Matie 21

Zezwii yɛ ‑mä Zeluzalɛɛmö plɛ

(Maakö 11.1-11; Lwiikö 19.28-40; Zaa 12.12-19)

1Zezwii ‑nyɛ 'ɔ ‑gänɩwaa 'sɔ, wa lɛ 'kää Zeluzalɛɛmö ghlɛɛ yii, ‑mä 'yio 'wʋ, ‑gäga ‑bhlʋ wa laa Olivieswii a ‑gägaa, a zɛmö a ‑glɔɔ wa laa Bɛtɩfazee, wa 'kuä ghlɩɛ yii, 'n ɔ yiɛ 'ɔ ‑gänɩwaa a gla'mö a nɩkpa 'sɔ tie, ɔ lɛ naa: 2«‑Glɔɔ ‑wʋ ‑wʋä mä'a a 'yukuu, a nɩ mö ‑mä. A ‑kä glɔ plɛ cuu, a yi ‑sʋkʋfanɩnglɔ ‑bhlʋ 'ylɩmö, ɛ yuu ‑wʋmö ‑lɛ. Yɩ ‑glɛ. A nɩ ‑dii 'kpɔ a ‑ka'mi ‑lɛ. 3'N nɩkpɛ ‑kaanyɩ yɩ za nimï 'yɩbhää, a nɩ 'nyɔ 'dɩ nɩɩ: ‑Alowli mɔɔ yɩbhɩɛ. A ‑kä sa'a nʋ cuu, wa yeanyɩ 'yi 'tatinɩ, a ‑nyɩɩ yi yi.» 4Nyɩasɛ Zezwii 'nuëë ‑sɩbhä 'dɩ 'nyɛ, ‑maa sɛɛ Lagɔ 'a 'möbhïlanɩnyɔɔ gbä a‑a, ‑sɩbhä 'kä 'yli 'wlʋnɩ a za, nza ɔ 'nyʋää ‑sɩbhä 'dɩ. Sɛɛ ɔ gbä a‑a nɩɩ:

5 A nɩ 'nyɛ Siɔɔ #21.5 Siɔɔ: Wa ‑kä Siɔɔ nʋʋ, Zeluzalɛɛmö a ‑glɔɔ 'mö wa gaaa. a ‑nʋa 'dɩ nɩɩ:

'A 'bhlɩlowli ‑wʋ yi dɔ'wʋ.

Ɔ'ɔɔ yɔwʋ kälɩ.

‑Sʋkʋfanɩyu ɔ glɩɛ ‑gömö,

‑sʋkʋfanɩnglɔ a 'yu. #21.5 Zakalii 9.9.

6Zezwii 'a ‑gänɩwa 'la 'sɔ ‑kpɔ, 'n wa yiɛ mö. Sɛɛ Zezwii 'nyʋä a‑a 'dɩ 'wuë, 'n wa yiɛ ‑sɩbhä 'zʋ. 7‑Sʋkʋfanɩ a yuu ‑nyɛ ɔ ‑da 'sɔ, 'n wa ‑nyɩɩ yiɛ yi. ‑Lɛ yɩ ‑gömö 'n wa yiɛ ‑lɛ 'wa ‑banɩɩ 'zʋ, 'n wa yiɛ Zezwii ‑lɛ ‑sʋkʋfanɩyuu ‑gömö sɛ 'gïla. 8Nɩkpa ‑mumuë a 'kɔkɔmlɛ, 'n wa yiɛ 'wa 'wʋpälokuu ‑lɛ 'yio 'wʋ lʋlʋ, 'n ‑mumuë yiɛ ‑titigblagblɩ ‑dɩ, 'n wa yiɛ ‑lɛ 'yio 'wʋ 'zʋ. 9Nɩpka a ‑bʋbʋʋ, ‑muë ‑gänɩ Zezwii 'yuku, ‑muë ‑gänɔ nimï, wa 'wuë, 'n wa kpaa 'mö 'n wa nʋä:

«Ozana! ‑Aa dɩba 'kɔdɔ Daviidɩ a 'yu a yu nɩ,

ɔ 'nglɩ nɩ 'ghlimanɩ aa!

