Lukas 12
12
Enagavoval ogarit naguselok, yugeragagi wene
(Matius 10:26-27)
1It Ala wene vagago agarwik menda inim, ap Varisi menda inim, Yesus vagaruguluk, enaninis en aigwakma dirit-darit wugusigik, it avakwa eneyave wisane ininggis dinggilup meyan homakbaluk, hobo-hobo en enovaga sep yagan wagagwa. Sep yagan wagusigik, At Yesus en At ane welagwi menda enendak yugirigya dugwit, “It ap Varisi akoen enendawi enagavoval amulisagwi yukherelagwi. Enagavoval amulisagwi yukherelagwi ako andi ragi roti#12:1: Ragi roti virisiga menda ako, horok maduk atma yedok helagwidek ovara, andi vaga roti ombok vikbaluk sigam helagwi. Anderogo hak, it Varisi enane yukherelagwi ako, wene andi menda henendawima nunggwigya haoen, henova hwalogo dogwes yugeragagi. virisiga menda hak atma, wene andi menda henendawima nunggwigya haoen, hit henova hwalogo dogones.
2Yi wene ndi wene enendawima sovalek agarik halok andi sigam agya, eke yi ogagwi ndi ogagwi hwilago agarik halok andi vagalagya, ogarisogon o. 3Anderogoma, hit o hwiserekma dugwit, yugu lagagup ako o awiya vaga yugu hunggwis, eke, umwa ilim andoma dugwit, wene madingguruk yugu lagagup ako, o virimu en hum-naik vaga vagalogo yugurugwi, ogagya hagup,” yiluk, yugeragagi.
Ala nenalon umbutu dogop wene
(Matius 10:28-31)
4Yugirigya lagagirik, ambi yugirigya dugwit, “Ai naswei. An wene ambi yukherayogon. Avakwa en heneyave adigat henasagwi ako andi, henalon ombarubuk. Henakbaluk, nggarogo okbigigaup ombasagwi? Dek.
5Hit henalon ombasagwi ako, An hurimbis yukherayogon. At heneyave mondok henakbaluk, hali abya wuluk-herek yagaligama lakbigigaup andok ako, henalon umbutu dogones. At mondok henalon umbutu dogones o, yiluk, yukheraliga. 6Yoparip mariduk mberen vaga swa wudue eneyave 5 dambup erogo hunisagwi akora? Onggo maduk anderogo vaga huninivisagwi ovara, At Ala en swa ambiat ogo mondok inggut asigadek. 7Hit hiniris ogo ovok erogo At Ala inggis dinggilik agarik. Anderogo atma, swa mariduk eneyave wisane dambulogo At endawi hunik horogat agarik ovara, hit ako andi, At endawi hunik ombok erogo henombasiga atma, henalon umbutu dogobuk,” yugeragagi.
“Yesus andi Nenowa aro,” yiluk, vaganggu dogop wene
(Matius 10:32-33; 12:32; 10:10-20)
8Wene yugirigya lagagirik, ambi yugirigya dugwit, “Hiren avakwa inivaga, ‘Yesus andi Nenowa aro,’ yiluk, vaganggu hiniselok, An Ap-At Endaklagagis akoen it Ala yonggo lakbisa wandiga menda malaikat ako inivaga, ‘It avakwa yi, An naori aro,’ yiluk, vagalisogon. 9Eke, hit avakwa inivaga, ‘Yesus andi, ninunggut,’ yugu hiniselok andi, An ogo, it Ala yonggo lakbisa wandiga menda malaikat ako inivaga, ‘It avakwa yi An ninggurat,’ yiluk, iri neyagup, yiluk, yukheraliga.
10An Ap-At Endaklagagis ako enane wiyiknom-weyaknom erogo banungguselok, enomaduk andi, Ala en degerogo bisayogon ovara, Averiniki wiyiknom-weyaknom erogo baguselok andi, enomaduk andi, Ala en mondok degerogo bisayogonbuk.
11It avakwa Yakuri samban ogasagwima homago inim, it ap ininis werek inim, it ap ombok-ombok inim, enadema wokhiniviluk bigiga laguselok, henendawi anggin dugwit, henagap wendakhedaup ako, ‘Wene ngga yugerami,’ yiluk, henendawi wenggelubuk. 12Andi hudi wene yugeraup ako, Averiniki en, ‘Anderogo yugeran,’ yiluk, yukhirigya hagup,” yugeragagi.
