Juan 7
7
Jechu ju̧i̧di ja̧ji̧ri̧ pio judiro̧borë quëna̧dërëreji̧ri̧diro̧jo̧ȩ
1Ado japamitë chjätä ëte, Garirea quȩmȩ chirirämo̧ tai̧rëremȩde Jechu judi. Jabechji̧ oëra̧ti̧ oa chjätäti̧ cjiarërea̧ ji̧, Garirea quȩmȩ chirirämo̧ ano̧ mire tai̧rëremȩde. Jabechji̧ Judearäpȩ tjamo̧ cjo̧ro̧ji̧ri̧ judio judiro̧ Jechu pio ju̧i̧ ja̧bo tänȩpea̧ ji̧ järi tjamo̧ oaiä, ja̧dira̧ jädëri̧ cjiarëremȩde. 2Ado judiorë do chjätärea̧ do üdë ma̧na̧pea̧ ji̧ querediä tjamo̧rëremȩde. Aja̧, chja̧oe tomi̧ darä cjo̧ro̧rea̧ do chjätärea̧ do üdë ma̧na̧pea̧ ji̧ querediä tjamo̧rëremȩde.#7:2 Chja̧oe tomi̧ darä cjo̧ro̧rea̧ quȩmȩ do chjätärea̧ do üdë, jabechji̧ judio pio ji̧ri̧ jo̧rȩta tänȩpea̧rëremȩde. Jibëa̧ ütëti̧rea̧ pio judiro̧ chiri maearäpȩ chjätäti̧ cjiarërea̧ pio ju̧i̧ jo̧rȩtapea̧ oa, judiro̧ chja̧oe tomi̧ darä cjo̧ro̧rërea̧ pio ju̧i̧ jo̧rȩtapea̧ oa, juraji̧ri̧rȩ a̧dope chjaorëreji̧ri̧dirȩ. 8 do nö̧ta a̧doparëreji̧ri̧dirȩ. Ado pio ju̧i̧iä ja̧di dari̧ quȩpea̧diro̧jo̧ȩ. Chja̧oe tomi̧ darä cjo̧ro̧rea̧ do quȩra̧ quȩpea̧diro̧jo̧ȩ jiro do chjätärea̧ do oa. 3Ado pio ju̧i̧iä Jechu ja̧ oti̧ judiro̧, pio ju̧i̧di ja̧ji̧ri̧ pio judiro̧ yo̧a̧diro̧jo̧ȩ Judiorë a̧doparea̧räpȩ jätä. Jabomo̧ yo̧ji̧ri̧rȩ yo̧a̧diro̧jo̧ȩ, jibëa̧ omȩ pio ju̧i̧ ba chia dadëji̧ri̧rȩ.
—Jaevä Jechu, pio yudiri go̧dütäremȩrenȩ Judea chiriräpȩ jäpea̧ oa —yo̧a̧diro̧jo̧ȩ—. Danȩ, na̧ jadü judiro̧ pio mȩa chjadëri̧ dapea̧ oa, jauëchja cjiari̧ na̧rȩmȩ oa irä dapea̧ oa, jabechji̧ ja̧dira̧ jätäremȩrenȩ —yo̧a̧diro̧jo̧ȩ—. 4Danȩ, eami̧ pumȩ üdë o judiro̧ pio jȩa chjiari chjadëri̧ dabatä earä judi, pio jȩaiäpȩmo̧ ba chia jo̧rȩtatä earä judi, jabechji̧ goadirea̧mi̧dëde, jabo chjadë maearä cjo̧ro̧mi̧ dari̧ japapea̧ chiade. Ado mȩnȩ jauëchja cjiari̧ japarea̧ chia tara, jabechji̧ dai chirirä cjo̧ro̧ji̧ri̧ ütëbodärärë dabarea̧mi̧ dari̧ japatäremȩrenȩ pio ji̧ri̧ ja̧ dachoro. Jaevä. Judearäpȩ jävä —yo̧a̧diro̧joȩ, Jechu pio ju̧i̧ ba chia dadëji̧ri̧rȩ.
5Ja̧di ta̧rëri̧ yo̧ji̧ri̧rȩ jabomo̧ goaeri̧ yo̧rëreji̧ri̧diro̧jo̧ȩ Jechu ju̧i̧iäpȩmo̧ judiro̧ quëna̧dëa̧ oaiä. Jabechji̧ pio ju̧i̧di ja̧ji̧ri̧ judiro̧borë quëna̧dëa̧diro̧jo̧ȩ. ‘Aja̧, Ütë tjamo̧ pio judi chjadüa̧ oa birë ma̧na̧diibëda’ quëna̧ dadëa̧diro̧jo̧ȩ. Ado pio ju̧i̧iä chjaocjiami̧ dari̧ yo̧rëreji̧ri̧diro̧jo̧ȩ.
6Jabo Jechu judi dëbë yo̧a̧dejȩrȩ:
—Jabërequede —yo̧a̧dejȩrȩ—. Pjärämȩde. Jabë na̧rȩdëpea̧de. Pio coa da tänȩpea̧ do üdë jabë ma̧na̧dëa̧de. Tjamo̧ davä. Pumȩ ütëbodärä oa pio coaiäpȩmo̧ da tänȩpea̧ do üdë jabë ma̧na̧dëa̧de. Ütära̧ do üdë jabë ma̧na̧dëa̧dique. Jabo ja̧didëde pio dibëiä. Ado pio mȩnȩro̧ jätämi̧ cjiarä judi, jächji̧vä chjaodëri̧. 7Jabechji̧ dai chirirä cjo̧ro̧ji̧ri̧ judiro̧ goëdëri̧ cjia dadë madiro̧dibe, jabo ja̧didëdiro̧coe coa. Goëdëri̧ cjia dadiro̧coe. Cüdë, judiro̧ chjai̧dëri̧ japea̧ pio ju̧i̧ chjiari ji̧dë ma yo̧a̧ oaiä, jabechji̧ goëdëri̧ cjia dadiro̧coe. 8Jabo danȩrȩ ca̧ oti̧, do chjätärea̧ do tara, jabechji̧ judiorë a̧doparea̧räpȩ jächji̧vä, jabo jädërequede. Jabechji̧ ütara̧ do üdë jabë ma̧na̧dëa̧ oaiä, jädërequede —yo̧mȩrȩ yo̧rëremȩdejȩrȩ.
9Ado ja̧di ta̧rëri̧ yo̧ ëte, Jechu judi cjiadiäa̧de Garirearäpȩ.
Jechu judi jädëparemȩrȩ järëremȩde Jerucharȩräpȩ
10Jabo Jechu ja̧ pumȩ judiro̧ judiorë a̧dopamȩräpȩ jäa̧ duri oa, peaja̧di järëremȩde, ji̧ri̧ ja̧ ma̧ȩrä jädëmȩrȩ. Jabo ütëborë pio jȩaiäpȩmo̧ darea̧mi̧ dari̧ jätärea̧ ji̧, goadi jämȩrȩ jäa̧de. 11Ado a̧doparea̧räpȩ ju̧ri̧ judio tjamo̧ yo̧ji̧ri̧ pio judiro̧ na̧tarëreji̧ri̧diro̧jo̧ȩ. Ado a̧dopaji̧ri̧ pio ji̧ri̧iä ja̧di ta̧rëri̧ iëno̧ iëno̧ ta̧rëtarëreji̧ri̧diro̧jȩrȩ:
—Pio jiro üi̧ üdë, ¿tjana̧räpȩde? —iënoë ta̧rëtea̧diro̧jȩrȩ.
12Ado noi̧dërë goadi ni̧bä chjaorëreji̧ri̧dirȩ Jechu pio ju̧i̧ chjiari. “Aja̧, pumȩ chjadëde” yo̧a̧dirȩ o judiro̧. Ado o judiro̧: “Cjäri̧ made, pumȩ ji̧ri̧ u̧i̧pe u̧i̧pe ni̧bämȩde. Pumȩ chjadëdëde” yo̧dirȩ. 13Jabo judiro̧ ütëborë ta̧rëri̧ ni̧bätärea̧ ji̧, goadi ni̧bä marëreji̧ri̧dirȩ ütëborë ta̧rërea̧mi̧dëri̧. Jabechji̧ tjamo̧ yo̧ji̧ri̧ judio pio ji̧ri̧ uapea̧ oaiä, goadi ni̧bärëreji̧ri̧dirȩ.
14Ado chja̧oe tomi̧ darä cjo̧ro̧pea̧ do chjätärea̧ do üdë, jabechji̧ 8 do ma a̧doparea̧ dorëremȩde. Ado jadüchiami̧ do chjätä ëte, Jechu judi järëremȩde Ütë tjamo̧ ja̧ bëräpȩ. Ado ju̧ri̧pȩ go̧düdäräa̧rä, taruparëremȩde a̧ra̧ano̧pea̧ ji̧. 15Ado tjamo̧ yo̧ji̧ri̧ judio judiro̧ dacho bëremi̧ cjiami̧ dari̧ jo̧rȩtaji̧ri̧rȩ ta̧rërëreji̧ri̧diro̧jo̧ȩ. Ado yo̧a̧dirȩ, ana̧ri̧ jo̧rȩtaji̧ri̧rȩ:
—Chia chia, dabaparea̧ jo̧räpȩ dabapadëa̧räbo, jabechji̧ a̧dë chäte ji̧ra̧ tjamo̧ oa dabapea̧de. ¿Yö̧ta dari̧ dabapea̧de yüdëje? Jabechji̧ dabaparea̧ jo̧räpȩ dabaparemȩmi̧ dari̧ a̧ra̧ano̧mȩde —yo̧a̧dirȩ.
