbà pàɖǎ ɖǎ ma ɔ mú dyá jè. 31Ké zùù gbà ɓěɔ̀ ɓaà ma Jízɛ̀, ɓɛ́ ɔ ní kɔ̃̀ ɖà wa ɖé ɓí vɛ̀nɛ̀ tɔ̀mɔ̀ǔn-tɔ̀mɔ̀ǔnɔ̀ mú po.
32Ɔ nì ná kɛɛ, ɓeé kúɖúú ɓě nì ma ɖi ɖiɛń ɓó toɖo ɖò nì ɓóɛɛ dya. Ké zùù gbà ɓěɔ̀ ɓaà ma Jízɛ̀, ɓɛ́ ɔ ké wɔ̃́, ɓɛ́ wa ké ɓeé ɓěɔ̀ mú kpá. Ké ɔ wɔ̃́ ma, 33ké zùù gbà ɓěɔ̀ sɔ̀ ma gàaɔ̀ mú, ké wa kpá ma ɓeé ɓěɔ̀ mú. Ké ɓeé ɓěɔ̀ kpa peɖeɛ ɖé dòùnɓìǎɔ̀ kpóó dyeinɔ̀ kɔ̃, ké wa wáɖá ma ɖé níɔ̀ kɔ̃, ké wa sè ɓó nyɛ̀nɛ̀ɛ̀.
34Ti ɓɛ́ ɓeé ɓěɔ̀ dyí-gmɔ̀-nyɔ̀ ɓěɔ̀ dyé ma ɖɛ kpá ma kà kɛɛ, wa gbǔ ma, ké wa mu ma ɖé hwɔɖɔɔ̀ mú ɔ kè ɖé hwɔɖɔ-kpàǎ ɓěɔ̀ kɔ̃, ké wa cɛ̃ ma ɖɛ séín kpá ma kɛ. 35Ké nyɔǔn ɓě dyi, ɓɛ́ wa ké ɖɛ kpá ma kà kɛɛ dyé. Wa dyi, ké wa dyé ma Jízɛ̀, ké gàa kɔ̃̀ mú zùù gbà ɓěɔ̀ sɔ̀ ma kà kɛɛ kò ma ɓó Jízɛ̀ ɓo zɔ̃̌ dyi. Ɔ po ma ɖɔún, ké ɔ fɔ̀nɔ̀-hwòɖǒɔ̀ ɖǎ ma ɔ gbo ɖe dyi. Púɛɛ, wa fɛ̃̀ìn ma ní. 36Ké nyɔ ɓě ɓɛ́ wa dyé ma kà ɖɛ kpá ma kà gàa ɓɛ́ zùù gbà ɓěɔ̀ nì ma kà múɛ gboɛɛ zaìn ma kà gàaɔ̀ nyu ma dyi kánáa kɛɛ kɔ̃in ɖé nyɔ ɓěɔ̀ gbo. 37Ké nyɔ kúɖúú ɓě ɓɛ́ wa sɔ̀ ma ɖé Gádàwíɖíìn-nyɔ̀ ɓěɔ̀ ɓíɖí-ɓòɖòɔ̀ kɔ̃ɛɛ cɛ̃ɛ ma Jízɛ̀ gbo, ɓɛ́ ɔ ké ma ɖé waà ɓóɖóɔ̀ mú sɔ̀, sepóɛɖé wa zi ma fɛ̃̀ǐn mìɔ. Ɔ jèɛɛ, Jízɛ̀ dyá ma ɓáɖáàɔ̀ mú ɖe, ké ɔ sɔ̀ ma ɖé waà ɓóɖóɔ̀ kɔ̃.
38Ti ɓɛ́ Jízɛ̀ ɖǎ ma zùù gbà ɓěɔ̀ gàaɔ̀ mú zà kɛɛ, gàaɔ̀ ɓaà ma Jízɛ̀, ɓɛ́ ɔ ké ma Jízɛ̀ kíɖíí sí. Kɛɛ Jízɛ̀ ɖoɓo ma ɔ ɖe, ké ɔ ɖá, 39“Mu m̀ ɓíɖí-taún ɖe, ɓɛ́ m̀ ké ɖɛ séín ɓɛ́ Gèɖèpɔ́ɔ̀ ɖǎà m̀ bìì nyuɛɛ jè cɛ̃.”
Ké gàaɔ̀ mu ma, ké ɔ cɛ̃ ma ɖɛ ɓě ɓɛ́ Jízɛ̀ ɖǎ ma ɔ bìì nyuɛɛ jè ɖé hwɔɖɔɔ̀ dà séín.
Jáíwɛ̀ɖɛ̀ɛ̀ dyú-màà kè màa ɖò tìnììn ma Jízɛ̀ɛ̀ mú-po-ɖɔ̀ɔ̀ dyiɛɛ jè
(Máfíò 9:18-26; Máà 5:21-43)
40Ti ɓɛ́ Jízɛ̀ kɔ́ìn ma ɖé níɔ̀ wáká tɔ̀ɔ̀ kɔ̃ ɖeɛɛ, nyɔ kúɖúú ɓě kpɔ̃ ma ɔ hwìǐ, sepóɛɖé wa séín nì ma ɔ fòèɛ̌n. 41Púɛɛ, gàa ɖò kɔ̃̀ nyɛ́nɛ́ mɔ̀ ma Jáíwɛ̀ɖɛ̀ kɛɛ dyi ma. Ɔ mɔ̀ ma Júù-nyɔ̀ ɓěɔ̀ cɔ́cì-gbò ɓěɔ̀ ɖòɛ̀ wuɖuí-kɔ̃̀-nyɔ̀. Ɔ jìɖǐ ma ɓó Jízɛ̀ ɓo zɔ̃̌ dyi, ké ɔ ɓaà ma ɔ, ɓɛ́ ɔ ké ma ɖé ɔ ɓíɖí-taún mu, 42sepóɛɖé ɔ dyú-màà dyúáɖò kpeé-kpeé ɓɛ́ ɔ mɔ̀ǎ ma zɔ̃ ɓaɖa-bùè sè sɔ̃́ kɛɛ nì ma mɛ́iń.
Ké ti Jízɛ̀ nì ma ɖé Jáíwɛ̀ɖɛ̀ ɓíɖí-taún muɛń nyɛɛ, nyɔ ɓěɔ̀ dè ma ɔ dyí. 43Ɓó tia ɓaɖaa, màa ɖò ɓɛ́ ɔ ɓéɖé ma nyɔmɔɔ-mú-sɔ̀-wɛ̀ ɓó zɔ̃ ɓaɖa-bùè sè sɔ̃́ xwíníín, ɓɛ́ nyɔ ɖò se ma ɔ dyi kánáìn ɓɛ́ìn nyɛɛ 44dyììn ma Jízɛ̀ ɖeín, ké ɔ tìnììn ma Jízɛ̀ɛ̀ mú-po-ɖɔ̀ɔ̀ dyi. Wàɖà kɛɛ, wɛ́ɔ̀ ɓɔ́ ma. 45Ké Jízɛ̀ ɖá, “Nyɛ́ tìnììn kà ḿ dyiɛ́?”
Ké nyɔ séín ɖá ɔ se ma wa mɔ̀. Ké Píɖɛ̀ ɖá, “Ɓɔ̌ɔ̀, m̀ dyé nyɔ kúɖúú ɓěɛ̀, ké wa nì m̀ dyí dèɛ̌n.”
46Kɛɛ Jízɛ̀ ɖá, “Nyɔ ɖò tìnììn ḿ dyi, sepóɛɖé ḿ dyuòɛ̀ dyí kà ní nyɔ-dyi-kánáìn-kpèɔ̀ ɖò ɖǎ ḿ mú sɔ̀ kɛ.” 47Ké ti màaɔ̀ dyéɛ ma kà ɔ jè se ma kɔ̃in gàìn ɓɛ́ìn nyɛɛ, púɛɛ, ɔ dyà ma tɛɖɛɛ, ké ɔ jìɖǐ ma ɓó Jízɛ̀ ɓo zɔ̃̌ dyi. Ké ɔ cɛ̃ ma ɖɛ kɔ̃̀ jè ɔ tìnììn ma kà Jízɛ̀ dyiɛɛ ɓó nyɔ séín ɓěɔ̀ dyúa, ɔ kè kà ɔ nyu ma dyi kánáa wàɖà kɛ. 48Ké Jízɛ̀ cɛ̃ɛ ma ɔ gbo, ké ɔ ɖá, “Ní dyú-màà, nì hwìɖǐǐ-taɓa-taɓaɔ̀ ɖǎ m̀ dyi kánáìn. Mu, nì hwòɖǒɔ̀ mɛ ɓɔ́ ɓaɖaa.”
49Ti ɓɛ́ Jízɛ̀ nì ma wùɖùɛ̌n keɛɛ, nyɔ ɖò sɔ̀ ma ɖé Jáíwɛ̀ɖɛ̀ ɓíɖí-taún, ké ɔ cɛ̃ɛ ma Jáíwɛ̀ɖɛ̀ gbo, ké ɔ ɖá, “Nì dyú-mààɔ̀ ɖǎ mɛ́. Mɔ̀ǔn ɖá ɓɛ́ m̀ ké nyɔ-ɖɛ-tɛ̀mɛ̀ìn-nyɔ̀ɔ̀ fũ̀à-fṹá nyùìn ɖe.”
50Kɛɛ ti ɓɛ́ Jízɛ̀ wɔ̃́ ma ɖɛa kɛɛ, ɔ cɛ̃ɛ ma Jáíwɛ̀ɖɛ̀ gbo, ké ɔ ɖá, “Mɔ̀ǔn ɖá ɓɛ́ m̀ ké fɛ̃̀ìn. Dè ḿ hwòɖǒ kɔ̃. Nì dyúɔ̀ mu dyi kánáùn.”
51Ti Jízɛ̀ nyini ma gbǒɔ̀ zɔ̃̌ɛɛ, ɔ se ma wɔ̃́ ɓɛ́ nyɔ kà kò ɖò ké ma ɔ kíɖíí sí, ɔ sèìn Píɖɛ̀ kè Jɔ̃́ɔ́ kè Jĩ́ìn ɔ kè dyúɔ̀ ɖe kè ɔ ɓǎ. 52Ké nyɔ séín ɓěɔ̀ nì ma kpé poɛń, ké wa nì ma kuɖu-kuɖu nyuɛń. Kɛɛ Jízɛ̀ ɖá, “Ɓě ɓɔ́ kpé poɛ. Dyúɔ̀ se mɛ́. Ɔ nì mɔ́uń.”
