Jâan 15
15
Jezü wätə̂ lëge da yö vînye
1«Më wätə̂ lëge da yö vînye, Bha mê wätə̂ earə̂ kə̂ wun tchô pâ vînye nə̈. 2Amatö yö gbɛ̂ ndə̂ âwâ ëtə̂ mê, ânyë kə̈ lêâbô lê-ê, tche âku rə̂ fiî. Praâbalë amatö yö gbɛ̂ ndə̂ âlê, tche âsro atäpânə̈ ndə̂ âwûtu tə̂ kʉ̂tê nə̈ ndə̂kə̂ pa äka lê tə̂ gbölösə̂nə̈. 3Pö ndə̂ më tô rə̂ sə̈ nyê, âmbô nyê, nyë grô nə̂ gbɛ̂. 4Nyë sə̈ balë la mê ânyë mê səadje balë la nyê. Ngâ matö yö wâbo ndə̂kə̂ le la tə̂ yê, ndə̂ tche wâbô wâ ëtə̂ da yö nə̈-a. Andə̂ nye nə̈, ârə̂ âwa ndjë käko-ë, âdə nyê âsəabô sə̂ balë la mê, nyê leabô lêlê nə̈ balë tee-a. 5Më wätə̂ da yö vînye, nyë wätə̂ amatö nə̈. Akrə ndə̂ tche wâ balë la mê, ânyë më wâ balë la tchë, tchê leadje alêlê nə̈ tə̂ gbölösə̂nə̈, bëte âdə nyë âsə tə̂ mê bhâchï, nyê mboabô ngâ rə balë tee-a. 6Âdə ngâ akrə ndə̂ tche wâbô wâ balë la mê, a âyi tchë fiî batə̂ matö nə̈ ndə̂ a kû rə̂ ânyë âhrô. Agbâkü matö nə̈ ndə̂ âhrô lâme, a âpala rə̂, kə̂ yi rə̂ bhâlə̂ wo ânyë âju. 7Âdə nyë âwa balë la mê, ânyë apö ndə̂ mê wâ lə̂ nyê, nyë âyukû arə gbɛ̂ ndə̂ nyë nyîndə̂ nə̈, nyê gboadje rə̂. 8Âdə nyê âle lêlê nə̈ tə̂ gbölösə̂nə̈, ânyë kə̈ nyîsə̂ nə̈ pä nyë wätə̂ alëge adjisîpili ndə̂ mê, a luadje sə̂ Bha mê lə̂ köbosə̂ nə̈. 9Batə̂ rə̂ ndə̂ Bha nyîndə̂ mê logbɛ̂, mëmê ndjë gbɛ̂ më nyïndə̂ nyê. Äwäpä nyë sə kpô lə̂kə̂ nyində̂ ngâ, ndə̂ më nyîndə̂ nyê la rə̂ lâme. 10Âdə nyê âbata andïɛ̈ ndə̂ mê, nyê səadje kpô lə̂kə̂ nyində̂ ngâ ndə̂ më nyîndə̂ nyê la rə̂ lâme. Batə̂ rə̂ ndə̂ më bâta andïɛ̈ ndə̂ Bha mê ânyë kə̈ sə̂ kpô lə̂kə̂ nyində̂ ngâ ndə̂ tche nyîndə̂ nyê la rə̂ lâme.
11«Më tö pö lâme sə̈ nyê ndə̂kə̂ pa mômô ndə̂ mê wa lə̂ nyê, käko ânyë mômô ndə̂ nyê nə̈ sɨ̂adje sɨ̈ lə̂ arə gbɛ̂. 12Ndïɛ̈ ndə̂ mê wä kâkë: Nyë nyïndə̂ tə̂ nyê lə̂ gbâtə̂ nyê la angâ nyê, batə̂ më nyîndə̂ nyê. 13Âdə ngâ akrə âza tchîsûwu ndə̂ yê la kuzü bëte araagü nə̈, ndə̂kə̂ nyisə̂ kə̂ nyində̂ ngâ ndə̂ yê, kə̂ nyində̂ ngânə̈ lâme wä gbölö kə̈ rô adɨ̂ nə̈ gbɛ̂. 14Âdə nyê âmbo rə gundə̂sə̂ kə̂ zama ndə̂ mê, nyë wätə̂ araagü mê. 15Mê kä eabô nyê tə̂ a-earə̂ kua tee-a, bëte earə̂ kua wûn-âbo sə̂ rə ndə̂ gbölö akrə ndə̂ yê mbo rə̂-a. Mê âe nyê tə̂ araagü mê, bëte më nyîsə̂ arə gbɛ̂ ndə̂ më djê rə̂ dəndə̂ Bha mê sə̈ nyê nə̂. 16Âdə̂âbo nyënyê kä ndə̂ âê mê-a, praâbalë mëmê kä ndə̂ adɨ̂ nyê, më zäma sə̈ nyê ndə̂kə̂ pa nyë e, kə̂ le lêlê nə̈, lêlê nə̈ ndə̂ âwa logbɛ̂. Käko Bha mê âkʉadje arə gbɛ̂ sə̈ nyê ndə̂ nyë yûkû nə̈ la rə̈ mê. 17Käko rə ndə̂ më zâma sə̈ nyê tâ wä ndə̂kə̂ nyində̂ angâ nyê lə̂ gbâtə̂ nyê.»
