Matie 25

'Dumöwʋyuëa kʋgbä ‑kpɔ a ninea

1‑Mi'la 'plɩɛ 'wëë, 'n Zezwii yuëë 'nine 'pänɩ. Ɔ lɛ naa: «Sɛɛ 'dumöwʋyuë kʋgbä libhï'ɛ 'wa 'wapöö 'wʋ, 'n wa mö'ɛ nglʋkwänyɔ 'yio 'wʋʋ, 'pɩwʋ mää Lagɔ 'kämanɩɛ a wɛlɩɩ, ‑sɩbhä yɩ ‑wʋä. 2Wa 'kää möä yii, wa gla'mö a ‑nʋä ngbï, wa nʋ 'nɛɛnɩli, ‑maa ‑muë'la ngbï ‑kpɔ, wa'aa 'nɛɛnɩli nʋ. 3‑Muë'la ngbï ‑kpɔ ‑waaa 'nɛɛnɩli nʋʋ, 'wa 'wapöö a 'yize 'mö wa 'libhïä 'wʋ cuu ‑maa wa'aa 'kpälɩ 'mö 'kpö ‑su. 4‑Maa ‑muë'la ‑wa nʋä 'nɛɛnɩlii, wa 'libhïä 'wa 'wapöö 'wʋ 'wëë, 'n wa yiɛ 'kpälɩ bhʋlʋbhlʋ 'wʋ 'libhï, 'n wa yiɛ 'kpö 'wʋ yie. 5‑Maa wa ‑kʋnɩɛ nglɔɔ a 'luwli ‑këë, ɔ'ɔɔ ‑pa yi zaa, 'n 'yɛla yuëë 'lɩbhä, wa 'wuë 'n wa yiɛ ngämö.

6‑Maa zlɩjijo'wʋ, wa lɛ zʋ a sɛ'ɛ cuu, ‑gëbë gbä, wa lɛ: ‑Alɛɛ, nglɔɔ a 'luwli ‑wʋa yi dɔ'wʋ lɛɛ, a ‑sɔ 'wʋ, a 'kɔa 'yio 'wʋ mö aaa! 7'Dumöwʋyuëa kʋgbä ‑kpɔ, 'n wa yiɛ gbuglunɔ, 'n wa yiɛ 'wa 'wapöö 'wlu gïganɩ, wa 'kä mö. 8Wa lɛ zʋ a sɛ'ɛ, 'wapöö 'wuë yɛ 'kpö 'mö bhɩɛ. ‑Muë'la ngbï ‑kpɔ wabhlɩ, wa ‑su a yɩ 'kpö zaa, wa ‑wii ‑mä 'wa 'wapöö 'mö pälɩ dɔ'wʋ, wa 'bhɩa ‑muë'la 'n wa yuë zɛla, wa lɛ naa: ‑A'bhɩanyɩ, a nyɩanyɩ 'kpöyie, ‑maa ‑a'a 'wapöö ‑wʋ 'ngïmo dɔ'wʋ. 9‑Muë'la ngbï ‑kpɔ lɛ naa: N'nn, yɩ'ɩɛ ‑zu zaa, ‑a ‑kä ‑mä ‑a'a 'bɛyɩ pälɩ 'wëë, yɩ'ɩɛ yɩ 'kä 'wʋ tʋʋ. Zaa, mä wa pɩɛ 'pɛlʋ a nɩ mö ‑mä, a 'kä a ‑nɩ pɩa. 10'N wa yiɛ 'wʋ ‑sɔ 'n wa yiɛ wa ‑nɩ pɩaa mö. Wa ‑wʋ ‑bhlɛ ‑mä, nglʋkwänyɔɔ wa ‑kʋnɩ a‑a, 'n ɔ yiɛ glɔ ghlɛ. ‑Muë'la ngbï ‑kpɔ ‑wa gïganɩ a‑a 'wluu, 'n wa yoo 'yio 'wʋ mö, wa ‑nyɔɔ 'sɔ, ‑mä ‑buduu 'mö, mä wa 'kää nglɔɔ 'wʋ zaanɩ, 'n wa yiɛ ‑mä plɛ. Wa plɛɛ ‑mä 'wëë, 'n wa yiɛ ‑lɛ ‑gba. 11‑Lɛ gwälɛɛ 'mö 'wëë, ‑muë'la ngbï ‑kpɔ ‑wa mö a‑a kpöö pɩaaa, 'n wa yia'aa wabhlɩ yi. Wa 'nɩgbö ‑lɛ 'ngloluë 'wʋ 'n wa yiɛ 'mö 'kpa, wa lɛ naa: ‑Atʋ, ‑Atʋ, kälɩ ‑lɛ, ‑a 'kä plɛ. 12‑Maa nglʋkwänyɔɔ lɛ naa: ‑Tiamö n nyanyɩɛ dɛ'ɛ 'dɩ, n 'nanyɩɛ ‑yi 'lɩlɩlɩ. 13‑Sɩbhä a za n nyanyɩɛ 'dɩ nɩɩ, a nɩ ‑gïganɩ 'wlu a 'kä ‑lɛ glɩ, ‑maa 'tɛnyɩɩ a ‑lowli 'kää 'mö yii, a 'nɛɛ ‑yi.