53Ké nyɔ ɓěɔ̀ kéɛ̀ ma ɔ, sepóɛɖé wa dyuòɛ̀ kà dyúɔ̀ ɖǎ ma mɛ́ɛ. 54Kɛɛ Jízɛ̀ kpɔ̃ ma dyúɔ̀ sɔ̃ɔ̀ dyi, ké ɔ cɛ̃ɛ ma ɔ gbo, ké ɔ ɖá, “Ní dyú, sɔ̀ dyí.” 55Ké dyúɔ̀ fɛ̀ɛ̀ɔ̀ dyi ma ɔ mú ɖe, ké ɔ sɔ̀ ma dyí wàɖà. Ké Jízɛ̀ cɛ̃ɛ ma wa gbo, ɓɛ́ wa ké ma dyúɔ̀ ɖii-ɖɛ̀ ɖò nyí. 56Ɔ wóɖóìn-nyɔ̀ ɓěɔ̀ giniìn ma dyi mìɔ, kɛɛ Jízɛ̀ cɛ̃ɛ ma wa gbo, ɓɛ́ wa ní kɔ̃̀ ɖà ɖɛ ɖǎ ma kà kpáa nyɔ ɖò gbo cɛ̃.
Bassa Bible © Bible Society Liberia, 2002.
Ɖúù 8
8
Màa ɓě ɓɛ́ wa sí ma Jízɛ̀ kíɖííɛ
1Sɔ̀ìn ɓóɛ gboɛɛ, Jízɛ̀ kpa ma bɔ̃̌ nɔ̀mɔ̀ dyíin ɓá Gèɖèpɔ́ɔ̀ kã́á-ɓòɖòɔ̀ jè dyíɛɛ cɛ̃ɛ ɖé hwɔɖɔ ɓěɔ̀ mú ɔ kè ɖé hwɔɖɔ-kpàǎ ɓěɔ̀ kɔ̃in. Ɔ kè ɔ ɖeín-nà-nyɔ̀ ɓaɖa-bùè sè sɔ̃́ ɓěɔ̀ mu ma. 2Ké màa ɖíɛ́ ɓě ɓɛ́ wa ɓéɖé ma zùù gbà kè wɛ́-dù kò-kò ɓě, ké Jízɛ̀ ɖǎ ma wa dyi kánáìn nyɛɛ mu ma ɖekè. Wa mɔ̀ ma Meɖé ɓɛ́ wa ɖáìn Máɖèɖà-nyɔ̀ kɔ̃̀ mú ɓɛ́ Jízɛ̀ zà ma zùù gbà mɛ̀nɛ̌ìn-sɔ̃́ kɛ 3kè Jòánà mɔ̀ ma Cúzà mɔ̀ ma Hɛ́wɔ̀ɖɔ̀ɛ̀ gbo-nì-nyɔ̀ kɛɛ gmàà kɛ kè Zùzánà ɔ kè màa kúɖúú tɔ̀ɔ̀ ɓě ɓɛ́ wa kpá ma Jízɛ̀ kè ɔ ɖeín-nà-nyɔ̀ ɓěɔ̀ gbo ɖé ɖɛ ɓě ɓɛ́ wa ɓéɖé ma kɛɛ múɛ.
Nɔ́ɔ́ ɓá ɖɛ-ɓá-nyɔ̀ ɖò jè dyíɛ
(Máfíò 13:1-9; Máà 4:1-9)
4Ɓó tia ɓaɖaa, nyɔ ɓě nì ma Jízɛ̀ gbo dyiɛń sɔ̀ìn ɖé hwɔɖɔ ɖò-ɖò ɓě mú. Ti ɓɛ́ nyɔ kúɖúú ɓě poìn ma dyíɛɛ, Jízɛ̀ po ma nɔ́ɔ́ nìà kɛ wa gbo, ké ɔ ɖá, 5“Gàa ɖò sɔ̀ ma dyí, ké ɔ mu ma ɓáá-ɖɛ̀ ɓáùn. Ti ɔ nì ma ɓáá-ɖɛ̀-dyùàɔ̀ mɛ́nɛ́iń nyɛɛ, ɔ dyúàɔ̀ ɖíɛ́ ɓě wáɖá ma ɓó hwìèɔ̀ gbìǐ dyi, ké nyɔǔn síɛ̀n kɔ̃in, ké naà ɓě dyi, ké wa manaa ma. 6Ké ɖíɛ́ ɓě kpá ma ɓó ɓóɖó wè ɓáìn sɔ́ɔ́-pìɔ̌ kɔ̃in nyɛɛ mú. Ké ti wa gbǎ ma kɔ̃́ɔ́ kɛɛ, wa mɛ́ ma, sepóɛɖé ní ɖò se ma ɓó nì. 7Ké ɓáá-ɖɛ̀-dyùàɔ̀ ɖíɛ́ ɓě kpá ma dɛ̀ ɓɛ́ wí-gbǎ ɓě nì ma kɛ, ké wa kè wí ɓěɔ̀ mɛ ma, ké wí ɓěɔ̀ taɓaìn ma ɓáá-ɖɛ̀ ɓěɔ̀ dyi. 8Ké ɓáá-ɖɛ̀-dyùàɔ̀ ɖíɛ́ ɓě kpá ɓóɖó bùɛ̀-bùɛ̀ mú, ké wa gbǎ ma kɔ̃́ɔ́, ké wa mɛ, ké wa zaìn dúún. Wa tòɖò ma ɓo hɔ̃dɛ̀ɖɛ̀ ɖò.”
