ยฮ 2
2
ลอง เฌา เยซู โบง แตห อึม แบน อึม มางูน
1วาย อัน ตี โอย ซีแง, อึณ มึห บลอย คัด แคง มืง คานา อี กอย แคง อืง ฆาลีเล. บอ มา เฌา เยซู ตัห โฮม คัด ตี. 2เฆ แฮะ บาง บอ เฌา เยซู บอ ดีแบ อัน, แตห บอ เฆ ตัห. 3ดอ อัน ตี เฆ แฮะ เดียง โตต อึม มางูน, อาว ฮู มึห. มา เฌา เยซู วี กาลาง ดี เฌา เยซู ต็อห, “อึม มางูน เฆ แฮะ โตต.”
4อัน วี ต็อห, “อึย มา, แกวะ จัร โอว โบง มาเซ. เฌาพรา หณัม แตห โอว โบง ฌึร เหมา.”
5มา อัน ยี ฮาว กาลาง โฆรห ดี แดเจณ แคง กาง. อัน ต็อห, “เซ อัน จัร เบ โบง ฌึร เหมา, แตห เบ โบง ปาย ตี.”
6แคง กาง ตี ยี มึห แปรณ ตาง เดา โบ็ง. เฆ โบง แปรณ ตี ตา มาว. เฆ ดูอี อายูดา ตา แปรณ ตี บาย แบน โมยว แบน โมยว, แตห อึณ ซีงา, แตห อึณ โดบ ดารา. แปรณ ตี ดอน โบ็ง ปึอน ฮับ อึม กาบัก พวน พัน ปูง.
7เฌา เยซู วี ต็อห ดี แดเจณ ตึอน, “แตห เบ ต็อะ อึม, ฮับ แคง แปรณ ตี, แตห กอ โนะ ดอน โบ็ง.” เฆ วี โบง ปาย ตี.
8เฆ แฮะ ฮอต โบง, อัน วี ต็อห, “ดอ ตี นี, เบ ปลัก อึม ตี คอ อี แจก, แตห ดา อี แบน โหรว วี จีม.”
9เฆ แฮะ ฮอต โบง ปี จัร เฌา เยซู, โหรว ตึอน วี จีม อึม ตี. อึณ ยี แฮะ แบน อึม มางูน. โหรว ตึอน ตู นับ, อึณ ดึอม มูห อึม ปี ฮับ เฆ แคง แปรณ ตึอน. เฆ แดเจณ อี ต็อะ โหลว อึม แคง แปรณ ตึอน, เฆ ยี นับ. โหรว ตึอน วี แดะ กาโณม อี คัด ตึอน, ต็อห ดี อัน, 10“ดอน อี แตห แคต เดียง อึม มางูน อี หมึอม ดี อาต. แฮะ ฮอต, วาย แคต แฮะ เดียง กืน, เฆ วี ดัว อึม มางูน อี ตู บอ หมึอม. แม ยี แฮะ อูน อึม มางูน อี หมึอม กาเซา, ดัว แคต เดียง ดอ ตี นี.”
11ปี โบง เฌา เยซู ตี, อึณ มูห ดอ โฆว ดี กาจูห อัน ดี โบง อี หมึอม อาม กาเซา. ดอ อัน ตี อัน กอย แคง มืง คานา อี กอย แคง อืง ฆาลีเล. ปี โบง อัน ตี, อึณ แตห อี นับ ลอง อาพูง ดังโคว อัน. แฮะ ฮอต, ดีแบ อัน กอ หณึม อัน.
ลอง เฌา เยซู ลึบ แคง โฮว เฌาพรา
12วาย อัน ตี เฌา เยซู วี โลง มืง กาเปนารึม. บอ มา อัน เฆ วา อัน, บอ ดีแบ อัน ฮาว รึม โดบ อัน. เฆ ยี ตู กอย เหลณ แคง มืง ตี.
