Yohanes 3
3
Yesus Nikodemus iperen wene mbanggugwa wene
1Ap ambi Yakuri menda enasin, inis Nikodemus-at welagagi. At ako it ap Varisi menda enawene vagago welagagi. 2At ako ndugwis ambi vaga o hup Yesus adema wagya lagagirik, yugugu dugwit, “Ngguru wai! Hat avakwa mamulirigya dogonyok yiluk, Ala en lakbaga wagagi ninilup aro. Avakwa Ala inim hunik dek halok, inilup arup enalon werek menda hat ogarit landiga ako, iren ogarup mondok meyan.”
3Yugugu lagagimu, At Yesus en wene onggo at yugugu dugwit, “Ap ambi saen ambi inim swi endaklagatek halok, Ala avema bisaligama il hayogonbuk, yiluk, mondok avyarat yukhisiga.”
4Yugugu lagagimu, at Nikodemus en, “A! Ap ambi anggok aklukmu, hivis nggarogonggan en swi endaklarup yegen? At isa elola nungguluk, ambi inim swi endaklarup sek atma yiluk, yagaliga yi? Mondok meyan.”
5Yugugu lagagimu, At Yesus en, “Avakwa ambi saen is vaga inim, Ala Averiniki vaga inim, swi endaklagatek halok, Ala avema bisaligama nunggusogom mondok dek o, yiluk, avyarat yukhisiga. 6Avakwa en endaginivisagwi andi, it avakwa-at endaklarisagwi. Eke, Ala Averiniki en endaginivisiga andi, At Ala Averiniki menda-at swi endaklarisagwi. 7Anderogo atma, ambi inim swi endaklarup wene yukhigis yi ako, ‘Wi!’ yiluk, vok yubuk. 8O havut andi, endagen-at lavuliluk wandiga. Lavuliluk wagya hegek, ane iris haruk hulisiga ovara, nggoma en lavuliluk wagya, o nggomanggan warit lagya, ogasiga andi hat hinggut. Anderogo hak, it avakwa Ala Averiniki en endaginivisiga ako andi, anderogoat ogasiga o.”
9Yugugu lagagimu, at Nikodemus en, “Anderogo yegen ako, nggarogonggan en ogarup yiluk yegen?”
10Yugugu lagagimu, At Yesus en, “Hat avakwa Iserali menda mamuleraliga ovara, An wene yukhisiga yi, dibagetek agindik? 11Ninilup halok adigat yukhirugwi, ninil higyo ako vagalogo yukhirugwi, ogasagwi ovara, vagalogo yukherelagwi ako hit wegetek-at agipik o, yiluk, mondok avyarat yukhisiga. 12Anen wene wema menda avok yukheraliga ako hit avyarat embetetekma, mbogot vaga wene yukhirigya neyalok, nggarogonggan avyarat ombarusogom embetep? Meyan. 13Ap ambi arogo wema en mbogot vaga mondok enggetek ovara, An Ap-At Endaklagagis yi, nadigat mbogot vaga en wambu wagagis o.”
14-15“At Musa o harumu dugwit, mbas agur-agut wakhegek ogarogo yo vaga ilik bagagi. Ilik bagagi ako hak, An Ap-At Endaklagagis ako, anderogoat yo vaga ilik banugup. It avakwa enendawi novaga vanggabaluk, avyarat numbutuselok, mondok-mondok iniluk dogopwak yiluk, An anderogoat yo vaga ilik banugup.”
16“At Ala en yi avakwa ndi avakwa ovok erogo enabwa ombok erogo imbitigirikmu, At Abut adik ambengga Anat lakbani wagagi. Anderogo atma, it avakwa enendawi novaga vanggabaluk, avyarat numbutuselok, degerogo bisayogonbuk iniluk mondok-mondok-at dogosogom. 17Ala en At Abut An ako it avakwa ovok enowak dilogo weyak onggo enovaga bisagiluk, o wen vaga yoma lakbani wagetek. Ata, yi avakwa ndi avakwa enagap wendarupwak yiluk At lakbani wagagi.”
18“It avakwa enendawi An novaga vanggabaluk, avyarat numbutuselok, Ala en enowak dilogo weyak onggo enovaga bisayogonbuk. Anderogo ovara, it enendawi An novaga vanggabaluk, avyarat nembetetek iniselok andi, it enendawi Ala Abut adik ambengga An ako novaga vanggabaluk, avyarat nembetetekma, vage enowak dilogo weyak onggo enovaga bigigirikmu agarwik. 19Ala en enowak dilogo weyak onggo enovaga bisaup adem ako yiat: At awiya oginivisiga menda ako o wen vaga yoma vage wambu wagagi. Wambu wagagi ovara, it avakwa andi, weyak adigat ogasagwi atma, At awiya ako andi, ‘Nenanggon,’ umbutu dugwit, enendawi o hwiserekma dogop hogop ombasagwi. 20Yi ap ndi ap weyak ogasagwi akoen it weyak ogasagwi sigam agya haoen, At awiya ako andi, ‘Nenanggon o,’ yiluk, avema wendagudek. 21Anderogo ovara, it avyarat wene Ala yagagi ako ogasagwi halok andi, Ala inim hunik dugwit, ogasagwi sigam arupwak yiluk, At awiya ako avema wendagwi o,” yiluk, yugogogi.
Yohanes en Yesus avok vagalogo yugeragagi wene
22Andi yugugu lagagirik, hivis Yesus At ane welagwi menda inim o Yudea nunggugu lagagwarik, andoma inim dugwit, avakwa ima wombabugu lagagwa. 23-24Wombabugusigik, at Yohanes ako lembaga ao mabagetekma, at Yohanes ogo, o Salim horok hegek, o Ainon is wisane werekma andoma avakwa at adema waguselok, ima wombabugu lagagi.
25Ima wombabugwis werekma, ap Yohanes ane welagwi menda inim, ap Yakuri menda ambi inim, iren yi menda ndi menda adat vaga hurup wene hobalek ako vaga wenemuk yagagwa. 26Yohanes ane welagwi menda en wenemuk yiluk, Yohanes adema wagu lagagwarik, at yugugu dugwit, “Ngguru wai. At Yesus hiperen is Yorodan elavikit dugwit, avok vagalogo yugeragagin ako, ima wombabuguma, avakwa ovok erogo At adema lendagwi.”
27Yugugu lagagwama, at Yohanes en, “Avyak! Ap ambi saen Ala en okbagetek hegek, adik en endawi hobaluk ogarit laup sek embetep? Dek o. 28Avakwa enagap wendarupwak yiluk Ala en denogo mondok okbagagi ako andi, an dek o. ‘At eyave hivis warup yiluk, an endak yonggo lakbani wagagi o,’ yiluk, vagalogo yukheragagis ako, hirat henaruk hunggu lagagup. 29Hwa ambi ap en wigya halok, hwa andi, ap wagagi ako ogwa aro. At hwa hidigya aswe ako andi, un inim dugwit, ap hwa hidigya ako ane hunggu halok, adenggen wisane haliga ako ovagak andi, an aro. Anderogo atma, At ogarit lagya vaga avakwa wisane At adema laguselok, an nendawi adenggen wisane oknetas. 30At ombok agya hegek, an horok maduk avema arup sek aro,” yiluk, yugeragagi.
“At Yesus mbogot vaga en wambu wagagi,” yugeragagi wene
31Andi yugirigya lagagirik, Yohanes en ambi inim yugirigya dugwit, “It avakwa ovok erogo sovalek inigik, At mbogot vaga eloma en wagagi ako mondok siyalek agarik o. It wen vaga en endago andi, wen vaga menda atma, wen vaga menda wene adigat yagalagwi. It avakwa ovok erogo sovalek inigik, At mbogot vaga en wagagi ako, mondok siyalek-at agarik. 32At mbogot vaga en wagagi ako il hagagi inim, aruk hunggigi inim, vagalogo yugirigya hegek ovara, At vagalogo yugeraliga ako avakwa mondok wegetek-at agarwik. 33At vagalogo yugeraliga ako, it avakwa en welagwi vaga Ala avyarat yagaliga sigam erogo belagwi. 34At Ala en lakba wagagi andi, Ala en Averiniki hudi bagetek wisane erogo wogisiga andien, Ala aneat yugeraliga. 35Asin en Abut endawi hunik agarik atma, yi menda ndi menda inim, yi ogagek ndi ogagek inim, ovok erogo At Abut vagago dogopwak yiluk, andok okbagagi. 36It avakwa enendawi Ala Abut ovaga vanggabaluk, avyarat umbutuselok, mondok-mondok iniluk-at dogosogom. It mondok-mondok iniluk dogosogom ovara, it nin andi, Ala Abut ane hobaluk, ogagetek iniselok andi, iniluk dogosogombuk. Ala aninis enovaga-at dogosogon o,” yiluk, yugeragagi.
נבחרו כעת:
Yohanes 3: nbq2013
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו