Jâan 9
9
Jezü tchä ngâ earə̂ föla
1Ndə̂ Jezü âsə̈ ro pâ köbo, tche wûn ngâ earə̂ föla ndə̂ a zɨ̂ tchë zɨ̈ la rə̂. 2Adjisîpili ndə̂ yê yû tchë päkëdə̂: «Earə̂ kə̂ nyisə̂ rə, köchë ndə̂ a zɨ̂ tchë tə̂ earə̂ föla âtə, tchetchë kä ndə̂ âmbô ngbongbo rə? Âdəndjë bha nə̈ la anyï nə̈?» 3Jezü tô rə̂ ndə̂nə̈ päkëdə̂: «Âdə̂âbô tchetchë âdəndjë bha nə̈ la anyï nə̈ kä ndə̂ âmbô ngbongbo rə-a. Praâbalë äwä ndə̂kə̂ pa a wun kua ndə̂ Ndjapä mbo rə̂ lə̂ yê. 4Ârə̂ âsə̈ wa la tchêdalo, äwäpä azə̈ mbo kua ndə̂ tchanə̈ ndə̂ tche wân mê. Tchə̂lə̂ bütchî ndô nə̂, ânyë ngâ akrə balë wâbo ndə̂kə̂ mbo kua-a. 5Ndə̂ gbô mê ndə̂po bêche âtə, më wätə̂ ngbänga ndə̂ tchêbêche âtə.» 6La tchêngbâ nə̈ ndə̂ Jezü tô rə̂ käko, tche kû ngrʉ̂srö ëbêche kə̈ mbô rə̂ la kpata, pânə̈ tche nâna rə̂ ëpâ gaga la earə̂ föla lâme, 7kə̈ tô rə̂ sə̈ tchë päkëdə̂: «Amö e kə̈ djûtu la zə̈ lə̂ kpakpa ngû ndə̂ Silowë.» Silowë nə̈ lâme nyïndə̂ kə̂ to rə̂ päkëdə̂: «Akrə ndə̂ a wân tchë». Tche ê kə̈ djûtu la yê, ndə̂ tche âsə̈ dotə̂ yê, kə̈ wûn tchô.
8Azü ndə̂ andjë lô ndola nda ndə̂ yê la angâ azü ndə̂ andjë wûn tchë dokʉ̈tchê lakə̂ yukû rə tchânə̂ azü lâme, andjë tô rə̂ päkëdə̂: «Âdə̂âbô köchë ndə̂ tche sə̂ bêche alême lakə̂ yukû rə tchânə̂ azü lâme kä âtə?» 9Angânə̈ tô rə̂ päkëdə̂: «Tchetchë kä.» Andjanə̈ me tô rə̂ päkëdə̂: «Ɛ̂n-ɛ̈n, akrə nə̈ kʉ̈ tchë kʉ̈.» Tchetchë la tə̂ yê tô rə̂ päkëdə̂: «Mëmê kä.» 10Andjë tô rə̂ sə̈ tchë päkëdə̂: «La zə̈ jï atöko?» 11Tche tô rə̂ sə̈ andjê päkëdə̂: «Köchë ndə̂ rə̈ yê wû pä Jezü lâme mbö kpata, kə̈ nâna rə̂ ëpâ gaga la mê, ânyë kə̈ tô rə̂ sə̈ mê päkëdə̂: ‹Amö êë, kə̈ djûtu la zə̈ lə̂ kpakpa ngû ndə̂ Silowë.› Käko më ê kə̈ djûtu la mê, ânyë kə̈ kä wûn tchô ngrôô!» 12Andjë yû tchë päkëdə̂: «Köchë lâme sə̈ bhâ tchêbâ?» Tche tô rə̂ ndə̂nə̈ päkëdə̂: «Më wûn-âbo sə̂nə̈-a.»
