Rut 4
4
Ia Boas e tauhaa koi Rut
1Ia Boas e dia tana malengana tara hanaa ira na mai ma na sai tana sanganiana na barabarana na vera nia, me tohotuu me pitu inge. Me liu mai na kamana varasoha kalavata ia Elimelek, na tinoni te kokori ia Boas. Me tu ia Boas me huvia tinoni nia, me kori vahai vania de, “Tasigu, ko mai ko tohotuu ide.” Me dia na tinoni me tohotuu kolua ia Boas.
2Me tu ia Boas me solora e sangavulu na tinoni leholeho tana vera nia me nongira kara mai ma kara tohotuu kolukoera koera. Tahuna tara tohotuu ira, 3me tu ia Boas me kori vahai vania na kamana de, “E visu mai koi Naomi vota i Moab, me ngavina ke chikai tinoni ke chabiria na busu ni pari te tamania ia Elimelek, na kamakodada kohita. 4Nau ngavina ko hana kolua hoe na omea de. Baia, tina ko ngavina hoe, mo ko volia tana matadira tinoni nira de. Me tina vahai ko hoso hoe, mo ko koria, matengana hoe luhi, kode minau.”
Me kori vahai tinoni nia de, “Nau ba ku volia.”
5Tu ia Boas me kori vahai de, “Talana solehana, me tina vahai ko voli chonia hoe na pari tatana koi Naomi, mo ko taha kolua hoe koi Rut, na daki chamu ni Moab, me ke ni toha visu na pari nia tatana kamana tinoni te mate nia.”
6Me kori visua tinoni nia, “Ia te vahai laka nia, ba ku teha nau volia na pari nia, matengana ngeni ba ke utu na dalegu nau na tamaniana na pari nia. Ko volia hoe, inau ba ku teha.”
7(Nidira naunau ira na Israel tana tahu nia, tana livu hotosiana na chabiri se na vaiolisihi tana omea tatamani, ia na tinoni te chabiri nia, ke chuaa nina sadolo me ke sau vania na tinoni te volia na omea nia. Tana agosi vahaniana nia, ira na Israel ara tihisi lengaa kovahai ara hotosia na hua tara valaguna.)
8Tana tahu vahai nia, me tu na tinoni nia me kori vahai vania ia Boas de, “Ko volia hoe.” Me chuaa ia nina sadolo me sau vania ia Boas. 9Me tu ia Boas me kori vanira na tinoni leholeho nira, kolu kesana laka tinoni tara toha tana tahuna nia, “Ihamu kode amu morosi nohaa ngeni de, tu volia nau tatana koi Naomi visa na omea te tamania ia Elimelek ma na dalena koera, ia Kilion ma ia Malon. 10Ma ia lakamu koi Rut, na daki ni Moab, na tina matena ia Malon, ba ke lia nigu toha kolu nau. Ia ku ni hae taonia nau nina omea tatamani na tinoni te mate nia, ma kara ni taha datoa ira na lilivuna ia Malon tana verana nia. Hamu amu morosi kode nohaa ngeni de.”
11Na tinoni leholeho nira kolura ira kesana laka ara kori vahai de, “Mana ia, ami morosi kodea hami visa na omea. Ma ia Yawe ke sangaa nimu toha kolu hoe me ke ni vahai koi Reichol ma koi Lia, koera tara ko vasua danga na gari vania ia Jekob, na kukuadada hita na tinoni ni Israel. Me tihilana ihoe ko tamania dangana na omea levoha, me ke ni tangi na rongomu tana lilivuna ia Eprat i Betlehem. 12Me tihilana na dalemu nira te ke vaniho ia Yawe te ke mai tatana koi Rut, ba kara danga vahai na dalena nira ia Peres, na dalena ia Juda ma koi Tama.”
Ia Boas ma na kukuana nira
13Ma ia Boas e tahaa koi Rut me lia na tauna. Ma ia Yawe e sangaa koi Rut me mahara me tamania e chikai na dalena mane. 14Ma na daki nira ara kori vahai vania koi Naomi de, “!Livu kaea ia Yawe! E sau vaniho chikai na kavemu mane ngeni de, me ke ni turu taoniho hoe. !Me ke tangi leho na asana na gari nia lalona i Israel! 15Seisuge vahai ko tamania hoe ke vitu dalemu mane, ba kara teha chaulia nina sasahavi ma na nina sasanga na daki vungomu hoe. Mi tahuna de, ia e vasu nohaa vaniho e chikai na kavemu mane, ma ia ba ke vaniho na mauri vaolu me ke saua nina vaituruhi ma na morosi tataoniho tahuna to ko gosi hoe.”
16Me tahaa koi Naomi na gari nia me tabalaa me turu tataonia. 17Ira na daki nira tana vera nia ara soloa na asana garimane nia ia Obed. Mara kori valego vanira ira kode, “Koi Rut e vasu vania koi Naomi chikai na garimane.” Ia Obed e lia na tohana ia Jesi, ma ia Jesi e lia na tohana ia Deved, na king ni Israel.
18Ide na lilivuna ia Peres me chau tatana ia Deved:
ia Peres na tohana ia Hesron,
19ma ia Hesron na tohana ia Ram,
ma ia Ram na tohana ia Aminadab,
20ma ia Aminadab na tohana ia Nason,
ma ia Nason na tohana ia Salmon,
21ma ia Salmon na tohana ia Boas,
ma ia Boas na tohana ia Obed,
22ma ia Obed na tohana ia Jesi,
ma ia Jesi na tohana ia Deved.#4:22 Tana naunau tara marea ira na Israel na lilivudira, ira ara hana marea “tohana” tana kukuana kesana tahu.
© 2024 (active), Wycliffe Bible Translators, Inc. All rights reserved