ลก 24
24
ลอง เฌา เยซู วี ยีต วี อีม
1แฮะ ฌัม ซีแง วาย ซีแง ดีเหลา, ซีณวัห เจว, เฆ อีบึณ ตึอน บอ ฮาว ฌัม โดง กอย กาเดา บาเรว. เฆ มืร โฆ็ง ซีนัม แปะ แฮะ แรน อูน เฆ คา อาต. 2ดอ แฮะ ตัห ฌัม เฆ โดง ตึอน, เฆ บอ ยึร, มาว ตาง ปี เบลห เฆ นา อาต มาโลห กาเดา บาเรว, แตห อึณ กาบีด รีด, อาว ฮู มึห. 3ดอ ยึร เฆ กาเดา บาเรว แฮะ อึณวึห ปาย ตี, เฆ บอ ลึบ นา แคง. เฆ ยอด, ยี ตู ยึร โดว โบ็ง เฌา เยซู. 4เฆ บอ อาม กาเซา. เฆ ตา ยึร อีมาย อา วี แฮะ กอย ดี อาต เฆ. ครึง ฆาย แฮะ ลูย ราว. 5เฆ อีบึณ บอ โยว กาเซา. เฆ บอ ครึบเครา. ดอ กรึบ เฆ ปาย ตี, อีมาย ฆาย ตึอน ต็อห ดี เฆ, “เหมา อึณ ปาย ปี ตัห เหรต เบ ดูอี อีม โดง กอย ดูอี ยัม นี? 6ดูอี ปี เหรต เบ ตี, อัน ตู กอย ดี นี. อัน แฮะ วี ยีต วี อีม. เบ โลว โหลห โฆรห ปี ต็อห อัน ดี เบ ดอ ซี กอย รึม อัน โดบ เบ แคง อืง ฆาลีเล. 7อัน แฮะ ดึอม ต็อห ดี เบ, ‘เฆ ดี อาบ ดูอี อี แฮะ แบน ฆอน ดูอี, แตห เฆ ดูอี มึห หมาบ ปึอน ดี อึบ อัน. เฆ ดี ง็อห ยัม อัน, ดึก อัน ดี ร็อง กาแวะ. ฮี โนะ โอย ซีแง, อัน ยี ดี วี ยีต วี อีม.’” 8ดอ อัน ตี เฆ อีบึณ ตึอน วี โหลห โฆรห ปี ดึอม กาลาง เฌา เยซู ดี เฆ.
9ปัน ตี เฆ วี เลห แคง กาเดา บาเรว, ฮาว กาลาง โตต ปี ยึร เฆ ตึอน, แตห เฆ ดีแบ เฌา เยซู ฆึร ดี อู วี บอ เฆ ฆึก เฌา เยซู ดอน อี กอ นับ โตต ลอง อัน ตี. 10เฆ อีบึณ อี กาลาง ลอง อัน ตี ดี เฆ ดูอี ตึอน, อึณ มูห นาง มารี อี ตัห มืง มากดาลา, บอ นาง โยวฮานา, บอ นาง มารี อี มูห มา อายาโกบ, บอ อีบึณ อี เฮา อี กอย รึม โดบ เฆ. 11เฆ ดีแบ เฌา เยซู ยี ทาง, อีบึณ เฆ ตี กาลาง โฆรห ปีเยณ. โคว, เฆ มืร ตู หณึม ปี แค เฆ. 12อาเปตารู ยี ยีต กาแบลบ ฮาว, ตัห ฌัม โดง กอย กาเดา บาเรว ตึอน, มูด ยอด นา แคง. อัน ยึร บีก ปี กาบัน เฆ โดว โบ็ง เฌา เยซู. แฮะ ฮอต, อัน วี เวณ บอ อาม กาเซา ลอง อัน ตี.#24:12 บับ ดอ โฆว มัง โมยว อาว มึห กาบัก นี
ลอง ดีแบ เฌา เยซู อา วี ฮาว โดบ อึณเตณ
13ซีแง อัน ตี, อึณ ยี มึห ดีแบ เฌา เยซู อา วี, ฆาย ฮาว โดบ อึณเตณ อี ฮาว มืง เอมาอูะ. มืง ตึอน ฆาย มืง เยรูซาแลม, คราว อึณเตณ กาโต็ง กาบัก อา นารี.#24:13 แคง บับ บรีม อึณ ต็อห 60 ซาทาดียา อี แบน มอก 7 หล็อก 14ดอ ฮาว ฆาย, ฆาย บอ ลาย กามวน ลอง ซาดาง ดอน โมยว แปะ แฮะ ยึร ฆาย ดอ อา โอย ซีแง อี ปวน ตัห. 15ดอ ลาย กามวน ฆาย ปาย ตี, เฌา เยซู ตัห ฌัม โดง กอย ฆาย บอ กาลาง ดี ฆาย. อัน บอ จูห ดี ฮาว รึม โดบ ฆาย. 16ฆาย บอ ยึร อัน, ฆาย ยี ตู นับ, อัน มูห เฌา เยซู.
17เฌา เยซู ดีหมอด ฆาย ต็อห, “ลอง มาเซ ปี ลาย กามวน บาย ดอ ฮาว บาย โดบ อึณเตณ นี?” ดูอี อา วี ตึอน บอ ฆืด อู กาจัน, อึณ ลึห, ฆาย มึห น็อห กลึร.
18ดูอี อู วี อี จืร อาคาเลโอวพา, อัน ต็อห, “ดูอี บอ มืง แคง มืง เยรูซาแลม แฮะ นับ ลอง อัน ตี. แฮะ หมาน, แม อู วี มูห แคต อี ตู นับ ลอง ดอน โมยว แปะ แฮะ โบง เฆ อา โอย ซีแง อี แฮะ ปวน ตัห?”
19“มาเซ อึณ มูห?” เฌา เยซู วี ดีหมอด ฆาย. ฆาย วี ต็อห, “อึณ มูห ลอง แปะ แฮะ โบง ดูอี ดี อาเยซู, อี ตัห มืง นาซาเรต. อัน แฮะ มูห ดูอี อี บยาน โฆรห เฌาพรา. อัน แฮะ โบง นา หมึอม อาม กาเซา บอ กาลาง โฆรห อี มึห ปวน ตาง ปี ดัว เฌาพรา ดี อัน. ดูอี บอกาเฆลียด แฮะ นับ ลอง อัน ตี. 20อึณ บอ มูห เฆ ดา ตาง อี แยต เฆ ดูอี อี หลู ดี เฌาพรา บอ เฆ ดา กาณา อี อึบ มืง, เฆ แฮะ อาบ อัน ดี ดูอี เฮา, แตห เฆ บอ ง็อห ยัม อัน. เฆ มืร แตห อัน ยัม แดง ร็อง กาแวะ. 21คา อาต เย ดีแบ อัน แฮะ ทาง อัน ดี คยอด เฆ ดูอี อีซาเรลัะ. อาตึร แฮะ ปึอน โอย ซีแง วาย ง็อห เฆ ดี อัน. 22อึณ ยี มึห เฆ อีบึณ แคง พึง เย มัง อี, เฆ บอ ต็อห นา หมึอม อาม กาเซา ดี เย. ซีณวัห เจว ดอ เลห ฮาว เฆ ดี บาเรว, 23เฆ ตู ยึร โดว โบ็ง อัน. เฆ วี เวณ กาลาง ลอง อัน ตี ดี เย. เฆ ต็อห, เฆ แฮะ ยึร อามู อามาด เฌาพรา อี ต็อห, อัน แฮะ วี ยีต วี อีม. 24ฆึก ยาย มัง อี บอ ลึบ แคง กาเดา บาเรว, เฆ บอ ยึร โตต, แฮะ ปี ปี ต็อห เฆ อีบึณ ตึอน. เฆ ยี ตู ยึร โดว โบ็ง อัน.” ฆาย แฮะ ฮอต ต็อห ปาย ตี ดี เฌา เยซู.
