मत्ती 17
17
येशूक रूप परिवर्तन
मर्कूस ९:२-१३; लूका ९:२८-३६
1वाकर छ दिन पाछ पत्रुस, याकूब ओ हुँकहार भैया यूहन्नह येशू आपनसँग लेक पर्वत्तोम गैल।#२ पत्र १:१७-१८ 2चेलावँ हेर्टीहेर्टी येशूक रूप बद्ललन। उहाँक अनुहार दिनअस चम्कलिन, 3ओ उहाँक लुगाजुन चह्कार उज्जर हुइलन। तब एकचोट्टे एलिया ओ मोशा येशूसे बात बट्वाइट् देखपर्ल।
4पत्रुस येशूह कल, “प्रभु, हम्र यिहाँ रलक धेर मजा हुइल्। यदि अप्न चहबी कलसे, मै यिहाँ तीनठो झोँप्री बनैम, एकठो अप्नक लाग, एकठो मोशक लाग, ओ एकठो एलियक लाग।”
5पत्रुस बोल्टीबोल्टी चह्कार बद्री आक उहाँहुँकन छोप्लन ओ बद्रीमसे असिन आवाज आइल, “यी म्वार प्रिय छावा हुइट। हिँकहीनसे मै धेर खुशी बाटुँ। टुह्र हिँकहार कहल मनहो।”#उत २२:२; व्य १८:१५; भज २:७; यशै ४२:१; मत्ती ३:१७; १२:१८; मर्क १:११; लूक ३:२२
6यी आवाज सुन्क चेलावँ एकदम डरैल ओ घोपट्यागैल। 7तर येशू आक हुँकन छुल ओ कल, “उठो, जिन डराओ।” 8हुँक्र उठ्क हेर्ल त येशूह बाहेक और किहुह नैदेख्ल।
9उहाँहुँक्र पर्वत्तोमसे ओल्हाइबेर, येशू हुँकन आज्ञा देल, “मै मनैयक छावा मुवलमसे फेदोस्र नैजियट्सम, यी दर्शनक विषयम किहुसे जिन बटोइहो।”
10तब चेलावँ उहाँह पुछ्ल, “ख्रीष्टसे आघ एलिया फेदोस्र संसारम आइपर्ठा कैक शास्त्रीहुँक्र काजे कठ?”#मला ४:५
11उहाँ हुँकन जवाफ देल, “हो, सब चिज ठीकठाक पारक लाग, एलिया अवस्य आइपर्ठा। 12मै टुँहन कहटुँ, एलिया फेदोस्र आरलह, तर मनै हुँकहीन नैचिन्ह्ल ओ हुँक्र जसहेँक मन लग्लन, हुँकहीनसे ओसहेँक दुर्व्यवहार कर्ल। मै मनैयक छावह फे हुँकन्हक हाँठसे दुःखकष्ट भ्वाग परुइयाबा।”#मत्ती ११:१४ 13तब येशू त बप्तिस्मा देहुइया यूहन्नक बारेम बात बट्वाइटलह कैक हुँक्र बुझ्ल।
भूत्वा लागल लौँरा चोखैलक
मर्कूस ९:१४-२९; लूका ९:३७-४३
14येशू चेलन्हकसँग भीड रहल ठाउँम घुम्क अइल त, एकठो मनैया उहाँक पाउ पर्क कहल, 15“प्रभु, म्वार छावह दया करी, मिर्गीरोग लग्लकओर्से यी धेर दुःख पाइटा। यी कबु आगीम, कबु पानीम पर्टीरठा। 16मै यहीह अप्नक चेलन्हकठे अन्नु, तर हुँक्र यहीह चोखाइ नैसेक्ल।”
17येशू कल, “टुह्र कस्सिन भ्रष्ट मनै हुइटो, एक्को विश्वास नैकर्टो! मै कैह्यासम टुन्हकसँग रहम? मै कहाँसम सहुँ? ओहीह यिहाँ आनो।” 18येशू वाकरम रहल भूत्वह हप्कैल। तब उ भूत्वा वाकरमसे निकर्क गैल् ओ उ लौँरा तबहेँ चोखागैल्।
19पाछ चेलावँ उहाँह गुपचुपम पुछ्ल, “हम्र काजे उ भूत्वह निक्राइ नैसेक्ली?”
20येशू हुँकन जवाफ देल, “टुन्हक विश्वास कमजोर रलक कारणले हो। जाट्टीसे मै टुँहन कहटुँ, कि एकठो राईक दाना बराबर टुन्हक विश्वास रहट कलसे, टुह्र यी पर्वत्वह ‘अठेसे हट्जा’ कलसे यी हट्जैनेरह। ओ टुह्र ज्या फे कर सेक्नेरलहो।#मत्ती २१:२१; मर्क ११:२३; १ कोर १३:२ 21[तर असिन किसिमक भूतन त ब्रत रह्क प्रार्थना कर्लसे केल निक्राइ सेक्जैठा।]”
येशू आपन मृत्युक बारेम द्वासर फ्यारा बट्वइलक
मर्कूस ८:३१–९:१; लूका ९:२२-२७
22येशू आपन चेलन्हकसँग गालीलम रहल समयम हुँकन कल, “मै मनैयक छावा, दुष्ट मनैन्हक हाँठम सुम्प्वापैम। 23हुँक्र महीह मुवहीँ, तर मुलक तीसर दिनम फेदोस्र जिजैम।” यी सुन्क चेलावँ धेर दुःखीत हुइल।
मन्दिरम तिरपर्ना कर
24 #
प्रस ३०:१३; ३८:२६ येशू ओ उहाँक चेलावँ कफर्नहुमम पुग्ल त, मन्दिरक कर उठुइयन पत्रुसकठे आक कल, “टुन्हक गुरु फे मन्दिरम तिरपर्ना कर तिर्ठ ना, कि नैतिर्ट?”#१७:२४ बीस वर्ष पुगल या ओहीसे धेर उमेर रहल हरेक यहूदी पुरुषहुँकन सालो मन्दिरक कर तिरपरन। उ कर एकठो कामदारक दुइ दिनिक ज्याला बराबर रह ओ उठल पैँसा मन्दिर मर्मत कर्ना कामम खर्च ह्वाए (प्रस्थान ३०:१३-१६; २ इतिहास २४:९-१४; नहेम्याह १०:३२)।
25ऊ जवाफ देल, “तिर्ठ जे, का नैतिरहीँ?”
पत्रुस घरम पैँठ्ल त, येशू हुँकहीन कल, “सिमोन, यी संसारक राजाहुँक्र केहीसे कर उठैठ? आपन देशक जनतनसे कि औरजहनसे? टुँहार विचार का बा?”
26पत्रुस जवाफ देल, “औरजहनसे।”
येशू हुँकहीन कल, “ओसिन हो कलसे, आपन देशक जनताओँ छुट पारख्ल। 27तर फे हम्र हुँकन रिस नैलगाई। टुँ समुद्रम जाक बन्सी लगाओ, ओ बन्सीम सबसे पैल्ह बाझल मच्छीक मुह् खोलो। टुँ वाकर मुहम एकठो चाँदीक पैँसा भेटैबो। उह पैँसा लैजाक मन्दिरम टुँहार ओ म्वार तिरपर्ना कर तिरदेओ।”
© 2020, Wycliffe Bible Translators, Inc. All rights reserved.