Ap inggi werek ovara endawi wes ovagak yugeragagi wene
13Yugirigya lagagimu, it avakwa wisane homago ako ambien Yesus yugugu dugwit, “Ngguru wai. An nowa en nasin eyase nin higirogo woknirupwak yiluk, yuguru.”
14Yugugu lagagimu, At Yesus en, “Avyak! Henowak dilogo heneyase sumbukherapwak yiluk, Anat denogo baninggigi ombasiga a?” 15Yugugu lagagirik, Yesus en avakwa yugirigya dugwit, “Henangge wisane agarik ako vaga hiniluk dogosogombuk atma, ap enangge hogop-hogop umbutu hinisaoen, henendawi suam watu dugwit, dibagu dogwes,” yugeragagi.
16Yugirigya lagagirik, wene wakhegek vaga yugirigya dugwit, “Ap inggi werek ambien awiangge wen mudis vaga yagagirikmu, enggen yugup wisane agagi. 17Enggen yugup wisane agya lagagimu, endawi imbita dugwit, ‘Yagagis enggen yugup mbalogo baup o dek atma, nggarogo ogarik?’”
18“Imbita lagagirik, ‘Yerogo ogasogon. An o maduk yi, masalogo bagya dogomindik, o ombok erogo vabaluk, nangge inim, yagagis enggen yugup ako inim, andoma ba nunggwigya dogosogon. 19Ba nunggwigya dogomindik, nangge wisane wonggalek agarik ako ninggya neyagek yi tahun ndi tahun ogarupwak yiluk, yogak sat yanggal hidigya dugwit, erom ninggya, amburup ninggya, nendawi adenggen adigat yagan lagya, ogagya dogosogon, yiluk, nendawi en imbita dugwit ogasogon o,’ yagagi.”
20“Yagagi ovara, At Ala en, at ap ako yugugu dugwit, ‘Hat ap wes yi, wai! Yogak o hup yi vaga hat henendawi An wa warisogonma, hat vipuk erogo bagen ako hivis saen andok arimi embeten?’ yiluk, yugisogon.”
21“Anderogo atma, it avakwa enangge wen vaga menda adigat wisane okhidugu dugwit ovara, enangge eyave mbogot vaga menda okhedegetek iniselok, at ap andi ndatak aro,” yiluk, yugeragagi.
“Henendawi anggin dogobuk,” yugeragagi wene
(Matius 6:25-34)
22Yugirigya lagagirik, Yesus en At ane welagwi menda ako yugirigya dugwit, “Niniluk dogoguluk, nenagas-nenagarom nano namwi? Eke, neneyave sek dogoguluk, nenasum nano yikhedamwi?’ yiluk, henape wenggenggu dugwit henendawi anggin dogobuk, yiluk yukheraliga. 23Nelagwi menda andi, horogat ovara, hiniluk dogop andi, iya. Eke, yikhedelagwi menda andi, horogat ovara, heneyave ako andi, iya aro. 24Swa ngguragas ogasagwi ako dibas. Awi yakhidugwi, enggen mbanggwis, andi ogasagwidek. Eke, enggen mbalogo ndanggi vaga beta nunggwisagwima ogo, dek adigat ovara, At Ala en enagarom wogeraliga. Swa andi, At endawi hunik horogat hegek, Ala en enagarom wogeraliga ovara, hit andi, At endawi mondok hunik wisane atma, wokherayogonbuk yagalagwi? Wokherayogon aro.
25Hit ambi hambup vanggo yi wagya hegek, ‘Niluk ambukumat inim dukluk, hambup sek ai,’ yiluk, henendawi anggin wenggelit lagwi vaga ndatak okbugugu hagup ombasagwi? Dek. 26Henendawi anggin wenggelisagwi vaga ambukumat dukluk hambup okbigigaup meyan atma, henagarom naup inim, henasum yikhedaup inim, henendawi anggin wenggelek dogobuk.
27Yo hundumbuk mot inggya lagarik, agare enggen yiliga ako dibas. At Salomo ap mondok ombok yum pakian sek adigat yirik halok, avakwa en, ‘Wi,’ yiluk, vok yugu lagagwa ako ovara, at horogat o. Yo hundumbuk agare enggen halok andi, yavup ogagya, digi danggya, ogasigadek ovara, Ala en okbagya hegek, agare enggen mondok segedok yiligama yiluk, yukheraliga. 28Yoangga-hedangga weram menda yogak mudi-mudis inggya, eke heveret sakni baguselok, hali ninggya, ogasiga ovara, At Ala en elese sek erogo baligama, Aren yoangga ako madugat okbagya, eke, hit avakwa henendawi Ala des erogo avyarat ombasagwidek menda yi, hit mondok iya-at okbigigya, ogarisogonbuk embetep?”
