Lukas 15
15
Wakhegek ap ambi andomba bolagagi vaga yugeragagi wene
1It ap pemerintah enake yoparip wonggalisagwi menda inim, weyak ogasagwi menda inim, ovok erogo Yesus ane hulusogom yiluk, At adema wagu lagagwa. 2Adema wagu lagagwama, it Varisi menda inim, it Ala wene vagago agarwik menda inim, iren Yesus it ap weyak ogasagwi menda inim inigu lagagwarik, enanggon umbutu dugwit, “Ap yi, avakwa weyak ogasagwi menda woginipu lagarik, inim erom naliga hinil yokhanes!” yagagwa.
3Yugu lagagwama, At Yesus wene wakhegek vaga it yugirigya dugwit, 4“Hit ambi henandomba eneyave 100 werekma, ambiat bolagya halok, 99 adigat ludak angga nenggek nelagwima nenggek nagusigik, ambiat bolagagi ako hekbagetek enggek wambegek belalit nagu dugwit, havethedelagwi akora? 5Eke, havethidugu lagipik, henomado vaga sambinbaluk henendawi adenggen en hai warit 6henamwa wolok lagu lagipik, henaswei, henowa-henaot inim, wonggabisiluk, ‘Nandomba bolagagi ako belalhidigya lagirik havethidigirikmu, hit ninim adenggen ogarusogom,’ yiluk, yugerelagwi akora? 7Andi wane-wane, ap eneyave 99 umbutu dugwit, ‘Nenendawi mondok sek adigat halok nenomaduk mbobaup dek,’ ombasagwi halok, it mbogot vaga agarwik enendawi adenggen horogat ombarusogom ovara, it ap weyak ogasagwi menda ambien weyak ogagya lagagi ako, asam helok, mbobagya halok andi, it mbogot vaga agarwik ako enendawi adenggen ombok erogo umbutu dogosogom o, yiluk, yukheraliga,” yugeragagi.
Yoparip bolagagi wene
8Anderogo yugirigya lagagirik, ambi yugirigya dugwit, “Hwa ambi yoparip 10 vagago werekma, ambiat bolagya halok, indwa yevetbaluk, mupwak horogo lakbagek ogagya dugwit, mbup yegetek belanggu lagarik, havethedaliga akora? 9Eke, havethedelok, aswei inim, at inim agarwik menda inim, homakbisiluk, ‘Nayoparip bolagagi ako havethidigirikmu, ninim adenggen ogarusogom,’ yiluk, yugeraliga akora? 10Andi ndatak ap weyak ogasiga menda ambiat en weyak ogagya lagagi ako asam higya dugwit, mbobagya halok, it Ala yonggo lakbisa wandiga menda malaikat akoen enendawi adenggen umbutu dogosogom, yiluk, yukheraliga o,” yugeragagi.
Ap ambi abut bolagagi wene
11Yugirigya lagagirik, wene ambi iri dugwit, “Ap ambi aburi mberen welagagi. 12Abut elavo akoen asin yugugu dugwit, ‘Nasin. Heyase an hivis woknirup embeten ako yogak wokniru,’ yugugu lagagimu, asin en angge eyase ako higirogo iperen wogeragagi.”
13“Wogirigya lagagimu, ndugwis ambukum welagagirik, abut elavo akoen asin angge wogogogi ako ovok erogo wonggalogo onggo hundutu lagagirik, ayoparip hedelok o hunogoma adumu akoma winggigi. Wunggu lagagirik andoma dugwit, endawi ugun dibagetek ogarit lagya dugwit, ayoparip ako dek okhedagagi. 14Ayoparip ako dek agagirik werekma, avakwa andoma ovok erom uvup wisane agagirikmu, at ogo erom uvup wisane ogagagi. 15Erom uvup ogagya lagagimu, ap awerek ambi awi andoma menda eyavup ogagya dogogiluk, adema lagagi. Adema lagya lagagimu, at ap andien anggomi o weram andoma malogo dogopwak yiluk, lakbagagi. 16Lakbagagi lagya lagagirik, andoma dugwit, ‘Nagaum arupwak yiluk, erom agamut wameyakma yi, an ninggya dogoik ai,’ imbitigi ovara, dek, it ninen ambiat ogo mondok wogigitek-at welagagwa.”
