Yohanes 10
10
Wam ndomba malenombogo agarik wene
1Yugirigya lagagirik, Yesus en ambi inim yugirigya dugwit, “Dibas! It ap ndomba awilola ilim leget akma nunggugu dugwit, ndanggi yendaleksup nonggegetek leget anggop ovasup nungguguselok andi, ap enonggop welagwi menda aro. 2Eke, ap ambi ndanggi yendaleksup nunggwigya halok andi, ap ndomba malenombogo agarik menda aro. 3At ndomba malenombogo agarik menda ako wagya halok, ap sup malogo agarik akoen sup huririsiga. At andomba ako at ane hulisagwi atma, ininis adik-adik erogombo woginiviluk wilisiga. 4At andomba adik-adik ovok erogo woginiviluk wulukluk, at endak lagya hegek, at andomba ako ane inilup atma, at ambetaga amusek lendagwi. 5Ap hunogo enambetaga lendagwidek. Ap hunogo andi, enane dibagetek atma, hoda wulusogom, yiluk, yukheraliga,” yugeragagi.
6At Yesus en wene atok hwilagago andi yugeragagi ovara, “Wene yi, anderogo yukneraliga,” yiluk, it dibagetek-at welagagwa.
“Wam ndomba segerogo malinivisiga andi, An aro,” yugeragagi wene
7Dibagetek welagagwama, At Yesus en ambi inim yugirigya dugwit, “Sup ndanggi yendaleksup wam ndomba nunggu wendagwima An aro. 8An wagatek neyagek, it ap enendak wagagwa ako ovok enonggop welagwi menda adigat wagagwarikmu, ndomba en it enane enaruk hunggitek-at welagagwa. 9Sup An aro. It ap sup An agirik yi vaga nungguguselok, enagap wendarek-at dogosogom. Enagap wendarek werekma, winggik-nonggegek yugu dugwit, ludak abit sek menda nenggek lagu dogosogom. 10It ap enonggop akoen ndomba enonggop hedugwi, initwis, degerogo bugwis, ogaruguluk wendagwi ovara, An andi, iniluk oginivigiluk, wagagis. Iniluk oginivisigama dugwit, enendawi adenggen mondok wisane hegek-hegek hapwak yiluk wagagis.”
11“Wam ndomba segerogo malinivisiga andi, An aro. At ndomba segerogo malinivisiga akoen andomba enake hambisogon ombasiga. Enake hambisogon ombasiga ovara, 12it ap ninen, ‘Yi nit nenandomba dek,’ yiluk, des erogo malenombogo agarwikbuk. It ap andi, un onggo hedasogom, umbutu dugwit, it akoen andi, yangge do wagya inil hugu lagarwik, ndomba nggelabisiluk, hoda wilisagwi. Wunggusigik, yangge do akoen ndomba aik hivirinipu dugwit, sak okbisaliga. 13It ap ndomba des erogo malinivisagwidek ako, un onggo hedasogom, umbutu dugwit, malenombogo agarwik atma, yangge do wagya halok, ndomba nggelabisiluk, wilisagwi.”
14-15“Wam Ndomba sek erogo malinivisiga ako An aro. Nasin en An ilup agarik, eke, Anen At nilup agirik ako wane-wane, An anderogoat nanggom ndomba nilup, eke, iren An inilup-at agarwik. Anderogo dugwit, An nanggom ndomba enake hambisogon ombasiga. 16An nanggom ndomba ilim yoma adigat agarwikbuk. Nin adik o hunogoma werekma, woginivit lagya dogomindik, inim bisa warup atma, bisa warimima dugwit, it An nane hulusogom. Eke, eneyave ambi dambulik inigik, An nadigat eneyave malenombogo dogosogon o.”