Ti Jízɛ̀ ɖǎ ma ɖɛa cɛ̃ kɛɛ, ɔ kpa ma wuɖu dyií, ké ɔ ɖá, “Nyɔ ɓɛ́ ɔ ɓéɖé ɖùǔ ɓɛ́ ɔ ké dyi wɔ̃́ɛɛ, ɔ mɛ tò ɖùǔ.”
Xwíníín kɔ̃̀ jè Jízɛ̀ poà nɔ́ɔ́ kɛ
(Máfíò 13:10-17; Máà 4:10-12)
9Sɔ̀ìn ɓóɛ gboɛɛ, Jízɛ̀ɛ̀ ɖeín-nà-nyɔ̀ ɓěɔ̀ diè ma ɔ dyi ɓá nɔ́ɔ̀ jè dyí. 10Ké Jízɛ̀ ɖá, “Gèɖèpɔ́ɔ̀ ɖǎa nyu ɓɛ́ ɓě ké ɖɛ ɓě vǐè ma kĩ́ín ɓá ɔ kã́á-ɓòɖòɔ̀ jè dyíɛɛ dyí dyuò. Kɛɛ ɓó nyɔ tɔ̀ɔ̀ ɓěɔ̀ mɔ̀ùn bììɛɛ, vǐè-ɖɛ̀ ɓěɔ̀ dyììn nɔ́ɔ́ mú ɖé wa gbo, ɓɛ́ wa kéɛ gmɔ̀, ɓɛ́ wa ké seɛ múin dyé, ɔ kè ɓɛ́ wa kéɛ wɔ̃́, ɓɛ́ wa ké seɛ múin wɔ̃́.
Jízɛ̀ zà nɔ́ɔ́ ɓá ɖɛ-ɓá-nyɔ̀ɔ̀ jè dyíɛɛ xwíníín mú
(Máfíò 13:18-23; Máà 4:13-20)
11“Nɔ́ɔ̀ xwíníínɔ̀ kɛà kɛ̀. Ɓáá-ɖɛ̀-dyùàɔ̀ mɔ̀ Gèɖèpɔ́ɔ̀-wùɖùɔ̀. 12Ɓáá-ɖɛ̀-dyùà ɓě ɓɛ́ wa wáɖáìn ma kà hwìèɔ̀ gbìǐ dyiɛɛ, wa mɔ̀ nyɔ ɓě wɔ̃́ bɔ̃̌ nɔ̀mɔ̀ dyíinɔ̀, kɛɛ Nɔɔ́-nàmàǔn dyi, ké ɔ bǎ bɔ̃̌ nɔ̀mɔ̀ dyíinɔ̀ ɖé wa hwòɖǒ-dyùàɔ̀ mú, ɓɛ́ wa ní kɔ̃̀ɔ̀ ɖà hwìɖǐǐ taɓa, ɓɛ́ wa ní kɔ̃̀ ɖà póɛ. 13Ɓáá-ɖɛ̀-dyùàɔ̀ nyɔ kpáà ɓó sɔ́ɔ́-pìɔ̌ɔ̀ kɔ̃ɛɛ, ɔ mɔ̀ nyɔ ɓě ɓɛ́ wa wɔ̃́ bɔ̃̌ nɔ̀mɔ̀ dyíinɔ̀, ké wa kpá múàǔn, ké wa kpɔ̃ ɔ jè dyiɛ. Kɛɛ wuɖuɔ̀ se ɖé waà fɛ̀ɛ̀ɔ̀ mú kpá jɛ́ɛ́ cá. Wa taɓaa hwìɖǐǐ kpã́ún pū. Ti ɓɛ́ mú-dɔ̃̌-dɔ̃̌ dyiɛɛ, wa táà ɔ jè dyi wàɖà. 14Ɓáá-ɖɛ̀-dyùàɔ̀ nyɔ kpáà wí-gbǎɔ̀ múɛɛ, ɔ mɔ̀ nyɔ ɓě ɓɛ́ wa wɔ̃́ bɔ̃̌ nɔ̀mɔ̀ dyíinɔ̀, ké kà wa mu dyúa kɛɛ, wa poìn ɓóɖó-kpàà jè hwìɖǐi mìɔ, ké bã jè kpɔ̃ wa hwòɖǒ, ké wuɖuɔ̀ se ɖɛ ɖò nyu ɖé waà fɛ̀ɛ̀ɔ̀ múɛ. 15Ké ɓáá-ɖɛ̀-dyùàɔ̀ nyɔ kpáà ɓóɖó bùɛ̀-bùɛ̀ múɛɛ, ɔ mɔ̀ nyɔ ɓě ɓɛ́ wa wɔ̃́ bɔ̃̌ nɔ̀mɔ̀ dyíinɔ̀, ké wa kpɔ̃ɔ dyi kóɖó-kóɖó ɖé hwòɖǒ-dyùà nɔ̀mɔ̀ dyíin kè hwòɖǒ wáɖáá mú, ké wa ku dúún, ké bɔ̃̌ nɔ̀mɔ̀ dyíinɔ̀ tòɖò ɖé wa múɛ.
