Iivan 4
4
Iisus da samarielaine naine
1Konzu Iisus sai tiediä, fariseit kuultih, buite Häi keräi iččeh ymbäri enämbän opastujii da ristii rahvastu enämbän kui Iivan, 2hos Iisus iče ei ristinyh, a Hänen opastujat ristittih, 3Häi lähti Juudiespäi da meni uvvessah Galileih. 4Hänel pidi matkata Samarien kauti.
5Matkal Iisus tuli Samarien Sikar-nimizeh linnah. Sen lähäl oli muapalaine, kudaman Juakoi oli andanuh Josif-poijale, 6i sie oli Juakoin silmykaivo. Dorogas väzynyh Iisus istuihes kaivon luo. Oli keskipäivänaigu, kuvven čuasun mail.
7Yksi samarielaine naine tuli viele, i Iisus sanoi hänele: «Anna minule juvva.» 8Opastujat oli mendy linnah syömisty ostamah. 9Naine sanoi: «Sinähäi olet jevrei, kuibo sinä voit pakita juvva samarielazel naizel?» Jevreit, näit, pyzyttih eriže samarielazis.
10Iisus sanoi naizele: «Ku sinä tiedäzit, min Jumal andau lahjakse, da ku tiedäzit, ken sinul pakiččou juvva, sinä iče pakiččizit Hänel, i Häi sinule andas eläviä vetty.» 11Naine sanoi: «Hyvä ristikanzu, eihäi sinul ole ni ast՚ettu, a kaivo on syvä. Kuspäibo sinä ottazit eläviä vetty? 12Ethäi ole suurembi Juakoi-tuattua, kudai andoi meile tämän kaivon? Häi iče joi tämän kaivon vetty, täs kaivospäi juodih hänen poijat dai karju.» 13Iisus vastai hänele: «Sidä, kudai juou tädä vetty, rubieu uvvessah juotattamah, 14no ken juou minun annettuu vetty, sidä enämbi nikonzu ei juotata. Sit vies, kudaman minä annan, häneh roih silmykaivo, kudamas rubieu nouzemah ilmanigäzen elaijan vetty.» 15Naine sanoi: «Hyvä ristikanzu, anna minule sidä vetty. Sit minuu ei rubie enämbi juotattamah, eigo minul enämbi pie kävvä tänne viele.»
16Iisus sanoi hänele: «Mene kuču tänne ukkuodas.» 17«Ei minul ole ukkuo», vastai naine. Iisus sanoi: «Toven sanoit: ei sinul ole ukkuo. 18Viizi ukkuo sinul oli, i se, kudamanke nygöi elät, ei ole sinun ukko. Täs pagizit tottu.» 19Naine sanoi: «Hyvä ristikanzu, minä näin, sinä olet Jumalan iänenkandai. 20Meijän tuatat kumardeltihes da molittihes Jumalale täl mäil, a työ, jevreit, sanotto: Jerusalimas on se kohtu, kus pidäy moliekseh.» 21Iisus vastai: «Usko minuu, naine, tulou aigu, konzu työ etto molei Tuatale täl mäil, ettogo Jerusalimas. 22Työ kumardelettokseh moizele, kudamua iče etto tunne. Myö kumardelemmokseh Hänele, kudaman tunnemmo, kačo, ku piäzendy tulou jevreilöispäi. 23Roih aigu – i se on jo tulluh – konzu tozi molijat molitahes Tuatale hengel i tovel. Moizii molijoi Tuatto tahtou. 24Jumal on hengi, i sendäh niilöil, kudamat Hänele molitahes, pidäy moliekseh hengel da tovel.» 25Naine sanoi: «Messii tulou, sen minä tiijän.» – Messii se on Hristos. – «Konzu Häi tulou, Häi sanou meile kaiken.» 26Iisus sanoi: «Minä se olen, minä, kudai pagizen sinunke täs.»
