Génesis 18
18
Jix Yakꞌ Stiꞌ Jehová Yakꞌon Junoj Scꞌaal Naj Abraham
1Jix lawi tuꞌ, jix xꞌoxon sbꞌa Jehová tet naj Abraham bꞌey scawilal wan teꞌ jii bꞌey yul yet naj Mamré. Chuman mi wal cꞌu, chotan eltej naj Abraham tuꞌ bꞌey stiꞌ sna, catuꞌ jix jul Jehová scꞌatan naj. 2Jix yilon Abraham tol linan oc oxwan winaj sattaj. Jaꞌ yet jix yilon tuꞌ, eyman jix too lemna ẍaꞌon ebꞌ, catuꞌ jix ey noan sat txꞌotxꞌ sattaj ebꞌ. 3Catuꞌ jix yalon naj tet junoj ebꞌ jaxca tiꞌ:
—Jex waawil, chi wal ey jex cꞌamto chex toi. 4Echbꞌanewej, tiꞌ chi too walaꞌ, tol chi too iꞌletej niꞌoj jaꞌ, catuꞌ oj je txꞌaon el je yajan. Xewanwej yich teꞌ teꞌ tiꞌ bꞌela. 5Yajbꞌan tol ey jex ecꞌ jin cꞌatan, tiꞌ chi too wiꞌ niꞌoj tzet oj je loꞌ, yet watxꞌ chi oc je yip, catuꞌ oj jex toj cꞌal yul-laj bꞌe, ẍi naj Abraham tuꞌ.
—Asiꞌ xin, ẍi ebꞌ tet naj.
6Catuꞌ jix octoj jininoj Abraham tuꞌ yul sna, jix yalon tet ix Sara jaxca tiꞌ:
—¡Eyman! iꞌtej oxebꞌoj echbꞌal ixim jarina caw wal watxꞌ, catuꞌ cha waꞌnen jayebꞌoj ixim pan, ẍi naj tet ix.
7Catuꞌ jix too jininoj Abraham bꞌey ey noꞌ swacax, jix bꞌet yiꞌontej jun noꞌ achꞌe wacax caw bꞌakꞌech, catuꞌ jix yakꞌon noꞌ tet jun naj yakꞌomal servil yu swaꞌnele el noꞌ yin eymanil yet chi chiꞌle noꞌ. 8Catuꞌ jix yiꞌontej mantequilla, cꞌal lech, yetoj noꞌ chiꞌbꞌe jix waꞌnele el tuꞌ, chi ecꞌ lininoj Abraham yilon slow ebꞌ bꞌey yich teꞌ teꞌ tuꞌ.
9Catuꞌ jix skꞌanlen ebꞌ tet naj Abraham tuꞌ:
—¿Bꞌeytuꞌ eyoc ix ja wistil Sara? ẍi ebꞌ tet naj.
—Eyoctoj ix yul cu na tiꞌ jon, ẍi naj tet ebꞌ.
10Jix yalon junoj ebꞌ tuꞌ jaxca tiꞌ:
—Yabꞌ jaxca tiꞌ yet junxa abꞌil, oj jaach jul wil junelxa; jaꞌ yet tuꞌ oj aloj yuneꞌ ix ja wistil tuꞌ, winaj unin oj aloj, ẍi ebꞌ tet naj.
Jal ix Sara tuꞌ xin, tucꞌal chi yabꞌ ix tzet chi al-lei. Jaꞌ yintaj naj Abraham tuꞌ, tecꞌan oc ix yul stiꞌ sna tuꞌ. 11Jaꞌ naj Abraham yetoj ix Sara tuꞌ caw icham animaxa ebꞌ, yutol xax ecꞌtoj stiempoal yijon oc yuneꞌ ix. 12Tucꞌal jix stzee ix yul scꞌul, yet jix yabꞌen ix yal-le tuꞌ, catuꞌ jix snaꞌon ix jaxca tiꞌ: ¿Tzet to wal oj yun wochen jun tiꞌ, ilaꞌ tol jaꞌ naj wichamil yetoj jin caw icham ánima jon xa? ẍi ix.