17“Niluk arigiluk, hambisogon ombasiga andien, Nasin endawi hunik okneraliga. 18An narup andi, it avakwa en umbutu dugwit narup meyan. An nendawi ombakluk enat hambisogon. An hambisogon imbita neyalok andi, hambigya, eke, niluk arisogon imbita neyalok andi, niluk agya, ogagya dogogiluk, Nasin en andok okbaninggigi, yiluk, mondok avyarat yukheraliga o,” yugeragagi.
19Wene andi yugeragagi vaga it Yakuri menda enendawi wisane ogot hedagagwa. 20Ogot hudugu dugwit, it ninen, “At madis endawima nunggwigya lagarik, nenek ogagya hegek, nggarogo yiluk At ane hulisagwi?”
21Yugusigik, it ninen, “Dek. Wene andi, ap madis endawima dugwit yagaligadek. Madis en ap inil mbuk sek okbisaup sek embetep? Dek o,” yiluk, yagagwa.
It Yakuri menda en Yesus mbobagagwa wene
22Andi okbaluk, hivis it ap Yakuri menda Ala awi valek segerogo wet ogagu lagagwarik, adenggen ogagagwa ako enape wenggenggu dugwit o Yerusalem andoma isogo isarup ako vage horok-horok ari wagagi. O andi vaga soges hunik welagagirikmu, 23Yesus Ala awi ombok valek awi ambi adik ogarek ilim andoma inis Salomo akoma lagagirik, nagu lagagi. 24Andoma naguma, it Yakuri menda At adema homari wagu lagagwarik, yugugu dugwit, “Nenendawi anggin ninigik ndugwis maren dogomi? Ala en Nenowa Inis Ombok denogo mondok okbagagi Keretus ako Harat halok andi, mondok sigam erogo yukneran.”
25Yugugu lagagwama, At Yesus en, “An vage yukhirigi ovara, hit avyarat nembetetek-at agipik. Nasin inis vaga ogasiga akoen Nasin en lakbani wagagi ako navok sigam asiga ovara, 26hit An nanggom ndomba menda agipikbuk atma, An avyarat nembetetek-at hinigis. 27An nanggom ndomba andi, An nane hulisagwi. An andi it nilup agirik atma, iren An nambetaga namusek wendagwi. 28An nambetaga namusek waguselok, An mondok-mondok iniluk oginivisiga andien, it degerogo bisaup mondok dek o. Eke, avakwa en ogo, An ninggimu en ndiyalinuvusogom mondok dek. 29Yi ap ndi ap enanye andi horok madugat ovara, nanggom ndomba wisane woknigigi Nasin ako andi, adik anye wisane agarik atma, avakwa en ndomba An Nasin inggimu en ndiyalinuvusogom mondok dek o. 30An inim, Nasin inim andi, nit ambiat agurik o,” yiluk, yugeragagi.
31Yugirigya lagagimu, it Yakuri menda en Yesus ambi inim warugen yiluk, helep wagagwa. 32Wugu lagagwama, Yesus en it yugirigya dugwit, “An sek ogagya dogop Nasin en yuknogogi ako hit havovok yiluk, wisane erogo ogagya lagi ovara, ambi ngga ogagi vaga hit yogak helep vaga An naruguluk, ogasagwi?”
33Yugirigya lagagimu, it Yakuri menda en, “Hat sek ogagen vaga harusogombuk. Ata, Ala wiyiknom-weyaknom erogo bagya, eke, hat un eve ap-at ovara, Ala ovagak okhedegek lagya, ogasiga andi vaga-at harusogom.”
34 #
Mazmur 82:6 yokhanes. Yugugu lagagwama, At Yesus en it yugirigya dugwit, “Ala Wene Musa Wene hit vagago agipik ako vaga, Ala en iri dugwit, ‘Hit heneyave ala-at ovagak agipik o,’ yiluk, yugeragagi dirup warek agarik akora? 35Ala wene dirup warek andi, adik huluk molalogo yagaligadek nit ninilup. Anderogo atma, Ala en it avakwa At ane hunggugwa ako, ‘Hit heneyave ala-at ovagak agipik o,’ yiluk, yugeragagi atma, 36Anen, ‘An Ala abut o,’ yagaliga andi vaga, hiren, ‘Hat Ala wiyiknom-weyaknom erogo baliga o,’ nggarogo yiluk yuknisagwi? Nasin Ala enat An denogo baninggya lagagirik, wen vaga yoma lakbani wagagi ovara, nggarogo yiluk anderogo yuknisagwi? 37An Nasin ogasiga ako, An anderogo ogaklibuk en, hit henendawi novaga vanggabaluk avyarat nombarusogombuk andi ogo, segat. 38Segat ovara, An Nasin ogasiga menda ogagya neyagek, hit ao henendawi An novaga vanggabaluk avyarat nombarusogombuk halok, An nggarogo ogarubuk menda ogasiga ako andi adigat avyarat umbutu dogones. An Nasin ninim hunik, eke, An At inim hunik, anderogo agurik hinilup arovovok yiluk, nggarogo ogarubuk menda ogasiga ako andi adigat avyarat umbutu dogones,” yiluk, yugeragagi.
39Yugirigya lagagimu, At ambi inim vagarugen yiluk ogagagwa ovara, ininggimu en weralogo hekbisiluk, winggigi.
40Wunggu lagagirik, is Yorodan elavikit at Yohanes endak avakwa ima wombabugu lagagirikmu akoma mbup yi lagagi. 41Andenam werekma, avakwa wisane At adema wagu lagagwarik, “At Yohanes en ninilup arup nenalon werek menda ogagya lagetek ovara, aren At Yesus yi, avok yuknirigya lagagi ako andi, avyarat yuknirigya lagagi higyo,” yiluk, yagagwa. 42Eke, o andoma avakwa wisane enendawi Yesus ovaga vanggabaluk, avyarat umbutugwa.
נבחרו כעת:
Yohanes 10: nbq2013
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Yohanes 10
10
Wam ndomba malenombogo agarik wene
1Yugirigya lagagirik, Yesus en ambi inim yugirigya dugwit, “Dibas! It ap ndomba awilola ilim leget akma nunggugu dugwit, ndanggi yendaleksup nonggegetek leget anggop ovasup nungguguselok andi, ap enonggop welagwi menda aro. 2Eke, ap ambi ndanggi yendaleksup nunggwigya halok andi, ap ndomba malenombogo agarik menda aro. 3At ndomba malenombogo agarik menda ako wagya halok, ap sup malogo agarik akoen sup huririsiga. At andomba ako at ane hulisagwi atma, ininis adik-adik erogombo woginiviluk wilisiga. 4At andomba adik-adik ovok erogo woginiviluk wulukluk, at endak lagya hegek, at andomba ako ane inilup atma, at ambetaga amusek lendagwi. 5Ap hunogo enambetaga lendagwidek. Ap hunogo andi, enane dibagetek atma, hoda wulusogom, yiluk, yukheraliga,” yugeragagi.
6At Yesus en wene atok hwilagago andi yugeragagi ovara, “Wene yi, anderogo yukneraliga,” yiluk, it dibagetek-at welagagwa.
“Wam ndomba segerogo malinivisiga andi, An aro,” yugeragagi wene
7Dibagetek welagagwama, At Yesus en ambi inim yugirigya dugwit, “Sup ndanggi yendaleksup wam ndomba nunggu wendagwima An aro. 8An wagatek neyagek, it ap enendak wagagwa ako ovok enonggop welagwi menda adigat wagagwarikmu, ndomba en it enane enaruk hunggitek-at welagagwa. 9Sup An aro. It ap sup An agirik yi vaga nungguguselok, enagap wendarek-at dogosogom. Enagap wendarek werekma, winggik-nonggegek yugu dugwit, ludak abit sek menda nenggek lagu dogosogom. 10It ap enonggop akoen ndomba enonggop hedugwi, initwis, degerogo bugwis, ogaruguluk wendagwi ovara, An andi, iniluk oginivigiluk, wagagis. Iniluk oginivisigama dugwit, enendawi adenggen mondok wisane hegek-hegek hapwak yiluk wagagis.”
11“Wam ndomba segerogo malinivisiga andi, An aro. At ndomba segerogo malinivisiga akoen andomba enake hambisogon ombasiga. Enake hambisogon ombasiga ovara, 12it ap ninen, ‘Yi nit nenandomba dek,’ yiluk, des erogo malenombogo agarwikbuk. It ap andi, un onggo hedasogom, umbutu dugwit, it akoen andi, yangge do wagya inil hugu lagarwik, ndomba nggelabisiluk, hoda wilisagwi. Wunggusigik, yangge do akoen ndomba aik hivirinipu dugwit, sak okbisaliga. 13It ap ndomba des erogo malinivisagwidek ako, un onggo hedasogom, umbutu dugwit, malenombogo agarwik atma, yangge do wagya halok, ndomba nggelabisiluk, wilisagwi.”
14-15“Wam Ndomba sek erogo malinivisiga ako An aro. Nasin en An ilup agarik, eke, Anen At nilup agirik ako wane-wane, An anderogoat nanggom ndomba nilup, eke, iren An inilup-at agarwik. Anderogo dugwit, An nanggom ndomba enake hambisogon ombasiga. 16An nanggom ndomba ilim yoma adigat agarwikbuk. Nin adik o hunogoma werekma, woginivit lagya dogomindik, inim bisa warup atma, bisa warimima dugwit, it An nane hulusogom. Eke, eneyave ambi dambulik inigik, An nadigat eneyave malenombogo dogosogon o.”
17“Niluk arigiluk, hambisogon ombasiga andien, Nasin endawi hunik okneraliga. 18An narup andi, it avakwa en umbutu dugwit narup meyan. An nendawi ombakluk enat hambisogon. An hambisogon imbita neyalok andi, hambigya, eke, niluk arisogon imbita neyalok andi, niluk agya, ogagya dogogiluk, Nasin en andok okbaninggigi, yiluk, mondok avyarat yukheraliga o,” yugeragagi.
19Wene andi yugeragagi vaga it Yakuri menda enendawi wisane ogot hedagagwa. 20Ogot hudugu dugwit, it ninen, “At madis endawima nunggwigya lagarik, nenek ogagya hegek, nggarogo yiluk At ane hulisagwi?”
21Yugusigik, it ninen, “Dek. Wene andi, ap madis endawima dugwit yagaligadek. Madis en ap inil mbuk sek okbisaup sek embetep? Dek o,” yiluk, yagagwa.
It Yakuri menda en Yesus mbobagagwa wene
22Andi okbaluk, hivis it ap Yakuri menda Ala awi valek segerogo wet ogagu lagagwarik, adenggen ogagagwa ako enape wenggenggu dugwit o Yerusalem andoma isogo isarup ako vage horok-horok ari wagagi. O andi vaga soges hunik welagagirikmu, 23Yesus Ala awi ombok valek awi ambi adik ogarek ilim andoma inis Salomo akoma lagagirik, nagu lagagi. 24Andoma naguma, it Yakuri menda At adema homari wagu lagagwarik, yugugu dugwit, “Nenendawi anggin ninigik ndugwis maren dogomi? Ala en Nenowa Inis Ombok denogo mondok okbagagi Keretus ako Harat halok andi, mondok sigam erogo yukneran.”