Libhonʋwaa ta ‑kpɔ a ninea

(Lwiikö 19.11-27)

14'Pɩwʋʋ mää Lagɔ 'kämanɩɛ a wɛlɩɩ, sɛɛ nɩkpɛ ‑kä'ɛ lowlu 'mö möä yi, 'n ɔ dilanɩɛ 'ɔ libhonʋwaa lɩ wa 'kɛ libho 'wʋ nʋʋ, ‑sɩbhä yɩ ‑wʋä. 15Ɔ 'nyɛ ‑mɔ ‑sikagbëbhï ngbï yowʋ, ɔ 'nyɛ ‑mɔ 'gbëbhï 'sɔ yowʋ, ɔ 'nyɛ ‑mɔ 'gbëbhë ‑bhlʋ yowʋ. Wa 'wuë, sɛ wa bhɛnɩɛ bhʋlʋbhlʋ wa 'kɛ libho 'wʋ nʋʋ, ‑sɩbhä ɔ 'nyʋänyɩɛ yowʋ. 16Ɔ möä 'wë cuu, nɩkpɛɛ ɔ 'nyɛ a‑a ‑sikagbëbhï ngbï yowʋʋ, 'n ɔ yiɛ 'wʋ 'libhï, 'n ɔ yiɛ libho 'wʋ nʋ ‑këë, 'n ɔ yiɛ ‑sikagbëbhï ‑mimii ngbï ‑lɛ ‑gömö ghlɩ. 17‑Mɔ ɔ 'nyɛ a‑a 'gbëbhï 'sɔ yowʋʋ, sɛ ‑bhlʋ ‑kpɔ ‑sɩbhä ɔ 'zʋ'ɛɛ ɔbhlɩ, 'n ɔ yiɛ 'gbëbhï ‑mimii 'sɔ ‑lɛ ‑gömö ghlɩ. 18‑Maa ‑mɔ ɔ 'nyɛ a‑a 'gbëbhë ‑bhlʋ yowʋʋ, ɔ ‑sɔɔ ɔbhlɩ 'wʋʋ, 'bhlu ɔ 'bhluä, 'n ɔ yiɛ ‑mä ɔ 'bhidɩba 'a ‑sikagbëbhëa glu 'zʋ.