29“Anderogo atma, ‘Nenagarom-nenagas nano namwi?’ yiluk, adigat henendawi wenggelit lendagwi andi, moga. Henendawi anggin dogobuk. 30It avakwa weram menda akoen, andi menda ovok erogo belalit nelagwi ovara, hit andi, ‘Nit andi menda dek,’ yiluk, hogop ombasagwi ako At Henasin ilup agarik. 31Hiren ‘An Ala avema dogop, ai,’ ombakluk, endak musek lagu hiniselok, hivis andi menda ovok erogo ovaga hondalogo wokhirigya hagup,” yiluk, yugeragagi.
Henangge wonggalogo mbogot vaga batugu dogop wene
(Matius 6:19-21)
32Yugirigya lagagirik, At Yesus en, “Naburi wai! Henasin Ala en hit At avema dogop imbitigi ako, sek menda dikduk erogo okbigigaup endawi sek imbitigirikmu, henalon habuk. 33Henangge vaga onggo hunggu dogomundik, ap ininggidek halok, yoparip wogeranes. It ap enonggop en wa nunggugwi, hudu-hudup libilit nunggwigya, ogasigadekma mbogot vaga andoma henangge eyave sek, dek arup dek ako menda yidik dogopwak yiluk, yum awi libik yagaligadek ako menda yikhidugu dogones.
34Henangge-henangge wonggalek werekma, henendawi ogo, andoma-at dogosogon o,” yiluk, yugeragagi.
Ala ayeloman halok dikduk erek dogop wene
35Wene ambi yugirigya dugwit, “Henayum, henamboranis nggitik-nggetok yirik dugwit, hininggimu indwa mondok yevedek dikduk erek dogones. 36Ap hwa hidigyama isogo isagusim akoma en ap ombok amwa sup dolen-dolen ogari wagya haoen, ayelomani en mbikit sup huthaguluk, abyam agaruk hak dogones. 37Enasin en ayelomani ako iniluk dugwit, suam watusim enadema wagya halok, adenggen enombarisogon. Suam watusim enadema wagya halok, asin en ayum nggetalogo yikbetaluk, at ayelomani isogo napwak yiluk, ambekma horabisiluk, enake ogagya dogosogon, yiluk, avyarat yukheraliga. 38O hup agako vaga warimi a, o yanggo irisim warimi a, wagya dogomindik, ayeloman anderogo iniselok, adenggen enombarisogon o.”
39“Hit dibas! At ap awi werek en, ap onggop waliga menda ako mo il andi vaga wasogon, ilup aklip en, ‘Sup lakbaluk, nangge onggop wa nunggu wagu saoen,’ yiluk, nogo yigitek mondok-mondok suam watya duklip. 40Anderogo hak, An Ap-At Endaklagagis yi, hiren, ‘O ngga vaga warup,’ nembetetek hinigik, warugwis atma, hit mondok dikduk-dakduk okbaluk dogones o,” yiluk, yugeragagi.
Ap ambi ugun-ugun ogasiga, ap ambi dikduk ogasiga wene
(Matius 24:45-51)
41Yugirigya lagagimu, Peterus en Yesus yugugu dugwit, “Nasin wai. Wene wakhegek yukneregen yi andi, nit adigat yukneregen a, ata it avakwa ovok erogo yugeregen a?”
42Yugugu lagagimu, At Nenowa Yesus en, “Andi halok, Ap ombok ayeloman ambi endawi werek yavup dikduk ogagya halok andi, at asin ap ombok akoen at ayelomani nin andi yugirigya dogopwak yiluk, mondok okbagagi. Mondok okbaluk, winggigi. Wunggu hegek, ayeloman akoen, it nin ako enagarom wogeraup agya halok, enagarom des erogo wogeragagi. 43Hivis it enasin ako wagya dugwit, at ayeloman ambi ako anderogo dikduk ogagya halok, asin ako endawi adenggen ombarisogon. 44Asin en ayeloman ako anderogo ogagyama adema wagya halok, angge-angge ovok erogo vagago dogopwak yiluk, andok okbayogon, yiluk, avyarat yukheraliga. 45Eke, ayeloman akoen endawima imbita dugwit, ‘An nasin arabu dukluk wasogon ai,’ yiluk, at asin ayelomani nin ap inim akwa inim yo yawi enatya, yi menda ndi menda ugun nenggek adigat lagya, amburup nenek oginivisiga menda ninggya dugwit, nenek ogarit lagya, ogarit lagya halok andi, nggayok larup ombasagwi?