13ดอ อัน ตี อาคราว ดี โบง เฆ บลอย แฮะ กาตัด ดี ฌัม. อึณ มูห บลอย โหลห เฆ ดูอี อายูดา เฌาพรา ดอ กาโลห อัน กาง เฆ. โคว, เฌา เยซู โฮะ แคง มืง เยรูซาแลม. 14อัน แฮะ ฮอต ฌัม, อัน ฮาว ลึบ แคง โฮว เฌาพรา. อึณ มึห ดูอี อี ย็อง มัก อาโล็ง บอ มาบู เฆ มาโบลย. อึณ บอ มึห ดูอี ลาย การ็อห กาฆู รึอน, เฆ บอกาเฆลียด กอย แคง แวง โฮว เฌาพรา. 15ปัน ตี อัน วี ดึห อึณโป็ง วัน, ณอน บอ มัก บอ มาบู เลห แคง โฮว เฌาพรา. อัน บอ โจะ กาเบลียะ กาโช็ง เฆ ดูอี อี ลาย การ็อห กาฆู รึอน. อัน บอ ฮูห บรัด รึอน ปี อูน เฆ. 16อัน วี ต็อห ดี เฆ ดูอี อี ย็อง มาโบลย, “ดึห เลห โกรว เบ ฮาว, แกวะ โบง แตห กาง ฆูณ โอว วี แบน กาลัห.”
17ดอ อัน ตี เฆ ดีแบ อัน วี โหลห ปี แดม อูน แคง บับ เฌาพรา. อึณ ต็อห ลอง เฌา เยซู, “โอว ร็อก กาเซา โฮว เฌาพรา. โอว คัม ยัม ดี ร็อก.”
18เฆ ดูอี อายูดา วี หมาณ อัน บยัะ ปวน อัน. เฆ ต็อห, “แตห แม บยัะ นา หมึอม อาม กาเซา อู โมยว อี แตห เย นับ แม มึห ปวน ดี โบง ฌึร ตี.”
19ปัน ตี เฌา เยซู วี ต็อห, “แตห เบ โบง แตห โฮว นี กาปยาต ลึร โตต. โอย ซีแง โอว ดี วี ซัม แตห อึณ ฮอต.”
20เฆ ดูอี อายูดา วี ต็อห, “เย แฮะ ซัม โฮว ตี, อาดา พวน ฆึร ดี เดา ซีนัม กอ ฮอต. แม ยี ต็อห, ‘โอย ซีแง แฮะ ปึอน วี ซัม โฮว ตี, แตห อึณ ฮอต.’” 21ดอ กาลาง เฌา เยซู ลอง โฮว ตี, อัน กาลาง ลอง โดว โบ็ง อัน. อึณ มูห โดว โบ็ง อัน อี ปี โฮว เฌาพรา ตี. 22วาย อัน ตี เฌา เยซู ฮี ฮอต ยัม, ฮี ฮอต วี ยีต วี อีม, เฆ ดีแบ อัน วี โหลห โฆรห ตี ปี กาลาง เฌา เยซู ดี เฆ. ดอ อัน ตี เฆ วี หณึม ซีคยา โฆรห เฌาพรา ปี แดม อูน อัน แคง บับ เฌาพรา. เฆ บอ หณึม บอ โฆรห เฌา เยซู ปี ดึอม กาลาง อัน ดี เฆ.
23ดอ กอย เฌา เยซู แคง มืง เยรูซาแลม, ดอ โบง เฆ บลอย ตึอน, อึณ มึห ดูอี กืน อี หณึม อัน โกบ โบง อัน นา หมึอม อาม กาเซา. อึณ แตห อี นับ อาเซ อัน มูห. 24เฌา เยซู ยี ตู แตห เฆ นับ น็อห อัน โกบ นับ อัน น็อห ดูอี ดอน อี. 25อัน ตู โลว อาเซ กาลาง ดี อัน ลอง อี เฮา. อัน แฮะ นับ ราง อัน มาเซ ปี ทาง เฆ ดอน อี แคง น็อห เฆ.
© 2021, Wycliffe Bible Translator, Inc. All rights reserved.