मत्ती 14

यूहन्ना बपतिस्मा रंड्राढो हत्या

1दुह मुक्का चोथाई देशो रज्ज़ा हेरोदेसे यीशु पाहठी रेड्रा, 2दंङ एनोह परगरातिंङ कुहतो, “दिह यूहन्ना बपतिस्मा रंड्रा शुह, अंऊ सिमी दोरच़ी ला श्रींङे इलज़ा। झांह लेह यीशु दोरच़ी दिह हेरान लहज़िमी ठ्रोह कम प्रगट शुबी लेहकी तोईरे”

3छना कुचे रज्ज़ा हेरोदेसे एनोह न्वा फिलिप्पुस ओ मेच़ा हेरोदियासो बजहच़ि, यूहन्ना जेलो अंद्रेग केहशी तहरेह। 4छना कुचे यूहन्ना कुहषी तहरेह कि कनिंङ दीह तहच़ि ठीक मशोतो। 5दंङ दोई दुह सच़िमी तारेह पर मीहतंङ साते बेवाते, छना कुचे मीह्जी दुह भविष्यवक्ता ञेंचातेर।

6पर अपेहल रज्ज़ा हेरोदेसो जन्मदिन अन्दे दंङ हेरोदियासो मियोई दोहर गहरछे हेरोदेस खुश लेह केहते। 7दोऊ थल्जी दोई वाईदा जें वचन रेंई, “कि केई छिल्ला जुना गिऊ दोरच़ी पेट्रोंई कनिङ गेह दुह रामोग।” 8दुह एनोह याहऊ उल्लेक्सी कुड़ी, “यूहन्ना बपतिस्मा रनड्राडो पुंज़ा ट्रिकी त्राठिंङ केह देहर हता।” 9रज्ज़ा दुखी शुहचे इलि पर एनोह वाईदाऊ बजहच़ि साते बंङज़ा मीहतु वजाहज़ि कुड़ी रें च़रतुंई। 10दंङ जेलंङ मीहरे चरच़े यूहन्नाओ पुंज़ा ट्रिहटी लेह च़रति; 11दंङ दोऊ पुंज़ा त्राठिंङ ह्न्जे मेच़मी कटु बि रेंहई, दंङ दोई दुह एनोह याह ऊ कछंङ रेंज़ा शिली। 12दोऊ चेलाज़ि अंज़े दोऊ फुक शिल्ज़े पथेके चेहच़ातोर दंङ इलजे यीशु बि दोऊ पाहठी कंज़ातोर।

ङा हज़ार मीहतिंङ खिलाच़ी

(मरकु 6:30-44; लूको 9:10-17; यहून्न 6:1-15)

13अपेहल यीशुज़ि दिह थशातो, दुह किशतीऊ टोईच़ी बंङज़ा दोरच़ी सुनसान ठाहरीरिंङ हखा अह्च़ा इलज़ा। मीहरे दिह रेड्रीरंङ नगरारिंङ-नगरिंङज़ि पैदल दोऊ थले शुहचे इलिरे। 14दोई हुंज़ा इच्च़ा मोह्ड़े भीड़ तंङरी, दंङ दोतु टोईच़ी दया लहरी; दंङ; दोई दोतु नत्पारे ठीक लहरी।

15अपेहल ञोंकोल शुईता यीशु चेलाज़ि दोऊ कछंङ अंज़े कुह्तोर; “दीह ताह सुनसान ठारी शुह, दंङ झाहड़ा ला शुहबी लेहकी तोह मीहरे याहच़े च़रपोंई ताकि दोच़ी नगरारिंङ इलजे एनातु थल्जी बगत चुम्मोर।”

16यीशुज़ि चेला तु हखा कुंई “दोतु इबी ज़रूरी माह! केहच़ी ए दोतिंङ बगत रांई।” 17दोच़ी यीशुबि कुह्तोर, “ञेंहतु दोर ङा रोटी ए झुह्ट मह्छ़ तु इलावा ऊहई छल्ले मद।”

18यीशुज़ि कुहतो; “दोतिंङ देहर गिऊ हखा हतांई।” 19दोई मीहतिंङ षोहड़ीङ श्रांङतु टोहकठे बंङज़िमी थल्जी कुहतो दंङ दुह ङा रोटीए झुह्ट मह्छ़ लेहप्ती, दंङ सर्गो हखा खांई परमेश्वरो धन्यवाद लहरी, दंङ रोटी खन्नी-खन्नी लेह चेला तिंङ रमा लहरी। 20दंङ भत्ते मीहच़ी खोकटुंङ पिंङे बगत ज़हरिर, दंङ केह्षा इलजी सनी टोकरी उठाएकातेर। 21ज़ज़ाहरे मेच़िमी रे ए कटुतु अलावा लगभग ङा हज़ार गंङमीहरे तोईरे।

यीशु तिऊ टोईच़ी जोई

(मरकु 6:45-52; यहून्न 6:16-21)

22दंङ यीशुज़ि दोहथरे एनोह चेला तिंङ किशती रिंङ चड़ाएकतो ताकि दोरे दुह्बे तुहई दोसी पले हुंज़ी जूंस, अपेहल तचेक कि दोई दोहर रुमज़ा मीहतिंङ बिदा लोहतो। 23यीशुज़ि मीहरे याहच़े प्रार्थना लहज़ी थल्जी ऊई गोऊ टोईच़ी अच़ा इलि; दंङ दुह ञोंह्कोलकि दोहर इच्च़ा तोहई। 24दुह मुक्का किशती गलील झीलो विचंङ छ्वली कुचे तुहरपि लेहकी तोहई।

25रातो पी पहर यीशु झीलारिंङ तिऊ टोहकठे ज़ोजा चेला तु कछंङ इलि। 26चेलारे दोबि झीलो टोईच़ी ज़ोई तंङज़िरंङ बेऐ इलदेर। दंङ कुट्री लेहतिरे “दिहता वंङ शुह” दंङ वेऐ हउषारे रंड्री लेहतिरे! 27यीशुज़ि दोहथल ए दोतंङ साते गप्पा लहरी, दंङ कुहतो थबेंई “याहो लाहनी: गेह शुगाह; बेओंई था।” 28पतरसे दोबि जुबाब रन्दो, “हे प्रभु अगर कांह ए शुहनाता, गिह्बी केनोह कछंङ तिऊ टोईच़ी जोए अपिमी आज्ञा रंऊ।” 29यीशुज़ि कुंई, “अता” दंङ पतरस किशतिंङ ज़ि तक्सा यीशु कछंङ इबिमी थल्जी तिऊ टोईच़ी ज़ोई लेहती।

30अंऊ मुक्का पतरस बि महसूस शुई कि लहन महसे तेज तोह ता दुह बेई इलि, दंङ छना ए तीरिंङ डुमज़े लेहती ता हाऊष रें कुट्री लेहती, “हे प्रभु, गिह्बी बचाएतु!” 31यीशुज़ि दोहथरे गुहड़ तुंखा लेह दुह च़ुमरी, दंङ दोबि कुहतो, “हे विशवास माह लहज़ाड़ा केई छिले शक लहतेन?” 32अपेहल दोकु किशतीऊ टोईच़ी इलदोर, दंङ लहन चसा इलि। 33दिरंङ अरीला किशतीऊ अंद्रेग तोईरे दोच़ी दोबि फ्यग लेह कुड़िर; “काह हेले परमेश्वरो योह शुनाह।”

गन्नेसरतंङ टेहषी दोतिंङ अईन लहज़ी

34यीशु ए दोऊ चेलारे दोसी तक्सा गन्नेसरत प्रदेशंङ अतिर। 35दंङ दोहर मीहच़ी दुह सेहच़े भत्ते ठाहरीरिंङ उजाब च़रतिर, दोच़ी भत्ते नत्पारे दोऊ कछंङ रेंज़ा हतिरे। 36दंङ यीशुरंङ साते बिनती लाहरिरे कि दोतिंङ केनोह खमज़ेतु मुखऐ थोक्च़ी रंऊ दंङ अच़िला दुह थोकातेर भत्ते अईन शुहचे इलिरे।

נבחרו כעת:

मत्ती 14: LBFNT

הדגשה

שתף

העתק