Azü tchêbêche kösə̂ Jezü la adjisîpili ndə̂ yê
18«Âdə azü tchêbêche âtə âkosə̂ nyê, äwäpä nyë wunsə̂ nə̈ pä andjë kösə̂ mê dokʉ̈tchê tə̂ nyê. 19Âdə nyê âwa alême tə̂ azü tchêbêche âtə, tchêbêche nə̈ nyiadje ndə̂ nyê, bëte nyë wätə̂ andjandə̂ ye nə̈. Praâbalë nyë kä wâbo tə̂ azü ndə̂ yê-a, bëte më dɨ̈ nyê lə̂ gûtə̂ azü tchêbêche. Bëte rə̂ kä ndə̂ azü tchêbêche kôsə̂ nyê. 20Nyë rɨ̈ tchə̂lə̂ nyê tə̂ pö ndə̂ më tô rə̂ päkëdə̂: ‹Earə̂ kua wâbo gbölö kə̈ rô gbölö akrə ndə̂ yê-a.› Âdə azü tchêbêche âmbo mê la yûkü, andjê mboadje ndjë nyê la yûkü. Âdə andjê âbata pö ndə̂ mê, andjê batadje ndjë pö ndə̂ nyê. 21Praâbalë andjê mboadje arə lâme gbɛ̂ tə̂ nyê tə̂ pö ndə̂ rə̈ mê, bëte andjë wûn-âbo sə̂ tchanə̈ ndə̂ tche wân mê-a. 22Âdə mê ânəabô alême nə̂-ê, ânyë kə̈ tôâbô pö alême tô sə̈ andjê-ê, ngbongbo rə wabô lə̂ küma andjê tee-a. Praâbalë angaâtə, andjë kâ wâbo la ngâ pö ndə̂kə̂ to rə̂ bëte ngbongbo rə ndə̂ andjê-a. 23Akrə ndə̂ tche kôsə̂ mê, tche kö ndjë sə̂ Bha mê. 24Âdə mê âmboabô arə alême mbô lə̂ gûtə̂ andjê, ndə̂ ngâ akrə ngbî mbôâbô rə̂ mbô-ê, andjê wabô la ngbongbo rə lə̂ küma andjê tee-a. Angaâtə, andjë wûn arə ndə̂ më mbô rə̂ nə̂, praâbalë gbô andjê kä lakə̂ kosə̂ mê ndjë la Bha mê. 25Praâbalë rə lâme wütu ndə̂kə̂ pa apö ndə̂ a mbô rə̂ lə̂ Mbëtï-ndïɛ̈ ndə̂ andjê, mbo gundə̂sə̂ nə̈. Pö nə̈ wä päkëdə̂: ‹Andjë kösə̂ mê ämbämbänə̈#15.25 Nyë dɨ̈ Aps 35.19; 69.5..›
26«Tchanə̈ ndə̂ tche wâ ndə̂kə̂ za könô sə̈ nyê lâme, tchê nəadje. Tche də̈ Yingö ndə̂ tche to lëge pö ndə̂ tche tô bhândə̂ Bha mê ânyë kə̈ nə̂. Mê wan-adje tchë la rə̈ Bha mê sə̈ nyê, ânyë tchetchë kä ndə̂ âtoadje pö pâ mê sə̈ azü. 27Nyënyê ndjë gbɛ̂, nyê toadje pö ndə̂ nyë wûnsə̂ nə̈ pâ mê, bëte sə̂nə̈ ndə̂ më jêtə̂ kua ndə̂ mê alême, nyë kä tâ.»
© Wycliffe Bible Translators, Inc.