Mateo 3
3
1Xerilaꞌ ja tiempo chi ja Juan Bautista arjaꞌ peti, ntajini nuyaꞌ rbixic ja rtzobal Dios chipan jun lugar kas talani cꞌo pa rcuenta Judea. 2Quewaꞌ nbij chique ja winak riꞌ: —Teqꞌuexaꞌ ja renaꞌoj in teyaꞌaꞌ can ja ritzelal como xa nnakajinto ja gobierno xin chilaꞌ chicaj, neꞌ chique. 3Ja Juan jariꞌ ja bitajnak can ojer chi npi na, quewaꞌ bitajnak can tre rmal ja profeta Isaías riꞌ: —Cꞌo jun kulaj ncꞌaxax chipan ja lugar ja kas talani, quewaꞌ nbij riꞌ: —Techomarsaj chi utz ja rubey ja kajaw Dios, jic teyaꞌaꞌ. Queriꞌ ja tzꞌibtal can tre ja Juan.
4Ja cꞌa Juan puro rsamal camello ocnak ja rtziak rcojon in cꞌo jun cincha rcojon xerupan. Ja rocnak rqꞌuexwach rway, sacꞌ nerutij in raxcab chakajaꞌ ncanoj pa tak kꞌayis. 5In nij ecꞌo wiꞌ winak neꞌekaj ruqꞌuin caniꞌ chique ja raj Jerusalén in chique ja recꞌo chipan ja juleꞌ chic lugar ja cꞌo pa rcuenta Judea in chakajaꞌ canojel ja recꞌo chinakaj ja binelyaꞌ Jordán. 6Ja cꞌa tok xeꞌekaj ruqꞌuin xeba̱n bautizar rmal chipan ja binelyaꞌ Jordán in triꞌ quechol wiꞌ ja quil quemac.
7E qꞌuiy chique ja fariseo e cachbil ja saduceo ejeꞌeꞌ xeꞌekaj ruqꞌuin ja Juan chi neba̱n bautizar rmal pro ja cꞌa Juan tok xerutzꞌat arjaꞌ xbij chique: —Ixix congana itzel tak naꞌoj ewcꞌan, ix caniꞌ juleꞌ itzel tak cumatz. ¿Nak bin chewe chi nixanmaj chwach ja nimlaj juicio ja nnakajinto? 8Ja kas mero rubey chi neban tiwachini ja rutzil pa tak ewanma, nijawariꞌ yatal chewij chi neban ja wi katzij chi eqꞌuexon chic ja renaꞌoj. 9In maxta quewaꞌ techꞌob kaj pa tak ewanma riꞌ: —Ajoj ok riy rumam can ja rAbraham rmalariꞌ ok rtinamit Dios, maxta quixcheꞌe. Queriꞌ nbij chewe como ja Dios ni ma cꞌayew ta tre nerwinakarsaj juleꞌ riy rumam ja rAbraham trelaꞌ juleꞌ abaj leꞌ. 10In chakajaꞌ ja camic riꞌ xa nakaj cꞌoto chi wiꞌ ja juicio xin Dios caniꞌ rbanic jun iquiaj chomin chic xajalal majaꞌn tichoy juleꞌ cheꞌ tre. Ja cꞌa cheꞌ ja mta utz rwach nuyaꞌ jariꞌ nchoyi nojelal in nporox pa kꞌakꞌ. 11Anin, yaꞌ ncoj ja nixnbanbej bautizar in tok nixban bautizar jariꞌ retal chi echꞌobon chic chi neqꞌuex ja renaꞌoj in neyaꞌ can ja ritzelal. Pro cꞌo chi na jun penak ja xajalal majaꞌn tumaj ja rsamaj, arjaꞌ más chi na nim ja poder cꞌo pa rukꞌaꞌ chinwach anin. Anin ma yatal ta chwij xquintiloc ta ruqꞌuin nixtacꞌa chi rucꞌaxic ja rxajab. Arjaꞌ nixruban bautizar pro Espíritu Santo in kꞌakꞌ ja nixrbanbej bautizar. 12Arjaꞌ rchomin chic riꞌ chi nerpartiꞌij ja re utz chiquicojol ja ma e utz ta caniꞌ nuban jun achi nuqꞌuiak rwach trigo tre pala, npartiꞌij ja trigo chipan ja rmukal. Cꞌacꞌariꞌ nucꞌol ja trigo chipan ja rcꞌolibal pro ja rmukal nporoj pa kꞌakꞌ pro jariꞌ kꞌakꞌ mta chupic trij. Queriꞌ xbij ja Juan chique.
* * * * * * * * * *
13Ja cꞌa Jesús arjaꞌ xelto pa Galilea, be ruqꞌuin ja Juan chuchiꞌ ja binelyaꞌ Jordán. Ja rchꞌobonel chi nbe neba̱n bautizar rmal ja Juan. 14Pro ja tok xekaji, ja Juan matirajoꞌ nuban bautizar, quewaꞌ xbij tre riꞌ: —Pro ja kas rubey, anin ja quinabanaꞌ bautizar, pro jariꞌ takaꞌan atat nawajoꞌ chi natnuban bautizar, neꞌe ja Juan. 15In bix tre rmal ja Jesús: —Camic ni ninaban wiꞌ bautizar como rjawaxic chi nkaban cumplir nojel ja najoꞌx chake rmal ja Dios chi nkaban, neꞌxi ja Juan. Cꞌacꞌariꞌ ja Juan xuban ja bautismo. 16Ja Jesús tok chaka maril bantaj bautizar xelto pa yaꞌ in chaka jalal tok jaktaji ja caj. Cꞌacꞌariꞌ xutzꞌat ja rEspíritu Santo xin Dios caniꞌ jun ajsakaxicꞌ kajto ruqꞌuin. 17In cꞌo jun kulaj penak chilaꞌ chicaj cꞌaxaxi, quewaꞌ xbij riꞌ: —Jawaꞌ wariꞌ jawaꞌ chakꞌlaj Walcꞌwal, congana ninquicot trij, neꞌe ja kulaj xin Dios.
© 2010, Wycliffe Bible Translators, Inc. All rights reserved.