Lûke 20
20
Gbôgbô ndə̂ Jezü tö bhâ tchêbâ?
(Mat 21.23-27; Mar 11.27-33)
1Tə̂ngâlo, Jezü sə̂ lakə̂ nyisə̂ rə sə̈ azü lə̂ gbölö nda Ndjapä lakə̂ mu Tchôtchô Pö ndə̂ Ndjapä. Agbölö a-earə̂ kə̂ wa ngela sə̈ Ndjapä la a-earə̂ kə̂ nyisə̂ ndïɛ̈ la akpôkpô azü wûtu. 2Andjë tô rə̂ sə̈ Jezü päkëdə̂: «To rə̂ sə̈ ârâ, gbôgbô giamâ kä ndə̂ mo mbo rə âtə la rə̂? Tchabâ kä ndə̂ âzâ gbôgbô âtə sə̈ mö?» 3Jezü tô rə̂ ndə̂nə̈ sə̈ andjê päkëdə̂: «Mëmê ndjë gbɛ̂ më âyu nyê la ngâ pö. Nyë tö pö ndə̂nə̈ sə̈ mê: 4Tchabâ âwân Jâan-Batîse ndə̂kə̂ za batɛ̂me ndə̂ ngû sə̈ azü? Ndjapä kä? Âdəndjë azü tchêbêche?» 5Praâbalë andjë zâ küma andjê lə̂ gbâtə̂ andjê lakə̂ to rə̂ päkëdə̂: «Âdə azə̂ âto rə̂ ndə̂nə̈ sə̈ tchë päkëdə̂: ‹Ndjapä kä ndə̂ âwân Jâan,› tchê yuadje azə̂ päkëdə̂: ‹Bëte giamâ kä ndə̂ nyë gâmbabô pö ndə̂ Jâan gâmba-ê?› 6Praâbalë âdə azə̂ âto rə̂ päkëdə̂: ‹Azü kä ndə̂ âwân Jâan,› azü gbɛ̂ nyeadje azə̂ la täme kə̂ won azə̂! Bëte andjë gämba rə̂ la su andjê gbɛ̂ pä Jâan wätə̂ earə̂ ndə̂ma Ndjapä.» 7Käko andjë tô rə̂ sə̈ Jezü päkëdə̂: «Ârâ wûn-âbo sə̂ akrə ndə̂ tche wân Jâan ndə̂kə̂ za batɛ̂me sə̈ azü lâme-a.» 8Jezü tô rə̂ sə̈ andjê päkëdə̂: «Mëmê ndjë gbɛ̂, mê nyiabô sə̂ akrə ndə̂ tche zâ gbôgbô lâme sə̈ mê tee-a.»
Ndoka pâ angbongbo a-earə̂ kə̂ djo kɨ̈ndɨ̈ vînye
(Mat 21.33-46; Mar 12.1-12)
9La tchêngbâ nə̈ Jezü sə̂ lakə̂ to ndoka âtə sə̈ azü nə̈ päkëdə̂: «Ngâ akrə mbö kɨ̈ndɨ̈ vînye#20.9 Nyë dɨ̈ Eza 5.1., ânyë kə̈ gbôtâ ëtchânə̂ a-earə̂ kə̂ mbo kua vînye, ânyë kə̈ ê atə̂sə̂ ngâ tchô ndə̂kə̂ sə bhâye lə̂ angâ angbängbä alö. 10Ndə̂ lo kə̂ kʉlo lêlê vînye nə̈ âsə̈ wutu, tche wân ngâ earə̂ kua ndə̂ yê sə̈ a-earə̂ kua vînye nə̈, ndə̂kə̂ pa andjë wän andə̂ ye nə̈ lêlê vînye nə̈ sə̈ tchë. Praâbalë a-earə̂ kə̂ mbo kua kɨ̈ndɨ̈ vînye nə̈ bhî earə̂ kua lâme, kə̈ grô tchë la wünwün könô yê. 11Earə̂ kɨ̈ndɨ̈ vînye nə̈ kä wân ngâ earə̂ kua ndə̂ yê, praâbalë a-earə̂ kə̂ mbo kua vînye nə̈ kä