Afarizïɛ̈n yü earə̂ föla ndə̂ la yê vrô
13Andjë ê la tchanə̈ ndə̂ la yê fô alême pu afarizïɛ̈n. 14Dëkë lə̂ ngâ lö sabäa alême kä ndə̂ Jezü mbô kpata, ânyë kə̈ vrô la yê la rə̂. 15Âdə andə̂ afarizïɛ̈n nə̈, andjë yû tchë tə̂ köbo ndə̂ la yê vrô la rə̂. Tche tô rə̂ sə̈ andjê päkëdə̂: «Tche mbö kpata ëpâ gaga la mê, më djûtu la mê ânyë kə̈ wûn tchô.» 16Angâ afarizïɛ̈n nə̈ tô rə̂ päkëdə̂: «Köchë ndə̂ tche mbô rə lâme tôâbo bhândə̂ Ndjapä-a, bëte tche kpêâbo wa ndïɛ̈ ndə̂ lö sabäa-a.» Angânə̈ tô rə̂ päkëdə̂: «Atöko kä ndə̂ ngâ earə̂ ngbongbo rə wâ ndə̂kə̂ mbo akpɨ̈ngbɨ̈ rə kâkë âtə?» Tchâme tchə̂lə̂ andjê krʉ̂-ê. 17Afarizïɛ̈n kâ yû earə̂ föla lâme päkëdə̂: «Momö, âbatə̂ tche vrô la zə̈ lâme, mo tö rə̂ tə̂ yê atöko?» Tche tô rə̂ ndə̂nə̈ päkëdə̂: «Tche də̈ earə̂ ndə̂ma Ndjapä.»
18Dokʉ̈tchê ndə̂kə̂ pa andjë wan tchô ndə̂kə̂ e bha nə̈ la anyï nə̈, ajuîfu gâmbabô rə̂ pä tche wä alême tə̂ earə̂ föla ânyë kə̈ kâ wûn tchô lâme-a. 19Andjë yû bha nə̈ la anyï nə̈ päkëdə̂: «Bechë ndə̂ nyê kä âtə? Ndə̂ nyë tö rə̂ pä nyë zɨ̈ tchë zɨ̈ tə̂ earə̂ föla âtə? Tïtïsə̂nə̈ atöko kä ndə̂ tche wûn tchô angaâtə?» 20Bha nə̈ la anyï nə̈ tô rə̂ ndə̂nə̈ päkëdə̂: «Ârâ wûnsə̂ nə̈ nə̂ pä modô ndə̂ ârâ kä, ânyë a zɨ̈ tchë tə̂ earə̂ föla. 21Praâbalë atöko kä ndə̂ tche wûn tchô angaâtə, ârâ wûn-âbo sə̂nə̈-a. Tchabâ kä ndə̂ âvrô la yê, ârâ wûn-âbo ndjë sə̂nə̈-a. Nyë yü tchë, tche mbôtə̂ yê tə̂ köchë nə̂ ndə̂kə̂ to pö la tə̂ yê pâ pö ndə̂ âwûn tchë!» 22Bha nə̈ la anyï nə̈ tö rə̂ käko bëte andjë mbö wawa ajuîfu. Bëte ajuîfu djëtə̂ andjê pä, âdə ngâ akrə âwun tchë batə̂ Krîsiti, a gro tchë lə̂ nda kə̂ voga Ndjapä ndə̂ andjê. 23Bëte rə̂ kä ndə̂ bha nə̈ la anyï nə̈ tô rə̂ päkëdə̂: «Tche mbôtə̂ yê tə̂ köchë nə̂, nyë yü tchë.»
