Zenezi 4
4
Caĩ norĩ wasu'u, Abéu me
1Tawamhã Adã, timro Ewaha ãma nasi sapa'a wamhã, ma tô tiwasã. I'ra duré oto tãma waptã'ã wamhã, te ãne tinha:
— Uburé Danhib'apito nhimipawaptobzéb zarina, ma ĩ'ra aibâ na ĩma podo.
Tawamhã ma tô sisi, Caĩ#4.1 Caĩ hã hebreu norĩ mreme na “Wa tô ti'â” aiwa prã na ne iwapari na hã. na. 2Tahawa, nimahã na ma tô duré i'ra hâiba amo hã tãma podo, isisi hã Abéu na, Caĩhĩ sisãnawã hã. Abéu te pone'ẽrebâ 'madâ'â'wa na 're hâimana. Caĩ hã te rob're na si te te 're romhuri.
3Tawamhã we ropsi'utõrĩ mono pari, nimahã bâtâ na Caĩ ma tô tiburu nho hã 'mai'â, Uburé Danhib'apito ma, ãma tãma isõprubzéb da hã. 4Duré Abéu tinhimizama pone'ẽrebâ 'ra poto'rada hã ma tô duré 'mai'â. Tawamhã taha na nimahã inhi wẽ uptabi na ma tô Uburé Danhib'apito ma ãma tãma tinhopru. Tawamhã Abéu ma hã duré isibzari ma zama toi uptabi di. 5Tane nherẽ, Caĩhĩ nhibzari si te te wẽsãmri õ di. Ma tô wẽ'õ. Tahawa, ma tô Caĩ ab'rui pese. Duré ma tô ti'ubu zei'õ pese. 6Tahawa te Uburé Danhib'apito hã tãma tinha ãne:
— E marĩ wa, ma tô asahi. Duré e marĩ wa, te ai'ubu zei'õ na si nasi ane. 7Tô i'uwaibaba na a hã 'manharĩ 'wa'âhã, te aré 're aihâ mo, rowẽ te. Tane nherẽ, ma tô asiwasé, a hã. Tahawa te i'aiwasétézé hã 'ridawa ãma asô mapa. Ta hã te sima wẽ, siptete na asada 're hâimana mono da. Tane nherẽ, te za a hã asiptete na ãma ai'uté da sada asipte.
8Tawamhã Caĩ, tisisãnawã Abéu ma, te ãne tãma tinha:
— Oto wane na, a'ubuni u.
Tawamhã rom na oto siré hâimana zahuré wamhã, ma tô Caĩ, tisisãnawã Abéu da asapẽtẽ. Tahawa, ma tô tiwĩ.
9Tawamhã Uburé Danhib'apito, nimahã na te Caĩ hã sadanha ãne:
— E mahãta asisãnawã Abéu.
— Me! Wa hã te waihu'u õ di. E wa hã ĩsisãnawã 'madâ'â'wa pâ. — Ãne Caĩ ma te asa ãma sada'â.
10Tawamhã 'Re ihâimana u'âsi mono te ãne tãma tinha:
— E marĩ da, ma tô ãne hã i'manha. Asisãnawãi wapru te ti'ai hawimhã 're sadari. Te duré waptẽ, ti'ruiwa'âbâzé hã. 11Tahawa wa za iwẽ'õ hã aima pisutu. Ti'ai wamhã 're irob're mono da hã mare di za oto. E marĩ wa. Asisãnawã wĩrĩ wamhã, ti'a iwapru zô hã si'ridawa wa, te te waprui hârâ da. 12Tahawa duré ti'a na 're rob're mono da, sada 're ropese mono wamhã, aima 're i'rãi mono da hã mare di za. A hã te za hâiwi si õne u'â daro mono bâ 're aimo.
13Tawamhã Caĩ, te Uburé Danhib'apito ma asa tãma tinha ãne:
— Ã hã ipire uptabi na ĩma irob'manharĩzé hã, te 'wapéi waihu'u õ di za. 14Ã bâtâ na te za ã hã ti'ai hawi ĩzatõ. Tahawa wa za ai'ubu wi hã 're ĩsima'uri u'âsi. Duré siwa'ru wa za daro mono bâ 're mo, hâiwi si. Tawamhã duré siwa'ru da te dasiwi 're ĩnhopẽtẽ mono wamhã, te za dasima da te 're wẽ za'ra, da te dasiwi ĩwĩrĩ da hã.
