Génesis 4
4
Naj Caín Yetoj Naj Abel
1Jix lawi tuꞌ, jix sjunbꞌane sbꞌa naj Adán yetoj ix Eva, jix yijoc yuneꞌ ix. Catuꞌ jix ali jun yuneꞌ ix, jix yakꞌon yij sbꞌi Caín,#4:1 Jaꞌ yin Hebreo, jaꞌ jun bꞌie chi yij Caín, laan chi yun yal-le yetoj jun kꞌane, jix akꞌle ey jin. catuꞌ jix yalon ix jaxca tiꞌ: Tuxa jix ali jun jin winaj unin. Jaꞌ Jehová jix akꞌon ey jin, ẍi ix. 2Jix lawi tuꞌ jix ali pax naj Abel, yuẍtaj Caín. Jaꞌ naj Abel tuꞌ, jobꞌo meꞌ jix yun naj, jal pax naj Caín tuꞌ, jix oc naj yin mulnail sat txꞌotxꞌ txꞌotxꞌ.
3Jix bꞌey cꞌaltoj tiempo xin, ey jun cꞌual jix yiꞌontoj xaambꞌal naj Caín tet Jehová, jaꞌton tzet chi yiꞌ yin smulnail. 4Jal pax naj Abel xin, jix yiꞌ cꞌal pax toj jun xaambꞌal sattaj Jehová, jaꞌton noꞌ bꞌabꞌel yuneꞌ meꞌ, noꞌ caw bꞌakꞌech. Caw jix ẍaꞌ scꞌul Jehová jun xaambꞌal naj Abel tuꞌ. 5Jal pax naj Caín tuꞌ xin, ma ẍaꞌ scꞌul Jehová jun xaambꞌal naj tuꞌ. Yu cꞌal jun tuꞌ, yuxan jix chichon a scꞌul naj, jow xacꞌal jix yute ey sat naj. 6Catuꞌ jix yalon Jehová tet naj jaxca tiꞌ: ¿Tzet yuxan chi chichon a ja cꞌul, catuꞌ jow xacꞌal cha wute ey ja sat? 7Ta watxꞌ tzet jix ja wunne, tzalacꞌulal mi yili ja sat catuꞌ chach eqꞌui. Yu cꞌal tol pena tzet jix ja wunne, yuxan jaꞌ spenail tuꞌ tꞌanan xacꞌal oc ja win yet oj jaach eyqꞌuey yu, asan xin, chi to skeꞌ ja wakꞌon eyqꞌuey jun spenail tuꞌ, ẍi Jehová.
8Ey jun cꞌual, jaꞌ naj Caín jix yawtetoj jun yuẍtaj chi yij Abel, yet chi too ebꞌ scawanil yin paẍal, jaꞌ yet eytoj ebꞌ paẍal tuꞌ xin, jix pacꞌoc naj Caín tuꞌ yin yuẍtaj, catuꞌ jix smakꞌon camoj. 9Jix lawi tuꞌ, jix skꞌanlen Jehová tet naj Caín tuꞌ jaxca tiꞌ:
—¿Bꞌeytuꞌ eyoc naj ja wuẍtaj Abel?
Catuꞌ jix takꞌwi naj Caín jaxca tiꞌ:
—Man wotaj oj. Tumi yilomal naj weoc an, ẍi naj tet Jehová.
10Jix yalon Jehová tet naj jaxca tiꞌ:
—¿Tzet yuxan jix ja makꞌ cam naj ja wuẍtaj tuꞌ? Jaꞌ ẍiqꞌuil naj ja wuẍtaj jix malcantoj sat txꞌotxꞌ txꞌotxꞌ tuꞌ ja wu, jaꞌ chi yal sbꞌa ey jin yet chin naꞌon oc yin. 11Jaꞌ tinaniꞌ xin, chi wa can ey sjowal jin cꞌul ja wibꞌan, catuꞌ chi wiꞌon can el ja wopiso yibꞌan txꞌotxꞌ txꞌotxꞌ jix uqꞌuen eytoj ẍiqꞌuil naj ja wuẍtaj jix ja makꞌ cam tuꞌ. 12Caxcꞌal oj jaach mulna sat txꞌotxꞌ, cꞌam cꞌal tzet oj ja wiꞌ yin ja mulnail, cꞌam cꞌal bꞌakꞌin oj jaach xewoj yet ey jaach ecꞌ yul yibꞌankꞌinal tiꞌ, ẍi Jehová tet naj.
13Catuꞌ jix takꞌwi naj Caín tet Jehová jaxca tiꞌ:
—Caw wal miman jun syaꞌilal chi tit can wibꞌan tiꞌ, caw ma xa techa wu an. 14Jaꞌ tinaniꞌ, jix ja wiꞌ can el wopiso yibꞌan txꞌotxꞌ txꞌotxꞌ tiꞌ, catuꞌ jix ja waon cantej syaꞌtajilal wibꞌan, tuxa cꞌal oj mi jin ecꞌabꞌoj, cꞌamxa cꞌal mi bꞌey oj jin xew niꞌoj. Yal cꞌal mactxequel oj jin chaꞌle jin bꞌa yetoj, catuꞌ oj jin smakꞌon camoj.
15Catuꞌ jix takꞌwi Jehová jaxca tiꞌ:
—Cꞌamaj. Ta ey mactxequel oj jaach makꞌon camoj, jaꞌ jun mactxequel tuꞌ jujel oj ecꞌ spaj tet.
Catuꞌ jix ale can oc jun yechel naj yu Jehová, yet watxꞌ ta ey mac chi ẍaꞌle sbꞌa yetoj naj, cꞌam chi makꞌle cam naj. 16Jix lawi tuꞌ, jix el naj Caín bꞌey jix kꞌanabꞌ yetoj Jehová tuꞌ, catuꞌ jix too naj bꞌey jun txꞌotxꞌ txꞌotxꞌ caw naat chi yij Nod, yetcꞌulaltoj Edén bꞌey chi aol cꞌu.
Ebꞌ Yicꞌaal Naj Caín
17Jix sjunbꞌane sbꞌa naj Caín yetoj yistil, catuꞌ jix yijon oc yuneꞌ ix. Jix lawi tuꞌ, jix ali jun yuneꞌ ix, jix yakꞌon ix yij sbꞌi Enoc. Catuꞌ jix swaꞌnen jun conobꞌ naj Caín tuꞌ, jaꞌ sbꞌi jun scꞌaal tuꞌ jix yaoc sbꞌioj jun conobꞌ tuꞌ. 18Jaꞌ naj Enoc, smam Irad; jaꞌ naj Irad smam Mehujael, jaꞌ Mehujael smam Metusael, jaꞌ Metusael smam Lámec. 19Jaꞌ naj Lámec tuꞌ, cawan yistil naj. Ey jun ix chi yij Adá, ey junxa ix chi yij Silá. 20Jaꞌ ix Adá tuꞌ, jix ali jun swinaj unin, Jabal jix yakꞌ yij sbꞌi: Jaꞌton naj tuꞌ bꞌabꞌel jobꞌom meꞌ, tol jix caey ecꞌ yul-laj na waꞌnebꞌil a yetoj kꞌap, yet chi ecꞌabꞌ cꞌaltoj yetoj noꞌ sjobꞌbꞌeal noꞌ tuꞌ. 21Jaꞌ naj Jabal tuꞌ, ey jun yuẍtaj chi yij Jubal. Jaꞌ naj tuꞌ jix bꞌabꞌi tenon teꞌ arpa cꞌal xuon flauta. 22Jaꞌ ix Silá tuꞌ, jix ali pax jun swinaj unin ix, Tubal-caín jix yakꞌ yij sbꞌi. Jaꞌ naj tuꞌ, chacꞌom chꞌen jix eloc naj, catuꞌ jix swaꞌnen tzettaj yetal yin chꞌen bronce cꞌal yin chꞌen hierro. Ey jun yanabꞌ chi yij Naamá.
23Jaꞌ yet junel jix yalon naj Lámec tet ebꞌ ix yistil jaxca tiꞌ:
Jex wistil, jaach Adá cꞌal jaach Silá, abꞌwej tzet oj walaꞌ: Jix jin makꞌ cam jun naj achꞌe yutol jix jin smakꞌ yasoj naj.
24Ta jujel chi pajtzele yet Caín, jajxam wal jin jain tiꞌ 77 el, oj pajtzele tet ebꞌ chin txꞌemoni, ẍi naj.
Jix Ali Junxa Scꞌaal Adán Sqꞌuexeloj Naj Abel
25Jaꞌ Adán jix ali pax junxa scꞌaal yetoj ix Eva. Set,#4:25 Jaꞌ yin Hebreo, jaꞌ jun bꞌie chi yij Set, laan chi yun yal-le yetoj jun kꞌane, qꞌuexele. jix yij naj unin tuꞌ yu ix. Jix yalon ix jaxca tiꞌ: Jaꞌ Jehová jix akꞌon junxa wuneꞌ tiꞌ sqꞌuexeloj naj Abel makꞌbꞌil cam yu naj Caín.
26Jaꞌ naj Set tuꞌ, jix ali jun scꞌaal, jix yakꞌon yij sbꞌi Enós. Jatax yet jun tiempoal tuꞌ jix ẍaꞌon el yich yoc ebꞌ ánima yin eyilal tet Jehová.
© 2016, Wycliffe Bible Translators, Inc. All rights reserved.