Matius 14
14
Yohanes Pembaptis dapa bunu
(Mrk. 6:14-29; Luk. 9:7-9)
1Waktu itu, Herodes#14:1: Herodes ini, Herodes Antipas. Dia pe papa itu raja Herodes pertama, yang parenta supaya bunu ana-ana kacil di Betlehem waktu Yesus masi kacil. yang jadi raja di daera Galilea, dia dengar kabar tentang Yesus. 2Kong dia bilang pa dia pe pegawai-pegawai, “Mangkali Yesus itu Yohanes Pembaptis yang dulu mati, kong so hidup ulang kaapa? Ada harus dia bole biking mujizat-mujizat itu!”
3 #
Mrk. 6:17-18; Luk. 3:19-20 Raja Herodes bilang bagitu, barang tempo hari, dia yang suru tangka pa Yohanes kong ika deng rante, turus kase maso di penjara. Dia biking bagitu karna masala Herodias. Dia pe carita bagini: raja Herodes ambe pa Herodias kong kase jadi dia pe bini. Padahal, Herodias so kawing deng Filipus, Herodes pe sudara sandiri. 4#Im. 18:16, 20:21 Kong Yohanes togor ulang-ulang pa Herodes. Dia bilang bagini, “Bapa, bapa so langgar Tuhan Allah pe aturan karna bapa so ambe bapa pe ipar Herodias kong kase jadi bapa pe bini!”
5Waktu Herodes dengar bagitu, Dia ingin bunu pa Yohanes, tapi dia tako pa orang banya karna dorang anggap Yohanes itu nabi yang jaga kase turus Tuhan Allah pe pasáng.
6Satu kali bagini, waktu Herodes pe hari jadi, Herodias pe ana parampuang baronggeng di muka Herodes deng dia pe tamu-tamu. Dia manari biking Herodes pe hati sanang. 7Karna itu, Herodes bajanji sampe dia basumpa, mo kase apa saja yang ana itu minta.
8Pe dengar itu, ana itu pe mama suru pa dia supaya pigi pe Herodes kong bilang bagini, “Kita minta Yohanes Pembaptis pe kapala taru di atas baki, kong kase pa kita di sini!”
9Waktu raja Herodes dengar apa yang ana parampuang itu minta, dia pe hati jadi susa. Tapi karna dia so basumpa pa ana parampuang itu di dia pe tamu-tamu pe muka, dia kase iyo apa yang ana itu minta. 10Jadi, Herodes suru dia pe ana bua la potong Yohanes pe kapala di penjara. 11Turus, ana bua itu taru Yohanes pe kapala di baki kong kase pa ana parampuang itu. Turus ana parampuang itu kase pa dia pe mama. 12Waktu Yohanes Pembaptis pe murit-murit dengar Yohanes so mati, dorang datang ambe dia pe mayat kong kubur. Abis itu, dorang pigi kase tau kabar itu pa Yesus.
Yesus kase makang lima ribu orang lebe
(Mrk. 6:30-44; Luk. 9:10-17; Yoh. 6:1-13)
13Waktu Yesus dengar Yohanes Pembaptis so mati, Dia deng Dia pe murit-murit pigi dari situ. Dorang nae parau satu kong pigi di tampa yang sunyi deng jao dari kampong, la mo basandiri di sana. Tapi waktu orang banya tau itu, dorang kaluar dari dong pe kota-kota kong bajalang kaki ka sana la mo baku dapa deng Yesus. 14Waktu Yesus turung dari parau, Dia lia orang banya itu, kong Dia rasa kasiang pa dorang. Turus Dia kase sembu pa orang-orang yang saki.
15Bagitu so sore, Yesus pe murit-murit datang pa Dia kong bilang, “Guru, tampa ini jao dari kampong, deng so mo malam. Jadi lebe bae Guru suru pa orang banya ini pigi di kampong-kampong la dong bili makanang.”
16Tapi Yesus bilang pa Dia pe murit-murit itu, “Dorang tara perlu pigi. Ngoni yang musti kase makang pa dorang.”
17Kong murit-murit bilang pa Yesus, “Guru, yang ada pa torang di sini cuma roti lima deng ikang dua ekor.”
18Yesus bilang pa dorang, “Bawa suda kamari itu.” 19Turus, Dia suru orang banya itu dudu di atas rumpu. Kong Dia ambe roti lima deng ikang dua itu. Dia mangada di langit kong batarimakasi pa Tuhan Allah. Abis itu, Dia pela-pela roti itu kong kase pa Dia pe murit-murit. Turus, Dia pe murit-murit kase bage-bage pa orang banya. 20Kong samua orang makang sampe kanyang. Abis itu, Yesus pe murit-murit kumpul makanang yang talebe, ada dua blas karanjang ponong. 21Yang makang hari itu, ada lima ribu orang laki-laki, itu bolong tahitung parampuang deng ana-ana.
Yesus bajalang di atas aer
(Mrk. 6:45-56; Yoh. 6:16-21)
22Abis itu, Yesus langsung suru Dia pe murit-murit nae di parau la pigi kamuka ka sana di sabla talaga. Sementara itu, Dia suru orang banya itu pulang. 23Waktu Yesus so suru orang banya itu pulang, Dia nae di bukit untuk berdoa di situ sandiri. Waktu so malam, Yesus masi sandiri di situ. 24Sementara itu, Yesus pe murit-murit itu so jao ka lao di talaga pe tenga-tenga, kong angin kancang batiop dari muka sampe dong pe parau mulai balenggang kuat.
25Pe amper siang, Yesus datang pa dorang, Dia bajalang di atas aer. 26Waktu Dia pe murit-murit lia ada yang bajalang di atas aer, dorang tako skali kong bataria, “Setang!”
27Tapi Yesus langsung bilang pa dorang, “Tenang, jang tako! Ini Kita!”
28Kong Petrus bilang pa Dia, “Guru, kalu butul itu Guru, suru suda kita bajalang di atas aer ka sana pa Guru.”
29Kong Yesus bilang pa dia, “Kamari suda!”
Turus, Petrus turung dari parau kong dia bajalang ka sana pa Yesus. 30Tapi waktu Petrus dapa rasa angin kuat, dia jadi tako kong mulai tenggelam. Dia bataria pa Yesus, “Guru, tolong pa kita!”
31Kong Yesus capat-capat pegang Petrus pe tangan, turus angka pa dia. Yesus bilang, “Ee, ngana yang kurang percaya, bikiapa kong ngana ragu?”
32Abis itu dorang nae di parau kong angin me jadi todo. 33Pe lia samua itu, orang-orang yang ada di parau semba pa Yesus deng bilang, “Guru ini butul Anak Allah.”
Yesus kase sembu banya orang saki di Genesaret
(Mrk. 6:53-56)
34Bagitu Yesus deng Dia pe murit-murit sampe di sabla talaga, dorang balabu di daera Genesaret. 35Kong waktu orang-orang di situ kanal pa Yesus, dong capat kase tau di samua tampa di daera itu, Yesus so ada. Pe dengar itu, orang-orang bawa samua orang saki pa Yesus. 36Kong dorang bamohon pa Yesus supaya Dia kase ijin pa orang-orang saki, la dorang pegang pa Dia biar cuma pa Dia pe ujung juba. Jadi, samua orang saki yang bapegang pa Dia jadi sembu.
נבחרו כעת:
Matius 14: PB MMU
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Perjanjian Baru Bahasa Melayu Maluku Utara @ Lembaga Alkitab Indonesia 2020