25ดอ อัน ตี เฌา เยซู ต็อห ดี ฆาย, “อึย, เบ อาโมยว ดูอี แฮะ รึร กาเซา, น็อห เบ อาว หงึย หณึม โฆรห ปี ดึอม ต็อห เฆ ดูอี อี บยาน โฆรห เฌาพรา. 26บาย ตู นับ, อัน เฌา ปี ร็อห ปี ตึย เฌาพรา แตห อัน คยอด ดูอี, อัน แฮะ โลว คัม ดูก ปาย ตี. แฮะ ฮอต, อัน ดี ปึอน อาพูง ดังโคว อัน.” 27ปัน ตี เฌา เยซู จูห ดี กาลาง โตต ดอน โมยว ปี แดม อูน แคง บับ เฌาพรา ลอง อาซาก อัน, อู ซีณ ดอ แดม ดา อาโมวแซ กอ ฌัม ปี แดม เฆ ดูอี อี บยาน โฆรห เฌาพรา ดอน อี, อัน วี กาลาง โตต ดี ฆาย, แตห ฆาย นับ.
28ดอ ตัห ฌัม ฆาย กาตัด มืง ดี ฮาว ฆาย, เฌา เยซู ณึงราง ดี ฮาว กาโลห มืง ตี. 29ฆาย ยี หมาณ, แตห อัน กอย รึม โดบ ฆาย แคง มืง ตี. ฆาย ต็อห, “แตห แม กอย รึม โดบ ยาย, ซีแง มืร ดี เฆต. แปร มืร แฮะ รีน ดี อับ.” แฮะ ฮอต กาลาง ปาย ตี, เฌา เยซู บอ ฮาว กอย รึม โดบ ฆาย.
30ดอ กอย อัน แคง กาง ฆาย, อาต โฮม รึม เฆ, เฌา เยซู ดึห คามูน, ดาง ฆูง เฆฌู ดี เฌาพรา, บอ กาบัก คามูน, ดัว เฆ โฮม. 31ดอ อัน ตี อึณ ปี งาย ฆาย แฮะ บลาง. ฆาย กอ นับ อัน มูห เฌา เยซู. ดอ อัน ตี เฌา เยซู ยี หราย โดง กอย ฆาย, อาว ฮู ปึอน ยึร อัน. 32ฆาย ยี ลาย กามวน. ฆาย ต็อห, “เหมา, ดอ กาลาง อัน โฆรห, ดอ ฮาว อาย โดบ อึณเตณ, ดอ มาโนว อัน ลอง บับ เฌาพรา แตห อาย นับ, อึณ แฮะ แบน น็อห โคย บอ บลืง ดี น็อห.”
33วาย อัน ตี ดูอี อา วี ตึอน, ฆาย วี เวณ ฌัม แคง มืง เยรูซาแลม. ฆาย กาตูณ เฆ ดีแบ ฆึร ดี อู วี อี กอย รึม โดบ ดูอี เฮา. 34เฆ วี ต็อห ดี ฆาย, “อึณ แฮะ หมาน อาคาคัร, อัน เฌา แฮะ วี ยีต วี อีม. แฮะ มูห, อาซีโมน แฮะ ปึอน ยึร อัน.” 35ดอ อัน ตี ฆาย อา วี วี จูห ดี กาลาง ปี ยึร ปี โทม ฆาย ดอ ฮาว ฆาย โดบ อึณเตณ ตึอน. ฆาย บอ แค ลอง แฮะ นับ ฆาย อัน มูห เฌา เยซู ดอ กาบัก อัน คามูน, ดัว ดี ฆาย.
ลอง เฌา เยซู กาปลูห ดี ดีแบ อัน
36ดอ กาลาง ฆาย ลอง อัน ตี, เฌา เยซู กาปลูห ตัห ดี กาแต เฆ. อัน ต็อห ดี เฆ, “แตห เบ มึห น็อห เฆียด.”
37เฆ ยี แฮะ กาจัว บอ โยว กาเซา. เฆ ทาง, เฆ แฮะ ยึร กาเปรา. 38เฌา เยซู วี ต็อห ดี เฆ, “เหมา อึณ ปาย ปี ตู หณึม เบ? เหมา อึณ ปาย ปี มึห เบ น็อห กาลีง กาแล? เหมา อึณ ปาย ปี ทาง เบ ปาย ตี? 39แตห เบ ยอด แด โอว บอ เปลา โอว นี, แตห เบ นับ, อึณ มูห โอว. แตห เบ ปา โดว โอว นี, แตห เบ นับ, กาเปรา ตู มึห ยัง ปี โอว.”
40อัน แฮะ ฮอต ต็อห ปาย ตี, อัน บอ บยัะ แตห เฆ ยอด แด เฆ เปลา.#24:40 บับ ดอ โฆว มัง โมยว อาว มึห กาบัก นี 41โคว, น็อห เฆ แฮะ ดาคึย บอ อาม กาเซา. เฆ กอ ฮู วี หณึม งาย เฆ. ดอ อัน ตี เฌา เยซู วี ต็อห, “เบ มึห ปี ดี โฮม ดัว ดี โอว?” 42แฮะ ฮอต, เฆ วี ดัว มาฆา ฆึม ดี อัน, แตห อัน โฮม อู โดว. 43เฌา เยซู ดึห โฮม มาฆา ตี, แตห เฆ ดอน อี ยึร.
44อัน ต็อห ดี เฆ, “ดอ กอย รึม โอว โดบ เบ, โอว แฮะ ดึอม กาลาง ดี เบ ลอง ปี แดม อูน เฆ ดูอี แคง บับ เฌาพรา ลอง โอว. ดอน โมยว ปี แดม ดา อาโมวแซ อูน แคง บับ ดารา เฌาพรา บอ ปี แดม เฆ ดูอี อี บยาน โฆรห เฌาพรา บอ ปี แดม อูน เฆ ดี บับ ปี โหมว ทัม, แคะ ปี แดม เฆ ลอง โอว, อึณ ดี แบน โตต แคะ ปี ต็อห เฆ ตี.”
45ปัน ตี อัน วี กาลาง, แตห อึณ ลึห ซีเพา อัน ดี น็อห เฆ ลอง ปี แดม แคง บับ เฌาพรา. 46อัน ต็อห ดี เฆ, “แฮะ มูห, ปี แดม ดูอี แคง บับ เฌาพรา. อัน เฌา ปี ร็อห ปี ตึย เฌาพรา แตห อัน คยอด ดูอี, อัน โลว คัม ดูก. แฮะ ฮอต, อัน ดี ยัม. วาย อัน ตี โอย ซีแง, อัน ดี วี ยีต วี อีม. 47เบ ยี โลว ดึห ปวน อัน เฌา ปี ร็อห ปี ตึย เฌาพรา แตห อัน คยอด ดูอี. แฮะ ฮอต, ซาดาง ลอง ดูอี แฮะ ปึอน แวน น็อห บรีม เฆ, บอ ซาดาง ลอง เฌาพรา ฆ็อห แวน หมาบ ดูอี, เบ โลว กาลาง ดี ดูอี ดอน โมยว. เบ ยี โลว จูห ดี กาลาง แคง มืง เยรูซาแลม ดี อาต, แฮะ ฮอต, เบ โลว ฮาว ดอน โปละ. 48เบ มูห ดูอี อี แฮะ ยึร ดอน โมยว, เบ มืร โลว กาลาง ดี อี เฮา ลอง อัน ตี. 49กาดีก ซัดฌา ปี ดัว ฆูณ โอว ดี ดูอี, โอว ดี ดัว ดี เบ. เบ ยี โลว กอย แคง มืง นี, หน็อะ อาคราว ดี ดัว เฌาพรา ปวน อัน ดี เบ.”
ลอง เฌา เยซู โฮะ ฆางหราว
50วาย อัน ตี เฌา เยซู แยต ดี อาต เฆ, แยต เฆ เลห แคง มืง ตึอน ตัห ฌัม เรา เบทานี. ดอ อัน ตี อัน บอ โจะ แด อัน, ม็องการา แตห ดี เฆ. 51ดอ ม็องการา แตห อัน ดี เฆ, อัน เลห โดง กอย เฆ. เฌาพรา ยี ดึห อัน โฮะ แคง มืง ฆางหราว. 52เฆ บอ กรึบ เฌา เยซู. แฮะ ฮอต, เฆ เวณ แคง มืง เยรูซาแลม. น็อห เฆ ยี ดาคึย กาเซา. 53ดอน ซีแง เฆ กอย กาฌูะ แคง โฮว เฌาพรา, อืบ เฌาพรา เซเซ.
© 2021, Wycliffe Bible Translator, Inc. All rights reserved.