Zään 2

Zozii ‑gbä 'nɩ 'nyu ‑jɩjlää divaa'

1Ylɩɩ 'sɔ plöö‑ ylä nä, ‑mɔɔ Galilee‑bhlɩɛɛ' 'duu wa laa lä Kanaa nä 'mnö, wlunö‑glɩsɩɩsɩ ‑kʋ bhä ‑mɔɔ, 'nɩ Zozii ɔ 'nɔ ‑kʋmʋ bhä ‑lɔɔ. 2Wa laamʋ‑ bhä 'sɩɩ ‑mɔɔ Zozii ‑yä ɔɔ' 'kʋgënyʋa. 3‑Maa, 'tänyɩ ‑ŋëë 'nɩ ‑glɩsɩɩsɩɛɛ' divaa yi bhɩä. A ‑bhɩä lä nä, kä Zozii ɔ 'nɔ ‑sonöɔ, ɔ lä waa' yɩɔ divaa ‑kä! 4‑Mä, ɔ cii‑ lä 'sɔɔ nä, kä Zozii ‑sonöɔ, ɔ lä ‑a 'nɔ, wälɩ ‑sä ‑kʋ‑anyɩ bhä pää? 'Naa 'tänyɩɛɛ' ‑lätee ‑ŋëë. 5'Nɩ ɔ 'nɔ yi mʋ 'nɩ ɔ yi nyɩkpaa ‑wa dëë bhlä ‑glɩsɩɩsɩɛɛ' lülülɩɩ nä soo, ɔ lä sä ɔ ka'anyɩ 'ylää‑ nä, a nʋ sɔɔ!

6‑Mä 'nyukwëdü 'kädö ‑ngboplo ‑kʋ bhä ‑lɔɔ. 'Nɩ 'nyukwëdë 'nyukwëdë nä, a ‑kʋ bhä 'ghlünɔɔ' nynä tutu. Sä 'Zufʋnyʋaa' ‑jlämaa ylä bhlä nä, sɔɔ' 'nyukwëdüü' 'mnö 'nyuu, ʋmʋ 'Zufʋnyʋa wɔɔnö bhlä wlɩ nynä wa 'kä Laagɔ dëlü kplɔɔ. 7'Nɩ Zozii yi nyɩkpaa soo, ɔ lä a yie 'nyukwëdünö 'nyuu 'kʋ! 'Nɩ wa yii yie ‑sɩɩ. 8Ɔ lä a 'plü ‑yä a fä ‑jlükäänyɔɔ! 'Nɩ wa yi 'plü 'nɩ wa yi ‑jlükäänyɔɔ fä. 9'Nɩ ɔ yi 'nyuu nëë' yla. ‑Mä ɔ ylʋʋ‑ lä nëë' nä, ʋ yä bhɛ divaa' ‑jɩjlää. ‑Jlükäänyɔɔ bhɔɔ dä ‑lɔɔ' divaa bha bhlä nä ‑yi. ‑Mä nyɩkpaa ‑wa plüü‑ lä 'nyuu nä, wa ‑yi bhä wälɩɩ. 'Nɩ nyɩkpɔɔ ‑ɔnö ŋnʋnö‑jlëa 'mnö wa ‑kʋ bhlä nä, ‑jlükäänyɔɔ yio laa, 'nɩ ɔ yio soo, 10ɔ lä divaa 'nänaa, amä wa lä 'fɩa ‑jlë 'kʋ, 'nɩ dä nyɩkpaa 'fɩɩn yä ylä ‑jɛjɛsä 'mnä nä, laa ‑aa ‑wʋ lä kpänyɩ mɛɛ‑ nä, 'nɩ a bhɩä 'kʋ. ‑Mä ‑mɔɔ nä, kä ‑n ‑klä divaa 'nänaa 'nää ‑kaa, 'nɩ 'tänyɩnɛ yä lä ŋëë!

11'Yiziziogbɩɩ Zozii ‑nʋ lä tɛɛ ‑mɔɔ Galilee' 'duu wa laa lä Kanaa nä, ɩmɩɩ‑ ‑kʋ lä ‑lää. Ɔɔ' 'kʋgënyʋa nii‑ bhɛ lä ɔɔ' 'klʋagbaa 'yi nä, wa ‑kä bhɛ ɔɔ' pɔlötɛtɛ.

12‑Nɩnɩ 'fɩɩn plöö‑ ylä nä, Zozii ‑mʋ Kapɛnayumöduu' ɔ ‑yä ɔ 'nɔ ‑yä ɔ bhelie ɩyä ɔɔ' 'kʋgënyʋa. ‑Mä waa' ‑wʋ ‑mɔɔ ‑gwlɛ.