19Lɛ gwälɛɛ 'mö tenyii, 'n nɩkpa 'la a 'bhidɩba yia'aa ‑mä 'ɔ lowluu 'mö 'bhöö, 'n ɔ yiɛ 'ɔ libhonʋwaa wäzɩ, 'saa ɔ 'nyʋä a‑a yowʋ, libhoo wa nuä 'wʋ, ɔ 'kʋ 'ylimö. 20Mɔ ɔ 'nyɛ a‑a ‑sikagbëbhï ngbï ‑kpɔ yowʋʋ, 'n ɔ ‑nyɩɩ yiɛ yi, ɔ ‑su'ɛ ‑sikagbëbhï ngbï ɔ ghlɩɛ ‑lɛ ‑gömö, ɔ lɛ naa: ‑Atʋ, ‑sikagbëbhï ngbï, mö ‑n nyɩaa a‑a yowʋ, ‑maa n nwiɛ libho 'wʋʋ, 'n n yi'ɛɛ ‑mimii ngbï ‑lɛ gömö ghlɩ. Yɩ 'wuë miɛ dɛ'ɛ. 21Ɔ 'bhidɩbaa lɛ naa: 'Ɔ! ‑Ayo ‑këë! ‑N yɛ sasɛ 'na libhoo nʋ, libhonʋnyɔ a ‑nɔ a ‑nɔ ‑n glɩnɩɛ. ‑Li 'tikïyiea n nyɩamöä yowʋʋ, sasɛ ‑n 'zʋniɛ 'yli. Yɩ 'nglɩ 'mö, tɛɛnɩ zɩ'ɛ dɛ'ɛ, ‑li a ‑mii kää dɛsɛɛ, 'mö n ‑kamöä 'yli 'zʋ. Zaa, yi ‑a 'kä 'gämö 'mäna nʋnɩ. 22Tɛkänɔɔ 'bhööä ‑lɛ 'wëë, ‑mɔ ɔ 'nyɛ a‑a ‑sikagbëbhï 'sɔ yowʋʋ, 'n ɔ yiɛ yi, ɔ lɛ naa: ‑Atʋ, ‑sikagbëbhï 'sɔ mö ‑n nyɩaa a‑a yowʋʋ, ‑maa n nwiɛ libho 'wʋʋ, 'n n yiɛ ‑mimii 'sɔ ‑lɛ ‑gömö ghlɩ. Yi 'wuë miɛ dɛ'ɛ. 23Ɔ lɛ naa: 'Ɔ! ‑Ayo ‑këë! ‑N yɛ sasɛ 'na libhoo nʋ, libhonʋnyɔ a ‑nɔ a ‑nɔ ‑n glɩnɩɛ. ‑Li 'tikïyiea n nyɩamöä yowʋʋ, sasɛ ‑n 'zʋniɛ 'yli. Yɩ 'nglɩ 'mö tɛɛnɩ zɩ'ɛ dɛ'ɛ, ‑li a ‑mii kää dɛsɛɛ, 'mö n ‑kamöä 'yli 'zʋ. Zaa, yi ‑a 'kä 'gämö 'mäna nʋnɩ. 24'Gbëbhlenɩnɔɔ ɔ 'nyɛ a‑a 'gbëbhë ‑bhlʋ yowʋʋ, 'n ɔ yia'aa ɔbhlɩ yi, ɔ lɛ naa: ‑Atʋ, n ‑yi sɛ nɩɩ, ‑na wɛlɩ 'mö yɩ 'tɛɛ. Dɛ ‑nn a‑a glʋʋ, ‑lɛ ‑n ‑dɩ. Suu ‑nn a‑a glʋʋ, wʋ bhïï mö ‑n sɛ. 25Zaa ‑gu n ‑gumöä tenyii. Yɩ za, ‑na'a lɩɩ ‑n nyɩaa a‑a yowʋʋ, 'bhlu n 'bhluä, 'n n yee glu 'zʋ. Zaa, 'mö n ‑nyɛɛ yiɛ, mɛɛ dɛ'ɛ, 'libhe 'wʋ! 26Ɔ gbää sa'aa, ɔ 'bhidɩba lɛ naa: Libhonʋnyɔzokwë, ‑tlɩnɩnyɔ ‑n glɩnɩɛ. ‑Na'bhë ‑n ‑yi sɛ nɩɩ, dɛ n'n a‑a glʋ, ‑lɛ n dɩɛ. Suu n'n a‑a glʋʋ, wʋ bhïï mö n sɛɛ. 27Zaa, ‑n kä a ‑n 'kä 'na ‑sikagbëbhëa monikwïlawa yowʋ 'nyɛ, wa 'ka libho 'wʋ nʋ. ‑Lɛ a dɔ'wʋ, n yi a‑a dɛ'ɛɛ, 'na ‑sikagbëbhëa ‑nyɛ 'saa a ghlɩɛ ‑lɛ ‑gömö 'sɔ, 'mö n 'libhï a‑a dɛ'ɛ 'wʋ. 28'N ɔ yiɛ nɩkpa 'dɩ 'nyɛ nɩɩ: Nɩkpɛ nɩ, ‑sikagbëbhëa ɔ ‑suä da'aa, a nɩ ‑sɔnyɩ kä'mö, nzɩɩ tɛkänɔɔ, ‑ɔ ‑nyɛ ‑sikagbëbhï kʋgbä ‑kpɔ yiɛ, a 'kɔnyɩ yowʋ 'nyɛ. 29Ɛ'ɛ ‑bhö nyɩasɛ, ‑maa ‑ɔ kää ‑bɛ, 'mö wa nyɛɛ 'n ɔ ‑nɩɩ zumanɩɛ tenyii. ‑Ɔ kää 'tikïyiee, 'ɔ 'saa ɔ kää, 'mö wa sɔɔ kä'mö. 30Zaa, libhonʋnyɔzokwë nɩ, a nɩ ‑sɔɔ 'ɔ ‑sikagbëbhëa kä'mö, ɔ'bhë, a nɩ 'libho 'wʋ, ‑mä 'pɩwʋ, ‑mä guylukwëa 'mö, a 'kɔ ‑mä 'pä ɔ 'kä ‑mä 'klʋ 'slunɩ, ɔ 'kä ‑mä 'winɩ.

Lagɔ 'a ‑zijle 'kädaa

31‑Zlɩ Nɩkpɛ a 'Yu ‑kä ‑mä 'ɔ 'kämanɔ 'kɔdʋʋ 'mö yinɩɩ, ɔ ‑nyɛ Lagɔzuzukuu 'wuë 'sɔ, 'n wa 'kää yi. 'N ɔ 'kää ‑mä 'ɔ 'nglɩmöklikpëa 'mö sɛ glɩ. 32'N 'bhlɩbhëa 'wuë 'kää ‑lɛ ɔ 'yila 'klʋ 'wlu 'titanɩ. Ɔ 'kʋä 'ylimö dlinɩ. Sɛɛ wïla a 'ylizʋnɩnyɔ dlinɩɛ ɔ wïla 'ylimö, 'n ɔ zʋ'ɛ bhabhïlaa 'yɩ dɛ, 'n ɔ zʋ'ɛ wïla a ‑wïlaa 'yɩ dɛɛ, ‑sɩbhä ɔ 'kää 'bhlɩbhëa 'wuë 'zʋ. 33Nɩkpaa ‑wa ‑nyɛ bhabhïlaa 'wlʋnɩɛ, ɔ 'kʋä ‑mä ɔ luukɛ 'wʋ 'pänɩ, ‑muë'la ‑wa ‑nyɛ wïla a ‑wïlaa 'wlʋnɩɛ, ɔ 'kʋä ‑mä ɔ kɔpɛ 'wʋ 'pänɩ. 34Ɔ ‑kʋä ‑sɩbhä 'ylimö dlinɩ 'wëë, ‑wa ‑wʋä ‑mä ɔ luukɛ 'wʋʋ, sɛ'ɛ ɔ 'kʋää 'dɩ 'nyɛ nɩɩ, a nɩ yi abhlɩ, abhʋa na dɩba Lagɔ 'pää 'nyuu, a nɩ yi n 'kanyɩ 'pɩwʋ mää Lagɔ 'kämanɩɛ 'bhle 'nyɛ, ɛ'ɛ ‑bhö nyɩasɛ, ‑maa dɛɛ Lagɔ nɩ a‑a ‑bhlɛ 'pɩwʋ a ‑lii ‑bhɛɛ, 'bhle 'la, a sa‑a a‑a ‑lɛ a za. 35Nyɩasɛ n'n‑ä n 'kanya 'nyɛ, ‑maa ‑zlɩ ngɔmʋ lɩbhaa a‑a, abhʋa nyɩaa a‑a lile, ‑zlɩ 'nyutʋ lɩbhaa a‑a, abhʋa nyɩaa a‑a 'nyu, ‑zlɩ n yi a‑a lowlu 'möö, abhʋa pälaa a‑a. 36‑Zlɩ n'n a‑a 'wualu ‑kä, abhʋaa nyɩaa a‑a 'wuali, ‑zlɩ n'n a‑a ‑yɛ, abhʋaa ‑wʋʋ a‑a 'yli, ‑zlɩ n ‑wʋ a‑a ‑jie 'möö, abhʋaa mööö a‑a 'ylɩmöä. 37‑Maa ɔ ‑kʋä sa'a 'dɩ 'nyɛɛ, 'n wa 'kɔɔ nimï 'yɩbhä nɩɩ: ‑Alowli, ‑zlɩmɛ ngɔmʋ lɩbhamö a bhä, a‑a ‑yimö a bhä lile 'nyɛ 'nɩ? ‑Zlɩmɛ 'nyutʋ libhamö a bhä, a‑a ‑yimö a bhä 'nyu 'nyɛ 'nɩ? 38‑Zlɩmɛ ‑n mö a bhä ‑mä ‑a'a mä'a lowlu 'mö, a‑a ‑yimö a bhä päla 'nɩ? ‑Zlɩmɛ ‑nn a bhä 'wualu ‑kä, a‑a ‑yimö a bhä 'wuali 'nyɛ 'nɩ? 39‑Zlɩmɛ ‑nn a bhä ‑yɛ, a‑a ‑yimö a bhä 'yli ‑wʋ 'nɩ? 'N ‑zlɩmɛ ‑n ‑wʋ a bhä'ɛ ‑jie 'mö, a‑a ‑yimö a bhä 'ylɩmöä mö 'nɩ? 40'N ɔ 'kää nɩɩ: ‑Tiamö n nyanyɩɛ dɛ'ɛ 'dɩ: Nɩkpɛ a ‑mɔ nɩkpa ‑tɔnɩɛ a‑a ‑ɔɔ dɛsɛ ‑kä 'lɩlɩlɩɩ, ‑zlɩ a nɔ a‑a ‑li a ‑li 'la 'wluu, na ‑daayu ɔ glɩnɩɛ zaa, ‑amö a nwi a‑a 'wlu.

41'N ɔ 'käa'aa ɔ kɔpɛ 'wʋ a ‑nʋa 'mö 'bhɛlɔnɩ, ɔ 'kʋä'ɛ wabhlɩ 'dɩ 'nyɛ nɩɩ: Abhʋaa ‑bhätlɩnɩɛ Lagɔ a dɛɛ, a 'dionɩɩ gwë. ‑Mä ‑kosuu 'mö, mää Sataa ‑nyɛ 'ɔ zuzukuu 'sɔ 'kää 'kwädlɩ glɩɩ, a 'kä ‑mä mö, a 'kä 'kwädlɩ ‑mä glɩ. 42Ɛ'ɛ ‑bhö nyɩasɛ, ‑maa ‑zlɩ ngɔmʋ lɩbhaa a‑a, a ‑nɩɩɛ a abhlɩ lile 'nyɛ, ‑zlɩ 'nyutʋ lɩbhaa a‑a, a ‑nɩɩɛ a 'nyu 'nyɛ. 43‑Zlɩ n yi a‑a lowlu 'möö, a ‑nɩɩɛ a päla, ‑zlɩ n'n a‑a 'wualu ‑kä, a ‑nɩɩɛ a 'wuali 'nyɛ, ‑zlɩ n'n a‑a ‑yɛ, a ‑nɩɩɛ a 'yli ‑wʋ, ‑zlɩ n ‑wʋ a‑a ‑jie 'mö, a ‑nɩɩɛ a 'ylɩmöä mö. 44'N wa 'kɔɔ nimï 'yɩbhä nɩɩ: ‑Alowli, ‑zlɩmɛ ngɔmʋ lɩbhamö a bhä, ‑zlɩmɛ 'nyutʋ libhämö a bhä, ‑zlɩmɛ ‑n mö a bhä ‑mä ‑a'a mä'a lowlu 'mö, ‑zlɩmɛ ‑nn a bhä 'wualu ‑kä, ‑zlɩmɛ gu libhamö bhä, ‑zlɩmɛ ‑n ‑wʋ a bhä ‑jie 'mö, a‑a ‑nɩmö a bhä 'wʋ yi 'nɩ? 45'N ɔ 'kää nɩɩ: ‑Tiamö n nyanyɩɛ dɛ'ɛ 'dɩ nɩɩ: Dʋdʋ 'wʋ a nɩkpɛ a ‑mɔ nɩkpa ‑tɔnɩ a‑a ‑ɔɔ dɛsɛ ‑kä 'lɩlɩlɩ, ‑zlɩ a nɔ a‑a ‑lizoku 'la 'wluu, na ‑daayu ɔ glɩnɩɛ zaa, ‑amö a nwi a‑a 'wlu. 46'N ɔ 'kʋää ‑mä ‑kosuu 'mö 'pä. ‑Mä wa 'kää 'kwädlɩkwädlɩnɩ ‑wʋ. ‑Maa ‑muë'la ‑wa nʋ a‑a 'saa nɛnɩɛ Lagɔ dlɩ yɔwʋʋ, mʋa 'kää 'pɩwʋ mää 'naa 'kää 'yli bhɩɛ ghlɩ.»

נבחרו כעת:

Matie 25: bet

הדגשה

שתף

העתק