16Ja̧dëa ji̧ Jechu judi ‘ja̧di ta̧rëri̧ yo̧diro̧da’ quëna̧ dabamȩrȩ yo̧a̧dejȩrȩ:
—Danȩrȩ, ca̧ea̧ ma̧na̧ri̧ jo̧rȩtamȩrȩ a̧ra̧ano̧dërequede, jabo jabechji̧ Ütë tjamo̧ pio judiri ja̧ maeara̧ a̧ra̧ano̧requede, pio coa chjadüa̧mȩ pio judiri ja̧ maeara̧. 17Ado eami̧ pumȩ judi, Ütërë eami̧ tjamo̧ri̧ japatämi̧ cjiarä judi, jabechji̧ chjadëri̧ dabarea̧ dapade davä cüdë a̧ra̧ano̧a̧ pio ju̧i̧ chjiari —yo̧a̧dejȩrȩ—. 'Jabechji̧ jibëa̧ ma̧na̧ri̧ jo̧rȩtamȩrȩ a̧ra̧ano̧dëdida, jabo Ütë tjamo̧ pio judiri ma̧na̧mȩ maea oa a̧ra̧ano̧dida’ quëna̧ jo̧rȩtapade pio coa chjiari. 18Jabo o judiro̧, jibëa̧ ma̧na̧ri̧ jo̧rȩtaji̧ri̧rȩ a̧ra̧ano̧ji̧ri̧ pio judiro̧, cjäri̧ madirȩ, pio jibëiäpȩmo̧ ma ba chia datä eadiro̧jȩrȩ pumȩ ji̧ri̧. Pio jibë chjiarimo̧i̧ chjacjiamȩri̧ ni̧bätä eadiro̧jȩrȩ —yo̧a̧dejȩrȩ—. Jabo danȩrȩ, pio jȩa chjadüa̧mȩ pio ju̧i̧iäpȩmo̧ ma chjacjiamȩri̧ ni̧bätä eamȩ pio judi, jabechji̧ coëma cjiari̧ cjo̧ro̧de, pumȩ pio ji̧ri̧iäpȩmo̧ u̧i̧pe ni̧bärea̧ decjiari̧. 19Danȩrȩ, Moiche judi pio dibëiäpȩmo̧ tüdüa̧mi̧ darä cjo̧ro̧pea̧ ma̧ȩ oa yürürëremȩdidibe. Jabo cjäri̧ manȩrȩ, pio jiro ma̧ȩ oa nö̧tadäräri̧ ta̧rëdiädë marenȩro̧jo̧ȩ. Ado pio ju̧i̧ nö̧tadäräri̧ ta̧rëdiädëa̧rä judi, ¿tjana̧ ju̧i̧iä aechide yo̧renȩro̧coe cüdë ta̧rëdiädëa̧bea pio ju̧i̧ chjiari. Mȩnȩro̧ pio jiro ma̧ȩ oa chjadëri̧ ta̧rëdiädërä judi, ¿tjana̧ ju̧i̧iä järitanȩrȩ yaba̧ pio coa ja̧bo tänȩpea̧ ji̧? —iëno̧ë ta̧rëa̧dejȩrȩ.
20Jabo dëbë yo̧ji̧ri̧rȩ yo̧a̧diro̧jo̧ȩ:
—Cjäri̧ marenȩ, yaröca chiarenȩ —yo̧a̧diro̧jo̧ȩ—. A̧ro̧rȩ mȩa ja̧bo tänȩtämi̧ cjia ma ja̧didë. Teracabari̧ jo̧rȩtarenȩ —yo̧a̧diro̧jo̧ȩ.
21Jabo Jechu judi yo̧a̧dejȩrȩ:
—Danȩrȩ, ado cja̧rȩmo̧ doremȩrä järätä chjaparea̧ doro, jabomo̧ cja̧rȩmȩ co jauëchja cjiari̧ japamȩrȩ, chjaparȩa̧reconȩ gito ja̧boremȩ ju̧i̧ —yo̧a̧dejȩrȩ—. Ado mȩnȩro̧ pio ju̧i̧ daea̧ oaiä, cüdë järätä chjaparea̧ doro japea̧ pio ju̧i̧ daea̧ oaiä, dacho bëremi̧ cjiami̧ dari̧ jo̧rȩtaji̧ri̧pea̧nȩrȩ, goëdëri̧ cjiape bagaji̧ri̧rȩ. 22Jabo peaja̧di dari̧ japanȩrȩ —yo̧a̧dejȩrȩ—. Peaja̧di ja̧bepanȩrȩ järätä chjaparea̧ doro. Danȩrȩ, Moiche judi jibëa̧ ütëti̧rea̧ pio ji̧ri̧iä pearä ta̧rë ëte, yo̧rëremȩdidibe davä, dibëa̧ ja oa ütara̧ doro budopea̧ pio ju̧i̧ chjiari. Ado pio ju̧i̧iä jabechji̧, dibëa̧ ja oa nö̧ri ëte, do oa chjadëri̧ ütara ëte, jabechji̧ chjadëri̧ budorënȩrȩ. 'Jabechji̧ järätä chjaparea̧ dorobo ja̧bepadëpea̧dida’ quëna̧ dabaji̧ri̧borë tjaoërä budorënȩrȩ järätä chjaparea̧ dorobo. Pio ju̧i̧iä pio mȩnȩro̧borë ütarami̧ japatämi̧ cjiaji̧ri̧rȩ ja̧bepami̧ dari̧ japanȩrȩ davä pio jiro doro —yo̧a̧dejȩrȩ—. 23Aja̧, mȩnȩro̧ Moicherë go̧ȩparërea̧ ma̧ȩ pio ju̧i̧ jiadachea oa, jabechji̧ järätä chjaparea̧ dorobo budorënȩrȩ dibëa̧ ja pio ji̧ri̧.#7:23 Moiche judi icharaita ji̧ri̧ budopea̧ pio ju̧i̧ chjiari a̧ra̧ano̧rërea̧ ji̧, "üi̧ boi̧ oa 7 do ara ëte budopea̧de" yo̧mȩrȩ chi̧dëearëremȩdejȩrȩ. Aja̧, 7 do chjätä ëte dopea̧rä budopea̧de. Ado Moicherë yo̧rërea̧ duri pio ju̧i̧ jiadachea oa, ütara̧mi̧ budorëreji̧ri̧dirȩ icharaita judiro̧ jibëa̧ oari bori̧ ji̧ri̧. Ado ja̧di dari̧ japea̧ oaiä, järätä chjaparea̧ dorobo ja̧bepami̧ dari̧ japarëreji̧ri̧dirȩ. Pio ju̧i̧iä yo̧requededibe. Pio mȩnȩro̧borë ja̧bepanȩrȩ järätä chjaparea̧ doro. Ado pio ju̧i̧iä iëno̧ë ta̧rërequededibe. ¿Tjana̧ ju̧i̧iä ërecjiapea̧renȩro̧coe? Cüdë gito ja̧bomȩ pio ju̧i̧ järätä chjaparea̧ doro chjaparȩa̧ pio ju̧i̧iä, ¿tjana̧ ju̧i̧iä ërecjiapea̧renȩro̧coe? 24Jabechji̧ jabomo̧ uëmo̧ uëmo̧ jo̧rȩtaji̧ri̧rȩ ütaradëtäreji̧ri̧nȩrȩ, jabo jabechji̧ urëdi tjamo̧ oa jo̧rȩtaji̧ri̧rȩ ütaratärerji̧ri̧renȩro̧jo̧ȩ, coëma cjiari̧ ütaraji̧ri̧rȩ. Ado ja̧di dari̧ japea̧ oaiä, 'jabechji̧ coëma cjiari̧ japea̧dida’ quëna̧rea̧ dapanȩrȩ davä pio coa chjiari —yo̧mȩrȩ yo̧rëremȩdejȩrȩ Jechu judi.
‘Jechu pio judi Chjätä tänȩpame jirodida’ quëna̧ji̧ri̧pea̧diro̧jo̧ȩ orë
25Ado Jerucharȩräpȩ cjo̧ro̧ji̧ri̧ judiro̧ orë Jechu pio ju̧i̧ daea̧ ji̧, Ütë tjamo̧ ja̧ bëräpȩ pumȩ no̧i̧dë oa a̧ra̧ano̧mȩ oa daea̧ ji̧, ja̧di ta̧rëri̧ ni̧bä chjaoji̧ri̧pea̧dirȩ jibëa̧ dëbëti̧ra̧ chia:
—Danȩrȩ, ¿pio yüdë üi̧ pio judidëde o judiro̧ ja̧bo tänȩpea̧ ji̧ na̧ta̧ judi? Dëdë, pio judide. 26Jabo pio ju̧i̧ irä daea̧räbo, jabechji̧ eami̧ oa japadëdiro̧jo̧ȩ. Jabechji̧ ütëborë ta̧rërea̧mi̧ dari̧ ni̧bä chjaode chjadë maearä, uapadëmȩrȩ. Ado ni̧bä chjaomȩ oa goae tarari̧ dëbëpe chjaotärea̧ ji̧, eami̧ oa japadë madiro̧jo̧ȩ. Aechide yo̧dë madiro̧jo̧ȩ. Jabo dabadë jabo ‘Ütërë mitëa̧ Chjätä Tänȩmȩ pio judi jirodida’ quëna̧ jo̧rȩtape baga jirodiro̧jo̧ȩ. 27Jabo cjäri̧ made, pio yoa üi̧ pio ju̧i̧ chjiari dabarea̧ro̧jo̧ȩ. ‘Pio jiro bë ma̧ri̧räpȩ ütëpea̧dida, pio jiro bë ma̧ri̧rimȩdida’ quëna̧ dabarea̧ro̧jo̧ȩ. Jabo Ütërë mitëa̧ Chjätä Tänȩmȩ tjamo̧ pio judi ma̧na̧rä, jabechji̧ 'pio judiri ma̧na̧diibëda’ quëna̧ dabarea̧ dadëparea̧rȩ —yo̧rëreji̧ri̧dirȩ pumȩ judiro̧ Jechu pio ju̧i̧ chjiari.
28Ado Jechu judi Ütë tjamo̧ ja̧ bëräpȩ a̧ra̧ano̧a̧ ji̧, to̧bari̧ yo̧mȩrȩ iëno̧ë ta̧rëa̧dejȩrȩ pumȩ ji̧ri̧:
—Danȩrȩ, ¿mȩnȩro̧ pio coa chjiari tjamo̧ri̧ dabanȩrȩ? —iëno̧ë ta̧rëa̧dejȩrȩ—. ‘Pio judiri ma̧na̧diibëda’ ¿quëna̧ dabarenȩro̧coe? Danȩrȩ, ca̧ea̧ ma̧na̧ri̧ jo̧rȩtamȩrȩ ma̧na̧dëa̧requede, jabo Ütë tjamo̧ pio judi chjadüa̧ oa ma̧na̧requede —yo̧a̧dejȩrȩ—. Ado pio ju̧i̧ ja̧ ma̧ȩ üdë tjamo̧i̧ cjiari̧ baäde. Jabechji̧ ma̧ȩ chjádë yürüdëmȩde. Jabo cjäri̧ manȩro̧jo̧ȩ, dabadërenȩro̧jo̧ȩ. 29Jabo cüdë dabareconȩ. Ado pio judiri ma̧na̧requede. Aja̧, pio judide davä coa chjadüa̧mȩ judi —yo̧mȩrȩ yo̧a̧dejȩrȩ Jechu judi.
30Ado Jechu judi ja̧di ta̧rëri̧ yo̧a̧ oaiä, mitëtä järitea̧diro̧jo̧ȩ chaäpea̧ oa. Jabo cjäri̧ madiro̧jo̧ȩ, mitërea̧ dadëa̧diro̧jo̧ȩ. Mitëtä järitea̧räbo, eami̧ oa japarea̧ dadëa̧dirȩ. Jabechji̧ jabë mitëpea̧ dodë tara, chaärea̧ dadëa̧dirȩ. Ütara̧ doromo̧ mitërea̧ dapadiro̧jo̧ȩ.
31Ado pumȩ noi̧dërë quëna̧ji̧ri̧pea̧diro̧jo̧ȩ Jechu ju̧i̧, jabo o judiro̧mo̧rȩ. Ado quëna̧ji̧ri̧pea̧ pio judiro̧ ja̧di ta̧rëri̧ yo̧rëreji̧ri̧diro̧jȩrȩ jibëa̧ pumȩ ji̧ri̧:
—Danȩrȩ, ‘Jechu judi Ütërë mitëa̧ Chjätä Tänȩmȩ pio judi tjamo̧dida’ quëna̧ dabarea̧ro̧jo̧ȩ —yo̧a̧diro̧jȩrȩ—. Irä daea̧rea̧ro̧jo̧ȩ jauëchja cjiari̧ japamȩ oa. O judiro̧ japarea̧mi̧dëri̧ japamȩde. Pio ju̧i̧iä tjamo̧ri̧ dabarea̧ro̧jo̧ȩ. ‘Aja̧, Ütë tjamo̧ pio judi chjadüa̧ oa ma̧na̧diibëda, Ütërë mitëa̧ Chjätä Tänȩmȩ pio judi tjamo̧dida’ quëna̧ daba daea̧rea̧ro̧jo̧ȩ —yo̧ji̧ri̧rȩ yo̧a̧diro̧jȩrȩ jibëa̧ pumȩ ji̧ri̧.
32Ado pjaricheo judiro̧ pumȩ buba oa ta̧rëa̧ oaiä, Jechu pio ju̧i̧ chjiari goadi ni̧bäji̧ri̧ oa ta̧rëa̧ oaiä, jabechji̧ chjadürëreji̧ri̧diro̧jȩrȩ guadia ji̧ri̧ Jechu pio ju̧i̧ mitëpea̧ oa. Aja̧, pjaricheo judiro̧, ado tjamo̧ goë tuti ja̧bepaji̧ri̧ pio judiro̧ chjadüa̧diro̧jȩrȩ Ütë ja̧ bë oa jidaji̧ri̧ guadia pio ji̧ri̧ Jechu pio ju̧i̧ mitëpea̧ oa. 33Ado ja̧dëa ji̧ yo̧a̧dejȩrȩ Jechu judi ju̧i̧ ja̧ yuroro a̧dopë cjiaji̧ri̧ oa:
—Danȩrȩ, japamitë boi̧chji̧ maea oa ëba cjiaparequededibe —yo̧a̧dejȩrȩ—. Ado japamitë boi̧chji̧ chjätä ëte, ado chjereno̧ baäparequede coa chjadüa̧mȩ pio ju̧i̧iäpȩ. 34Ado na̧taparenȩro̧coe jabo cjäri̧ manȩrȩ, dadärädëparenȩro̧coe. Jabechji̧ coa cho̧rë jädärärea̧mi̧dëräpȩ a̧dë baäparequededibe —yo̧a̧dejȩrȩ.
35Ado pio ju̧i̧ ta̧rëa̧ oaiä, tjamo̧ yo̧ji̧ri̧ judio pio judiro̧ jibëa̧ dëbëti̧ra̧ chia ni̧bä chjaoji̧ri̧pea̧dirȩ, ja̧di ta̧rëri̧ yo̧ji̧ri̧rȩ:
—¿Jabo tjana̧räpȩ baäpade ibë a̧dë baäpea̧ oa, a̧ro̧rȩ pio ju̧i̧ dadärärea̧ dachea oa? —iëno̧ë ta̧rëa̧dirȩ—. ¿Judio judiro̧ orë chjuchjupechä baärërea̧räpȩ baäpade judiodë chjarerä goadi ano̧ mire cjo̧ro̧pea̧ oa? ¿Ibëa̧ chiridëräpȩ cjo̧ro̧ji̧ri̧ judio pio ji̧ri̧iäpȩmo̧ ano̧ mire a̧ra̧ano̧pea̧ oa baäpade? ¿Tjana̧räpȩ baärea̧ jo̧rȩtade? 36“Na̧taparenȩro̧coe jabo dadärädëpa” yo̧a̧ ji̧, ¿yö̧ta jo̧rȩtamȩrȩ yo̧a̧diibe? Ado judi yo̧a̧ ji̧, “Aja̧, pio coa cho̧rë jädärärea̧mi̧dëräpȩ a̧dë baäparequededibe” yo̧a̧ ji̧, ¿tjana̧ jo̧rȩtamȩrȩ yo̧a̧diibe? —yo̧ji̧ri̧rȩ yo̧a̧dirȩ jibëa̧ dëbëti̧ra̧ chia tjamo̧ yo̧ji̧ri̧ judio pio judiro̧, ana̧ri̧ jo̧rȩtaji̧ri̧rȩ.
Bucho ana̧ cjo̧ro̧rea̧ pio judi cjitëpade quëna̧ji̧ri̧ ja̧ chji̧ri pio judiri
37Judio judiro̧ do ji̧ra̧ri̧ a̧dopë ëte, go̧düdärärëremȩde cjiadiäa̧ do üdë, a̧dë chjäte ba chiamȩ do üdë. Ado pio jiro doro Jechu judi cjitë ëte, to̧bari̧ ni̧bä chjaorëremȩdejȩrȩ pumȩ buba oa, ja̧di ta̧rëri̧ yo̧mȩrȩ:
—Danȩrȩ, eami̧ pumȩ üdë ui ja̧borä judi, jana̧tädique cüdë pio ju̧i̧ jararea̧ yürüpea̧ oa —yo̧a̧dejȩrȩ—. 38Danȩrȩ, peaja̧di ta̧rëri̧ go̧ȩpea̧ oa cjiade Ütërë go̧ȩpa tänȩrërea̧ ma̧ȩ üdë. “Aja̧, eami̧ pumȩ üdë pio coaiäpȩmo̧ quëna̧mȩ pio judi, jabechji̧ pio ju̧i̧ ja̧ chji̧ri pio judiri cjitëpade bucho ana̧ cjo̧ro̧rea̧ üdë, uirë dabu ëteri pio judiri goae tarari̧ cjitëmi̧ dari̧" —yo̧a̧dejȩrȩ Jechu judi. 39Ado Jechu judi ja̧di ta̧rëri̧ yo̧a̧ ji̧, jabechji̧ Tjo tjamo̧ pio ju̧i̧ chjiari yo̧rëremȩde, pio jȩaiäpȩmo̧ quëna̧paji̧ri̧ pio judiro̧ chiapea̧ pio ju̧i̧ chjiari. Jabo jabërëremȩde jabo. Pio jiro japamitërä Tjo tjamo̧ pio judi jabë yürüa̧ oa cjiadërëremȩde. Quëna̧ji̧ri̧ pio ji̧ri̧iäpȩmo̧ jabë yürüa̧ oa cjiadëa̧de. Jabechji̧ Jechu judi jabë a̧dëräpȩ baädëa̧ oaiä, Ütë tjamo̧ judi Joja pio ju̧i̧ jabë a̧dë chjäte ba chia tjamo̧räpȩ chadärä tänȩdëa̧ oaiä, jabechji̧ jabë yürüa̧ oa cjiadërëremȩde Tjo tjamo̧ judi.
Jechu pio ju̧i̧ chjiari ni̧bä chjaoji̧ri̧rȩ tjarari̧ bubape bagami̧ dari̧ cjiadiärëreji̧ri̧dirȩ
40Ado pumȩ judiro̧ Jechurë ja̧di tärëri̧ yo̧mȩ oa ta̧rëa̧ oaiä, jabechji̧ pumȩ buba chjarerä cjiaji̧ri̧ judiro̧ orë järi tjamo̧pea̧ji̧ri̧rȩ yo̧rëreji̧ri̧dirȩ, ja̧di ta̧rëri̧ yo̧ji̧ri̧rȩ:
—Danȩrȩ, a̧ro̧rȩ no̧mȩ tjamo̧ri ja̧ jidatarërea̧ ni̧bämȩ pio judide. Jabechji̧ Ütërë ea jana̧ chjadüa̧ oa ni̧bämȩ pio judide pio yüdëje —yo̧a̧dirȩ.
41Jabo o judiro̧ yo̧a̧dirȩ:
—Cjäri̧ made, pio judidëde jabo Ütërë mitëa̧ Chjätä Tänȩmȩ pio judide —yo̧a̧dirȩ.
Jabo o judiro̧ yo̧a̧dirȩ:
—Cjäri̧ made. Ütërë mitëa̧ Chjätä Tänȩmȩ judi Garirea quȩmȩ chiriri pio judiri ma̧na̧dëpadiibe —yo̧a̧diro̧jȩrȩ—. 42Peaja̧di ta̧rëri̧ yo̧diibe Ütërë go̧ȩpa tänȩrërea̧ ma̧ȩ üdë. Danȩrȩ, Ütërë mitëa̧ Chjätä Tänȩmȩ pio judi Davi quȩmȩ ütërëremȩ pio judiri ja̧pade yo̧diibe ma̧ȩ üdë. Davirea̧ judi cjo̧ro̧rërea̧räpȩ ara̧ oa cjiapade, Berȩ quȩmȩ bë ma̧ri̧räpȩ ju̧ri̧ yo̧diibe ma̧ȩ üdë. Ado pio ju̧i̧iä jabechji̧, ‘Ütërë mitëa̧ Chjätä Tänȩmȩ pio judidida’ quëna̧rea̧mi̧dëde pio yüdëje —yo̧a̧dirȩ.
43Ado pio ju̧i̧iä tjarari̧ ma̧ȩ jo̧rȩtaji̧ri̧mi̧ dari̧ jo̧rȩtaji̧ri̧pea̧dirȩ pumȩ judiro̧ Jechu pio ju̧i̧ chjiari. 44Ado o judiro̧, jabechji̧ Jechu pio ju̧i̧ mitëtämi̧ cjiarëreji̧ri̧diro̧joȩ chaäpea̧ oa. Jabo mitëtämi̧ cjiaji̧ri̧borë mitërea̧ dadëa̧diro̧jo̧ȩ. Eami̧ oa japarea̧ dadëa̧diro̧jo̧ȩ.
45Ji̧dë duri oa japamitë chjätä ëte, Ütë tjamo̧ ja̧ bë oa jidaji̧ri̧ guadia pio judiro̧ ado chjereno̧ baäa̧dirȩ jibë chjadüa̧ji̧ri̧ pio ji̧ri̧iäpȩ. Ado Jechu pio ju̧i̧ ëba baädëa̧ oaiä, goë tuti ja̧bepaji̧ri̧ judiro̧, ado pjaricheo judiro̧ iëno̧ë ta̧rëa̧diro̧jȩrȩ Jechu pio ju̧i̧ chjiari, ja̧di ta̧rëri̧ yo̧ji̧ri̧rȩ:
—¿Jabo tjana̧ ju̧i̧iä mitëdëa̧renȩro̧jo̧ȩ? ¿Tjana̧ japatä ëba jana̧dëa̧renȩro̧jo̧ȩ?
46Jabo guadia judiro̧ dëbë yo̧a̧diro̧jȩrȩ:
—Cjäri̧ marea̧ro̧jo̧ȩ, pio jiro üi̧ üdë tjaoëpai̧ dari̧ ni̧bämȩde. O judiro̧ ni̧bämi̧ ni̧bädëde, jabo a̧dë chjäte goae tjamo̧ri̧ ni̧bämȩde. Pio ju̧i̧iä mitërea̧ dadëa̧rea̧ro̧jo̧ȩ —yo̧a̧diro̧jȩrȩ.
47Jabo tjamo̧ yo̧ji̧ri̧ pio judiro̧ yo̧a̧diro̧jȩrȩ:
—Jabo cjäri̧ manȩrȩ, japëtaraji̧ri̧nȩrȩ —yo̧a̧diro̧jȩrȩ—. ¿Pio mȩnȩro̧borë u̧i̧pea̧ oa cjianȩrȩ yaba̧ pio ju̧i̧iä? 48Danȩrȩ, pio a̧ro̧rȩmi̧ dari̧ na̧e chiatäreji̧ri̧nȩrȩ. Jabechji̧ a̧ro̧rȩ, judio tjamo̧ yo̧ji̧ri̧ pio judiro̧ cja̧rȩmȩrȩ pio ju̧i̧iäpȩmo̧ quëna̧dë marea̧ro̧jo̧ȩ. Ado peaja̧didirȩ pjaricheo judiro̧. 49Jabo pio jiro buba üdë Moicherë go̧ȩparërea̧ ma̧ȩ pio ju̧i̧ chjadëri̧ dabadëdiro̧jo̧ȩ. Ado pio ju̧i̧iä chjaodëri̧ quëna̧diro̧jo̧ȩ, Ütërë ërecjia̧räpȩ cjiaji̧ri̧rȩ —yo̧ji̧ri̧rȩ yo̧rëreji̧ri̧diro̧jȩrȩ tjamo̧ yo̧ji̧ri̧ judio judiro̧ Ütë tjamo̧ ja̧ bë oa jidaji̧ri̧ guadia pio ji̧ri̧iäpȩmo̧.
50Jabo ja̧dëa ji̧ Nicodemo̧ judi, Jechu pio ju̧i̧ gȩnȩpea̧rä goede järemȩ pio judi yo̧rëremȩdejȩrȩ pio jȩa nö̧ta ëba ja̧bepaji̧ri̧ pio ji̧ri̧, pjaricheo pio ji̧ri̧. Aja̧, quëna̧dëji̧ri̧ pio ji̧ri̧, ‘Jechu judi Chjätä Tänȩmȩdida’ quëna̧dëji̧ri̧ pio ji̧ri̧iäpȩmo̧ yo̧rëremȩdejȩrȩ, ja̧di ta̧rëri̧ yo̧mȩrȩ:
51—Jabo danȩrȩ, ja̧di ta̧rëri̧ yo̧diibe tüdüa̧mi̧ darä cjo̧ro̧pea̧ ma̧ȩ üdë —yo̧a̧dejȩrȩ—. “Jabechji̧ chjadëri̧ ütära̧rämo̧ bape chjaopea̧de” yo̧diibe ma̧ȩ üdë. Pio ju̧i̧iä a̧ro̧rȩ eami̧ pumȩ pio ju̧i̧ chjiari tjamo̧ri̧ dabadërä judi, judi japea̧bea pio ju̧i̧ chjiari tjamo̧ri̧ dabadërä judi, pio ju̧i̧ chjadëri̧ ütarë ta̧rëdëa̧rä judi, jabechji̧ chjaodëri̧ bape chjaodëtäreji̧ri̧rea̧ro̧jo̧ȩ. Jabechji̧ chjadëri̧ dabapea̧rämo̧, chjadëri̧ ütarë ta̧rëa̧rämo̧ bape chjaopea̧de —yo̧mȩrȩ yo̧a̧dejȩrȩ Nicodemo judi pio jȩa nö̧ta ëba ja̧bepaji̧ri̧ pio ji̧ri̧iäpȩmo̧.
52Ado Nicodemo pio ju̧i̧iä ta̧rëa̧ ji̧, iëno̧ë ta̧rëa̧diro̧jo̧ȩ:
—Danȩ, ¿pio mȩnȩborë Garirea quȩmȩ chiriri ma̧na̧mȩdënȩ? Aja̧, pio judirimȩ jirorenȩ. Jabo danȩ, chjadëri̧ ütarë go̧ȩ ni̧bäriä na̧täremȩrenȩ go̧ȩpea̧ oa cjiamȩ ma̧ȩ pio ju̧i̧ —yo̧a̧diro̧jo̧ȩ—. Jabechji̧ Ütërë ea jana̧ chjadüa̧ oa ni̧bämȩ judi cja̧rȩmȩrȩ Garirea quȩmȩ chiriri pio judiri ma̧na̧dë madirȩ. Jabechji̧ ütarë go̧ȩ ni̧bävä —yo̧a̧diro̧jo̧ȩ.
53Ado ja̧di ta̧rëri̧ ni̧bä chjao ëte, ütëbodärärë baächäa̧dirȩ jibëa̧ bëräpȩ.
©2021 Global Partners, All Rights Reserved
Juan 7
7
Jechu ju̧i̧di ja̧ji̧ri̧ pio judiro̧borë quëna̧dërëreji̧ri̧diro̧jo̧ȩ
1Ado japamitë chjätä ëte, Garirea quȩmȩ chirirämo̧ tai̧rëremȩde Jechu judi. Jabechji̧ oëra̧ti̧ oa chjätäti̧ cjiarërea̧ ji̧, Garirea quȩmȩ chirirämo̧ ano̧ mire tai̧rëremȩde. Jabechji̧ Judearäpȩ tjamo̧ cjo̧ro̧ji̧ri̧ judio judiro̧ Jechu pio ju̧i̧ ja̧bo tänȩpea̧ ji̧ järi tjamo̧ oaiä, ja̧dira̧ jädëri̧ cjiarëremȩde. 2Ado judiorë do chjätärea̧ do üdë ma̧na̧pea̧ ji̧ querediä tjamo̧rëremȩde. Aja̧, chja̧oe tomi̧ darä cjo̧ro̧rea̧ do chjätärea̧ do üdë ma̧na̧pea̧ ji̧ querediä tjamo̧rëremȩde.#7:2 Chja̧oe tomi̧ darä cjo̧ro̧rea̧ quȩmȩ do chjätärea̧ do üdë, jabechji̧ judio pio ji̧ri̧ jo̧rȩta tänȩpea̧rëremȩde. Jibëa̧ ütëti̧rea̧ pio judiro̧ chiri maearäpȩ chjätäti̧ cjiarërea̧ pio ju̧i̧ jo̧rȩtapea̧ oa, judiro̧ chja̧oe tomi̧ darä cjo̧ro̧rërea̧ pio ju̧i̧ jo̧rȩtapea̧ oa, juraji̧ri̧rȩ a̧dope chjaorëreji̧ri̧dirȩ. 8 do nö̧ta a̧doparëreji̧ri̧dirȩ. Ado pio ju̧i̧iä ja̧di dari̧ quȩpea̧diro̧jo̧ȩ. Chja̧oe tomi̧ darä cjo̧ro̧rea̧ do quȩra̧ quȩpea̧diro̧jo̧ȩ jiro do chjätärea̧ do oa. 3Ado pio ju̧i̧iä Jechu ja̧ oti̧ judiro̧, pio ju̧i̧di ja̧ji̧ri̧ pio judiro̧ yo̧a̧diro̧jo̧ȩ Judiorë a̧doparea̧räpȩ jätä. Jabomo̧ yo̧ji̧ri̧rȩ yo̧a̧diro̧jo̧ȩ, jibëa̧ omȩ pio ju̧i̧ ba chia dadëji̧ri̧rȩ.
—Jaevä Jechu, pio yudiri go̧dütäremȩrenȩ Judea chiriräpȩ jäpea̧ oa —yo̧a̧diro̧jo̧ȩ—. Danȩ, na̧ jadü judiro̧ pio mȩa chjadëri̧ dapea̧ oa, jauëchja cjiari̧ na̧rȩmȩ oa irä dapea̧ oa, jabechji̧ ja̧dira̧ jätäremȩrenȩ —yo̧a̧diro̧jo̧ȩ—. 4Danȩ, eami̧ pumȩ üdë o judiro̧ pio jȩa chjiari chjadëri̧ dabatä earä judi, pio jȩaiäpȩmo̧ ba chia jo̧rȩtatä earä judi, jabechji̧ goadirea̧mi̧dëde, jabo chjadë maearä cjo̧ro̧mi̧ dari̧ japapea̧ chiade. Ado mȩnȩ jauëchja cjiari̧ japarea̧ chia tara, jabechji̧ dai chirirä cjo̧ro̧ji̧ri̧ ütëbodärärë dabarea̧mi̧ dari̧ japatäremȩrenȩ pio ji̧ri̧ ja̧ dachoro. Jaevä. Judearäpȩ jävä —yo̧a̧diro̧joȩ, Jechu pio ju̧i̧ ba chia dadëji̧ri̧rȩ.
5Ja̧di ta̧rëri̧ yo̧ji̧ri̧rȩ jabomo̧ goaeri̧ yo̧rëreji̧ri̧diro̧jo̧ȩ Jechu ju̧i̧iäpȩmo̧ judiro̧ quëna̧dëa̧ oaiä. Jabechji̧ pio ju̧i̧di ja̧ji̧ri̧ judiro̧borë quëna̧dëa̧diro̧jo̧ȩ. ‘Aja̧, Ütë tjamo̧ pio judi chjadüa̧ oa birë ma̧na̧diibëda’ quëna̧ dadëa̧diro̧jo̧ȩ. Ado pio ju̧i̧iä chjaocjiami̧ dari̧ yo̧rëreji̧ri̧diro̧jo̧ȩ.
6Jabo Jechu judi dëbë yo̧a̧dejȩrȩ:
—Jabërequede —yo̧a̧dejȩrȩ—. Pjärämȩde. Jabë na̧rȩdëpea̧de. Pio coa da tänȩpea̧ do üdë jabë ma̧na̧dëa̧de. Tjamo̧ davä. Pumȩ ütëbodärä oa pio coaiäpȩmo̧ da tänȩpea̧ do üdë jabë ma̧na̧dëa̧de. Ütära̧ do üdë jabë ma̧na̧dëa̧dique. Jabo ja̧didëde pio dibëiä. Ado pio mȩnȩro̧ jätämi̧ cjiarä judi, jächji̧vä chjaodëri̧. 7Jabechji̧ dai chirirä cjo̧ro̧ji̧ri̧ judiro̧ goëdëri̧ cjia dadë madiro̧dibe, jabo ja̧didëdiro̧coe coa. Goëdëri̧ cjia dadiro̧coe. Cüdë, judiro̧ chjai̧dëri̧ japea̧ pio ju̧i̧ chjiari ji̧dë ma yo̧a̧ oaiä, jabechji̧ goëdëri̧ cjia dadiro̧coe. 8Jabo danȩrȩ ca̧ oti̧, do chjätärea̧ do tara, jabechji̧ judiorë a̧doparea̧räpȩ jächji̧vä, jabo jädërequede. Jabechji̧ ütara̧ do üdë jabë ma̧na̧dëa̧ oaiä, jädërequede —yo̧mȩrȩ yo̧rëremȩdejȩrȩ.
9Ado ja̧di ta̧rëri̧ yo̧ ëte, Jechu judi cjiadiäa̧de Garirearäpȩ.
Jechu judi jädëparemȩrȩ järëremȩde Jerucharȩräpȩ
10Jabo Jechu ja̧ pumȩ judiro̧ judiorë a̧dopamȩräpȩ jäa̧ duri oa, peaja̧di järëremȩde, ji̧ri̧ ja̧ ma̧ȩrä jädëmȩrȩ. Jabo ütëborë pio jȩaiäpȩmo̧ darea̧mi̧ dari̧ jätärea̧ ji̧, goadi jämȩrȩ jäa̧de. 11Ado a̧doparea̧räpȩ ju̧ri̧ judio tjamo̧ yo̧ji̧ri̧ pio judiro̧ na̧tarëreji̧ri̧diro̧jo̧ȩ. Ado a̧dopaji̧ri̧ pio ji̧ri̧iä ja̧di ta̧rëri̧ iëno̧ iëno̧ ta̧rëtarëreji̧ri̧diro̧jȩrȩ:
—Pio jiro üi̧ üdë, ¿tjana̧räpȩde? —iënoë ta̧rëtea̧diro̧jȩrȩ.
12Ado noi̧dërë goadi ni̧bä chjaorëreji̧ri̧dirȩ Jechu pio ju̧i̧ chjiari. “Aja̧, pumȩ chjadëde” yo̧a̧dirȩ o judiro̧. Ado o judiro̧: “Cjäri̧ made, pumȩ ji̧ri̧ u̧i̧pe u̧i̧pe ni̧bämȩde. Pumȩ chjadëdëde” yo̧dirȩ. 13Jabo judiro̧ ütëborë ta̧rëri̧ ni̧bätärea̧ ji̧, goadi ni̧bä marëreji̧ri̧dirȩ ütëborë ta̧rërea̧mi̧dëri̧. Jabechji̧ tjamo̧ yo̧ji̧ri̧ judio pio ji̧ri̧ uapea̧ oaiä, goadi ni̧bärëreji̧ri̧dirȩ.
14Ado chja̧oe tomi̧ darä cjo̧ro̧pea̧ do chjätärea̧ do üdë, jabechji̧ 8 do ma a̧doparea̧ dorëremȩde. Ado jadüchiami̧ do chjätä ëte, Jechu judi järëremȩde Ütë tjamo̧ ja̧ bëräpȩ. Ado ju̧ri̧pȩ go̧düdäräa̧rä, taruparëremȩde a̧ra̧ano̧pea̧ ji̧. 15Ado tjamo̧ yo̧ji̧ri̧ judio judiro̧ dacho bëremi̧ cjiami̧ dari̧ jo̧rȩtaji̧ri̧rȩ ta̧rërëreji̧ri̧diro̧jo̧ȩ. Ado yo̧a̧dirȩ, ana̧ri̧ jo̧rȩtaji̧ri̧rȩ:
—Chia chia, dabaparea̧ jo̧räpȩ dabapadëa̧räbo, jabechji̧ a̧dë chäte ji̧ra̧ tjamo̧ oa dabapea̧de. ¿Yö̧ta dari̧ dabapea̧de yüdëje? Jabechji̧ dabaparea̧ jo̧räpȩ dabaparemȩmi̧ dari̧ a̧ra̧ano̧mȩde —yo̧a̧dirȩ.
16Ja̧dëa ji̧ Jechu judi ‘ja̧di ta̧rëri̧ yo̧diro̧da’ quëna̧ dabamȩrȩ yo̧a̧dejȩrȩ:
—Danȩrȩ, ca̧ea̧ ma̧na̧ri̧ jo̧rȩtamȩrȩ a̧ra̧ano̧dërequede, jabo jabechji̧ Ütë tjamo̧ pio judiri ja̧ maeara̧ a̧ra̧ano̧requede, pio coa chjadüa̧mȩ pio judiri ja̧ maeara̧. 17Ado eami̧ pumȩ judi, Ütërë eami̧ tjamo̧ri̧ japatämi̧ cjiarä judi, jabechji̧ chjadëri̧ dabarea̧ dapade davä cüdë a̧ra̧ano̧a̧ pio ju̧i̧ chjiari —yo̧a̧dejȩrȩ—. 'Jabechji̧ jibëa̧ ma̧na̧ri̧ jo̧rȩtamȩrȩ a̧ra̧ano̧dëdida, jabo Ütë tjamo̧ pio judiri ma̧na̧mȩ maea oa a̧ra̧ano̧dida’ quëna̧ jo̧rȩtapade pio coa chjiari. 18Jabo o judiro̧, jibëa̧ ma̧na̧ri̧ jo̧rȩtaji̧ri̧rȩ a̧ra̧ano̧ji̧ri̧ pio judiro̧, cjäri̧ madirȩ, pio jibëiäpȩmo̧ ma ba chia datä eadiro̧jȩrȩ pumȩ ji̧ri̧. Pio jibë chjiarimo̧i̧ chjacjiamȩri̧ ni̧bätä eadiro̧jȩrȩ —yo̧a̧dejȩrȩ—. Jabo danȩrȩ, pio jȩa chjadüa̧mȩ pio ju̧i̧iäpȩmo̧ ma chjacjiamȩri̧ ni̧bätä eamȩ pio judi, jabechji̧ coëma cjiari̧ cjo̧ro̧de, pumȩ pio ji̧ri̧iäpȩmo̧ u̧i̧pe ni̧bärea̧ decjiari̧. 19Danȩrȩ, Moiche judi pio dibëiäpȩmo̧ tüdüa̧mi̧ darä cjo̧ro̧pea̧ ma̧ȩ oa yürürëremȩdidibe. Jabo cjäri̧ manȩrȩ, pio jiro ma̧ȩ oa nö̧tadäräri̧ ta̧rëdiädë marenȩro̧jo̧ȩ. Ado pio ju̧i̧ nö̧tadäräri̧ ta̧rëdiädëa̧rä judi, ¿tjana̧ ju̧i̧iä aechide yo̧renȩro̧coe cüdë ta̧rëdiädëa̧bea pio ju̧i̧ chjiari. Mȩnȩro̧ pio jiro ma̧ȩ oa chjadëri̧ ta̧rëdiädërä judi, ¿tjana̧ ju̧i̧iä järitanȩrȩ yaba̧ pio coa ja̧bo tänȩpea̧ ji̧? —iëno̧ë ta̧rëa̧dejȩrȩ.
20Jabo dëbë yo̧ji̧ri̧rȩ yo̧a̧diro̧jo̧ȩ:
—Cjäri̧ marenȩ, yaröca chiarenȩ —yo̧a̧diro̧jo̧ȩ—. A̧ro̧rȩ mȩa ja̧bo tänȩtämi̧ cjia ma ja̧didë. Teracabari̧ jo̧rȩtarenȩ —yo̧a̧diro̧jo̧ȩ.
21Jabo Jechu judi yo̧a̧dejȩrȩ:
—Danȩrȩ, ado cja̧rȩmo̧ doremȩrä järätä chjaparea̧ doro, jabomo̧ cja̧rȩmȩ co jauëchja cjiari̧ japamȩrȩ, chjaparȩa̧reconȩ gito ja̧boremȩ ju̧i̧ —yo̧a̧dejȩrȩ—. Ado mȩnȩro̧ pio ju̧i̧ daea̧ oaiä, cüdë järätä chjaparea̧ doro japea̧ pio ju̧i̧ daea̧ oaiä, dacho bëremi̧ cjiami̧ dari̧ jo̧rȩtaji̧ri̧pea̧nȩrȩ, goëdëri̧ cjiape bagaji̧ri̧rȩ. 22Jabo peaja̧di dari̧ japanȩrȩ —yo̧a̧dejȩrȩ—. Peaja̧di ja̧bepanȩrȩ järätä chjaparea̧ doro. Danȩrȩ, Moiche judi jibëa̧ ütëti̧rea̧ pio ji̧ri̧iä pearä ta̧rë ëte, yo̧rëremȩdidibe davä, dibëa̧ ja oa ütara̧ doro budopea̧ pio ju̧i̧ chjiari. Ado pio ju̧i̧iä jabechji̧, dibëa̧ ja oa nö̧ri ëte, do oa chjadëri̧ ütara ëte, jabechji̧ chjadëri̧ budorënȩrȩ. 'Jabechji̧ järätä chjaparea̧ dorobo ja̧bepadëpea̧dida’ quëna̧ dabaji̧ri̧borë tjaoërä budorënȩrȩ järätä chjaparea̧ dorobo. Pio ju̧i̧iä pio mȩnȩro̧borë ütarami̧ japatämi̧ cjiaji̧ri̧rȩ ja̧bepami̧ dari̧ japanȩrȩ davä pio jiro doro —yo̧a̧dejȩrȩ—. 23Aja̧, mȩnȩro̧ Moicherë go̧ȩparërea̧ ma̧ȩ pio ju̧i̧ jiadachea oa, jabechji̧ järätä chjaparea̧ dorobo budorënȩrȩ dibëa̧ ja pio ji̧ri̧.#7:23 Moiche judi icharaita ji̧ri̧ budopea̧ pio ju̧i̧ chjiari a̧ra̧ano̧rërea̧ ji̧, "üi̧ boi̧ oa 7 do ara ëte budopea̧de" yo̧mȩrȩ chi̧dëearëremȩdejȩrȩ. Aja̧, 7 do chjätä ëte dopea̧rä budopea̧de. Ado Moicherë yo̧rërea̧ duri pio ju̧i̧ jiadachea oa, ütara̧mi̧ budorëreji̧ri̧dirȩ icharaita judiro̧ jibëa̧ oari bori̧ ji̧ri̧. Ado ja̧di dari̧ japea̧ oaiä, järätä chjaparea̧ dorobo ja̧bepami̧ dari̧ japarëreji̧ri̧dirȩ. Pio ju̧i̧iä yo̧requededibe. Pio mȩnȩro̧borë ja̧bepanȩrȩ järätä chjaparea̧ doro. Ado pio ju̧i̧iä iëno̧ë ta̧rërequededibe. ¿Tjana̧ ju̧i̧iä ërecjiapea̧renȩro̧coe? Cüdë gito ja̧bomȩ pio ju̧i̧ järätä chjaparea̧ doro chjaparȩa̧ pio ju̧i̧iä, ¿tjana̧ ju̧i̧iä ërecjiapea̧renȩro̧coe? 24Jabechji̧ jabomo̧ uëmo̧ uëmo̧ jo̧rȩtaji̧ri̧rȩ ütaradëtäreji̧ri̧nȩrȩ, jabo jabechji̧ urëdi tjamo̧ oa jo̧rȩtaji̧ri̧rȩ ütaratärerji̧ri̧renȩro̧jo̧ȩ, coëma cjiari̧ ütaraji̧ri̧rȩ. Ado ja̧di dari̧ japea̧ oaiä, 'jabechji̧ coëma cjiari̧ japea̧dida’ quëna̧rea̧ dapanȩrȩ davä pio coa chjiari —yo̧mȩrȩ yo̧rëremȩdejȩrȩ Jechu judi.
‘Jechu pio judi Chjätä tänȩpame jirodida’ quëna̧ji̧ri̧pea̧diro̧jo̧ȩ orë
25Ado Jerucharȩräpȩ cjo̧ro̧ji̧ri̧ judiro̧ orë Jechu pio ju̧i̧ daea̧ ji̧, Ütë tjamo̧ ja̧ bëräpȩ pumȩ no̧i̧dë oa a̧ra̧ano̧mȩ oa daea̧ ji̧, ja̧di ta̧rëri̧ ni̧bä chjaoji̧ri̧pea̧dirȩ jibëa̧ dëbëti̧ra̧ chia:
—Danȩrȩ, ¿pio yüdë üi̧ pio judidëde o judiro̧ ja̧bo tänȩpea̧ ji̧ na̧ta̧ judi? Dëdë, pio judide. 26Jabo pio ju̧i̧ irä daea̧räbo, jabechji̧ eami̧ oa japadëdiro̧jo̧ȩ. Jabechji̧ ütëborë ta̧rërea̧mi̧ dari̧ ni̧bä chjaode chjadë maearä, uapadëmȩrȩ. Ado ni̧bä chjaomȩ oa goae tarari̧ dëbëpe chjaotärea̧ ji̧, eami̧ oa japadë madiro̧jo̧ȩ. Aechide yo̧dë madiro̧jo̧ȩ. Jabo dabadë jabo ‘Ütërë mitëa̧ Chjätä Tänȩmȩ pio judi jirodida’ quëna̧ jo̧rȩtape baga jirodiro̧jo̧ȩ. 27Jabo cjäri̧ made, pio yoa üi̧ pio ju̧i̧ chjiari dabarea̧ro̧jo̧ȩ. ‘Pio jiro bë ma̧ri̧räpȩ ütëpea̧dida, pio jiro bë ma̧ri̧rimȩdida’ quëna̧ dabarea̧ro̧jo̧ȩ. Jabo Ütërë mitëa̧ Chjätä Tänȩmȩ tjamo̧ pio judi ma̧na̧rä, jabechji̧ 'pio judiri ma̧na̧diibëda’ quëna̧ dabarea̧ dadëparea̧rȩ —yo̧rëreji̧ri̧dirȩ pumȩ judiro̧ Jechu pio ju̧i̧ chjiari.
28Ado Jechu judi Ütë tjamo̧ ja̧ bëräpȩ a̧ra̧ano̧a̧ ji̧, to̧bari̧ yo̧mȩrȩ iëno̧ë ta̧rëa̧dejȩrȩ pumȩ ji̧ri̧:
—Danȩrȩ, ¿mȩnȩro̧ pio coa chjiari tjamo̧ri̧ dabanȩrȩ? —iëno̧ë ta̧rëa̧dejȩrȩ—. ‘Pio judiri ma̧na̧diibëda’ ¿quëna̧ dabarenȩro̧coe? Danȩrȩ, ca̧ea̧ ma̧na̧ri̧ jo̧rȩtamȩrȩ ma̧na̧dëa̧requede, jabo Ütë tjamo̧ pio judi chjadüa̧ oa ma̧na̧requede —yo̧a̧dejȩrȩ—. Ado pio ju̧i̧ ja̧ ma̧ȩ üdë tjamo̧i̧ cjiari̧ baäde. Jabechji̧ ma̧ȩ chjádë yürüdëmȩde. Jabo cjäri̧ manȩro̧jo̧ȩ, dabadërenȩro̧jo̧ȩ. 29Jabo cüdë dabareconȩ. Ado pio judiri ma̧na̧requede. Aja̧, pio judide davä coa chjadüa̧mȩ judi —yo̧mȩrȩ yo̧a̧dejȩrȩ Jechu judi.
30Ado Jechu judi ja̧di ta̧rëri̧ yo̧a̧ oaiä, mitëtä järitea̧diro̧jo̧ȩ chaäpea̧ oa. Jabo cjäri̧ madiro̧jo̧ȩ, mitërea̧ dadëa̧diro̧jo̧ȩ. Mitëtä järitea̧räbo, eami̧ oa japarea̧ dadëa̧dirȩ. Jabechji̧ jabë mitëpea̧ dodë tara, chaärea̧ dadëa̧dirȩ. Ütara̧ doromo̧ mitërea̧ dapadiro̧jo̧ȩ.
31Ado pumȩ noi̧dërë quëna̧ji̧ri̧pea̧diro̧jo̧ȩ Jechu ju̧i̧, jabo o judiro̧mo̧rȩ. Ado quëna̧ji̧ri̧pea̧ pio judiro̧ ja̧di ta̧rëri̧ yo̧rëreji̧ri̧diro̧jȩrȩ jibëa̧ pumȩ ji̧ri̧:
—Danȩrȩ, ‘Jechu judi Ütërë mitëa̧ Chjätä Tänȩmȩ pio judi tjamo̧dida’ quëna̧ dabarea̧ro̧jo̧ȩ —yo̧a̧diro̧jȩrȩ—. Irä daea̧rea̧ro̧jo̧ȩ jauëchja cjiari̧ japamȩ oa. O judiro̧ japarea̧mi̧dëri̧ japamȩde. Pio ju̧i̧iä tjamo̧ri̧ dabarea̧ro̧jo̧ȩ. ‘Aja̧, Ütë tjamo̧ pio judi chjadüa̧ oa ma̧na̧diibëda, Ütërë mitëa̧ Chjätä Tänȩmȩ pio judi tjamo̧dida’ quëna̧ daba daea̧rea̧ro̧jo̧ȩ —yo̧ji̧ri̧rȩ yo̧a̧diro̧jȩrȩ jibëa̧ pumȩ ji̧ri̧.
32Ado pjaricheo judiro̧ pumȩ buba oa ta̧rëa̧ oaiä, Jechu pio ju̧i̧ chjiari goadi ni̧bäji̧ri̧ oa ta̧rëa̧ oaiä, jabechji̧ chjadürëreji̧ri̧diro̧jȩrȩ guadia ji̧ri̧ Jechu pio ju̧i̧ mitëpea̧ oa. Aja̧, pjaricheo judiro̧, ado tjamo̧ goë tuti ja̧bepaji̧ri̧ pio judiro̧ chjadüa̧diro̧jȩrȩ Ütë ja̧ bë oa jidaji̧ri̧ guadia pio ji̧ri̧ Jechu pio ju̧i̧ mitëpea̧ oa. 33Ado ja̧dëa ji̧ yo̧a̧dejȩrȩ Jechu judi ju̧i̧ ja̧ yuroro a̧dopë cjiaji̧ri̧ oa:
—Danȩrȩ, japamitë boi̧chji̧ maea oa ëba cjiaparequededibe —yo̧a̧dejȩrȩ—. Ado japamitë boi̧chji̧ chjätä ëte, ado chjereno̧ baäparequede coa chjadüa̧mȩ pio ju̧i̧iäpȩ. 34Ado na̧taparenȩro̧coe jabo cjäri̧ manȩrȩ, dadärädëparenȩro̧coe. Jabechji̧ coa cho̧rë jädärärea̧mi̧dëräpȩ a̧dë baäparequededibe —yo̧a̧dejȩrȩ.
35Ado pio ju̧i̧ ta̧rëa̧ oaiä, tjamo̧ yo̧ji̧ri̧ judio pio judiro̧ jibëa̧ dëbëti̧ra̧ chia ni̧bä chjaoji̧ri̧pea̧dirȩ, ja̧di ta̧rëri̧ yo̧ji̧ri̧rȩ:
—¿Jabo tjana̧räpȩ baäpade ibë a̧dë baäpea̧ oa, a̧ro̧rȩ pio ju̧i̧ dadärärea̧ dachea oa? —iëno̧ë ta̧rëa̧dirȩ—. ¿Judio judiro̧ orë chjuchjupechä baärërea̧räpȩ baäpade judiodë chjarerä goadi ano̧ mire cjo̧ro̧pea̧ oa? ¿Ibëa̧ chiridëräpȩ cjo̧ro̧ji̧ri̧ judio pio ji̧ri̧iäpȩmo̧ ano̧ mire a̧ra̧ano̧pea̧ oa baäpade? ¿Tjana̧räpȩ baärea̧ jo̧rȩtade? 36“Na̧taparenȩro̧coe jabo dadärädëpa” yo̧a̧ ji̧, ¿yö̧ta jo̧rȩtamȩrȩ yo̧a̧diibe? Ado judi yo̧a̧ ji̧, “Aja̧, pio coa cho̧rë jädärärea̧mi̧dëräpȩ a̧dë baäparequededibe” yo̧a̧ ji̧, ¿tjana̧ jo̧rȩtamȩrȩ yo̧a̧diibe? —yo̧ji̧ri̧rȩ yo̧a̧dirȩ jibëa̧ dëbëti̧ra̧ chia tjamo̧ yo̧ji̧ri̧ judio pio judiro̧, ana̧ri̧ jo̧rȩtaji̧ri̧rȩ.
Bucho ana̧ cjo̧ro̧rea̧ pio judi cjitëpade quëna̧ji̧ri̧ ja̧ chji̧ri pio judiri
37Judio judiro̧ do ji̧ra̧ri̧ a̧dopë ëte, go̧düdärärëremȩde cjiadiäa̧ do üdë, a̧dë chjäte ba chiamȩ do üdë. Ado pio jiro doro Jechu judi cjitë ëte, to̧bari̧ ni̧bä chjaorëremȩdejȩrȩ pumȩ buba oa, ja̧di ta̧rëri̧ yo̧mȩrȩ:
—Danȩrȩ, eami̧ pumȩ üdë ui ja̧borä judi, jana̧tädique cüdë pio ju̧i̧ jararea̧ yürüpea̧ oa —yo̧a̧dejȩrȩ—. 38Danȩrȩ, peaja̧di ta̧rëri̧ go̧ȩpea̧ oa cjiade Ütërë go̧ȩpa tänȩrërea̧ ma̧ȩ üdë. “Aja̧, eami̧ pumȩ üdë pio coaiäpȩmo̧ quëna̧mȩ pio judi, jabechji̧ pio ju̧i̧ ja̧ chji̧ri pio judiri cjitëpade bucho ana̧ cjo̧ro̧rea̧ üdë, uirë dabu ëteri pio judiri goae tarari̧ cjitëmi̧ dari̧" —yo̧a̧dejȩrȩ Jechu judi. 39Ado Jechu judi ja̧di ta̧rëri̧ yo̧a̧ ji̧, jabechji̧ Tjo tjamo̧ pio ju̧i̧ chjiari yo̧rëremȩde, pio jȩaiäpȩmo̧ quëna̧paji̧ri̧ pio judiro̧ chiapea̧ pio ju̧i̧ chjiari. Jabo jabërëremȩde jabo. Pio jiro japamitërä Tjo tjamo̧ pio judi jabë yürüa̧ oa cjiadërëremȩde. Quëna̧ji̧ri̧ pio ji̧ri̧iäpȩmo̧ jabë yürüa̧ oa cjiadëa̧de. Jabechji̧ Jechu judi jabë a̧dëräpȩ baädëa̧ oaiä, Ütë tjamo̧ judi Joja pio ju̧i̧ jabë a̧dë chjäte ba chia tjamo̧räpȩ chadärä tänȩdëa̧ oaiä, jabechji̧ jabë yürüa̧ oa cjiadërëremȩde Tjo tjamo̧ judi.
Jechu pio ju̧i̧ chjiari ni̧bä chjaoji̧ri̧rȩ tjarari̧ bubape bagami̧ dari̧ cjiadiärëreji̧ri̧dirȩ
40Ado pumȩ judiro̧ Jechurë ja̧di tärëri̧ yo̧mȩ oa ta̧rëa̧ oaiä, jabechji̧ pumȩ buba chjarerä cjiaji̧ri̧ judiro̧ orë järi tjamo̧pea̧ji̧ri̧rȩ yo̧rëreji̧ri̧dirȩ, ja̧di ta̧rëri̧ yo̧ji̧ri̧rȩ:
—Danȩrȩ, a̧ro̧rȩ no̧mȩ tjamo̧ri ja̧ jidatarërea̧ ni̧bämȩ pio judide. Jabechji̧ Ütërë ea jana̧ chjadüa̧ oa ni̧bämȩ pio judide pio yüdëje —yo̧a̧dirȩ.
41Jabo o judiro̧ yo̧a̧dirȩ:
—Cjäri̧ made, pio judidëde jabo Ütërë mitëa̧ Chjätä Tänȩmȩ pio judide —yo̧a̧dirȩ.
Jabo o judiro̧ yo̧a̧dirȩ:
—Cjäri̧ made. Ütërë mitëa̧ Chjätä Tänȩmȩ judi Garirea quȩmȩ chiriri pio judiri ma̧na̧dëpadiibe —yo̧a̧diro̧jȩrȩ—. 42Peaja̧di ta̧rëri̧ yo̧diibe Ütërë go̧ȩpa tänȩrërea̧ ma̧ȩ üdë. Danȩrȩ, Ütërë mitëa̧ Chjätä Tänȩmȩ pio judi Davi quȩmȩ ütërëremȩ pio judiri ja̧pade yo̧diibe ma̧ȩ üdë. Davirea̧ judi cjo̧ro̧rërea̧räpȩ ara̧ oa cjiapade, Berȩ quȩmȩ bë ma̧ri̧räpȩ ju̧ri̧ yo̧diibe ma̧ȩ üdë. Ado pio ju̧i̧iä jabechji̧, ‘Ütërë mitëa̧ Chjätä Tänȩmȩ pio judidida’ quëna̧rea̧mi̧dëde pio yüdëje —yo̧a̧dirȩ.
43Ado pio ju̧i̧iä tjarari̧ ma̧ȩ jo̧rȩtaji̧ri̧mi̧ dari̧ jo̧rȩtaji̧ri̧pea̧dirȩ pumȩ judiro̧ Jechu pio ju̧i̧ chjiari. 44Ado o judiro̧, jabechji̧ Jechu pio ju̧i̧ mitëtämi̧ cjiarëreji̧ri̧diro̧joȩ chaäpea̧ oa. Jabo mitëtämi̧ cjiaji̧ri̧borë mitërea̧ dadëa̧diro̧jo̧ȩ. Eami̧ oa japarea̧ dadëa̧diro̧jo̧ȩ.
45Ji̧dë duri oa japamitë chjätä ëte, Ütë tjamo̧ ja̧ bë oa jidaji̧ri̧ guadia pio judiro̧ ado chjereno̧ baäa̧dirȩ jibë chjadüa̧ji̧ri̧ pio ji̧ri̧iäpȩ. Ado Jechu pio ju̧i̧ ëba baädëa̧ oaiä, goë tuti ja̧bepaji̧ri̧ judiro̧, ado pjaricheo judiro̧ iëno̧ë ta̧rëa̧diro̧jȩrȩ Jechu pio ju̧i̧ chjiari, ja̧di ta̧rëri̧ yo̧ji̧ri̧rȩ:
—¿Jabo tjana̧ ju̧i̧iä mitëdëa̧renȩro̧jo̧ȩ? ¿Tjana̧ japatä ëba jana̧dëa̧renȩro̧jo̧ȩ?
46Jabo guadia judiro̧ dëbë yo̧a̧diro̧jȩrȩ:
—Cjäri̧ marea̧ro̧jo̧ȩ, pio jiro üi̧ üdë tjaoëpai̧ dari̧ ni̧bämȩde. O judiro̧ ni̧bämi̧ ni̧bädëde, jabo a̧dë chjäte goae tjamo̧ri̧ ni̧bämȩde. Pio ju̧i̧iä mitërea̧ dadëa̧rea̧ro̧jo̧ȩ —yo̧a̧diro̧jȩrȩ.
47Jabo tjamo̧ yo̧ji̧ri̧ pio judiro̧ yo̧a̧diro̧jȩrȩ:
—Jabo cjäri̧ manȩrȩ, japëtaraji̧ri̧nȩrȩ —yo̧a̧diro̧jȩrȩ—. ¿Pio mȩnȩro̧borë u̧i̧pea̧ oa cjianȩrȩ yaba̧ pio ju̧i̧iä? 48Danȩrȩ, pio a̧ro̧rȩmi̧ dari̧ na̧e chiatäreji̧ri̧nȩrȩ. Jabechji̧ a̧ro̧rȩ, judio tjamo̧ yo̧ji̧ri̧ pio judiro̧ cja̧rȩmȩrȩ pio ju̧i̧iäpȩmo̧ quëna̧dë marea̧ro̧jo̧ȩ. Ado peaja̧didirȩ pjaricheo judiro̧. 49Jabo pio jiro buba üdë Moicherë go̧ȩparërea̧ ma̧ȩ pio ju̧i̧ chjadëri̧ dabadëdiro̧jo̧ȩ. Ado pio ju̧i̧iä chjaodëri̧ quëna̧diro̧jo̧ȩ, Ütërë ërecjia̧räpȩ cjiaji̧ri̧rȩ —yo̧ji̧ri̧rȩ yo̧rëreji̧ri̧diro̧jȩrȩ tjamo̧ yo̧ji̧ri̧ judio judiro̧ Ütë tjamo̧ ja̧ bë oa jidaji̧ri̧ guadia pio ji̧ri̧iäpȩmo̧.
50Jabo ja̧dëa ji̧ Nicodemo̧ judi, Jechu pio ju̧i̧ gȩnȩpea̧rä goede järemȩ pio judi yo̧rëremȩdejȩrȩ pio jȩa nö̧ta ëba ja̧bepaji̧ri̧ pio ji̧ri̧, pjaricheo pio ji̧ri̧. Aja̧, quëna̧dëji̧ri̧ pio ji̧ri̧, ‘Jechu judi Chjätä Tänȩmȩdida’ quëna̧dëji̧ri̧ pio ji̧ri̧iäpȩmo̧ yo̧rëremȩdejȩrȩ, ja̧di ta̧rëri̧ yo̧mȩrȩ:
51—Jabo danȩrȩ, ja̧di ta̧rëri̧ yo̧diibe tüdüa̧mi̧ darä cjo̧ro̧pea̧ ma̧ȩ üdë —yo̧a̧dejȩrȩ—. “Jabechji̧ chjadëri̧ ütära̧rämo̧ bape chjaopea̧de” yo̧diibe ma̧ȩ üdë. Pio ju̧i̧iä a̧ro̧rȩ eami̧ pumȩ pio ju̧i̧ chjiari tjamo̧ri̧ dabadërä judi, judi japea̧bea pio ju̧i̧ chjiari tjamo̧ri̧ dabadërä judi, pio ju̧i̧ chjadëri̧ ütarë ta̧rëdëa̧rä judi, jabechji̧ chjaodëri̧ bape chjaodëtäreji̧ri̧rea̧ro̧jo̧ȩ. Jabechji̧ chjadëri̧ dabapea̧rämo̧, chjadëri̧ ütarë ta̧rëa̧rämo̧ bape chjaopea̧de —yo̧mȩrȩ yo̧a̧dejȩrȩ Nicodemo judi pio jȩa nö̧ta ëba ja̧bepaji̧ri̧ pio ji̧ri̧iäpȩmo̧.
52Ado Nicodemo pio ju̧i̧iä ta̧rëa̧ ji̧, iëno̧ë ta̧rëa̧diro̧jo̧ȩ:
—Danȩ, ¿pio mȩnȩborë Garirea quȩmȩ chiriri ma̧na̧mȩdënȩ? Aja̧, pio judirimȩ jirorenȩ. Jabo danȩ, chjadëri̧ ütarë go̧ȩ ni̧bäriä na̧täremȩrenȩ go̧ȩpea̧ oa cjiamȩ ma̧ȩ pio ju̧i̧ —yo̧a̧diro̧jo̧ȩ—. Jabechji̧ Ütërë ea jana̧ chjadüa̧ oa ni̧bämȩ judi cja̧rȩmȩrȩ Garirea quȩmȩ chiriri pio judiri ma̧na̧dë madirȩ. Jabechji̧ ütarë go̧ȩ ni̧bävä —yo̧a̧diro̧jo̧ȩ.
53Ado ja̧di ta̧rëri̧ ni̧bä chjao ëte, ütëbodärärë baächäa̧dirȩ jibëa̧ bëräpȩ.
©2021 Global Partners, All Rights Reserved