Matie 17

Zezwii a ‑gänɩwa ta yɛ 'ɔ 'ghlinɔɔ 'ylɩmö

(Maakö 9.2-13; Lwiikö 9.28-36)

1Zezwii 'nyʋä sa'a 'dɩ 'wëë, 'ylɩ gbʋplʋ 'plɩɛ, 'n ɔ yiɛ 'ɔ ‑gänɩwaa a gla'mö a nɩkpa 'wʋ 'libhï, Piɛlɩ mɔ, Zaakö mɔ 'n ɔ ‑daayu Zaa, 'n ɔ ‑nyʋä yiɛ ‑gäga 'käda ‑bhlʋ 'klʋ mö. Wa 'yize wa glɩ ‑mä. 2Wa 'yila 'klʋ, 'n Zezwii yiɛ zʋzlɔnɩ. 'N 'ɔ klʋʋ yiɛ tenyii 'mö lɩ 'ylʋväla a sɛ. 'N 'ɔ ‑banɩɩ yiɛ tenyii buu plɛ, 'n yɩ yiɛ 'mö lɩmö. 3Wa lɛ zʋ a sɛ'ɛ, ‑lɛ ɔ yɔwʋ, nɩkpa 'sɔ 'nɩgbö ‑lɛ. Wa ‑nyɔɔ ‑wʋ 'dɩ ‑sɛ dɔ'wʋ, Moyizɩ ‑nyɛ Elii 'sɔ, muëë. 4Piɛlɩ 'yuëë 'ylɩmöö, ɔ lɛ naa: «‑Alowli, yɩ nɛnɩ ‑a 'käa'a mä'ä glɩ. ‑N ‑kä 'yɩbhää, n 'kä ‑gligbï ta 'sɩbhä, ‑na ‑na ‑bhlʋ, Moyizɩ a ‑na ‑bhlʋ 'n Elii a ‑na ‑bhlʋ.» 5Ɔ kɩ ngli cuu, 'n ‑kpu yuëë 'wlu yi. ‑Kpu 'la, 'mö wʋ lɩɛ, ‑mä wʋ 'mö 'n wɛlɩ yiɛ ‑mä 'bhöönɩ, yɩ lɛ naa: «‑Mɔ nɩ 'dɛɛ, mɔɔ glɩnɩɛ 'na ‑wawayuu. Mɔɔ ‑glaa dlɩ 'wʋ. A nɩ ‑pʋnɔɔ 'yukwli.» 6Wɛlɩ nʋä sa'aa, Zezwii 'a ‑gänɩwaa ta ‑kpɔ, 'n nganɔ yuëë tenyii 'lɩbhä, 'n wa yiɛ 'klʋ glu 'pä. 7'N Zezwii yuëë yɔwʋ 'dio, 'n ɔ yuëë kɛ 'wʋ köbhä, ɔ lɛ naa: «A ‑sɔ 'wʋ! Nganɔ nɩ tanyɩ 'lɩbhä.» 8‑Maa wa 'libhïä 'wluu, wa'aa'a ‑bɛ 'wʋ yɩlɩ, 'n ɛ 'nɩ ‑bhö Zezwii a 'yize mɔɔ. 9'N wa yiɛ 'wʋ ‑sɔ 'n wa yiɛ mö. Wa ‑wʋ ‑gägaa kwli dɔ'wʋ, 'n Zezwii yuëë 'dɩ 'mö zʋ, ɔ lɛ naa: «'Saa a 'yɩɛ da'a 'ylɩmöö, 'n Nɩkpɛ a 'Yu 'nɩɛ 'ku ɔ 'kä glu 'wlʋ 'wëë, a nɩ ti ‑sɛ.»

10Ɔ gbää sa'a 'wëë, 'n wa yoo 'kïbhë ‑bhlʋ 'wʋ 'yɩbhänɩ, wa lɛ naa: «Moyizɩ 'a Gböö a 'cɩawaa, sɛ'ɛ wa nʋä nɩɩ: Elii mɔɔ 'kää yi 'wë, 'saa kä ɔ 'nglɩ?#17.10 Malasii 3.23.» 11Zezwii lɛ naa: «Nn! ‑Tiamö wa gbää Elii a dɛ nɩɩ, mɔɔ 'kää yi tɛɛ, ɔ 'kä ‑lii 'wuë 'wlu gïganɩ. 12Miɛ, ‑maa n nyanyɩ 'dɩ nɩɩ, Elii yɛ a yi 'wë, ‑maa wa 'nɔɔ yɩbhlɩnɩ, 'saa wa yɩbhää, 'mö wa noo 'wlu. Sɛ ‑bhʋlʋ ‑kpɔ 'la, Nɩkpɛ a 'Yu, ‑sɩbhä wa 'kɔɔ 'klɩ 'yɩa.» 13Zezwii gbää sa'aa, 'n wa yia'aa sɛ yɩbhlɩmanɩ nɩɩ, ɔ ‑kä Elii nʋʋ, Zaa Batisɩ 'mö ɔ gaaa.

Zezwii yɛ ‑sukusukulɩbhäyu yɛmanɩ

(Maakö 9.14-29; Lwiikö 9.37-43)

14Zezwii ‑nyɛ 'ɔ ‑gänɩwaa 'sɔ, wa ghlɛɛ ‑lɛ nɩkpa a ‑bʋbʋ yɔwʋʋ, 'n nɩkpɛ ‑bhlʋ yiɛ Zezwii yinɩ, 'n ɔ yiɛ ‑lɛ ɔ dlɩ 'mö ‑kokomïladigbï glu 'pä. Ɔ lɛ naa: 15«‑Atʋ, 'pä na yuu a ngäzɩdlɩ. ‑Sukusukuu lɩbhɔɔ, yɔlɔ ɔ ylɔɔ tenyii. Zlɩ ‑mɛmɛɛ 'mö, ɔ bhlinɩ ‑kosu 'mö. Zlɩ ‑mɛmɛɛ 'mö, ɔ bhlinɩ 'nyu 'mö. 16Nza n ‑nyɔɔ yiɛ, 'n n yoo ‑na'a ‑gänɩwaa yowʋ 'nyɛ, wa 'kɔ yɛmanɩ. ‑Maa wa'aa bhɛmanɩ.» 17Nɩkpɛɛ 'nyɔɔ sa'a 'dɩɩ, Zezwii lɛ naa: «‑Ɔɔɔ! Nɩkpazokunyɩ, 'a Lagɔ a dlɩtɛɛnɩtɛnɛɛ 'nɩɛ ‑zu 'lɩlɩlɩ. 'Ylɩ ‑zɩmö n 'kanyɩ bhä ‑bhlɛ ‑sɩkaa jijo'wʋ ‑sɛ 'nɩ? 'Ylɩ ‑zɩmö n 'kanyɩ bhä ‑bhlɛ ‑sɩkaa kɛ yɔlɔnɩ 'nɩ? Bhee n kɩ 'nʋ, ‑maa a ‑laa yuu.» 18Wa ‑nyɛ yuu yiɛ, zuzukwëzokwëa ‑anyɩ za ‑sukusuku lɩbhɔɔ, 'n Zezwii yeaa yɔwʋkanɩsɛ 'dɩ 'nyɛ nɩɩ: «'Bhöö yu nɩ ‑gömö.» Ɔ nʋä ‑sɩbhä cuu, 'n a yoo ‑gömö 'bhöö 'n ɔ yiɛ yɛmanɩ. 19Zezwii ‑nyɛ 'ɔ ‑gänɩwaa 'sɔ, wa 'yize wa glɩa'a ‑lɛ, 'n wa yoo nimï 'yɩbhä, wa lɛ naa: «Zuzukwëzokwë 'la, sɛ yɩ ‑wʋ ɔ 'mö a‑a yea sɩɛnɩ 'nɩ?» 20Zezwii lɛ naa: «Ɛ'ɛ ‑bhö nyɩasɛ, ‑maa 'a Lagɔ a dlɩtɛɛnɩtɛnɛɛ 'nɩɛ ‑zu. ‑Tiamö n nyanyɩɛ dɛ'ɛ dɩ nɩɩ, suyeyii wa laa mutaadɩ, ɛ 'tikëtikëyi. ‑Maa 'a sɛ a 'tɛɛnɩɛ Lagɔ dlɩɩ, ‑sɩbhä ‑kä a sa'a 'tikëyi 'wʋ ‑wʋ, ‑gäga nɩ ‑a ‑wʋä dɛ'ɛɛ, a yea 'dɩ 'nyɛ nɩɩ, ‑Gäga nɩmä, 'bhöö dɛ'ɛ ‑n 'kä da'a mö. Sɛ a gbää da'a a nɩ 'zʋʋ, a yi a ‑sɩbhä 'zʋ. Sɛ'ɛ n gbää nɩɩ, a ‑kä a Lagɔ dlɩ 'tɛɛnɩ, ‑lu ‑bhlʋ a'bhë 'naa 'kanyɩ a kɛ'mö 'tɛɛnɩ. [21‑Maa 'lɩlɩlɩ a dɔ'wʋ, sa'a a zuzukuzoku, ‑n ‑kä ‑n 'kɩ nɩkpa ‑gömö kpëti nʋʋ, plɛ su ‑n 'kä Lagɔ bhibhe 'wë. ‑Maa 'n 'ɛ 'nɩ ‑bhö ‑sɩbhä, nyɩasɛliɛ.]»

Zezwii yɛ'ɛ 'ɔ kwiea ‑nyɛ 'ɔ gluwlʋwlɛɛ 'sɔ a dɛ bhïla

(Maakö 9.30-32; Lwiikö 9.43-45)

22'Ylɩ ‑bhlʋ 'mö, Zezwii ‑nyɛ 'ɔ ‑gänɩwaa 'wuë 'sɔ, wa ‑wʋ ‑mä Galilee‑bhölɩɩ 'mö, 'n ɔ yuëë 'dɩ 'nyɛ, ɔ lɛ naa: «Nɩkpɛ a 'Yu, wa yoa'a ‑pa nɩkpa kä'mö plɩnɩ. 23Wa yo 'lɩbhä ɔ yi 'ku. ‑Maa ɔ ‑kä 'ku 'wëë a ylɩ a tanɛɛ 'mö, ɔ yi glu 'wlʋ.» Ɔ 'nyʋää sa'a 'dɩɩ, 'n yɩ yuëë tenyii swɩ yɔwʋ 'kuanɩ.

Zezwii yɛ Lagɔbudu 'Kɔdʋʋ a lapoo 'pɛnɩ

24Zezwii ‑nyɛ 'ɔ ‑gänɩwaa 'sɔ, 'n wa yiɛ ‑mä Kapɛnaɔmö ghlɛ. ‑Mä a nɩkpaa ‑wa bhliɛ lapoo Zwiiföwaa 'pɛnɩɛ Lagɔligbëa a 'wlumö 'wʋʋ, 'n wa yiɛ ‑mä Piɛlɩ ghlɩ 'n wa yoo nimï 'yɩbhä wa lɛ naa: «Lapoo nɩkpa 'wuë 'pɛnɩɛ Lagɔbudu 'Kɔdʋʋ a 'wlumöö, a 'bhidɩba 'pɛnɩmu bhä?» 25Piɛlɩ lɛ naa: «Nn! Ɔ 'pɛnɩmu.» Wa 'yɩbhɔɔ nimï 'wëë, 'n Piɛlɩ yiɛ 'ligbë 'mö mö. Ɔ plɛ'ɛ ‑mä 'ligbë cuu, Zezwii mɔɔ ‑dɩɛ tɛɛ gbʋ, ɔ lɛ naa: «Piɛlɩ, n ‑kamöä ‑ka nimï 'yɩbhä. Mä'ä 'pɩwʋ a dɔ'wʋ, 'bhlɩlowluwaa, ‑ɔ 'pɛnuë bhä lapoo kä'mö? ‑Glɔlowluwaa muë bhä, ‑maa lɛgäwaa muë bhä?» 26Ɔ lɛ naa: «Lɛgäwaa muëë.» Zezwii lɛ naa: «Nn ‑sɩbhä ma‑a ‑tiamö, ‑Glɔlowluwaa a'bhï, mʋa 'nɩɛ 'pɛnɩmö. 27‑Maa nɩkpa 'la, ‑a tuëa 'klɛ 'mö päla zaa, nza n nyɩamöä dɛ'ɛ 'dɩ nɩɩ: 'Libhï ‑gwɛ 'wʋ, ‑n 'kä ‑mä 'nyu yɔwʋ mö. ‑N ‑kä möö, ‑n ‑kä ‑mä ‑gwɛɛ 'nyu 'mö 'pä a tɛkäzibhiyii ‑n 'kää 'lɩbhää, 'libhe 'wʋ, ‑n 'kä ‑mä ɛ ngli yɩlɩ. ‑Maa ‑n yi ‑mä moni ghlɩ. Moni 'la, ɛ yi 'na lapoo 'pɛnɩ, ɛ yi ‑na ‑nʋʋ 'pɛnɩ. Mö ‑n nɩ 'libhï 'wʋ ‑n 'kʋänyɩ ‑mä kwä.»

נבחרו כעת:

Matie 17: bet

הדגשה

שתף

העתק

רוצים לשמור את ההדגשות שלכם בכל המכשירים שלכם? הירשמו או היכנסו

מידע נוסף אודות BdG2

Matie 17

פסוקים פופולריים מ-
Matie 17

להקשיב ל Matie 17

כתבי הקודש:

Bété, Guiberoua

גרסה: BdG2 - bet

Matie 17

Matie 17

פסוקים פופולריים מ- Matie 17

להקשיב ל Matie 17

כתבי הקודש:

Bété, Guiberoua

גרסה: BdG2 - bet

Matie 17

פסוקים פופולריים מ-
Matie 17