27Silkeskie opastujat tuldih sinne. Hyö diivuittihes, ku Iisus pagizi naizenke, no yksikai niken ei kyzynyh, midä Häi tahtoi da mikse Häi pagizi naizenke. 28Naine jätti veziastien sih, meni linnah i sanoi rahvahale: 29«Tulgua kaččomah miesty, kudai saneli minule kai, midä minä olen ruadanuh! Eigo Häi olle Messii?» 30Rahvas lähtiettih linnaspäi i tuldih Iisusan luo.
31Sil välil opastujat sanottih Iisusale: «Ravvi, tule syömäh.» 32No Häi sanoi heile: «Minul on syömisty, kudamah näh työ etto ni tiijä.» 33Opastujat paistih keskenäh: «Ollougo kentahto tuonnuh Hänele syömisty?» 34No Iisus jatkoi: «Minun syömizenny on täyttiä minun Työndäjän tahto da vediä Hänen ruado loppuh suate. 35Työ sanotto: ‘Vie on n՚elli kuudu vil՚l՚an leikkuandah.’ A minä sanon: Kačokkua ičes ymbäri! Pellot jo ollah kellistynnyöt leikattavakse. 36Leikkuaju jo nygöi suau palkan, häi keriäy vil՚l՚ua ilmanigäzeh elaigah, i kylväi voibi ihastellakseh yhtes leikkuajanke. 37Täh pädöy sanondu: ‘Yksi kylväy, toine leikkuau.’ 38Minä työnnin teidy leikkuamah sidä, min täh työ etto nähnyh vaivua. Toizet ruattih ruado, no työ piäzettö leikkuamah sualistu, kudaman kazvattajes hyö nähtih vaivua.»
39Äijät sen samarielazen linnan eläjis uskottih Iisussah, ku kuultih naizen sanat: «Häi saneli minule kai, midä minä olen ruadanuh.» 40Konzu samarielazet tuldih Iisusan luo, hyö pokoroittihes Hänele jiähä heijän luo, i Häi jäi sinne kahtekse päiviä. 41Iisusan sanoin kuultuu enämbät i enämbät uskottih Häneh, 42i hyö sanottih naizele: «Nygöi enämbi emmo usko vaiku sinun sanoin täh. Myö iče saimmo kuulta Händy da tiijämmö, Häi toven on muailman Piästäi.»
Iisus piästäy virguniekan poijan
43Kahten päivän mendyy Iisus lähti siepäi Galileih. 44Häi oli iče enne sanonuh: «Ei pietä čestis Jumalan iänenkandajua omal kodimual.» 45No nygöi, konzu Häi tuli Galileih, galileilazet vastattih Händy hyväl mielel. Hyögi, näit, oli käydy Jerusalimah pruazniekkah da sie nähty, midä Iisus pruazniekan aigah oli luadinuh.
46Iisus uvvessah tuli Galilein Kuanah, kus Häi oli muuttanuh vien viinakse. Kapernaumas oli suarin virguniekku, kudaman poigu oli voimatoi. 47Ku häi kuuli Iisusan tulendas Juudiespäi Galileih, häi lähti Iisusan luo da pokoroiččih tulemah da piästämäh hänen poigua, kudai oli kuolemas. 48Iisus sanoi hänele: «Työ etto usko sini, kuni etto nähne tunnusruadoloi da kummii.» 49No virguniekku pokoroiččihes: «Ižändy, tule, kuni poigu ei kuolluh.» 50Sit Iisus sanoi: «Mene kodih. Sinun poigu rubieu elämäh.»
Mies uskoi, midä Iisus sanoi hänele, i lähti. 51Matkal hänele vastah tuldih hänen käskyläzet, i sanottih hänele: «Poigas piäzi.» 52Mies kyzyi heil, mil aigua poigu oli alganuh toibuo, i hyö vastattih: «Egläi seiččemendel čuasul žuaru hänes lähti.» 53Sit tuattah ellendi, se rodih juuri sil aigua, konzu Iisus sanoi hänele: «Sinun poigu rubieu elämäh», i häi da kogo hänen taloin vägi uskottih Iisussah. 54Tämä oli Iisusan toine tunnusruado, i tämän Häi luadii, konzu tuli Juudiespäi Galileih.
(c) Biblienkiännändyinstituuttu, Helsinki 2003
Iivan 4
4
Iisus da samarielaine naine
1Konzu Iisus sai tiediä, fariseit kuultih, buite Häi keräi iččeh ymbäri enämbän opastujii da ristii rahvastu enämbän kui Iivan, 2hos Iisus iče ei ristinyh, a Hänen opastujat ristittih, 3Häi lähti Juudiespäi da meni uvvessah Galileih. 4Hänel pidi matkata Samarien kauti.
5Matkal Iisus tuli Samarien Sikar-nimizeh linnah. Sen lähäl oli muapalaine, kudaman Juakoi oli andanuh Josif-poijale, 6i sie oli Juakoin silmykaivo. Dorogas väzynyh Iisus istuihes kaivon luo. Oli keskipäivänaigu, kuvven čuasun mail.
7Yksi samarielaine naine tuli viele, i Iisus sanoi hänele: «Anna minule juvva.» 8Opastujat oli mendy linnah syömisty ostamah. 9Naine sanoi: «Sinähäi olet jevrei, kuibo sinä voit pakita juvva samarielazel naizel?» Jevreit, näit, pyzyttih eriže samarielazis.
10Iisus sanoi naizele: «Ku sinä tiedäzit, min Jumal andau lahjakse, da ku tiedäzit, ken sinul pakiččou juvva, sinä iče pakiččizit Hänel, i Häi sinule andas eläviä vetty.» 11Naine sanoi: «Hyvä ristikanzu, eihäi sinul ole ni ast՚ettu, a kaivo on syvä. Kuspäibo sinä ottazit eläviä vetty? 12Ethäi ole suurembi Juakoi-tuattua, kudai andoi meile tämän kaivon? Häi iče joi tämän kaivon vetty, täs kaivospäi juodih hänen poijat dai karju.» 13Iisus vastai hänele: «Sidä, kudai juou tädä vetty, rubieu uvvessah juotattamah, 14no ken juou minun annettuu vetty, sidä enämbi nikonzu ei juotata. Sit vies, kudaman minä annan, häneh roih silmykaivo, kudamas rubieu nouzemah ilmanigäzen elaijan vetty.» 15Naine sanoi: «Hyvä ristikanzu, anna minule sidä vetty. Sit minuu ei rubie enämbi juotattamah, eigo minul enämbi pie kävvä tänne viele.»
16Iisus sanoi hänele: «Mene kuču tänne ukkuodas.» 17«Ei minul ole ukkuo», vastai naine. Iisus sanoi: «Toven sanoit: ei sinul ole ukkuo. 18Viizi ukkuo sinul oli, i se, kudamanke nygöi elät, ei ole sinun ukko. Täs pagizit tottu.» 19Naine sanoi: «Hyvä ristikanzu, minä näin, sinä olet Jumalan iänenkandai. 20Meijän tuatat kumardeltihes da molittihes Jumalale täl mäil, a työ, jevreit, sanotto: Jerusalimas on se kohtu, kus pidäy moliekseh.» 21Iisus vastai: «Usko minuu, naine, tulou aigu, konzu työ etto molei Tuatale täl mäil, ettogo Jerusalimas. 22Työ kumardelettokseh moizele, kudamua iče etto tunne. Myö kumardelemmokseh Hänele, kudaman tunnemmo, kačo, ku piäzendy tulou jevreilöispäi. 23Roih aigu – i se on jo tulluh – konzu tozi molijat molitahes Tuatale hengel i tovel. Moizii molijoi Tuatto tahtou. 24Jumal on hengi, i sendäh niilöil, kudamat Hänele molitahes, pidäy moliekseh hengel da tovel.» 25Naine sanoi: «Messii tulou, sen minä tiijän.» – Messii se on Hristos. – «Konzu Häi tulou, Häi sanou meile kaiken.» 26Iisus sanoi: «Minä se olen, minä, kudai pagizen sinunke täs.»