‑Ɔ yiɛ dɛ'ɛ ‑Alowli Lagɔ a 'nglɩ 'möö,

Lagɔ nɩ 'pɔ 'nyu aa!

Ozana! Lagɔtapɛ 'a 'nglɩ nɩ 'ghlimanɩ aa!»

10Sa'a ‑këë, 'n Zezwii yiɛ ‑mä Zeluzalɛɛmö glɔ plɛ. 'N ‑glɔɔ yiɛ glu 'bhöö. Wa lɛ: «'Ɔɔ! Nɩkpɛ a ‑mɔ bhä sa'a?» 11Wa lɛ naa: «‑Mä Galilee‑bhölɩɩ 'mö a Nazalɛɛtɩ a Zezwii ‑ɔ glɩnɩɛ Lagɔ a 'möbhïlanɩnyɔɔ, mɔɔ.»

Zezwii yɛ Lagɔbudu 'Kɔdʋʋ 'mö a 'pɛlʋpäwaa kpëti

(Maakö 11.15-17; Lwiikö 19.45-46; Zaa 2.13-22)

12Zezwii plɛɛ glɔ 'wëë, 'n ɔ yiɛ ‑mä Lagɔbudu 'Kɔdʋʋ a 'ligbëa 'mö plɛ. Ɔ lɛ 'bhöö'ɛ, nɩkpa su ‑mä. ‑Muë pä 'pɛlʋ, ‑muë pɩa, ‑muë zigbanɩ moni 'mö. Wa 'wuë 'n ɔ yuëë ‑mä kpëti. ‑Wa zigbanɩɛ moni 'mö a 'tebhli mi, ‑wa pää ‑kpakwiea 'pɛlʋ a ‑klikpï mi, yɩ 'wuë 'n ɔ yiɛ 'gbliza. 13Wa 'wuë, 'n ɔ yuë 'dɩ 'nyɛ nɩɩ: «‑Mä Lagɔbɔgʋʋ 'mö, sɛ'ɛ yɩ 'cɛlɩɛ ‑mä nɩɩ, Lagɔ lɛ naa: 'Na ‑buduu, wa ‑kaa ‑mä bhibhenɩ a ‑luä.#21.13 Ezayii 56.7; Zelemii 7.11. ‑Maa abhʋa abhlɩ, 'mö a 'zʋaa 'wiwa a ‑budu 'wʋ.»

14Ɔ ‑wʋ ‑bhlɛ ‑mä, 'kukwlekäwa ‑nyɛ bhʋgbëyikäwa 'sɔ, 'n wa yoo yɔwʋ 'dio 'n ɔ yuëë yɛmanɩ. 15'Yuë ‑wʋmö a ‑mä. Mʋa 'kpaa 'mö, 'n wa nʋä: «Ozana!#21.15 Ozana! Mɩɩ sɛɛ zɛmö nɩɩ, ɔ 'nglɩ nɩ 'ghlimanɩ aa! Daviidɩ a 'yu a 'yu Zezwii, ɔ 'nglɩ nɩ 'ghlimanɩ aa!» Lagɔbʋbɔwaa a 'kifiea, wa ‑nyɛ Moyizɩ 'a Gböö a 'cɩawaa 'sɔ, wa gla'mö a ‑mumuë ‑wʋmö a‑a ‑mä. Zaa, sɛɛ Zezwii bhɛɛ zɩzɛ ‑li 'la, 'n sɛɛ yuëa nʋ'ɛɛ, wa 'yɩɛ ‑sɩbhä 'ylɩmöö, wa'a ‑wa 'lɩlɩlɩ. 16'N wa yiɛ Zezwii 'dɩ nyɛɛ mö, wa lɛ naa: «Yuëa ‑wa kpaa da'a 'möö, ‑n ‑ngö bhä wa wɛlɩɩ?» Ɔ lɛ naa: «Nn! N ‑ngö'ɛ aa. A'bhï, wɛlɩ ‑yɩ cɛlɩɛ ‑mä Lagɔbɔgʋʋ 'möö, a 'ni bhä ‑bhlɛ 'nʋ ‑a? Sɛ'ɛ yɩ nʋä nɩɩ:

‑Atʋ Lagɔ, 'yuë 'tikïyiea, ‑n kʋä wɛlɩ 'mö ‑sɛ, wa yɛ ‑na 'nglɩ 'ghlimanɩ. # 21.16 Soomö 8.3. »

17Zezwii 'nyʋä sa'a 'dɩ 'wëë, 'n ɔ yuëë ‑gömö panɩ, 'n ɔ yiɛ mö. Ɔ möä, 'n ɔ yiɛ ‑mä glɔ 'mö 'wlʋ, Zeluzalɛɛmö a ‑kʋkʋyɔwʋ a glɔ ‑bhlʋ wa laa Betanii, 'n ɔ yiɛ ‑mä gʋʋä mö.

Zezwii yɛ su bhätlɩnɩ

(Maakö 11.12-14,20-24)

18Zlɩ zɩɛ, Zezwii 'bhöönɩ ‑mä Betanii, ɔ ‑wʋ ‑mä Zeluzalɛɛmö 'bɩwʋ mö dɔ'wʋ, 'n ngɔmʋ yoo 'lɩbhä. 19'N ɔ yiɛ ‑lɛ 'yio yɔwʋ fiigösu ‑bhlʋ 'ylɩmö, 'n ɔ yuä yɔwʋ 'dio. Wʋ'ʋä 'bhë 'yli ‑kä, wʋ 'wlu kpɩ a 'yizee. 'N ɔ yiɛ nɩɩ: «‑Nmö su nɩ, ‑naa 'käa'a 'kwädlɩ 'bhë tlʋ.» ‑Gba ‑bhʋlʋ ‑kpɔ 'mö, 'n suu yiɛ 'ku 'lɩlɩlɩ. 20'Ɔ ‑gänɩwaa 'yɩɛ ‑sɩbhä 'ylɩmöö, 'n ngli yuëë yɛ. Wa lɛ: «'Ɔ! ‑Atʋ, sɛ yɩ 'zʋmözʋmö bhä 'mö, 'n su yi bhä sɛ'ɛ ‑gba ‑bhʋlʋ ‑kpɔ 'mö 'ku nɩ?» 21Ɔ lɛ naa: «‑Tiamö n nyanyɩɛ dɛ'ɛ 'dɩ nɩɩ, a ‑kä Lagɔ dlɩ 'tɛɛnɩ, 'n gʋgɔgʋgʋ 'nanyɩ dlɩ zɛmö ‑wʋʋ, 'saa n nʋä su nɩ 'wluu, a yu nʋ, ‑gäga nɩ a'bhë a yɩlɩɛ dɛ'ɛ 'wʋʋ, a ‑kaa 'dɩ 'nyɛ nɩɩ, 'bhöö ‑sɩkaa dɛ'ɛ, mö ‑n 'kä ‑mä gïnyɛ 'mö bhlinɩ nʋʋ, 'saa a gaaa da'a, wʋ yi 'yli 'wlʋnɩ. 22‑Sɩbhä a za n gbää nɩɩ, a ‑kä Lagɔ bhibhee, 'saa a ‑kɔɔ 'yɩbhänɩ ‑kë, 'n a ‑kɔɔ dlɩ 'tɛɛnɩɩ, ɔ yeanyu ‑tiamö 'nyɛ.»

Wa yɛ Zezwii ‑ɔ tioo 'wʋ 'yɩbhänɩ

(Maakö 11.27-33; Lwiikö 20.1-8)

23Zezwii ghlɛ'ɛɛ ‑mä Zeluzalɛɛmö 'n ɔ yiɛ ‑mä Lagɔbudu 'Kɔdʋʋ 'mö mö, 'n ɔ yiɛ ‑mä nɩkpa Lagɔwɛlɩ 'cɩanɩ. Ɔ ‑wʋ 'cɩa dɔ'wʋ, Zwiiföwaa 'a 'nɛɛnɩwa 'kädɩɩ, wa ‑nyɛ 'wa Lagɔbʋbɔwaa a 'kifiea 'sɔ, 'n wa yoo nimï 'yɩbhää yi, wa lɛ naa: «‑Lii 'wuë ‑n nʋä, ‑ɔ tieami bhä 'wʋ, ‑ɔnyɩ 'nglɩ 'mö ‑n nʋni bhä?» 24Zezwii lɛ naa: «N kɩ 'nʋ, ‑maa 'kïbhë ‑bhlʋ ‑kpöö, 'mö n 'kanyɩɛ 'wʋ 'yɩbhänɩ, a ‑kaa ‑gömö ‑sɛ 'wëë, ‑ɔ tiaaa, 'n n 'kanyɔ sʋlʋnɩ. 25N nɛ naa, Zaa Batisɩ, ‑ɔ tio a bhä 'n ɔ wɔlʋ a bhä nɩkpa 'wlu 'nɩ? Lagɔ mɔ 'nɩɩ, ‑maa nɩkpɛ bhä ‑a? A nɩ nyɩaaa ‑ka 'dɩ.» Ɔ gbää sa'aa, 'n wa yiɛ ylɩ 'mö mö. Wa lɛ naa: «Sɛ ‑a 'kä bhä gbä 'nɩ? A‑a ‑kä nɩɩ, Lagɔ mɔɔ tio a‑a nʋʋ, sɛ'ɛ ɔ 'kää nɩɩ, zaa, 'saa bhä 'n a 'nɔ a bhä dlɩ 'wʋ ‑kä 'nɩ? 26A‑a ‑kä'ɛ nɩɩ, nɩkpɛɛ tio a‑a nʋʋ, yɩ yi nɩkpabhë 'klɛ 'mö päla, ɛ'ɛ ‑bhö nyɩasɛ, ‑maa wa kɩ dlɩ 'wʋ nɩɩ, Zaa, Lagɔ a 'möbhïlanɩnyɔ ɔ glɩnɩ a‑a.» 27'N wa yiɛ Zezwii 'dɩ 'nyɛɛ mö nɩɩ: «Zaa Batisɩ, ‑aaa ‑ɔ kɔ a tiee ‑yi.» Zezwii lɛ naa: «Zaa, yɩ ‑kä sa'a 'mö ‑wʋʋ, 'naa 'kanyɩ'ɛ na a ‑ɔ tieaaa sʋlʋnɩ.»

Yuëa 'sɔ ‑kpɔ ‑nyɛ wa dɩba 'sɔ a ninea

28«A ‑pʋnɩ sasɛ 'yukwli, n nɛ naa: Nɩkpɛ ‑bhlʋ mɔɔ wʋä ‑lɛ. Ɔ kä nyɩbhɛlʋyuë 'sɔ. 'Ylɩ ‑bhlʋ 'mö 'n ɔ yiɛ tɛkänɔɔ 'dɩ 'nyɛ nɩɩ: Na 'yu, mö zɩ'ɛ ‑mä 'lagblɛ 'mö, ‑n 'kä ‑mä libho nʋ. 29'Yuu lɛ naa, 'naa nglu. ‑Maa ɔ gbää sa'a 'wëë, 'n ɔ dlɩ yiɛ 'mö 'bhɛlɔ, 'n ɔ yiɛ ‑mä 'lagblɛ 'mö mö. 30'N dɩbaa yi'ɛɛ 'sɔnɔɔ ‑sɩbhä 'dɩ 'nyɛ. Ɔ nyɔɔ 'dɩɩ, yuu lɛ naa: ‑Aa, n yi ‑mä mö. ‑Maa ɔ gbää sa'a 'wëë, ɔ'ɔɔ ‑mä mö. 31Yuë 'la 'sɔ ‑kpɔ a dɔ'wʋ, ‑ɔ 'zʋ bhä ɔ dɩba 'klʋkpamö?» Wa lɛ naa: «Tɛkänɔɔ.» Zezwii lɛ naa: «Miɛ. Zaa, ‑tiamö n nyanyɩɛ dɛ'ɛ 'dɩ nɩɩ lapoomoni a 'wʋbhliwaa, wa ‑nyɛ 'tutungwlɩɩ 'sɔ, wa yi ‑mä 'pɩwʋ mää Lagɔ 'kämanɩɛ 'bhle ghlɩ, ‑maa abhʋa abhlɩ a yi nimï tʋʋ. 32Ɛ'ɛ ‑bhö nyɩasɛ, ‑maa Zaa Batisɩ yiɛ, 'yioo ‑wʋ zlɔnɩɛ 'möö, ɔ sʋlʋnanyu, ‑maa a lɛ a 'naa kɔ dlɩ 'wʋ. ‑Maa lapoomoni a 'wʋbhliwaa, wa ‑nyɛ 'tutungwlɩɩ 'sɔ, mʋa ngluä wabhlɩ 'ɔ wɛlɩɩ 'wʋ. Nɩkpa 'la, a 'yɩ wa 'klʋkpamözʋzwɛ 'ylɩmö 'wë, ‑maa ‑sɩbhä yɩ ‑wʋ 'mö, 'a dilaa 'nɩɛ 'mö 'bhɛlɔ, a'aa Zaa Batisɩ dlɩ 'wʋ ‑kä.»

Libhonʋwazokuu a ninea

(Maakö 12.1-12; Lwiikö 20.9-19)

33N Zezwii yuëë 'nine 'pänɩ, ɔ lɛ naa: «Nɩkpɛ ‑bhlʋ mɔɔ glʋä 'likpïï ‑yɩnyɩɩ 'bhï wa bhɛɛ duvɛɛ 'wʋ a 'lagblɛ. 'N ɔ yee ‑gbätɩ 'mö 'pä. 'Bhʋkwaa wa 'kää duvɛɛ 'mö dɔlʋnɩɩ, 'n ɔ yeaa 'bhlu. 'N ɔ yiɛ ‑gbëgbë 'pä, dɛ wa 'kää glɩ wa 'kä 'lagblɛɛ ‑kʋ. 'N ɔ yee libhonʋwa yowʋ 'nyɛ, 'n ɔ yiɛ lɛgä 'mö mö. 34Ɔ ‑wʋ ‑mä 'n ‑sɛsɛtɛnyɩɩ yiɛ ghlɛ. 'N ɔ yiɛ ‑mä libhonʋwaa a 'bɛyɩ ɔ nɩkpa tie, wa 'kä 'saa wa ‑sɛɛ 'ylimö dlinɩ, wa 'kʋä 'ɔ daa yowʋ 'nyɛ. 35Nɩkpaa 'lagblɛlowlii tie a‑a, wa ghlɛɛ ‑mä 'lagblɛ 'möö, 'n libhonʋwaa yuëë 'wʋ gbulo. Wa 'sɛlɩ ‑mɔmɔɔ, 'n wa yiɛ ‑mɔmɔɔ 'lɩbhä 'n ɔ yi'ɛɛ 'ku. 'N wa yiɛ ‑mɔmɔɔ 'kpɩ 'mö 'lɩbhä 'n ɔ yiɛ 'ku. 36'Lagblɛlowlii 'nwiɛ, 'n ɔ yiɛ ‑mä nɩkpa ‑mumuë tie, wa ‑zu wa zi tɛkänʋa 'wʋ. ‑Maa wa ghlɛ'ɛɛ wabhlɩ ‑mä, tɛkänʋa a saa ‑sɩbhä wa köbhʋää. 37'Lagblɛlowlii 'nwiɛ, ɔ lɛ naa: 'Ɔ! Zaa, yɩ ‑kä sa'a 'mö ‑wʋʋ, 'na yuu 'mö n 'kää ‑mä tie, 'mö wa 'kää 'klʋkpamö zʋ. 38Yuu ghlɛɛ ‑mä, wa yoo 'ylɩmöö 'n wa yiɛ 'dɩ 'nyɛnyɛnɩ, wa lɛ naa: A yɩɛ, ‑ɔ 'kää zɩkö ɔ dɩba 'a gugbëa 'wʋ 'libhïï, mɔɔ da'a. Zaa, a‑a nɩ 'lɩbhɔmɔ ɔ 'kä 'ku, nzɩɩ ‑a 'käa'a 'lagblɛɛ 'wʋ 'libhï. 39'N wa yoo 'wʋ gbulo 'n wa yoo ‑mä 'lagblɛɛ 'mö ‑sɛ, 'n wa yoo 'lɩbhä 'n ɔ yiɛ 'ku.