13Jix yalon Jehová tet Abraham tuꞌ jaxca tiꞌ:
—¿Tzet yuxan chi tzee ix ja wistil tiꞌ? ¿Chim snaꞌ ix tol cꞌamxa chi skeꞌ yijon oc yuneꞌ ix jaxca jun skꞌinal ix tiꞌ? 14¿Tejan tol cꞌam tzet chi skeꞌ wu je naꞌoni? Yabꞌ wal jaxca tiꞌ yet junxa abꞌil, oj jin jul junelxa jaach jul wiloni. Jaꞌ yet tuꞌ, oj aloj junoj yuneꞌ ix Sara tiꞌ, winaj unin oj aloj, ẍi Jehová.
15Jaꞌ yet jix yabꞌen ix Sara jaxca tuꞌ, caw jix xiwa ix, jix yalon ix jaxca tiꞌ:
—Tumi ey jin chin tzee an xin, ẍi ix.
Catuꞌ jix takꞌwi Jehová tet ix jaxca tiꞌ:
—Wotaj tol jix jaach tzee, ẍi Naj tet ix.
Abraham Chi Yal Tet Jehová Yu Conobꞌ Sodoma
16Jix lawi tuꞌ, jix pax toj ebꞌ naj jix julecꞌ scꞌatan tuꞌ, jix too ebꞌ bꞌey sbꞌeal Sodoma. Jix eltoj Abraham niꞌanxa yetoj ebꞌ, catuꞌ jix stakꞌele can sbꞌa ebꞌ. 17Jix snaꞌon Jehová jaxca tiꞌ: Cꞌam chi skeꞌ webꞌan ey tet Abraham tiꞌ yu tzetyetal oj wunne. 18Yutol jaꞌ ebꞌ yicꞌaal Abraham tiꞌ, jaꞌ ebꞌ oj oc yin mimej conobꞌal tol caw ey yip. Jaꞌ masanil ebꞌ conobꞌlaj sat yul yibꞌankꞌinal tiꞌ oj ẍaꞌ syaaxilal ebꞌ yu naj. 19Yutol jain jix jin sicꞌ eltej Abraham, yet chi yalon masanil jin chejbꞌanil tet masanil ebꞌ yuninal cꞌal tet ebꞌ yicꞌaal, yet watxꞌ chi sjije ebꞌ. Catuꞌ oj sbꞌeybꞌalnen masanil tzetyetal watxꞌ ebꞌ, cꞌal sjichanil, yet watxꞌ chi eloc masanil bꞌey jix wakꞌcan jin tiꞌ tet ebꞌ, ẍi Jehová. 20Jix lawi tuꞌ, jix yalon Jehová tet Abraham tuꞌ jaxca tiꞌ:
—Jaꞌ masanil ebꞌ ánima bꞌey Sodoma cꞌal bꞌey Gomorra, caw pena yel skꞌumal ebꞌ, yutol yel xacꞌal miman spenail chi yun ebꞌ. 21Jaꞌ tinaniꞌ, tol chin to tituꞌ, yu wiloni ta caw yel pena xacꞌal chi yute sbꞌeybꞌal ebꞌ, jaxca chi yun yal-le ey jin tuꞌ, queyton tuꞌ xin, oj yun wotajne el sicꞌlebꞌil, ẍi Jehová.
22Jaꞌ cawan ebꞌ jix ecꞌ kꞌanabꞌ tuꞌ, tꞌinan xacꞌal stoo can ebꞌ bꞌey conobꞌ Sodoma, jal Jehová xin, jix cancan kꞌanabꞌ yetoj Abraham. 23Jix sjitzon xacꞌal oc sbꞌa Abraham scꞌatan Jehová, catuꞌ jix skꞌanlen naj jaxca tiꞌ: ¿Tumi oj ja qꞌueyel ebꞌ ánima cꞌam spenail yetoj ebꞌ ey spenail? 24Kꞌinaloj ta ey 50 ánima watxꞌ sbꞌeybꞌal yul conobꞌ tuꞌ. ¿Tumi oj ja qꞌueyel jun conobꞌ tuꞌ? ¿Cꞌam mi cha wakꞌ mimancꞌulal yin ebꞌ yu ebꞌ 50 cꞌam spenail tuꞌ? 25Tol oj wal man jaxca oj tuꞌ cha wute, ta cha qꞌueyel ebꞌ cꞌam spenail yetoj ebꞌ ey spenail, jaxca tol laan spenail masanil ebꞌ chi yal tuꞌ; manche ja wute jaxca tuꞌ. Yutol jaꞌcaw Juez jaach yul yibꞌankꞌinal tiꞌ. ¿Tumi wal oj ja wun tzet man jichanoj? ẍi Abraham tet Jehová.