15Tane nherẽ, Uburé Danhib'apito asa ma te ãne ãma tãma wa'rã:
— Mare di! Tane aima 're iromhâimana mono da hã mare di za. E marĩ wa. Ni'wa te te aiwĩrĩ wamhã, taha wa'rãmi te za 7 na ihawi a'uwẽ 're ihâimana za'ra mono norĩ hã ai'utõ, taha na si da te dasiwi ãma asé nhi'ra da.
Tawamhã Uburé Danhib'apito, Caĩhĩ ãma ipibui pese zéb da, ma tô marĩ hã ãma tihi, da te dasiwi 're sõpẽtẽ mono wa, da te wĩrĩ tõ da. 16Tawamhã Caĩ, Uburé Danhib'apito 're ihâimana mono zém hawimhã ma tô watobro. Tahawa, ma tô mo, Nodi#4.16 Node hã hebreu norĩ mreme na “Daro mono bâ hâiwi si te 're mo.” aiwa prã na ne iwapari na hã. na romnhisi ãma 're hâimana mono da oto, Édẽ bâtâ pusizém niwĩ 're ihâimana mono ãma.
Caĩhĩ nhihudu wasu'u
17Tawamhã Caĩ norĩ imro me hã, ma tô i'ra tãma ti'maipoto zahuré. Ta hã ma tô duré sisi zahuré, Enoqui na. Tawamhã duré nimahã na, Caĩ 'ri nho'u te te i'ri hã, ma tô ti'ra nhisi na hã sisi, Enoqui na. 18Ta hã Enoqui, Iradehe mama, duré Irade hã, Meuza'éhé mama, duré Meuza'é hã, Matuzarẽhẽ mama, duré Matuzarẽ hã, Rametihi mama.
19Tawamhã Rametihi mro zahuré hã, imorĩ'rata na imro nhisi hã Ada na, duré imro zahu nhisi hã Zila na. 20Tawamhã Adaha ma, i'ra hã ma tô tãma podo. Isisi hã Zaba na. Ta hã danhimizama tébré'wa norĩ hi'rata na'rada, duré romhâ 'manharĩ na te te sima 're i'ri nhoré za'ra mono 're, 're ihâimana za'ra mono norĩ hi'rata na'rada. 21Tawamhã duré Zabaha sisãnawã hã te 're 'maihâimana, isisi hã Zuba'u na. Ta hã, uburé isõrõta'are na te te 're iropta'a za'ra mono norĩ hi'rata na'rada, duré ibuhârâ na 're isimnhihãsi za'ra mono norĩ hi'rata na'rada. 22Tawamhã Zilaha ma zama, ma tô duré i'ra hã tãma 'maipodo. Isisi hã Tubalca'ĩ na, ẽtẽ topsada brõzi na duré isi'uwazi tete na marĩ hã te te 're i'ab'manharĩ mono. Duré taha hidiba hã te 're 'maihâimana, isisi hã Na'ama na.
23Tawamhã nimahã bâtâ na Rameti te timro norĩ ma hã tãma nharĩ zahuré ãne:
“Ada, Zilaha me, te za ĩwapari 'wa;
Rametihi mro norĩ, ĩmreme hã wapari pese aba.
Aibâ hã wa tô 'maiwĩ, te te ĩ'u'a wa.
Tô ai'repudu hã wa tô 'maiwĩ. E marĩ wa. Tô duré te te ĩ'u'a wa.
24Caĩ, da te iwĩrĩzé 7 na dahâiba na da te ãma dasiwi 'ruiwa'âbâ da wamhã, duré ni'wa te te ĩwĩrĩ da wamhã, te za 77 na dahâiba na idadâ'â za'ra na ãma isahu na hã ãma dasiwi ĩ'ruiwa'âbâ ni.”
Setihi waptã'ãzé wasu'u
25Tawamhã Adã norĩ imro me, ma tô duré i'ra hã tãma ti'maipoto zahuré. Tahawa te ãne tinha imro pi'õ hã:
— 'Re ihâimana u'âsi mono, Abéu nhowa're'remhã ma tô duré ĩ'ra hã ĩma tisõ, Caĩ te te ĩwĩrĩ nhibrob're ĩma 're ihâimana mono da hã.
Tawamhã ta hã ma tô sisi, Seti#4.25 Seti hã hebreu norĩ mreme na “Ma tô tisõ.” aiwa prã na ne iwapari na hã. na.
26Tawamhã duré Setihi ma, ma tô i'ra hã tãma 'maipodo. Ta hã ma tô duré sisi, Enosi na. Tawamhã tame ma tô oto Uburé Danhib'apito nhisi waptẽrẽ na hã ãma 're dawata na'rata za'ra.
נבחרו כעת:
Zenezi 4: xavBP
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2011, Wycliffe Bible Translators, Inc.All rights reserved.