मत्ती 21
21
यरूशलेमम येशूक जयजयकार
मर्कूस ११:१-११; लूका १९:२८-४१; यूहन्ना १२:१२-१९
1येशू ओ उहाँक चेलावँ यरूशलेमक लग्घ जैतून पर्वत्वम रहल बेथफागे कना ठाउँम पुग्ल। येशू दुइ जन चेलन असिक कैक आघ पठैल, 2“टुह्र, उ हाउ गाउँम जाओ। गाउँम पैँठ्टीकि टुह्र एकठो गधा ओ वाकर बच्छोह बान्धल भेटैबो। हुँकन छोर्क यिहाँ म्वारठे अनहो। 3यदि कुई टुँहन कुछु कही कलसे, ‘प्रभुह चाहल बाटन’ कहहो, त ऊ टुँहन तुरुन्त आन देहुइयाबाट।”
4असिक धर्मशास्त्र पूरा हुइल्, काकरकि अगमवक्ता कैरख्ल,
5“सियोनक#२१:५ सियोन कलक यरूशलेमक और नाउँ हो। मनैन कैदेओ,
हेरो, टुन्हक राजा टुन्हकठे अइटीबाट,
उहाँ नम्र बाट ओ एकठो गधकम चिहुर्क सवार कर्ठ,
उहाँ गधक बच्छोकम चिहुर्क सवार कर्ठ।”#जक ९:९
6उ दुइ चेलावँ गैल, ओ येशूक अह्राइल अनुसार कर्ल। 7हुँक्र गधा ओ वाकर बच्छोह आन्क हुँकन्हक पीठारीम आपन-आपन चद्री बिछादेल, ओ उहाँ बच्छोकम चिहुर्ल। 8भीडमक मनै आपन-आपन पिछौरी डगरिम बिछैल, ओ आकुर जन झालापाता काट्क डगरिम बिछादेल। 9उहाँक आघ ओ पाछ लागल भीडमक मनै चिल्ला-चिल्लाक उहाँक जयजयकार करलग्ल,
“दाऊदक सन्तानह होसन्ना!#२१:९ “होसन्ना” कलक “परमेश्वरक जय ह्वाए” कहल हो।
परमप्रभुक नाउँम अउइया धन्यक हुइट!
स्वर्गक परमेश्वरह होसन्ना!”#भज ११८:२५-२६
10उहाँ यरूशलेमम पैँठ्ल त, सारा सहरम हलचल मच्चल। मनै पुछलग्ल, “यी के हुइट?”
11भीडमक मनै जवाफ देल, “यी गालील क्षेत्रक नासरत सहरसे आइल एकठो अगमवक्ता, येशू हुइट।”#२१:११ गालील क्षेत्रक मनै अशिक्षित मानजाइँट्, ओ हेप्वा पाक व्यवहार कर्वाजपाइँट्।
येशू मन्दिरम
मर्कूस ११:१५-१९; लूका १९:४५-४८; यूहन्ना २:१३-२२
12येशू मन्दिरम गैल ओ मन्दिरक अङ्नम व्यापार कर्ना सबजहन उहाँसे खेद्ल। उहाँ पैँसा सटुइयन्हक टेबुल ओ पर्यावाँ बेँचुइयन्हक बैठ्ना बिल्टादेल। 13उहाँ हुँकन कल, “‘म्वार घर परमेश्वरसे प्रार्थना कर्ना घर हुई’ कैक धर्मशास्त्रम लिखल नैहो का?#यशै ५६:७ तर टुह्र यहीह डाँका मर्ना ठाउँ बनारख्लो।”#यर ७:११
14तबदोस्र आन्धर मनै ओ नाङ्गर मनै मन्दिरम येशूकठे अइल, ओ उहाँ हुँकन चोखैल। 15मुख्य पूजारीहुँक्र ओ शास्त्रीहुँक्र येशूक करल अचम्मक काम देख्ल, ओ लर्कापर्कन मन्दिरम “दाऊदक सन्तानह होसन्ना” कैक चिल्ला-चिल्लाक कहट् सुन्ल। तर हुँक्र रिसैल, 16ओ येशूह कल, “हिँक्र का कहट? का अप्न नैसुनठुइटी?”
उहाँ हुँकन कल, “सुनटुँ जे। का टुह्र धर्मशास्त्रम लिखल बात नैबुझ्टो? उहिँम असिक लिखल बा,
‘अप्न लर्कापर्कन ओ दूध खैना लर्कन
स्तुतिप्रशंसा कर सिखारख्ली।’”#भज ८:२
17तब उहाँ सहरमसे निकर्क बेथानिया गाउँम गैल, ओ उहँ रात रल।
अञ्जीरक रूख्वा
मर्कूस ११:१२-१४,२०-२४
18द्वासर बिहान सहरम घुमबेर, येशूह भुँख लग्लन। 19डगरीक किनारम येशू एकठो अञ्जीरक रूख्वा देख्ल। बोँट्याओँट्या बा कि कैक उहाँ उ रूख्वठे गैल, तर उ रूख्वम पत्या केल रह। तब उहाँ उ रूख्वह कल, “आबठेसे ट्वारम कबु फे फारा जिन लागस।” ओ उ अञ्जीरक रूख्वा तबहेँ सुख्गैल्।
20यी देख्क चेलावँ अचम्म मन्टी कल, “यी अञ्जीरक रूख्वा अत्रा झट्ट कसिक सुखल?”
21येशू हुँकन जवाफ देल, “जाट्टीसे मै टुँहन कहटुँ, यदि टुह्र विश्वास कर्ठो ओ शङ्का नैकर्टो कलसे, टुह्र अञ्जीरक रूख्वह म्वार करलअस कर सेक्बो। ओ अत्र केल नैहोक, यी पर्वत्तोह ‘यिहाँसे उँखर्क समुद्रम खस’ कबो कलसे, टुन्हक कहलअस हुउइया बा।#मत्ती १७:२०; १ कोर १३:२ 22यदि टुह्र विश्वास कर्ठो कलसे, प्रार्थनम ज्या मङ्ग्लसे फे टुह्र पउइयाबाटो।”
येशूक अधिकारम शङ्का
मर्कूस ११:२७-३३; लूका २०:१-८
23उहाँ मन्दिरम जाक मनैन सिखाइटलह। तब मुख्य पूजारीहुँक्र, अगुवाहुँक्र उहाँकठे आक पुछ्ल, “यी काम कर्ना अधिकार टुँ कहाँसे पैलो? टुँहीन यी अधिकार के देहल?”
24येशू हुँकन जवाफ देल, “मै फे टुँहन एकठो बात पुछटु, यदि टुह्र वाकर जवाफ देबो कलसे, मै यी अधिकार कहाँसे पैनु कैक टुँहन कहम। 25यूहन्ना बप्तिस्मा देना अधिकार कहाँसे पैल, परमेश्वरसे कि मनैनसे?”
यी सुन्क हुँक्र अप्न-अप्न बट्वाइलग्ल, “आब हम्र का कही? परमेश्वरसे कही कलसे, ‘काकर टुह्र हुँकहीन विश्वास नैकर्लो त?’ कहहीँ। 26मनैनसे कही कलसे, कसिक कना हो? उहँर फे डर बा, काकरकि यूहन्नह सबजन अगमवक्ता हुइट कैक विश्वास कर्ठ।”
27उहओर्से हुँक्र येशूह जवाफ देल, “हमन थाहाँ नैहो।”
उहाँ हुँकन कल, “ओसिन हो कलसे, मै फे यी सक्कु काम कर्ना अधिकार कहाँसे पैनु कैक टुँहन नैकहम।”
दुइ भाइ छावन्हक आहान
28येशू कल, “मै एकठो आहान कहटुँ। उ सुन्क टुह्र आपन विचार कहसेक्ठो। एकठो मनैयक दुइ भाइ छावन रलहन। ऊ आपन बर्का छावकठे जाक कल, ‘छावा, अङ्गूरबारीम जाक आज काम करस हाँ।’
29“ऊ जवाफ देहल, ‘मै नैजैम।’ तर वाकर मन परिवर्तन हुइलस ओ गैल्।
30“उ मनैया आपन छोट्की छावह उह बात कल। ऊ जवाफ देहल, ‘मै जैम।’ तर नैगैल्।
31“उ दुइ भाइ छावनमध्येम बाबक कहल के मानल?”
हुँक्र जवाफ देल, “बर्का छावा।”
येशू हुँकन कल, “मै जाट्टीसे टुँहन कहटुँ, कर उठुइयन ओ वेश्या काम करुइयन टुँहनसे आघ परमेश्वरक राज्यम जउइयाबाट। 32काकरकि यूहन्ना आक टुँहन सत्य डगर देखैल, ओ टुह्र हुँकहीन विश्वास नैकर्लो। तर कर उठुइयन ओ वेश्या काम करुइयन हुँकहीन विश्वास कर्ल। यी देख्क फे टुह्र आपन पापी मन परिवर्तन नैकर्लो, ओ हुँकहीन विश्वास नैकर्लो।”#लूक ३:१२; ७:२९-३०
अध्यरोन्हक आहान
मर्कूस १२:१-१२; लूका २०:९-१९
33येशू कल, “आब और आहान सुनो। एकठो जग्गाधनी आपन जग्गम अङ्गूर लगाक गिन्यौरसे बेन्ह्वा बेहर्ल। ऊ अङ्गूर पेर्ना कोल ओ अख्वारी कर्ना अँट्वा बनैल। तब ऊ अङ्गूरिक खेती औरजहन अध्या देल ओ अप्नजुन परदेश लग्ल।#यशै ५:१-२ 34अङ्गूर टुर्ना समयम जग्गाधनी आपन नोकरन आपन बठा अङ्गूर लिह हुँकन्हकठे पठैल।
35“तर हुँक्र उ नोकरन दुर्व्यवहार कर्ल। हुँक्र कौनोजहन पिट्ल, कौनोजहन पत्थ्रले मर्ल ओ कौनोजहन मार्क मुवादेल। 36जग्गाधनी पैल्हकसे धेर नोकरन हुँकन्हकठे पठैल। तर हुँक्र पैल्ह करलअस हुँकन फे ओस्तै दुर्व्यवहार कर्ल। 37आखिरम उ जग्गाधनी ‘म्वार छावह त हुँक्र पक्कहेँ आदर करहीँ’ कैक आपन छावह हुँकन्हकठे पठैल।
38“तर हुँक्र जग्गाधनीक छावह देख्क अप्न-अप्न कल, ‘यी त हकवाला हो। लेओ, यहीह मुवादी, त यी सम्पत्ति हमार होजाई।’ 39तब हुँक्र ओहीह घँस्यैटी अङ्गूरबारीसे बाहर लैगिल ओ मार्क मुवादेल।”
40येशू पुछ्ल, “आब जग्गाधनी अइहीँ त, उ दुष्ट मनैन का करहीँ?”
41मुख्य पूजारीहुँक्र ओ शास्त्रीहुँक्र उहाँह जवाफ देल, “ऊ अपन्हे आक उ दुष्ट मनैन मुवैहीँ, ओ ठीकसे भाग देना और मनैन उ अङ्गूर खेती अध्या देहहीँ।”
42येशू हुँकन पुछ्ल, “का टुह्र धर्मशास्त्र पहर्क फे नैबुझ्टो?
‘घर बनुइयन रद्दी ठह्राक फाँकल् पत्थ्रा त
कोनोक मुख्य पत्थ्रा बनल।
यी काम परमप्रभुसे हुइल् हो,
ओ यी हमार नजरम अचम्मक बा।’#भज ११८:२२-२३
43“उहओर्से मै टुँहन कहटुँ, परमेश्वरक राज्य टुन्हकमसे अछिन्क परमेश्वरक इच्छा अनुसार चल्ना मनैन देजाई। 44उ पत्थ्रम खसुइयन सबजन चकनाचूर हुहीँ, तर ज्याकरम उ पत्थ्रा खसी ओहीह किचुलप्वाटा पारदी।”
45जब मुख्य पूजारीहुँक्र ओ फरिसीहुँक्र येशूक कहल आहान सुन्ल, तब उहाँ हुँकन्हक्के विरोधम कलह कैक हुँक्र बुझ्ल। 46हुँक्र उहाँह पक्रना दाउ ह्यारलग्ल, तर हुँक्र मनैन्हक डर डरैल, काकरकि मनै येशूह एकठो अगमवक्ता मानँट्।
© 2020, Wycliffe Bible Translators, Inc. All rights reserved.