17“Andien, ndugwis ambi vaga endawi wenggenggu dugwit, ‘Ai, an nasin ayelomani en yavup ogasagwi onggo hedelagwi ako, eneyave wisane dugwit, erom higirogo bagek nelagwi ovara, an yira erom uvup en hambup atma, 18an yoma en nasin adema lagya dogomindik, “Nasin. At mbogot vaga menda inim, hat inim, weyak okbugugu lagi o. 19Weyak okbugugu lagirikmu, ‘Yi an nabut,’ yuknirubuk. Ata, hayeloman en yavup ogasagwi onggo hedelagwi ako ovagak okbanin o,” yuguri laik ai,’ imbitigi. 20Imbita lagagirik, o andoma hekbaluk, eyami vaga asin adema lagagi.”
“Adema lagya lagagirik, ao ari lagyama, asin ako il yokhigya lagagirik, abwa en venggen lagya dugwit, domat bagya lagagirik, ayup yagagi.”
21“Ayup yagya hegek, abut en asin yugugu dugwit, ‘Nasin. At mbogot vaga menda inim, hat inim, weyak okbugugu lagi. Weyak okbugugu lagirikmu, “Yi an nabut,” yuknirubuk,’ yugogogi.”
22“Yugogogi ovara, asin en ayelomani yugirigya dugwit, ‘Yum mondok segedok menda wolok wakluk yikbagwi, sanggan at inggis vaga yikbagwi, aropato yikbagwi, hodorogo ogares. 23Anderogo okbaluk, sapi eyak amok werek ambi wa lagu dogomundik, warogo isogo isagu dugwit, adenggen ogarusogom. 24An nabut yi, hombagagi ndatak ovara, iluk aga. Eke, bolagagi ovara, havethidigi o,’ yiluk, adenggen ogagagwa.”
25“Adenggen ogagusim, owa ako yavumu welagagirik, amwa ari nunggu wagya dugwit, ndawi nggidis nombanggwis ako aruk hunggigi. 26Hunggu lagagirik, ayeloman ambi yanggup yugogogi ako wagya lagagimu, yugugu dugwit, ‘Yi nano ogasagwi?’ yiluk, 27hemethigya lagagimu, ayeloman akoen, ‘Dek. Haot ako vage nunggu waga. Eke, eyave sek nunggu wagarikmu, hasin akoen sapi eyak amok werek ambi warogo isagu dugwit, adenggen ogasagwi.’”
28“Yugugu lagagimu, owa ako aninis agya lagagirik, amwa nunggup anggon en werekma, asin wunggu lagagirik, ane sagain erogo, ‘Nungguma,’ yugogogi ovara, 29owa akoen asin yugugu dugwit, ‘Haruk hulu. An yi tahun ndi tahun heyavup ogasiga. Eke, ogagya dugwit, “Yerogo ogarup, nderogo ogarup,” yuknisiga ako nanggon mondok yagaligadek ogarit adigat landiga ovara, kambin eyak ambiat an naswei ninim nenendawi adenggen dugwit, isarogo naguluk, wokneraligadek ovara, 30habut yi andi, akwa ugun oginivit nagu dugwit, hangge wogogogin ako dek ogarit nagu laga ako wagarikmu, sapi eyak amok werek menda warogo isagen.’”
31“Yugugu lagagimu, asin en, ‘Nabut o. Hat mondok-mondok ninim agindik atma, nangge-nangge ovok erogo andi, hat hangge aro. 32Eke, hat haot yi andi, hombagagi ndatak ovara, iluk aga o. Eke, bolagagi ovara, havethidigi atma, nenendawi adenggen dugwit, isogo yi sek isagyo,’ yugogogi,” yiluk, Yesus en it avakwa yugeragagi.
נבחרו כעת:
Lukas 15: nbq2013
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו