Matiye 7
7
Aɗaaniyo caɗawwa ɗa parlane oko gittoŋ
(Elloŋ Lik 6.37-42)
1Gaa Iisa beneyɗo missa gaa: «Aɗoŋ leewa ɗa unco giimo kuu ku ay caɗaawee ku parlanti ku maa ga Mella kulla alɗitoŋ caaɗa ɗa parlane, 2asan ga Mella akkitoŋ caaɗa parlane aleŋ maa ku caɗawɗiyo oko gittoŋ, o gu akkitoŋ geemisa ma maatiki maa ku geemesɗiy gittoŋ. 3Ayme ki elelɗiya n̰aalu ma aaye iɗiiti giicum, o barlu ma aaye iɗiicum pa ki ellaa ɗa? 4Ki gederra pe kii me ki beneyyiyyee oko giicum kii: “Duwaw ɗe na cimmiyyamga n̰aalu ma aaye iɗiicum.” A ki pa lekka saa pe barlu ma aaye oko tancum! 5Ki ay gimu ma beneyya ma biicum ka, ka galbancum pa kayti! Cimmiyya ƴa omma barlu ma aaye oko tancum. Goŋŋa ki ella saa pe samaane ki cimmiyyeega n̰aalu ma aaye iɗiiti giicum.
6«Aɗaaniyo beraa ɗa oko kan̰n̰o lawwi ma duwenta oko Mellayi, goneka kee gu rebella gu ommittoŋ, o ɗortoŋ ku horrigeeta ma ɓelaa ku aɗoŋgu soƴƴa ɗa unco kinzirnigeyyo, goneka kee gu waraayo.»
Eneewoŋga Mella Baaba
(Elloŋ Lik 11.9-13, 6.31)
7Gaa Iisa beneyyiɗe payya gaa: «Eneewoŋ, gaa Mella birittoŋ! Deyekkoŋ, kuu gasaɗɗo min oko Mellayi! Kokokkoŋ biití burgutti, gaa Mella iyyittoŋ, 8asan ga kulla gimu aɗe ma enaa ga Mella beree, o ma deyekka gasakka min oko Mellayi, o ma kokokka ga Mella eyee biití burgo. 9Aleŋ kuŋ appe gaa kaƴi min aattoŋ lekka miica, gaa runti inniya gaa ga biree mappa, ga beree aɗɗe dambu? 10A gaa inniya gaa ga biree buusu, ga beree aɗɗe barwu? 11A gaa kuŋ ka kulla ma gidaani ɗa, ibina ku berewɗiyo lawwi ku samaane oko rontoŋ, ga Tattoŋ pa ma aaye samaani, gata ka gidaani, beraa pe ƴiila lawwi ku samaane oko giimi ma enaa.
12«Garrarri paracco maa ku aŋka gu gittoŋ lewɗitoŋgu, ga kuŋ kulla leewaniyoogu. Ay keeke appe maa gi Kitamniti Muusa o kutubgeeco nabiinigeyyo beneyye.»
Burgo ta n̰aaɗi o ta baraamata
(Elloŋ Lik 13.23-24)
13Gaa Iisa gaayiɗe payya gaa: «Un̰n̰oŋ ma burgo ta n̰aaɗi, asan gi burgo ma katawkum masilti baraamata o gi un̰n̰ití daana ka, guu giimi maani katawɗo ma iŋaa. 14A burgo ta n̰aaɗi soopa o butultí gi un̰n̰ití raɗɗa, katawkum hayaatanti o giimi paalta ka ma gasakkaca.»
Masal ta ettu ma rontee
(Elloŋ Matiye 12.33, Lik 6.43-44)
15Gaa Iisa beneyɗo missa gaa: «Warroŋ maaƴi min oko giimi ma leewe goo gu ay nabiinigee. Guta kotti asaatoŋ detta ka aleŋ tamee, a ɗakko galbigeeco pa gu ay ɓiliwɓiliwnigee ma deewa. 16Ku ebennay min oko lubaakico. Ki jakaa aɗɗe mor̰mor̰oskee min askaniggi e baŋ pa ronti booti min miiri? 17Ettu ka samaane weewa miici ku daana o ettu ka miɗɗa pa weewa miici ma daana ɗa. 18Ettu ka samaane gederra ɗa ga weeɗo miici ma daana ɗa o ettu ka miɗɗa weewa ɗa miici ma daana. 19Kulla ettu aɗe ma weewa ɗa miici ku daana, gu daɗakkaa guu uwwiyya okkati. 20Aleŋ ta etteyyo aɗe maa ku ibinɗiy min oko ronco, gu giimi ma garaa zeneeco goo gu ay nabiinigee kulla ku ebennay pe min oko lubaakico aɗe.»
Jobookee ku seene
(Elloŋ Lik 6.46, 13.25-27)
21Gaa Iisa beneyyiɗe payya gaa: «Ay ma kolaano ɗa goo “Miltu, Miltu” ma on̰aa mulunniti Mellayi, innasoo gu ma on̰aa, ay ma leewa gaari maa ga Tattu ma aaye samaani aŋka. 22Gii meene ta parlanti ase, gu giimi maani akkaw beneyya goo: “Miltini, Miltini ay ma semeecam ɗa aɗe ni taasiyya beneycum e, o ni pittiɗe awaaradgee, o ni leeɗe gaari ku ajjibiti?” 23Gaa naa pa asiyyoo tiila naa: “Na ibintoŋ ɗa ta kaw, saapoŋ maaƴi min sariptu, ga kuŋ ma leewa miɗɗa.”»
Gerra ku seera
(Elloŋ Lik 6.47-49)
24Gaa Iisa gaayiɗe payya gaa: «Ay kaaka appe ga gimu ma geeway beneyyiŋgeetaw maa na beneyya kooko o ga jobokkay saabayɗe aleŋ gimu ma ibina gaari ma geewiya girti tirmilli. 25Guu ammi n̰aawiɗe, guu ƴirrarri unɗe namma gu ammi kawaɗɗo, gaa ussu aziɗe ma raɗɗa, guu aaniyiyya ger kaaka. Gaa gata pa alɗe gala ɗa asan gu caare namma ya tirmilli hatta guu geewiyya. 26A gimu soopa ma geeway beneyyiŋgeetaw kooko o ga jobokkay ɗa saabayya aleŋ gimu ma ibina ɗa gaari ma geewiya girti ƴiirti. 27Guu ammi n̰aawiɗe, guu ƴirrarri unɗe namma gu ammi kawwiɗe, gaa ussu aziɗe ma raɗɗa, guu aaniyiyya ger kaaka, gaa galɗe kivip.»
28Maa ga Iisa gaamiɗiy beneyyiŋgeetee kotti, guu giimi ku maani kotti ajjibiɗe ta tirta oko giraaniti taata, 29asan gi sawa ɗa ma ta aalimnigeeco ku Kitamniti Muusa. Iisa pa garkayyay ma beneyyiŋgee ma galaa.
© 2019, Wycliffe Bible Translators, Inc. All rights reserved.