24Afarizïɛ̈n kâ ê köchë ndə̂ la yê vrô lâme tə̂ bïchuû nə̈, kə̈ tô rə̂ sə̈ tchë päkëdə̂: «Amö za ayîabâ sə̈ Ndjapä. Ârâ wünsə̂ nə̈ pä köchë lâme wätə̂ earə̂ ngbongbo rə.» 25Tche tô rə̂ ndə̂nə̈ päkëdə̂: «Âdə tche âwatə̂ earə̂ ngbongbo rə, më wûn-âbo sə̂nə̈-a. Më wünsə̂ rə balë, më wä alême tə̂ earə̂ föla, praâbalë angaâtə më wûn tchô nə̂.» 26Andjë tô rə̂ päkëdə̂: «Tche mbö giamâ tə̂ zə̈? Tche vrö la zə̈ nə̈ atöko?» 27Tche tô rə̂ ndə̂nə̈ sə̈ andjê päkëdə̂: «Më tô rə̂ sə̈ nyê dokʉ̈tchê nə̂, praâbalë nyë djêâbo rə̂-a. Bëte giamâ kä ndə̂ nyë kä nyîndə̂ kə̂ dje rə̂ tə̂ täfo nə̈? Nyënyê ndjë gbɛ̂, nyë nyïndə̂ kə̂ watə̂ adjisîpili ndə̂ yê?» 28Andjë drô tchë, kə̈ tô rə̂ päkëdə̂: «Momö kä ndə̂ âwâtə̂ djisîpili ndə̂ akrə lâme, ârâ wätə̂ adjisîpili ndə̂ Möyîze. 29Ârâ wünsə̂ nə̈ pä Ndjapä tö pö alême sə̈ Möyîze, praâbalë tchanə̈ âtə, ârâ wûn-âbo sə̂ tchô ndə̂ tche tô tâ-a.» 30Köchë lâme tô rə̂ ndə̂nə̈ sə̈ andjê päkëdə̂: «Wunsa rə ndə̂ âmbo rə̂ pä tchə̂lə̂ küma azü djingɨli tâ kä lâme: Nyë wûn-âbo sə̂ tchô ndə̂ tche tô tâ-a, dëkë tchetchë kä ndə̂ âvrô la mê! 31Ârâ wünsə̂ nə̈ pä Ndjapä djêâbo a-earə̂ ngbongbo rə-a. Praâbalë âdə ngâ akrə âlusə̂ Ndjapä, ânyë kə̈ mbô rə ndə̂ su yê nyîndə̂ nə̈, tchanə̈ lâme, Ndjapä dje tchë. 32A djêâbo rə̂ lo balë pä ngâ akrə vrô la ngâ earə̂ föla ndə̂ a zɨ̂ tchë zɨ̈ la rə̂ nə̂-a. 33Âdə köchë lâme âtoabô tô bhândə̂ Ndjapä-ê, tche wâbo ndə̂kə̂ mbo ngâ rə balë-a.» 34Andjë tô rə̂ ndə̂nə̈ sə̈ tchë päkëdə̂: «Momö, a zɨ̈ mö la ndundu tə̂ zə̈ gbɛ̂ lə̂ ngbongbo rə, ânyë momö kä ndə̂ ânyisə̂ rə sə̈ ârâ?» Tchâme, andjë grô tchë atə̂ sûwu.
Alëge a-earə̂ föla
35Ndə̂ Jezü djê rə̂ pä afarizïɛ̈n grô köchë lâme nə̂ atə̂ sûwu, Jezü ê kə̈ gbô tchë ânyë kə̈ yû tchë päkëdə̂: «Momö, mo zâ su zə̈ sə̈ Modô ndə̂ Akrə nə̂?» 36Tche tô rə̂ ndə̂nə̈ sə̈ tchë päkëdə̂: «Gbölö Gbïɛ̈, Modô ndə̂ Akrə nə̈ də̈ tchabâ ndə̂kə̂ pa më za su mê sə̈ tchë?» 37Jezü tô rə̂ sə̈ tchë päkëdə̂: «Mo wûn tchë nə̂, akrə ndə̂ mo to pö la tchë âtə, tchetchë kä.» 38Käko tche tô rə̂ päkëdə̂: «Gbölö Gbïɛ̈, më zâ su mê sə̈ mö nə̂.» Tche gʉ̂te tchâtchâ yê. 39Pânə̈ Jezü tô rə̂ päkëdə̂: «Më nə̈ atə̂ bêche âtə ndə̂kə̂ wa ngbanga, ndə̂kə̂ pa a-earə̂ föla wun tchô, ânyë azü ndə̂ andjë wun tchô dotə̂ andjê tə̂ a-earə̂ föla.» 40Pânə̈ ndə̂ angâ afarizïɛ̈n ndə̂ andjë sə̂ ndola Jezü djê apö lâme, andjë yû tchë päkëdə̂: «Ârâ ndjë gbɛ̂, ârâ wätə̂ a-earə̂ föla?» 41Jezü tô rə̂ ndə̂nə̈ sə̈ andjê päkëdə̂: «Âdə nyë âwa alême tə̂ a-earə̂ föla, kə̂ mboabô ngbongbo rə tee-a. Praâbalë angaâtə nyë tö rə̂ päkëdə̂: ‹Ârâ wün tchô›, dëkë gbô ngbongbo rə kä lə̂ nyê.»
© Wycliffe Bible Translators, Inc.