40Zaa, 'lagblɛlowlii ‑kä yii, sɛ ɔ 'kä bhä libhonʋwa 'la zʋ 'nɩ?» 41Wa lɛ naa: «Ɔ ‑kä yii, jɛzlʋwa 'la, ɔ'ɔɔ ɔ 'kä wa ngäzɩdlɩ 'pä 'lɩlɩlɩ, ‑maa nɩkpaa ɔ 'kää 'dɩ 'nyɛ wa 'kʋä 'lɩbhä wa 'kä 'ku. 'Wë, libhonʋwa a ‑muë ‑wa ‑kä ‑sɛ 'wë cuu, ‑wa 'kɔɔ 'ɔ daa yowʋ 'nyɛɛ, ɔ 'kʋä ‑mä 'lagblɛ 'mö zʋ.» 42Zezwii lɛ naa: «Nn miɛ! ‑Maa wɛlɩkïbhë ‑bhlʋ cɛlɩ ‑mä Lagɔbɔgʋʋ 'mö nɩɩ:

Kpiyii 'sɩbhäsɩbhäwaa gbä a‑a, ‑ɛɛ nɛnɩɩ,

mɛɛ 'zʋa'aa ‑sɩkaa dɛsɛkäkpiyii.

‑Alowli Lagɔ mɔɔ gbää 'n yɩ yiɛ ‑sɩbhä 'wʋ 'plɩ.

‑A ‑kɩɩ 'wʋ yɩlɩɩ, a‑a nʋä nɩɩ: 'Mänaliɛ. # 21.42 Soomö 118.22-23.

‑Lɛ a wɛlɩ 'la, a 'ni bhä ‑bhlɛ 'nʋ ‑a? 43‑Sɩbhä a za n nyanyɩɛ dɛ'ɛ 'dɩ nɩɩ: 'Pɩwʋ mää Lagɔ 'kämanɩɛ ɔ 'naa 'kanyɩ ‑mä 'bhle 'nyɛ, ‑maa nɩkpa a ‑muëë 'kɔɔ 'klʋkpamö zʋʋ, mʋa 'kää a 'bhle 'mö 'plɩ. [44Sɛ'ɛ n gbää nɩɩ, ‑lɛ a kpiyi 'la, ‑ɔ ‑kɛɛ 'wʋ bhlinɩɩ, ɔ yi 'ku, 'n ‑mɔ ɛ ‑kä'ɛ 'wʋ bhlinɩɩ, ɛ yoo 'wʋ 'titli.]» 45‑Maa Lagɔbʋbɔwaa a 'kifiea wa ‑nyɛ Falizɩɛwaa 'sɔ, wa 'nʋä 'mö nɩɩ, nini 'la Zezwii 'pää, wa'bhï 'mö yɩ kpɔɔ yɔwʋʋ, 46wa yɩbhä a nyɩasɛ wa 'kɔ köbhä, ‑maa ‑bʋbʋʋ 'mö wa ‑guä. Ɛ'ɛ ‑bhö nyɩasɛ, ‑maa wa ‑yi sɛ nɩɩ nɩkpabhë a dɔ'wʋ, Lagɔ a 'möbhïlanɩnyɔɔ Zezwii glɩnɩɛ.

נבחרו כעת:

Matie 21: bet

הדגשה

שתף

העתק

רוצים לשמור את ההדגשות שלכם בכל המכשירים שלכם? הירשמו או היכנסו

מידע נוסף אודות BdG2

Matie 21

פסוקים פופולריים מ-
Matie 21

להקשיב ל Matie 21

כתבי הקודש:

Bété, Guiberoua

גרסה: BdG2 - bet

Matie 21

Matie 21

פסוקים פופולריים מ- Matie 21

להקשיב ל Matie 21

כתבי הקודש:

Bété, Guiberoua

גרסה: BdG2 - bet

Matie 21

פסוקים פופולריים מ-
Matie 21