bhî ndjë tchë, kə̈ drô tchë, ânyë kə̈ grô tchë la wünwün könô yê. 12Tche kä wân ngâ vötaâ akrə nə̈, andjë tû ku tə̂ yê, ânyë kə̈ grô tchë. 13Käko earə̂ kɨ̈ndɨ̈ vînye nə̈ tô rə̂ päkëdə̂: ‹Më âmbo atöko? Më âwan modô ndə̂ mê ndə̂ më nyîndə̂ yê tə̂ gbölösə̂nə̈, ambêteko andjê kpeadje wa yê.› 14Praâbalë ndə̂ a-earə̂ kə̂ mbo kua vînye nə̈ âsə̈ wun modô ndə̂ köchë lâme, andjë tô rə̂ lə̂ gbâtə̂ andjê päkëdə̂: ‹Earə̂ kə̂ za kɨ̈ndɨ̈ nə̈ ngbâ bha nə̈ kä âtə. Azə̈ wön tchë-ê, ndə̂kə̂ pa kɨ̈ndɨ̈ vînye nə̈ watə̂ andə̂ azə̈ nə̈.› 15Andjë wûtu la tchë lə̂ kɨ̈ndɨ̈ vînye nə̈ bhâchï kə̈ wôn tchë-ê.»
Jezü yû andjê päkëdə̂: «Earə̂ kɨ̈ndɨ̈ nə̈ âmbo tə̂ andjê atöko? 16Tchê kadje, kə̂ won-adje a-earə̂ kə̂ djo kɨ̈ndɨ̈ vînye nə̈ gbɛ̂ ânyë kə̂ gbotə̂ kɨ̈ndɨ̈ nə̈ ëtchânə̂ angâ azü ngbî.» Ndə̂ azü nə̈ djê pö lâme, andjë tô rə̂ päkëdə̂: «Rə nə̈ âmboabô balë tee-a!» 17Praâbalë Jezü wûn andjê zoo kə̈ tô rə̂ päkëdə̂: «Pö lə̂ Mbëtï Ndjapä âtə nyïndə̂ kə̂ to rə̂ atöko? Pö nə̈ to rə̂ päkëdə̂:
‹Täme ndə̂ a-earə̂ kə̂ mbo nda gbôtâ,
ârə̂ kä âkə̈ mbôtə̂ yê tə̂ gbôgbô täme da nda nə̈#20.17 Nyë dɨ̈ Aps 118.22.!›
18Akrə ndə̂ tche tê pâ täme lâme, tchə̂lə̂ yê ândjo. Âdə täme nə̈ âte pâ ngâ akrə, kə̂ nunu tchë bhilakata-ê.»
Rə ndə̂ Sezäre, la rə ndə̂ Ndjapä
(Mat 22.15-22; Mar 12.13-17)
19A-earə̂ kə̂ nyisə̂ ndïɛ̈ la agbölö a-earə̂ kə̂ wa ngela sə̈ Ndjapä wûnsə̂ nə̈ nə̂ pä anyenyê kä ndə̂ Jezü tô ndoka lâme tə̂ anyê. Andjë nyîndə̂ kə̂ za Jezü posə̂nə̈, praâbalë wawa azü nə̈ mbô andjê. 20Käko andjë sə̂ lakə̂ kparɨ Jezü. Andjë wân angâ azü ndə̂kə̂ mbotə̂ andjê âwûntî pä andjë də̈ adjîrə̂ azü. Azü nə̈ lâme sə̈ lakə̂ vu Jezü lə̂ köbosə̂ apö ma yê, ânyë andjë gbo köbo ndə̂kə̂ gbotə̂ yê ëtchânə̂ a-earə̂ gbôgbô la kümändëmä ndə̂ goverenëre. 21Andjë yû tchë päkëdə̂: «Earə̂ kə̂ nyisə̂ rə, ârâ wûnsə̂ nə̈ nə̂ pä pö ndə̂ mo to rə̂, la rə ndə̂ mo nyisə̂ nə̈ wä lə̂ köbo nə̈. Mo wûn-âbo gbölö ndə̂ akrə-a, praâbalë mo nyïsə̂ lëge köbo pâ rə ndə̂ âfû tə̂ su Ndjapä. 22Amö to rə̂ sə̈ ârâ: Ndïɛ̈ ndə̂ gö ndə̂ azə̂ zä köbo ndə̂kə̂ pa a kʉ makətche-lapöo sə̈ gbölö gbïɛ̈ Sezäre? Âdəndjë rə̂ a kʉabô rə̂ kʉ̂ sə̈ tchë-ê?» 23Praâbalë Jezü wûnsə̂ nə̈ nə̂ pä andjë nyïndə̂ kə̂ za pö lə̂ küma anyê, ânyë tche tô rə̂ sə̈ andjê päkëdə̂: 24«Nyë mä ngâ makətche sə̈ mê. Nyîsɨ̂ la rə̈ tchabâ kä ndə̂ a mbô rə̂ pâ makətche âtə?» Andjë tô rə̂ päkëdə̂: «Andə̂ Sezäre kä.» 25Jezü tô rə̂ sə̈ andjê päkëdə̂: «Käko nyë kʉ̈ arə ndə̂ âwâtə̂ andə̂ Sezäre sə̈ Sezäre, kə̂ kʉ arə ndə̂ âwâtə̂ andə̂ Ndjapä sə̈ Ndjapä.» 26Lə̂ apö ndə̂ tche tô rə̂ tchâtchu azü nə̈, andjë gbôâbo ngâ ngbongbo nə̈ lə̂nə̈-a. Praâbalë tchə̂lə̂ küma andjê djîngɨli, ânyë andjë sə̂ gii-ï.
Pö pâ kə̈ jo ndə̂ akuzü
(Mat 22.23-33; Mar 12.18-27)
27Angâ asadusïɛ̈n nə̂ ndola Jezü. Andjë wätə̂ azü ndə̂ andjë tô rə̂ pä akuzü wâbo ndə̂kə̂ jo-a#20.27 Nyë dɨ̈ Abdj 23.8.. Andjë yû Jezü päkëdə̂: 28«Earə̂ kə̂ nyisə̂ rə, Möyîze mbö rə̂ lə̂ mbëtï sə̈ ârâ päkëdə̂: ‹Âdə köchë la ɛ̈chë âtotə̂ andjê, ndə̂ ɛ̈chë nə̈ zɨ̂âbô zɨ̂ ânyë köchë nə̈ tchû, yîngâ yê nə̈ âto ɛ̈chë nə̈ ngbâ yê ndə̂kə̂ pa tchetchë la ɛ̈chë nə̈ lâme andjë zɨ bechë la rə̈ yîngâ yê ndə̂ tche tchû lâme.› 29Dëkë, angâ ayîngâ mïndûu manə̈ bïchuû kä tâ. Dokʉ̈ nə̈ tô ɛ̈chë, kə̈ tchû tə̂ abechë ämbänə̈. 30Bïchuû nə̈ tô ɛ̈chë nə̈ lâme, kə̈ zɨ̂âbo tə̂ yê-a, kə̈ tchû-î. 31Vötaâ nə̈ ndjë käko-ë, zoo andjê mïndûu manə̈ bïchuû lâme gbɛ̂ tô ɛ̈chë lâme, kə̈ zɨ̂âbo bechë tə̂ yê-a, kə̈ tchû-î. 32La tchêngbâ nə̈ ɛ̈chë nə̈ tchû ndjë. 33Käko-ë, lo nə̈ ndə̂ akuzü jo, ɛ̈chë lâme âwatə̂ ɛ̈chë ndə̂ tchabâ? Bëte andjê mïndûu manə̈ bïchuû gbɛ̂ tô tchë nə̂.» 34Jezü tô rə̂ ndə̂nə̈ sə̈ andjê päkëdə̂: «Azü ndə̂ tchô angêta tötə̂ andjê, 35praâbalë aköchë la aɛ̈chë ndə̂ Ndjapä dɨ̂ andjê tə̂ adjîrə̂ azü ndə̂kə̂ pa andjë jo kə̂ sə sûwu ndə̂ tchêlâmbo, andjê kä to bata tə̂ andjê tee-a. 36Andjê kä tchu bata tee-a, bëte andjë wä batə̂ aânje. Andjë wätə̂ abechë ndə̂ Ndjapä, bëte andjë jô lə̂ kuzü nə̂. 37Möyîze nyîsə̂ nə̈ alême nə̂ kraâ pä akuzü âjoadje. Ädə̈ käko ânyë, lə̂ Mbëtï Ndjapä ndə̂ âtô pö ndə̂ ngâ gbâkü dɨgbɨ ndöndö yö ndə̂ wo sə̂ lakə̂ tcho lə̂nə̈, Möyîze ê rə̂ tə̂ Gbölö Gbïɛ̈ pä tche wätə̂ ‹Ndjapä ndə̂ Abrahâmo, Ndjapä ndə̂ Izâke, Ndjapä ndə̂ Jakôbo#20.37 Nyë dɨ̈ Eki 3.2,6..› 38Jezü kä tô rə̂ päkëdə̂: Tche wâbo tə̂ Ndjapä ndə̂ akuzü-a, praâbalë tche wätə̂ Ndjapä ndə̂ azü ndə̂ andjë wä la tʉ̈rʉ̂ la andjê, bëte azü gbɛ̂ wä la tchîsûwu bëte tchë.» 39Käko angâ a-earə̂ kə̂ nyisə̂ ndïɛ̈ tô rə̂ sə̈ Jezü päkëdə̂: «Earə̂ kə̂ nyisə̂ rə, mo tö pö ndə̂ zə̈ la köbo nə̈.» 40Bëte gʉ ndə̂kə̂ ka yu tchë la ngâ pö wâbo lə̂ andjê-a.
Krîsiti la Davîdi
(Mat 22.41-46; Mar 12.35-37)
41Jezü tô rə̂ sə̈ andjê päkëdə̂: «Tchïtchïnə̈ atöko kä ndə̂ azü tô rə̂ pä Krîsiti wätə̂ Modô ndə̂ Davîdi? 42Davîdi tö rə̂ lə̂ mbëtï ndə̂ Apösômo päkëdə̂:
‹Gbölö Gbïɛ̈ Ndjapä tö rə̂ sə̈ Gbölö Gbïɛ̈ ndə̂ mê päkëdə̂:
Amö sə də ndôkö könô mê,
43zoo mê mbo rə̂ pä a-earə̂ kə̂ kösə̂ zə̈
wa batə̂ mbätä ëtchâtchâ da zə̈#20.43 Nyë dɨ̈ Aps 110.1..›
44Davîdi ë tchë pä ‹Gbölö Gbïɛ̈›. Tchïtchïnə̈ atöko kä ndə̂ Krîsiti kä wa ndjë tə̂ akrə pâ mawo ndə̂ Davîdi?»
Nyë mböäbô rə mbô batə̂ a-earə̂ kə̂ nyisə̂ ndïɛ̈
(Mat 23.1-36; Mar 12.38-40)
45Ndə̂ angbängbä azü nə̈ gbɛ̂ sə̂ lakə̂ dje tchë, Jezü tô rə̂ sə̈ adjisîpili ndə̂ yê päkëdə̂: 46«La nyê gbö-ê! Nyë mböäbô rə mbô batə̂ a-earə̂ kə̂ nyisə̂ ndïɛ̈ ndə̂ andjë nyîndə̂ kə̂ wrʉ kütû la agbölö lə̂ba, kə̈ nyîndə̂ nə̈ pä azü po ndə̂ anyê sə̂nə̈ ndə̂ azü pala tchê tə̂ andjê tâ. Andjë nyïndə̂ kə̂ sə lə̂ adokʉ̈ ngendë lə̂ anda kə̂ voga Ndjapä ndə̂ ajuîfu, la agbölö tchô tə̂ ma kɨ̈zɨ̂ ndə̂ kpülü. 47Andjë kʉ̈ arə gbɛ̂ tə̂ aɛ̈chë lə̂ ndavrö, kə̂ to pö sə̈ Ndjapä âgu tə̂ gbölösə̂nə̈ ndə̂kə̂ pa azü wun andjê. Ndjapä âwadje ngbanga lə̂ küma andjê tə̂ kïkï nə̈.»
© Wycliffe Bible Translators, Inc.