27Silkeskie opastujat tuldih sinne. Hyö diivuittihes, ku Iisus pagizi naizenke, no yksikai niken ei kyzynyh, midä Häi tahtoi da mikse Häi pagizi naizenke. 28Naine jätti veziastien sih, meni linnah i sanoi rahvahale: 29«Tulgua kaččomah miesty, kudai saneli minule kai, midä minä olen ruadanuh! Eigo Häi olle Messii?» 30Rahvas lähtiettih linnaspäi i tuldih Iisusan luo.
31Sil välil opastujat sanottih Iisusale: «Ravvi, tule syömäh.» 32No Häi sanoi heile: «Minul on syömisty, kudamah näh työ etto ni tiijä.» 33Opastujat paistih keskenäh: «Ollougo kentahto tuonnuh Hänele syömisty?» 34No Iisus jatkoi: «Minun syömizenny on täyttiä minun Työndäjän tahto da vediä Hänen ruado loppuh suate. 35Työ sanotto: ‘Vie on n՚elli kuudu vil՚l՚an leikkuandah.’ A minä sanon: Kačokkua ičes ymbäri! Pellot jo ollah kellistynnyöt leikattavakse. 36Leikkuaju jo nygöi suau palkan, häi keriäy vil՚l՚ua ilmanigäzeh elaigah, i kylväi voibi ihastellakseh yhtes leikkuajanke. 37Täh pädöy sanondu: ‘Yksi kylväy, toine leikkuau.’ 38Minä työnnin teidy leikkuamah sidä, min täh työ etto nähnyh vaivua. Toizet ruattih ruado, no työ piäzettö leikkuamah sualistu, kudaman kazvattajes hyö nähtih vaivua.»
39Äijät sen samarielazen linnan eläjis uskottih Iisussah, ku kuultih naizen sanat: «Häi saneli minule kai, midä minä olen ruadanuh.» 40Konzu samarielazet tuldih Iisusan luo, hyö pokoroittihes Hänele jiähä heijän luo, i Häi jäi sinne kahtekse päiviä. 41Iisusan sanoin kuultuu enämbät i enämbät uskottih Häneh, 42i hyö sanottih naizele: «Nygöi enämbi emmo usko vaiku sinun sanoin täh. Myö iče saimmo kuulta Händy da tiijämmö, Häi toven on muailman Piästäi.»
Iisus piästäy virguniekan poijan
43Kahten päivän mendyy Iisus lähti siepäi Galileih. 44Häi oli iče enne sanonuh: «Ei pietä čestis Jumalan iänenkandajua omal kodimual.» 45No nygöi, konzu Häi tuli Galileih, galileilazet vastattih Händy hyväl mielel. Hyögi, näit, oli käydy Jerusalimah pruazniekkah da sie nähty, midä Iisus pruazniekan aigah oli luadinuh.
46Iisus uvvessah tuli Galilein Kuanah, kus Häi oli muuttanuh vien viinakse. Kapernaumas oli suarin virguniekku, kudaman poigu oli voimatoi. 47Ku häi kuuli Iisusan tulendas Juudiespäi Galileih, häi lähti Iisusan luo da pokoroiččih tulemah da piästämäh hänen poigua, kudai oli kuolemas. 48Iisus sanoi hänele: «Työ etto usko sini, kuni etto nähne tunnusruadoloi da kummii.» 49No virguniekku pokoroiččihes: «Ižändy, tule, kuni poigu ei kuolluh.» 50Sit Iisus sanoi: «Mene kodih. Sinun poigu rubieu elämäh.»
Mies uskoi, midä Iisus sanoi hänele, i lähti. 51Matkal hänele vastah tuldih hänen käskyläzet, i sanottih hänele: «Poigas piäzi.» 52Mies kyzyi heil, mil aigua poigu oli alganuh toibuo, i hyö vastattih: «Egläi seiččemendel čuasul žuaru hänes lähti.» 53Sit tuattah ellendi, se rodih juuri sil aigua, konzu Iisus sanoi hänele: «Sinun poigu rubieu elämäh», i häi da kogo hänen taloin vägi uskottih Iisussah. 54Tämä oli Iisusan toine tunnusruado, i tämän Häi luadii, konzu tuli Juudiespäi Galileih.
(c) Biblienkiännändyinstituuttu, Helsinki 2003