Zozii tlüü‑ 'kwäsɛpänyʋa Laagɔ‑bhutu 'kädʋʋ 'mnö

(Matie 21.12‑13; Makö 11.15‑17; Lukö 19.45‑46)

13'Zufʋnyʋaa' ‑glɩsɩɩsɩɛ wa laa lä 'Pakö nä, ɛ yä bhɛ 'mɛmɛ. Ɩ ‑kä 'ŋnö nä, kä Zozii ‑mʋ Zolizalɛmʋduu'. 14'Nɩ ɔ yi Laagɔ‑bhutu 'kädʋʋ 'mnö plä. Ɔ lɔ wloo nä, 'kwäsɛpänyʋä ‑kʋ ‑mɔɔ. Wa ŋʋ bhä ‑dodobhlü, ɩyä 'bhabhlö ‑yä 'kpaakpi 'sɔ 'kpä. ‑Nänʋä ‑kʋ ‑mɔɔ 'nɩ wa dögbä bhä monii'. 15Ɔ nii‑ lä ‑nɩnɩ 'fɩɩn 'yi nä, kɔ bhlüü‑ 'bhliyi 'kʋ, 'nɩ ɔ yii ‑gblɩye 'kʋ nʋ. 'Nɩ ɔ yi nyɩkpaa Laagɔ‑bhutuu 'mnö 'tlü. Ɔ tlüü‑ 'sɩɩ 'bhabhlöö ‑yä ‑dodobhlüü. 'Nɩ monii' dögbänyʋaa' moniee ɔ yie sä jɛjɛɛ, 'nɩ ɔ yi waa' 'tëbhlüü bhuë. 16'Nɩ ɔ yi 'kpaakpii' 'kpä‑ŋʋnyʋa soo, ɔ lä a wlʋa ‑lɔɔ ‑lɩyɩ ‑zɔɔ! A 'nä klä ‑lä n 'Bää ‑bhutuu nynä ‑adäbhlä! 17Ɔ ‑nʋ ylä sɔɔ nä, kä ɔɔ' 'kʋgënyʋa ‑luë. Wa ‑luë yɩ nynä ɩ ‑jɩjlɔ Laagɔ‑bɔɔgʋʋ 'mnö nynä ‑mä,

'Oo! Laagɔ‑!

‑Wawʋʋ n ‑kä lä ‑naa ‑bhutuu' ‑za nä,

Ʋ gbä 'nɩ 'naa plɛ si! # 2.17 Ɩ bha Lɔlɔ 69.10.

18'Nɩ 'Zufʋnyʋa 'cifinyʋa yio 'ylä, wlä ‑mä, 'yiziziogbɩɩ' 'cesä ‑n yi‑anyɩ bhä paa? Sä ‑a yi bhä 'sɔɔ yibhë nynä ‑mä, wälɩɩ ‑n nʋ lä nä, ‑n ‑kä ɩɩ' nʋ sää? 19'Nɩ Zozii yiwa soo, ɔ lä a wlä Laagɔ‑bhutu 'kädʋnʋ, ‑mä ‑amʋ, n yi ylɩɩ taa 'kʋ 'bhlü 'nɩ n yiu bʋkʋ 'slä!#2.19 Zɛɛ 'sɩɩ Matie 26.61; 27.40; Makö 14.58; 15.29. 20Wlä ‑ɔ! Laagɔ‑bhutunʋ wa bhlüü‑ 'ylʋbɔɔ' gwlɩ 'sɔ 'nɩ ‑ngboplo 'kʋ 'nɩ wa slää‑ nä, ʋmʋ ‑mɔɔ ‑n ci lä nynä ‑mä, ‑n yi ylɩɩ taa 'kʋ 'bhlü, 'nɩ ‑n yiu bʋkʋ 'slä ‑a? 21‑Maa, Laagɔ‑bhutuu Zozii sä bhlä nä, ɔ yëku ɔ sä bhlä. 22'Tänyɩɩ' ɔ ‑glɔɔ ylä 'kuëë nä, ‑lɔɔ ɔɔ' 'kʋgënyʋa ‑luë lä nynä ‑mä ɔ cii‑ bhä 'zaazɩ sɔɔ. Ɩ ‑kä 'ŋnö nä, Laagɔ‑bɔɔgʋʋ 'mnö wälɩ, ɩyä Zozii' ciciwälɩɩ 'sɔ, wa ‑lɩɩ bhɛ nyaasäsä.

23Dä Zozii ‑kʋ bhlä Zolizalɛmʋduu' Pakö‑glɩsɩɩsɩɛ 'kʋ nä, ɩɩ' 'yiziziogbɩɩ ɔ ‑nʋ lä nä, nyɩkpaa ‑bhutukpä 'nii‑ bhä ɩɩ' dä. Ɩ ‑kä 'ŋnö nä, wa ‑kä bhɛ ɔɔ' pɔlötɛtɛ. 24‑Mä ɔ ‑yi bhlä waa' pleyi wälɩɩ 'fɩɩn nä, ɔ 'nʋwa bhɔɔ dë 'tɛɛ. 25Wälɩɩ 'fɩɩn ‑ɩ ‑kʋ lä nyɩkpɔ pleyi nä, kä Zozii ‑yii bhä, nä, ɔɔ' tään bhɔɔ nynä nyɩkpɔ ‑sonöɔ 'fɩa ɔ ‑liee' yëkuu' wälɩ.

נבחרו כעת:

Zään 2: god

הדגשה

שתף

העתק