Mataayo 5
5
Ameeghi gha Yesu a‑gheghoro
(Mataayo 5:1—7:29)
Ameeghi ighoro e rubhango na anyaako
(Ruuka 6:20–23)
1Mbe, hano Yesu arooche abhaato bhakaaruha, aghatiira a‑gheghoro, aghiikara. Hano amariri ghwikara, abhaanabheegha bhaache bhaaghaye hano are. 2Niho aghasëëma kobheeghi arabhugha,
3“Ngʼoni bhano bhaanyi abhahabhe mo‑chaakörö,
gho kubha obhutëmi bho Mwishaaro m‑bhobhoobho.
4Ngʼoni bhano bhaanyi na amacheeche,
gho kubha Eryobha ndekobhaghambisani.
5Ngʼoni bhano bhaanyi abhahörëëru,
gho kubha mbaghughabha ase.#5:5 Mööhi Sabhuri 37:11.
6Ngʼoni bhano bhaanyi na anchëra na anyööta e ghuköra ghano Eryobha rekwënda,
gho kubha ndekobhiighoti.
7Ngʼoni bhano bhaanyi na changori,
gho kubha Eryobha ryose ndekobharigheri changori.
8Ngʼoni bhano bhaanyi na akörö yeero,
gho kubha mbakorerighi Eryobha.
9Ngʼoni bhano bhaanyi abharwachi,
gho kubha Eryobha ndekobhabherekera abhaana bhaache.
10Ngʼoni bhano bhakunyaakibhu gho ghiri e ghuköra ghano Eryobha rekwënda,
gho kubha obhutëmi bho Mwishaaro m‑bhobhoobho.
11“Ngʼoni inyu abhaato bharabhatoka na kobhanyaaki, na kobhaghamba kobhe kwo manga maaru gho ghiri yaane, 12gho kubha hangʼu nibhu ꞉bhaare bharabhanyaaki abharööti bhano ꞉bhaare‑ho hayo ekimbërë. Muchömëru na ghuchaghana, gho kubha Eryobha ndebhatooriire atuho inkoro Mwishaaro.
Omoonyo ne emirëngaari
(Maariko 9:50; Ruuka 14:34–35)
13“Inyu n‑omoonyo o se. Amare omoonyo aribha usarëkiri, noghotooreru ke ghugharoki obhuchömu bhooche wiiki? Tooghotora kubha no obhuchömu wiiki gho gheghiro ghyokyose, amare mbakowute kurë na ghutachu na abhaato.
14“Inyu n‑emirëngaari ghe se moonyi. Omoghya uno wabhëkuru a‑gheghoro, toghotora kwibhisa. 15Taanyi‑ho omooto uno aghughööti oromore, aramara arohunye mo‑nyongo, amare nakorotoora ighoro e ghesungo kubha robharëngaari bhoose bhano bhaanyi mo‑nyumba. 16Hangʼu hangʼu ne emirëngaari gheenyu ngekwëndëru ghirëngaari kwo bhaato, kubha bhabhönë korighi amaköri ghaanyu amachömu, bhamoghongi Iso waanyu uno anyi Mwishaaro.
Ameeghi gha Yesu ighoro e meghiro ghe Musa
17“Motiituuri kubha niichiri gho ghiri e ghusari emeghiro, hamu ghano ꞉ghaasiikiiru na abharööti. Mööhi, ntiichiri gho ghiri e ghusari, amare niichiri gho ghiri e ghosiikëra obhuhëënë bhooche. 18Mahëënë ˆnekabhabhoorera, mbagha eriibhagha rino erishaaro na ase bhekoheta, ghetaanyi‑ho ekingʼöchö koru eryandëkö rimu isuuhu re meghiro ghe Musa rino rekoruusibhu, mbagha ghano ghoose ghahikeerane. 19Wowoose uno aghusari koru omoghiro umu mosuuhu ghokera ghyose na kobheeghi abhande bhakörë hangʼu, uyo naakubha mosuuhu kimu mo‑bhutëmi bho Mwishaaro. Amare wowoose uno aghoghitambana na kobheeghi abhande kubha nabho bhakörë hangʼu, uyo naakubha omokoro mo‑bhutëmi bho Mwishaaro. 20Mbe, ˆnekabhabhoorera kubha, aribha moraanga ghuköra ghano Eryobha rekwënda ghokera Amabharisaayo na abheeghi bha meghiro, motaaghusöha kimu mo‑bhutëmi bho Mwishaaro.