46Ayeloman akoen, ‘Nasin ndugwis andi vaga wasogon,’ eke, ‘Mo il andi vaga wasogon,’ embetetek endawi ugun obak werekma at asin ako wagya dogomindik, ayeloman ako eyave libik-ndendok erogo it ap avyarat ombasagwidek menda bisaligama akoma-at lakbayogon.”
47“Ap ayeloman ambi asin ogarup ombasiga ako ilup ovara, dikduk okbaluk, ogagetek halok, yo yawi vaga hegek-hegek watya hagup. 48Eke, ayeloman ambi asin ogarup ombasiga ako inggut dugwit, weyak ogarimi vaga onggo yo yawi warup ovara, horogat watya hagup. Ala en ombok erogo wokhirigya dogomindik, hivis, ‘Ombok erogo wokheragagis ako vaga, ombok erogo ogagagup a dek a?’ yiluk, yukhirigya, eke, vagago dogovovok yiluk, ombok erogo hininggimu bigigya dogomindik, hivis evenuk, ‘Ombok erogo hininggimu bagagis ako vaga, iya erogo ogagagup a dek a?’ yiluk, yukhirigya, ogagya hagup o,” yiluk, yugeragagi.
Ogorogo bisagiluk wagagi wene
(Matius 10:34-36)
49Yugirigya lagagirik, ambi yugirigya dugwit, “Anen o wen vaga yoma ovok erogo hali bagiluk wagagis atma, mbikit hali bagibuk, ai, ombasiga. 50Avakwa ima wombabiselagwi hak An anggin-mbanggin okbanup yiluk agirik ovara, wotok erogo okbanup hudi ao atma, nendawi mondok anggin adigat okneraliga. 51It avakwa o wen vaga yoma enendawi ugun adenggen erogo dambubisagiluk, wambu wagagis embetep? Dek. Ogorogo bisagiluk, wambu wagagis o, yiluk, yukheraliga.”
52“Yogak en ap ambi aburi 5 halok, henggam en mberen inim ogorek, eke, mberen en henggam inim ogorek, inisagup. 53Inim ogorek dugwit, asin en abut inim ogorek, abut en asin inim ogorek, isa en eyak inim ogorek, eyak en isa inim ogorek, ombak en, abut inim ogorek, abut en, ombak inim ogorek, inisagup,” yugeragagi.
O elese agya vaga dibaup wene
(Matius 16:2-3)
54Yugirigya lagagirik, Yesus en it avakwa wisane yugirigya dugwit, “O Iserali yoma hena mo il huruk yi landigama barat vikit en daga wagya halok, ‘Wi! Andi musu nagiluk, ogasiga ai,’ yigipikmu, musu naliga. 55Eke, havut o selatan vikit en warit wagya halok, ‘Wi! Heveret o hivi asogon higi,’ yigipikmu, heveret hivi-at asiga. 56Wen-mbogot elese dibaluk, ‘Andi anderogo asogon higi o,’ yiluk, hinilup ovara, yogak yi hudi vaga arup ako hit nggarogo yiluk dibagetek, ‘Wi! Ala anderogo ogasiga higi,’ yiluk, yegetek-at agipik? Hit henagavoval ovagak yagalagwi yi!” yiluk, yugeragagi.
Inim ogorek halok, hodorogo dambunggu dogop wene
(Matius 5:25-26)
57Yugirigya lagagirik, ambi yugirigya dugwit, “‘Sek ogarup yiat higi,’ yiluk, henadik-henadik dibaup sek hegek ovara, nano yiluk sek ogarup dibagetek agipik? 58Ap hinim ogorek ako hinim at ap enowak dilisiga menda adema lamwi halok, suvaga ao hinim lagu dugwit, hodorogo vagalogo hinim henendawi dambulhedaup. Dek halok, at hinim ogorek en likhiniviluk ap owak dilisiga menda adema bigigelagya, andien, ap enowak dilisiga menda en ap ayegen werek adema bigigelagya, andien, ap ayegen werek akoen ap lembaga mabugugu, ogagu saoen, suvaga ao hinim lagu dugwit, hodorogo vagalogo hinim henendawi dambulhedaup. 59Heda marogo mabiselagwima mabuguguselok, at enowak dilisiga menda akoen, ‘Onggo anderogo baup,’ yiluk, yukheragagi ako mondok ovok erogo bagetek hegek, andoma en mondok wibigigasogombuk, yiluk, yukheraliga,” yugeragagi.
נבחרו כעת:
Lukas 12: nbq2013
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו