Matie 20

Libhonʋwaa wa 'libhïä 'gbëbhlenɩ dɔ'wʋ 'wʋ a ninea

1 'Pɩwʋ mää Lagɔ 'kämanɩɛ a wɛlɩɩ, sɛɛ 'lagblɛlowli sɔ'ɛ 'zɔkpɔ 'pii 'mö 'wʋ, ɔ 'kä 'ylɩ ‑bhlʋ a libhonʋwa 'wʋ 'libhï, wa 'kä ɔ 'viinyɩlagblɛ 'mö libho nʋʋ, ‑sɩbhä yɩ ‑wʋä. 2Ɔ 'libhuëë 'wʋʋ, ɔ ‑nyʋä 'sɔ libhonʋylɩ ‑bhlʋ a moni wa ‑dɩɛ, 'mö wa ngluä 'wʋ 'n ɔ yuëë ‑mä 'lagblɛ 'mö kwä. 3'Zɔkpɔgïle ngbï‑mʋäna 'mö 'n ɔ yi'ɛɛ 'wʋ ‑sɔ. Ɔ lɛ 'bhöö'ɛ, nɩkpa ‑mumuë glɩ ‑lɛ 'du 'mö 'fʋ. 4Ɔ lɛ naa: «A nɩ 'mö ‑mä 'na 'lagblɛ 'mö, a 'kä ‑mä libho nʋmö. ‑Maa n yeanyɩ libhonʋylɩ ‑bhlʋ a moni 'pɛnɩ. 5'N wa yiɛ 'wʋ nglu, 'n wa yiɛ ‑mä mö. Ylʋʋ ghlɛɛ 'du 'möö, ‑kidogïle ta 'mö a sɛ, 'n ɔ yi'ɛɛ ‑mä ‑mumuë kwä. 6‑Kidogïle ngbï 'mö a sɛ, 'n ɔ yiɛ 'gbëbhlenɩdɔ'wʋ 'wʋ ‑sɔ. Ɔ lɛ 'bhöö'ɛ, nɩkpa ‑mumuë glɩ'ɛ ‑lɛ 'du 'mö. Ɔ lɛ naa: Sɛ yɩ ‑wʋ ɔ 'mö 'n a glɩ bhä dɛ'ɛ 'fʋ ‑këë, 'n swe yɛ ylu 'wë nɩ?» 7Wa lɛ naa: «Ɛ'ɛ ‑bhö fʋ, ‑maa ‑bɛ ‑nɩnyɩɛ libho 'nyɛ.» Ɔ lɛ naa: «‑Aa! Zaa, a nɩ mö ‑mä 'na viinyɩlagblɛɛ 'mö, a 'kä ‑mä libho nʋmö.» 'N wa yiɛ ‑mä mö. 8‑Kidosɛ ghlɛɛ, 'lagblɛlowlii 'n ɔ yiɛ 'ɔ libhoo a 'yliwʋnyɔ 'dɩ 'nyɛ, ɔ lɛ naa: Mö ‑mä 'lagblɛ 'mö libhonʋwaa kie, ‑n ‑kä yi ‑n 'kʋä bhʋlʋbhlʋ 'pɛnɩ. ‑Maa ‑n 'kʋä 'pɛnɩɛ yii, nɩkpa n 'libhïä 'gbëbhlenɩdɔ'wʋ 'wʋʋ, mö ‑n nɩ tɛɛnɩ 'wʋ ‑këë, ‑wa tɛɛnɩ a‑a 'zɔkpɔ 'pii 'mö ‑mä, ‑n 'kʋä 'gbë 'bhlenɩ. 9Wa yiɛ, ‑wa tɛɛ a‑a libho ‑kidogïle ngbï 'möö, mʋa plɛɛ tɛɛ, 'n ɔ yuëë bhʋlʋbhlʋ libhonʋylɩ ‑bhlʋ a moni 'pɛnɩ. 10Wa 'pɛnuëë sa'aa, ‑wa tɛɛ a‑a 'zɔkpɔ 'pii 'mö libhoo, wa plɛɛ, wa ‑tɔnɩ wabhlɩ nɩɩ, wa ‑nɛɛ wa 'kʋää 'pɛnɩɩ, ɛ yi ‑zu ɛ yi ‑muë'la a ‑nɛɛ 'wʋ zi. ‑Maa libhonʋylɩ ‑bhlʋ a moni 'la 'mö wa 'pɛnɩmuëë bhʋlʋbhlʋ. 11Wa 'nyʋää moni 'la yɔwʋʋ, 'n wa yiɛ 'lagblɛlowlii zɛmö 'ngungwanɩ. 12Wa lɛ naa: Nɩkpa nɩ, 'gbë wa 'bhlenɩɛ, 'gïle ‑bhlʋ wa nʋnɩɛ libho 'mö cuu. ‑Maa ‑abhʋa ‑abhlɩ, zlɩbhëa 'wuë mö ‑a nʋnɩɛ libho 'mö, 'n ylʋʋ ‑yinyɩɛ bhɔtɔ ‑këë a‑a yiɛ yɔlɔ. Sɛ yɩ ‑wʋ ɔ 'mö, n ‑a ‑nyʋä mlɩnɩ bhä 'pɛna 'mö 'nɩ? 13Wa gbää sa'aa, 'lagblɛlowlii, 'n ɔ yiɛ wa gla'mö a ‑bhlʋ 'yi gö, ɔ lɛ naa: 'Tua, n ‑nɩmöä yɩ ‑bi 'wʋ li. ‑N lɛ 'kä a‑a libhoo tɛɛ yii, libhonʋylɩ ‑bhlʋ a moni mö ‑a 'nɩɛ a bhä'ɛ 'mö ‑wanɩ? 14'Saa ‑a ‑dɩ a‑a, mö ‑n ‑suä da'a zaa, 'libhu 'wʋ ‑n 'kä mö. ‑Maa ‑muë n 'libhïä 'gbëbhlenɩdɔ'wʋ 'wʋʋ, sɛ n 'pɛnɩmöä 'n n ‑kʋä ‑sɩbhä 'pɛnɩɩ, 'na sɛ n yɩbhää ‑sɩbhä ma‑a, nza n 'pɛnuëë ‑sɩbhä. 15‑Amöö ‑kälɩɛ nanyɩ a monii, n'n bhä bhɛnɩ sɛ n yɩbhää, n 'kɛ ‑sɩbhä zʋ ‑a? ‑Maa sɛ n nɛnɩɛ dlɩ zɛmöö, ‑sɩbhä 'yli a kälɩmö bhä ‑a? 16'Saa ‑sɩbhä ‑wa ‑gä a‑a 'yuku 'kää 'gbë 'bhlenɩ, 'n wa 'bhlenɩ a‑a 'gbë 'kää 'yuku ‑gä.»

Zezwii yɛ 'wʋ tanadɔ'wʋ 'ɔ 'kwiea ‑nyɛ 'ɔ gluwlʋwlɛɛ 'sɔ a dɛ bhïla

(Maakö 10.32-34; Lwiikö 18.31-34)

17'Tɛnyɩ ‑mɛmɛɛ ‑bhlʋ ghlɛɛ, Zezwii ‑nyɛ 'ɔ ‑gänɩwaa kʋgbä'sɔ ‑kpɔ sɔ 'n wa yiɛ Zeluzalɛɛmö a 'yioo plɛnɩ. ‑Mä 'yio 'wʋ, 'n ɔ ‑nyʋä yiɛ cɩɔnɩ, 'n ɔ yuëë 'dɩ 'nyɛ, ɔ lɛ naa: 18«A yɩɛ, ‑mä Zeluzalɛɛmö ‑mä ‑a ‑wʋä dɛ'ɛ mö dɔ'wʋ. ‑Maa ‑a ‑kä ‑mä ‑wʋʋ, Nɩkpɛ a 'Yu, wa yo 'wʋ 'libhï, Zwiiföwaa a Lagɔbʋbɔwaa a 'kifiea, wa ‑nyɛ Moyizɩ 'a Gböö a 'cɩawaa 'sɔ, wa yuënyɩ kä'mö plɩnɩ. Gbʋ a ‑muu 'kää 'nglɩ ‑kä ɔ 'kä 'kuu, mʋa 'kɔnyɩɛ ghïla. 19Mʋa 'kɔ'ɛɛ lɛgäwaa ‑waaa Lagɔ ‑yi kä'mö plɩnɩ. Nɩkpa 'la mʋa 'kɔɔ nɛpɔ, wa 'kɔ ‑kplɩya 'mö 'sɛlɩnɩ, wa 'kɔ su 'klʋ kʋnɩ, ɔ 'kä 'ku. ‑Maa ɔ ‑kä 'ku 'wë a ylɩɩ a tanɛɛ 'mö, ɔ yi glu 'wlʋ.»

Zebedee ‑yowluwaa a ‑da yɛ Zezwii ‑lu 'yɩbhänɩ

(Maakö 10.35-45; Lwiikö 22.24-27)

20Zezwii 'nyʋä sa'a 'dɩ 'wëë, Zebedee ‑yowluwa a ‑da 'n ɔ yiɛ Zezwii ‑mä ghlɩ, 'ɔ yuëa 'sɔ ‑kpɔ kökä. Wa ghlɛɛ ‑lɛ, 'n nglɔɔ yiɛ ‑lɛ Zezwii a dlɩ 'mö ‑kokomïladigbï glu 'pä, ɔ 'kɔ ‑lu zɛla. 21Zezwii lɛ naa: «'Saa ‑n 'yɩbhä bhä?» Nglɔɔ lɛ naa: «‑Zlɩ ‑n ‑kä 'bhlɩlowli 'zʋʋ, nglu 'wʋ, 'na yuëa 'sɔ ‑kpɔ wa 'nɩgböä dɛ'ɛɛ, ‑mɔ 'kä ‑mä ‑na luukɛ 'wʋ ‑wʋ, ‑mɔ'la 'kä ‑mä ‑na kɔpɛ 'wʋ.» 22Zezwii lɛ naa: «‑N ‑nyɛ ‑na'a yuëa 'sɔ, 'saa a yɩbhää da'aa, a'aa sɛ wʋ sɛ zɛmö ‑yi. Zaakö, Zaa, 'klɩyɩyɛ a ‑dɔkɔɔ n 'kää 'nɩmää, a bhɛnɩ bhä a 'kʋ 'nɩmä ‑a?» Wa lɛ naa: «Nn, ‑a bhɛnɩ.» 23Ɔ lɛ naa: «‑Aa! ‑Tiamö abhlɩ, a yu 'nɩmä. ‑Maa ‑ɔ 'kää ‑mä na luukɛ 'wʋ glɩ 'n ‑ɔ 'kää ‑mä na kɔpɛ 'wʋ glɩ a dɔ'wʋ, ‑amöö 'nɩɛ ‑lɛ a wɛlɩ ‑kä, ‑maa na dɩba Lagɔ mɔɔ kɩɛ. ‑Wanyɩɩ za na dɩba Lagɔ gïganɩɛ 'bhli 'la 'wluu, mʋa 'kɩɛ 'mö glɩ.»

(Maakö 10.42-45; Lwiikö 22.24-27)

24‑Maa 'ɔ ‑gänɩwa ‑muë'la kʋgbä ‑kpɔ, wa 'nwiɛ, 'n wa yiɛ ‑daayuë 'la 'sɔ ‑kpɔ 'klɛ yɔwʋ 'pänɩ. 25'N Zezwii yuëë wa 'wuë wäzɩ 'n ɔ yuëë 'dɩ 'mö zʋ, ɔ lɛ naa: «A ‑yi sɛ nɩɩ, 'kämanɩwa 'kädɩɩ, gasɛ wa 'kämanɩɛ nɩkpaa ‑gömö, nɩkpaa 'mö wa 'wälanɩɛ 'wa 'kämanɔɔ ‑gömö 'yli. 26‑Maa abhʋa na ‑nʋa abhlɩ, yɩ nɩ tɩ ‑sɩbhä ‑mä a gla'mö ‑wʋ. A gla'mö a nɩkpɛ a ‑mɔɔ ‑kä nɩɩ ɔ 'kä 'kɔdɔ glɩnɩ nʋʋ, ɔ nɩ ‑bhɩɔ 'mö ɔ 'kä a 'wuë a 'yliwʋnyɔ glɩnɩ. 27‑Ɔ ‑kä 'yɩbhä ɔ 'kanyɩ 'yuku ‑gänɩɩ, ɔ nɩ ‑bhɩɔ 'mö ɔ 'kanyɩ gïyi a sɛ 'yli ‑wʋ. 28Nɩkpɛ a 'Yu, ‑sɩbhä ɔ ‑wʋmöä. Nɩkpa 'kɔ 'yli ‑wʋ a za ɔ'ɔɔ mä'ä dʋdʋ 'wʋ yi. ‑Maa ɔ 'kʋä 'yli ‑wʋ, ɔ 'kä wa 'wlumö 'ku, nzɩɩ ɔ 'kä bäbätɛ galɛ 'mö ‑sɛ, nza ɔ yiɛ.»

Zezwii yɛ 'Kukwlekäwa 'sɔ yɛmanɩ

(Maakö 10.46-52; Lwiikö 18.35-43)

29‑Mä Zeluzalɛɛmöyio 'wʋ a ‑glɔɔ wa laa Zelikoo, Zezwii 'pluä yɛ'möö, 'n nɩkpa 'kɔkɔmlɛ yoo 'biwʋ bhlinɩ. 30Wa ‑wʋ mö dɔ'wʋ, 'kukwlekäwa 'sɔ, wa glɩ ‑lɛ 'yio yɔwʋ, 'n wa yiɛ 'nʋ nɩɩ, Zezwii mɔɔ plɩɛ. N wa yiɛ 'mö 'kpa, wa lɛ: «‑Alowli, Daviidɩ a 'yu a 'yu aa, yɩlɩ ‑aa ngäzɩklʋ 'mö aa!» 31'N nɩkpa yuëë 'wʋ nylanɩ, wa lɛ naa: «‑Ɔɔ! A 'zʋ yɩ vlɩɩ.» ‑Maa ‑sɩbhä wa kpaa tenyii 'mö 'yize, 'n wa nʋä: «‑Alowli, Daviidɩ a 'yu a 'yu aa, yɩlɩ yɩ ‑aa ngäzɩklʋ 'mö aa!» 32'N Zezwii yiɛ 'nɩgbö, 'n ɔ yuëë wäzɩ. Ɔ lɛ naa: «'Saa a yɩbhä bhä n nɩ nʋ a dɛ?» 33Wa lɛ naa: «‑Alowli, ‑a bhiamö, gbä ‑a'a yilaa 'kä do.» 34'N wa ngäzɩ yiɛ Zezwii 'lɩbhä, 'n ɔ yiɛ 'wa yilaa kɛ zɩ. Cuu, 'n yɩ yiɛ do. 'N wa yiɛ Zezwii 'bɩwʋ bhlinɩ.

נבחרו כעת:

Matie 20: bet

הדגשה

שתף

העתק