Ameeghi ighoro e ghukarara
(Ruuka 12:57–59)
21“Mumariri kooghu kubha abhaato bha kare ꞉mbaabhooriiru, ‘Otiita!#5:21a Mööhi Kohoroka 20:13. Wowoose uno aghwita naghoteneru ekiina.’#5:21b Mööhi Kohiita kwo Meghiro 17:8–9. 22Amare eni nekobhabhoorera, wowoose uno akomukararera mughëndi waache naghoteneru ekiina. Wiiki uno akomotoka mughëndi waache kubha mughëëghë, nakwëndëru ahiru mwibharacha. Uno akobherekera mughëndi waache kubha m‑muraghaanu nakurëngʼaanera ghusöha mwiribha re mororo.
23“Mbe, aribha oghaye koreruuseri Eryobha amaruusi mo‑haghiro ha koruuseri amaruusi, na hayo ohiita kubha mutamiine na mughëndi waacho, 24otighe amaruusi ghaacho ahaghiro ha koruuseri amaruusi, oghi singa woghwane nawe, niho ugharuke oruusi amaruusi ghaacho.
25“Moghwane na uno aghoghusëma bhwango mokeere moonyi mo‑nchëra motaamara kohika mwibharacha. Aribha taanyi hangʼu uno aghoghusëma naghokuhaana kwo moteni o kiina, omoteni o kiina woose naghokuhaana kwo moshirikare, nawe naghokubhöha mwighërëcha. 26Mahëënë neghokobhoorera, tookohoroka moose, mbagha hano asiire yaacho yoose ekorehu!
Ameeghi ighoro e bhutaari
27“Mumariri kooghu emeghiro ghino ghekobhugha kubha, ‘Otataara.’#5:27 Mööhi Kohoroka 20:14. 28Amare eni ˆnekabhabhoorera kubha, omooto wowoose uno akomumööhërëri omukari gho komwighomba, namariri ghutaara nawe mo‑körö yaache. 29Mbe, eriiso reecho re kwiro reraköra ukörë amasari, oreruusi na korite kurë. N‑ghuchömu kobhori ekyemo kimu ghokera omobhere waacho woose kurëkëru mwiribha re mororo. 30Wiiki, aribha n‑okubhökö koocho gho kwiro#5:29–30 Kurëngʼaana na chaasughara che Bhayahuuti, eriiso no okubhökö gho kwiro nibhyo bheenyi ambërë ghuköra amasari na korikangata eriiso no okubhökö gho kumosi. Egheteemoro ekende kwo Bhayahuuti, egheghiro ghyokyose kino keenyi okubhökö gho kwiro, nkehaasooku chwee ghokera kino keenyi eribhaara re kumosi. ghoghughëri ukörë amasari, okonunge oghutë kurë. N‑ghuchömu kobhori ekyemo kimu mo‑mobhere waacho, ghokera omobhere waacho woose kurëkëru mwiribha re mororo.
Ameeghi ighoro e ghutaana no omukari
(Mataayo 19:9; Maariko 10:11–12; Ruuka 16:18)
31“Wiiki, mumariri kooghu omoghiro uno okobhugha kubha, ‘Omooto wowoose uno akomotigha omukari waache, amuhë anyaarubha e komwanga.’#5:31 Mööhi Kohiita kwo Meghiro 24:1. 32Amare eni ˆnekabhabhoorera kubha, omooto wowoose uno akomotigha omukari waache aribha taanyi gho ghiri e bhutaari, naghuköra omukari waache kubha mutaari. Wiiki, wowoose uno akomokwira omukari uno ataaniri no omosubhe, woose n‑omutaari.
Ameeghi ighoro e kuraheri
33“Mumariri kooghu omoghiro uno abhaato bha kare bhabhooriiru kubha, ‘Motasari eriiraheri rino murahiiri ambërë e Omutëmi, amare nekwëndëru mukörë ghoose ghano murahiiri.’#5:33 Mööhi Abharaawi 19:12; Kubhara 30:2; Kohiita kwo Meghiro 23:21. 34Amare eni ˆnekabhabhoorera kubha, motasaki kuraheri kwo riina re Mwishaaro, gho kubha nikyo eghetumbe ghe ghitëmi ke Ryobha. 35Koru motaraheri gho se gho kubha niho Eryobha reghotoora amaghoro ghaache. Koru motaraheri kwo moghya o Yerusareemu gho kubha n‑omoghya o Mutëmi omokoro. 36Koru motaraheri kwo mitu gheenyu gho kubha motaaghotora ghugharura koru orochweri rumu kubha rwërö hamu rwirabhuru. 37Aribha angʼana enyi hëënë ibhe hëënë. Hamu aribha tiyaanyi ibhe tiyaanyi, gho kubha ghano ghaghokera ghayo, ngakoru kwo Rishambu, omobhisa wuure.
Ameeghi ighoro e korehani asiire
(Ruuka 6:29–30)
38“Mumariri kooghu omoghiro uno okobhugha kubha, ‘Eriisho kwo eriisho, ne eriino kwo riino.’#5:38 Mööhi Kohoroka 21:24; Abharaawi 24:20; Kohiita kwo Meghiro 19:21. 39Amare eni ˆnekabhabhoorera kubha, otamoreha obhobhe omooto uno aghuköriire obhobhe. Aribha omooto araghutëma orohe mo‑rusa ro kwiro, omugharurere na ro kumosi wiiki. 40Wiiki, aribha omooto aghoghusëma gho ghiri e kwimoki angibho yaacho, omotighere imoki ne erighööti.#5:40 Mööhi Kohoroka 22:26–27; Kohiita kwo Meghiro 24:12–13. 41Wiiki, aribha omooto arakuhaamereri ghughëgha omorigho waache orughëndö ro kiromeeta imu, owohiki chakiromeeta ibhere. 42Omooto wowoose araghusabha egheghiro, omuhë. Wiiki omooto araghusabha asiire omuhë, otamwima.
Ameeghi ighoro e kobhasiigha abhabhisa
(Ruuka 6:27–28, 6:32–36)
43“Mumariri kooghu wiiki omoghiro uno okobhugha kubha, ‘Omosiighe omwatani waacho,#5:43 Mööhi Abharaawi 19:18. amare omurëghë omobhisa waacho.’ 44Amare eni ˆnekabhabhoorera kubha, mobhasiighe abhabhisa bhaanyu. Wiiki, mobhasabhere kwo Ryobha bhoose bhano bhakobhanyaaki. 45Mbe, hayo mookubha abhaana bha Taata waanyu uno anyi Mwishaaro, gho kubha iwe nahaarëngaari eryobha kwo bhaato abhahëënë na abhabhe. Wiiki, nahaatëëki ambura kwo bhaghöröröku haghirohamu na bhano bhaanyi na amasari. 46Aribha morasiigha bhano bhabhasiighiri abheene, mokubhöna bhwëra ke? Koru abhatöbhi bha righööti mbahaasiigha bhano bhabhasiighiri abheene! 47Wiiki, erabha mokobhakëëri bhano bhakobhakëëri abheene, mokubhöna bhwëra ke? Mööhi na bhano bhataakorekumi Eryobha, bhoose mbahaabhakëëri abhaghëndi bhaabho. 48Mbe, mubhe bhaghöröröku kinya bhuure Taata waanyu uno anyi Mwishaaro anyi mughöröröku.
© 2022 Wycliffe Bible Translators, Inc. All rights reserved