26Catuꞌ jix takꞌwi Jehová tet naj jaxca tiꞌ:
—Ta ey 50 ánima watxꞌ yul conobꞌ Sodoma tuꞌ, yu ebꞌ 50 tuꞌ chi wakꞌ mimancꞌulal yin masanil ánima caan bꞌey tituꞌ, ẍi Naj.
27Jix yalon pax Abraham tet Naj jaxca tiꞌ:
—Akꞌ mimancꞌulal win, oj tocꞌal jin kꞌanabꞌ ey jaach, jaach tiꞌ Yaaw jaach, jal jin xin, ánima jin cꞌam niꞌoj weloc apnoj. 28Ta cꞌuxan eyto jowanojxa cꞌam chi tzꞌajna yin 50 ebꞌ ánima watxꞌ sbꞌeybꞌal tuꞌ. ¿Tumi yu wal cꞌam jowanxa tuꞌ, catuꞌ cha qꞌueyon el jun conobꞌ tuꞌ? ẍi Abraham.
Catuꞌ jix takꞌwi tet naj jaxca tiꞌ:
—Ta ey 45 ánima tol watxꞌ sbꞌeybꞌal, cꞌam chin qꞌueyel jun conobꞌ tuꞌ, ẍi Dios.
29Jix yalon pax Abraham junelxa:
—Kꞌinaloj ta asan 40 ánima watxꞌ sbꞌeybꞌal bꞌey jun conobꞌ tuꞌ, ẍi naj.
—Yu ebꞌ 40 tuꞌ, man oj jin qꞌueyel jun conobꞌ tuꞌ, ẍi Jehová.
30Jix yalon pax Abraham tet Jehová junelxa:
—Jaach Waawil, chin kꞌan ey jaach, cꞌam ojabꞌ chi tit ja jowal win, yu chach jin tee. Tala cꞌuxan asan 30 ánima watxꞌ sbꞌeybꞌal chi ilchai, ẍi naj tet Jehová.
Catuꞌ jix takꞌwi Jehová:
—Jaꞌ yu 30 ánima cꞌam spenail tuꞌ, oj wakꞌ mimancꞌulal yin jun conobꞌ tuꞌ, ẍi Naj.
31Jaꞌ Abraham jix oc cꞌal ian yaloni:
—Jaach Waawil, tol oj jaach jin tee cꞌal, ¿tzet wal cha wute ta asanne 20 ánima cꞌam spenail? ẍi naj.
Jix takꞌwi Jehová jaxca tiꞌ:
—Jaꞌ yu 20 ánima watxꞌ sbꞌeybꞌal tuꞌ, cꞌam chin qꞌueyel jun conobꞌ tuꞌ, ẍi Dios.
32Jix yalon pax Abraham junelxa:
—Akꞌ wal mimancꞌulal win jaach Waawil, cꞌam ojabꞌ chi tit ja jowal win, jaxa cꞌal junel tiꞌ chin kꞌanle ey jaach, cꞌamxa tzet oj wal ey jaach: ¿Tzet cha wute ta asanne laonwan ánima watxꞌ sbꞌeybꞌal chi ilchai? ẍi naj tet Jehová.
Catuꞌ jix yalon Jehová jaxca tiꞌ:
—Ta ey laonwan ánima watxꞌ sbꞌeybꞌal, cꞌam chin qꞌueyel jun conobꞌ tuꞌ.
33Jaꞌ yet jix lawi skꞌanabꞌ Jehová tet naj Abraham tuꞌ, jix too Jehová, catuꞌ jix meltzo pax toj Abraham tuꞌ bꞌey sna.
נבחרו כעת:
Génesis 18: knj
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2016, Wycliffe Bible Translators, Inc. All rights reserved.