Ɖáùnpò nì gbǎ-wĩín ɖò xwíɖíiɛ
(Máà 4:21-25)
16“Nyɔ ɖò ní kpɔ̃̀ìn ɖáùnpò dyí, ké ɔ ní dèɛ̀ gbǎ-wĩín xwíɖíi, ké ɔ ní dèɛ̀ gbɛ xwíɖíi. Kɛɛ ɔ dèɛ̀ ɖáùnpò-kɔ̃-dè-ɖɛ̀ kɔ̃, ɓɛ́ nyɔǔn ɓě dyi ɖé gbǒɔ̀ mú dyáuń nìǐn, ɓɛ́ wa kéɛ ceɔ̀ dyé. 17Ɖɛ séín ɓě ɓɛ́ nyɔǔn vǐè kɛɛ mu píé wóɖóùn, ké ɖɛ séín ɓě ɓɛ́ wa gàìn nyɛɛ, nyɔǔn mu wa dyí dyuòùn, ké wa mu ce dyí dyiìn.
18“Ɓě ma mú ɓó kà ɓě mu ɖùǔ tòɛ̀ nyuùn wɛ̃, sepóɛɖé nyɔ mɔ̀ nyɔ ɓɛ́ ɔ ɓéɖé ɖɛ ɖò kɛɛ, ɔ mu ɖò dyéìn ɖe, kɛɛ nyɔ mɔ̀ nyɔ ɓɛ́ ɔ se ɖò ɓéɖéɛɛ, ɔ nyɔ ɓɛ́ ɔ ɖá ɔ ɓéɖéà kɛɛ mu ɔ xwa sɔ̀ùn.”
Jízɛ̀ ɖe kè ɔ ɖíí-gàà ɓě
(Máfíò 12:46-50; Máà 3:31-35)
19Sɔ̀ìn ɓóɛ gboɛɛ, Jízɛ̀ ɖe kè ɔ ɖíí-gàà ɓěɔ̀ dyi ma ɔ gbo, kɛɛ wa se ma ɖé ɔ gbo nyiniɛ ɓɛ́ìn ɓó nyɔ kúɖúú ɓěɔ̀ jè. 20Ké nyɔ ɓěɔ̀ cɛ̃ɛ ma ɔ gbo, ké wa ɖá, “Gmɔ̀ nɔ̄, m̀ ɖe kè nì ɖíí-gàà ɓě nyànà ɖé píé dyi, ké wa mɔ́ ɓɛ́ wa ké m̀ dyé.”
21Kɛɛ Jízɛ̀ cɛ̃ɛ ma wa gbo, ké ɔ ɖá, “Nyɔ ɓě mɔ̀ nyɔ ɓɛ́ wa wɔ̃́ Gèɖèpɔ́ɔ̀-wùɖùɔ̀, ké wa nyuɛ kɛɛ, wa mɔ̀ ḿ ɖe kè ḿ ɖíí ɓěɔ̀ jɛ́ɛ́.”
Jízɛ̀ po dìì ɖò ɓɔ́í
(Máfíò 8:23-27; Máà 4:35-41)
22Wé ɖòɛ̀ ɓaɖaa, Jízɛ̀ kè ɔ ɖeín-nà-nyɔ̀ ɓěɔ̀ dyá ma ɓáɖáà ɖò mú, ké ɔ cɛ̃ɛ ma wa gbo, ké ɔ ɖá, “Ɓěà mu ɖé dòùnɓìǎɔ̀ ɖeín.” Ké wa ɖú ma mu kpàǐ. 23Ti wa nì ma muɛń nyɛɛ, Jízɛ̀ kpá ma nyíɔún. Ké dìì vɛ̀nɛ̀ ɖò dyi ma ɖé dòùnɓìǎɔ̀ kɔ̃, ké ní ɖú ma ɓáɖáàɔ̀ mú wáɖá kpàǐ, ké wa nì ma nàdǐ mú. 24Ké wa mu ma, ké wa túò ma Jízɛ̀, ké wa ɖá, “Ɓɔ̌ɔ̀, à nìǎ mú gbɔɔ̀ǔno.”
Ké ɔ sɔ̀ dyí, ké ɔ po dììɔ̀ kè dyóó-kpɛ̀ ku wɔ̃ ɓěɔ̀ ɓɔ́í. Ké wa ɓɔ́, ké níɔ̀ dè ma dyi dɔ̃̀ùn-dɔ̃̀ùn. 25Ké ɔ diè ma wa dyi, ké ɔ ɖá, “Dɛ̌ ɓěɛ̀ hwìɖǐǐ-taɓa-taɓaɔ̀ nìɛ́?”
Ké wa fɛ̃̀ìn ma, ké wa giniìn ma dyi, ké wa cɛ̃ìn cɛ̃̀ìn ma gbo, ké wa ɖá, “Gàaɔ̀ nyɛ́ nìà kà kɛ́? Ɔ wùɖù dìì kè dyóó-kpɛ̀ ɓěɔ̀ gbo, ké wa nyu ɔ wuɖu wà!”
Jízɛ̀ kánáìn gàa ɖò ɓɛ́ ɔ ɓéɖé zùù gbà ɓě kɛɛ dyi
(Máfíò 8:28-34; Máà 5:1-20)
26Ké Jízɛ̀ kè ɔ ɖeín-nà-nyɔ̀ ɓěɔ̀ nyini ma Gádàwíɖíìn-nyɔ̀ ɓěɔ̀ ɓíɖí-ɓòɖò ɓɛ́ ɔ nì ma ɖé Gáɖàɖíì-ɓòɖòɔ̀ ɖeín nyɛɛ kɔ̃. 27Ti ɓɛ́ Jízɛ̀ ɖǎ ma ɓáɖáàɔ̀ mú sɔ̀ kɛɛ, ɔ kè gàa ɖò ɓɛ́ zùù gbà nì ma mú, ké ɔ sɔ̀ ma ɖé hwɔɖɔɔ̀ múɛɛ gmɔ̌ìn ma. Ɔ ɖǎ hwèɖèìn, ké gàaɔ̀ séè ɖɔ mú po ɖò. Ɔ se ma ɖé ɔ ɓíɖí-taún cĩ́, kɛɛ ɔ cĩ́ ma ɖé kú-toɖoɔ̀ mú. 28Ti ɔ dyé ma Jízɛ̀ kɛɛ, ɔ páná ma mú, ké ɔ ɓùɖùìn ma ɓó ɔ ɓo zɔ̃̌, ké ɔ ɖá, “Jízɛ̀, mɔ̀ mɔ̀à Ɖɛɓíɔ́ Gèɖèpɔ́ɔ̀ Dyú-gààɔ̀ kɛɛ, ɖɛ́ kɔ̃̀ jè m̀ nì ḿ fũ̀à-fṹá nyùɛ̌n nyɛ́? Ní ɓaà m̀ ní, mɔ̀ǔn ɖá ɓɛ́ m̀ ké ḿ gǎ dyéìn.” 29Ɔ cɛ̃ ma ɖɛa, sepóɛɖé Jízɛ̀ ɖǎa ma zùù gbàɔ̀ gbo cɛ̃, ɓɛ́ ɔ ké ma gàaɔ̀ mú sɔ̀. Ti ɓáún-ɓáún xwíníín nyɛɛ, zùù gbàɔ̀ ɖǎ ma ɔ kɔ̃ kpá. Wa gmɔ̀ ma gàaɔ̀ dyí, ké wa sã̀ìn ma ɔ dyɔ̀ɔ̌ dyɛo, kɛɛ ɔ cɛ̃ìn ma dyɔ̀ɔ̌ ɓěɔ̀ dyi, ké zùù gbàɔ̀ kpa ma ɔ ɖé gbǎùn-fúɖúáɔ̀ kɔ̃.
30Ké Jízɛ̀ diè ma zùù gbàɔ̀ dyi, ké ɔ ɖá, “Xwɛ̌ nì nyɛ́nɛ́ jǔɛ́?”
Ké ɔ ɖá, “Ní nyɛ́nɛ́ mɔ̀ Vòò-nyɔ̀.” Ɔ cɛ̃ɛ ma náa, sepóɛɖé zùù gbà pàɖǎ ɖǎ ma ɔ mú dyá jè. 31Ké zùù gbà ɓěɔ̀ ɓaà ma Jízɛ̀, ɓɛ́ ɔ ní kɔ̃̀ ɖà wa ɖé ɓí vɛ̀nɛ̀ tɔ̀mɔ̀ǔn-tɔ̀mɔ̀ǔnɔ̀ mú po.
32Ɔ nì ná kɛɛ, ɓeé kúɖúú ɓě nì ma ɖi ɖiɛń ɓó toɖo ɖò nì ɓóɛɛ dya. Ké zùù gbà ɓěɔ̀ ɓaà ma Jízɛ̀, ɓɛ́ ɔ ké wɔ̃́, ɓɛ́ wa ké ɓeé ɓěɔ̀ mú kpá. Ké ɔ wɔ̃́ ma, 33ké zùù gbà ɓěɔ̀ sɔ̀ ma gàaɔ̀ mú, ké wa kpá ma ɓeé ɓěɔ̀ mú. Ké ɓeé ɓěɔ̀ kpa peɖeɛ ɖé dòùnɓìǎɔ̀ kpóó dyeinɔ̀ kɔ̃, ké wa wáɖá ma ɖé níɔ̀ kɔ̃, ké wa sè ɓó nyɛ̀nɛ̀ɛ̀.