25Yugugu lagagwama, At Yesus en, “An vage yukhirigi ovara, hit avyarat nembetetek-at agipik. Nasin inis vaga ogasiga akoen Nasin en lakbani wagagi ako navok sigam asiga ovara, 26hit An nanggom ndomba menda agipikbuk atma, An avyarat nembetetek-at hinigis. 27An nanggom ndomba andi, An nane hulisagwi. An andi it nilup agirik atma, iren An nambetaga namusek wendagwi. 28An nambetaga namusek waguselok, An mondok-mondok iniluk oginivisiga andien, it degerogo bisaup mondok dek o. Eke, avakwa en ogo, An ninggimu en ndiyalinuvusogom mondok dek. 29Yi ap ndi ap enanye andi horok madugat ovara, nanggom ndomba wisane woknigigi Nasin ako andi, adik anye wisane agarik atma, avakwa en ndomba An Nasin inggimu en ndiyalinuvusogom mondok dek o. 30An inim, Nasin inim andi, nit ambiat agurik o,” yiluk, yugeragagi.
31Yugirigya lagagimu, it Yakuri menda en Yesus ambi inim warugen yiluk, helep wagagwa. 32Wugu lagagwama, Yesus en it yugirigya dugwit, “An sek ogagya dogop Nasin en yuknogogi ako hit havovok yiluk, wisane erogo ogagya lagi ovara, ambi ngga ogagi vaga hit yogak helep vaga An naruguluk, ogasagwi?”
33Yugirigya lagagimu, it Yakuri menda en, “Hat sek ogagen vaga harusogombuk. Ata, Ala wiyiknom-weyaknom erogo bagya, eke, hat un eve ap-at ovara, Ala ovagak okhedegek lagya, ogasiga andi vaga-at harusogom.”
34 #
Mazmur 82:6 yokhanes. Yugugu lagagwama, At Yesus en it yugirigya dugwit, “Ala Wene Musa Wene hit vagago agipik ako vaga, Ala en iri dugwit, ‘Hit heneyave ala-at ovagak agipik o,’ yiluk, yugeragagi dirup warek agarik akora? 35Ala wene dirup warek andi, adik huluk molalogo yagaligadek nit ninilup. Anderogo atma, Ala en it avakwa At ane hunggugwa ako, ‘Hit heneyave ala-at ovagak agipik o,’ yiluk, yugeragagi atma, 36Anen, ‘An Ala abut o,’ yagaliga andi vaga, hiren, ‘Hat Ala wiyiknom-weyaknom erogo baliga o,’ nggarogo yiluk yuknisagwi? Nasin Ala enat An denogo baninggya lagagirik, wen vaga yoma lakbani wagagi ovara, nggarogo yiluk anderogo yuknisagwi? 37An Nasin ogasiga ako, An anderogo ogaklibuk en, hit henendawi novaga vanggabaluk avyarat nombarusogombuk andi ogo, segat. 38Segat ovara, An Nasin ogasiga menda ogagya neyagek, hit ao henendawi An novaga vanggabaluk avyarat nombarusogombuk halok, An nggarogo ogarubuk menda ogasiga ako andi adigat avyarat umbutu dogones. An Nasin ninim hunik, eke, An At inim hunik, anderogo agurik hinilup arovovok yiluk, nggarogo ogarubuk menda ogasiga ako andi adigat avyarat umbutu dogones,” yiluk, yugeragagi.
39Yugirigya lagagimu, At ambi inim vagarugen yiluk ogagagwa ovara, ininggimu en weralogo hekbisiluk, winggigi.
40Wunggu lagagirik, is Yorodan elavikit at Yohanes endak avakwa ima wombabugu lagagirikmu akoma mbup yi lagagi. 41Andenam werekma, avakwa wisane At adema wagu lagagwarik, “At Yohanes en ninilup arup nenalon werek menda ogagya lagetek ovara, aren At Yesus yi, avok yuknirigya lagagi ako andi, avyarat yuknirigya lagagi higyo,” yiluk, yagagwa. 42Eke, o andoma avakwa wisane enendawi Yesus ovaga vanggabaluk, avyarat umbutugwa.