34Ti ɓɛ́ ɓeé ɓěɔ̀ dyí-gmɔ̀-nyɔ̀ ɓěɔ̀ dyé ma ɖɛ kpá ma kà kɛɛ, wa gbǔ ma, ké wa mu ma ɖé hwɔɖɔɔ̀ mú ɔ kè ɖé hwɔɖɔ-kpàǎ ɓěɔ̀ kɔ̃, ké wa cɛ̃ ma ɖɛ séín kpá ma kɛ. 35Ké nyɔǔn ɓě dyi, ɓɛ́ wa ké ɖɛ kpá ma kà kɛɛ dyé. Wa dyi, ké wa dyé ma Jízɛ̀, ké gàa kɔ̃̀ mú zùù gbà ɓěɔ̀ sɔ̀ ma kà kɛɛ kò ma ɓó Jízɛ̀ ɓo zɔ̃̌ dyi. Ɔ po ma ɖɔún, ké ɔ fɔ̀nɔ̀-hwòɖǒɔ̀ ɖǎ ma ɔ gbo ɖe dyi. Púɛɛ, wa fɛ̃̀ìn ma ní. 36Ké nyɔ ɓě ɓɛ́ wa dyé ma kà ɖɛ kpá ma kà gàa ɓɛ́ zùù gbà ɓěɔ̀ nì ma kà múɛ gboɛɛ zaìn ma kà gàaɔ̀ nyu ma dyi kánáa kɛɛ kɔ̃in ɖé nyɔ ɓěɔ̀ gbo. 37Ké nyɔ kúɖúú ɓě ɓɛ́ wa sɔ̀ ma ɖé Gádàwíɖíìn-nyɔ̀ ɓěɔ̀ ɓíɖí-ɓòɖòɔ̀ kɔ̃ɛɛ cɛ̃ɛ ma Jízɛ̀ gbo, ɓɛ́ ɔ ké ma ɖé waà ɓóɖóɔ̀ mú sɔ̀, sepóɛɖé wa zi ma fɛ̃̀ǐn mìɔ. Ɔ jèɛɛ, Jízɛ̀ dyá ma ɓáɖáàɔ̀ mú ɖe, ké ɔ sɔ̀ ma ɖé waà ɓóɖóɔ̀ kɔ̃.
38Ti ɓɛ́ Jízɛ̀ ɖǎ ma zùù gbà ɓěɔ̀ gàaɔ̀ mú zà kɛɛ, gàaɔ̀ ɓaà ma Jízɛ̀, ɓɛ́ ɔ ké ma Jízɛ̀ kíɖíí sí. Kɛɛ Jízɛ̀ ɖoɓo ma ɔ ɖe, ké ɔ ɖá, 39“Mu m̀ ɓíɖí-taún ɖe, ɓɛ́ m̀ ké ɖɛ séín ɓɛ́ Gèɖèpɔ́ɔ̀ ɖǎà m̀ bìì nyuɛɛ jè cɛ̃.”
Ké gàaɔ̀ mu ma, ké ɔ cɛ̃ ma ɖɛ ɓě ɓɛ́ Jízɛ̀ ɖǎ ma ɔ bìì nyuɛɛ jè ɖé hwɔɖɔɔ̀ dà séín.
Jáíwɛ̀ɖɛ̀ɛ̀ dyú-màà kè màa ɖò tìnììn ma Jízɛ̀ɛ̀ mú-po-ɖɔ̀ɔ̀ dyiɛɛ jè
(Máfíò 9:18-26; Máà 5:21-43)
40Ti ɓɛ́ Jízɛ̀ kɔ́ìn ma ɖé níɔ̀ wáká tɔ̀ɔ̀ kɔ̃ ɖeɛɛ, nyɔ kúɖúú ɓě kpɔ̃ ma ɔ hwìǐ, sepóɛɖé wa séín nì ma ɔ fòèɛ̌n. 41Púɛɛ, gàa ɖò kɔ̃̀ nyɛ́nɛ́ mɔ̀ ma Jáíwɛ̀ɖɛ̀ kɛɛ dyi ma. Ɔ mɔ̀ ma Júù-nyɔ̀ ɓěɔ̀ cɔ́cì-gbò ɓěɔ̀ ɖòɛ̀ wuɖuí-kɔ̃̀-nyɔ̀. Ɔ jìɖǐ ma ɓó Jízɛ̀ ɓo zɔ̃̌ dyi, ké ɔ ɓaà ma ɔ, ɓɛ́ ɔ ké ma ɖé ɔ ɓíɖí-taún mu, 42sepóɛɖé ɔ dyú-màà dyúáɖò kpeé-kpeé ɓɛ́ ɔ mɔ̀ǎ ma zɔ̃ ɓaɖa-bùè sè sɔ̃́ kɛɛ nì ma mɛ́iń.
Ké ti Jízɛ̀ nì ma ɖé Jáíwɛ̀ɖɛ̀ ɓíɖí-taún muɛń nyɛɛ, nyɔ ɓěɔ̀ dè ma ɔ dyí. 43Ɓó tia ɓaɖaa, màa ɖò ɓɛ́ ɔ ɓéɖé ma nyɔmɔɔ-mú-sɔ̀-wɛ̀ ɓó zɔ̃ ɓaɖa-bùè sè sɔ̃́ xwíníín, ɓɛ́ nyɔ ɖò se ma ɔ dyi kánáìn ɓɛ́ìn nyɛɛ 44dyììn ma Jízɛ̀ ɖeín, ké ɔ tìnììn ma Jízɛ̀ɛ̀ mú-po-ɖɔ̀ɔ̀ dyi. Wàɖà kɛɛ, wɛ́ɔ̀ ɓɔ́ ma. 45Ké Jízɛ̀ ɖá, “Nyɛ́ tìnììn kà ḿ dyiɛ́?”
Ké nyɔ séín ɖá ɔ se ma wa mɔ̀. Ké Píɖɛ̀ ɖá, “Ɓɔ̌ɔ̀, m̀ dyé nyɔ kúɖúú ɓěɛ̀, ké wa nì m̀ dyí dèɛ̌n.”
46Kɛɛ Jízɛ̀ ɖá, “Nyɔ ɖò tìnììn ḿ dyi, sepóɛɖé ḿ dyuòɛ̀ dyí kà ní nyɔ-dyi-kánáìn-kpèɔ̀ ɖò ɖǎ ḿ mú sɔ̀ kɛ.” 47Ké ti màaɔ̀ dyéɛ ma kà ɔ jè se ma kɔ̃in gàìn ɓɛ́ìn nyɛɛ, púɛɛ, ɔ dyà ma tɛɖɛɛ, ké ɔ jìɖǐ ma ɓó Jízɛ̀ ɓo zɔ̃̌ dyi. Ké ɔ cɛ̃ ma ɖɛ kɔ̃̀ jè ɔ tìnììn ma kà Jízɛ̀ dyiɛɛ ɓó nyɔ séín ɓěɔ̀ dyúa, ɔ kè kà ɔ nyu ma dyi kánáa wàɖà kɛ. 48Ké Jízɛ̀ cɛ̃ɛ ma ɔ gbo, ké ɔ ɖá, “Ní dyú-màà, nì hwìɖǐǐ-taɓa-taɓaɔ̀ ɖǎ m̀ dyi kánáìn. Mu, nì hwòɖǒɔ̀ mɛ ɓɔ́ ɓaɖaa.”
49Ti ɓɛ́ Jízɛ̀ nì ma wùɖùɛ̌n keɛɛ, nyɔ ɖò sɔ̀ ma ɖé Jáíwɛ̀ɖɛ̀ ɓíɖí-taún, ké ɔ cɛ̃ɛ ma Jáíwɛ̀ɖɛ̀ gbo, ké ɔ ɖá, “Nì dyú-mààɔ̀ ɖǎ mɛ́. Mɔ̀ǔn ɖá ɓɛ́ m̀ ké nyɔ-ɖɛ-tɛ̀mɛ̀ìn-nyɔ̀ɔ̀ fũ̀à-fṹá nyùìn ɖe.”
50Kɛɛ ti ɓɛ́ Jízɛ̀ wɔ̃́ ma ɖɛa kɛɛ, ɔ cɛ̃ɛ ma Jáíwɛ̀ɖɛ̀ gbo, ké ɔ ɖá, “Mɔ̀ǔn ɖá ɓɛ́ m̀ ké fɛ̃̀ìn. Dè ḿ hwòɖǒ kɔ̃. Nì dyúɔ̀ mu dyi kánáùn.”
51Ti Jízɛ̀ nyini ma gbǒɔ̀ zɔ̃̌ɛɛ, ɔ se ma wɔ̃́ ɓɛ́ nyɔ kà kò ɖò ké ma ɔ kíɖíí sí, ɔ sèìn Píɖɛ̀ kè Jɔ̃́ɔ́ kè Jĩ́ìn ɔ kè dyúɔ̀ ɖe kè ɔ ɓǎ. 52Ké nyɔ séín ɓěɔ̀ nì ma kpé poɛń, ké wa nì ma kuɖu-kuɖu nyuɛń. Kɛɛ Jízɛ̀ ɖá, “Ɓě ɓɔ́ kpé poɛ. Dyúɔ̀ se mɛ́. Ɔ nì mɔ́uń.”
53Ké nyɔ ɓěɔ̀ kéɛ̀ ma ɔ, sepóɛɖé wa dyuòɛ̀ kà dyúɔ̀ ɖǎ ma mɛ́ɛ. 54Kɛɛ Jízɛ̀ kpɔ̃ ma dyúɔ̀ sɔ̃ɔ̀ dyi, ké ɔ cɛ̃ɛ ma ɔ gbo, ké ɔ ɖá, “Ní dyú, sɔ̀ dyí.” 55Ké dyúɔ̀ fɛ̀ɛ̀ɔ̀ dyi ma ɔ mú ɖe, ké ɔ sɔ̀ ma dyí wàɖà. Ké Jízɛ̀ cɛ̃ɛ ma wa gbo, ɓɛ́ wa ké ma dyúɔ̀ ɖii-ɖɛ̀ ɖò nyí. 56Ɔ wóɖóìn-nyɔ̀ ɓěɔ̀ giniìn ma dyi mìɔ, kɛɛ Jízɛ̀ cɛ̃ɛ ma wa gbo, ɓɛ́ wa ní kɔ̃̀ ɖà ɖɛ ɖǎ ma kà kpáa nyɔ ɖò gbo cɛ̃.
Bassa Bible © Bible Society Liberia, 2002.