SAN LUCAS 22
22
Ni Judas Iscariote najun kamaqxtaqyaꞌ ni Jesús la ixtamakakꞌan yu lajꞌay lapanakni
(Mt. 26:1-5, 14-16; Mr. 14:1-2, 10-11; Jn.11 :45-53)
1Ex chuncha ixtaꞌuktsꞌuniy ni Paxku yu ay ixkꞌatankꞌan ni israelitas, tejkan ixtaꞌuy ni pan yu jantu lhiyaukan levadura. 2Chuncha ni xaꞌukxtinin ni kuras kun yu ixtamasuy ixlhachimoꞌonkꞌan ni israelitas, va ixtalakxkauniy tas laycha katapumaqnil ni Jesús. Pero va ixtatalhauniy ni lapanakni.
3Ex chuncha ni Satanás va tanunil ni Judas, yu ixtajuniy Iscariote. Yucha xaqayntaun yu ixpumakautꞌuykꞌan ixtꞌaltanan Jesús. 4Ex yucha jalaqꞌal ni xaꞌukxtinin kuras kun yu xapolicias ni ay lakatajtan. Va laqlhixaqalal para laycha kalaqmaqxtaqnil ni Jesús ni yuꞌuncha. 5Ex yuꞌuncha talhiꞌachantajul, va tajunil kataxtaqnil tumin incha kalaqmaqxtaqnil. 6Ex va lhipaꞌinil ni Judas, va aqtayl lakpastaknan tas lay kapumaqxtaqlhi ni Jesús tejkan jantu kaꞌalil pumalhuu lapanakni.
Ni Jesús laktꞌavayl ixtꞌaltanan yu xavayti Paxku
(Mt. 26:17-29; Mr. 14:12-25; Jn.13 :21-30; 1Co.11 :23-26)
7Ex chuncha va lakachilcha xakꞌatan Paxku, tejkan ixtaꞌuy pan yu jantu ixlhiyaukan levadura, vachuꞌ ixtamaqniy sasꞌatꞌa borrego tacha ixlapaxkankꞌan. 8Ni Jesús malaqachal ni Pedro ali Juan, va lakjunil:
—Kapꞌintꞌik laꞌoxinin yu kaꞌuyau xakꞌatan Paxku.
9Ex va tanaul:
—¿Toꞌoxtaycha naꞌun kaklaꞌoxiu?
10Ex lakjunil ni Jesús:
—Tejkan katꞌanuyapitik ni laka putaulan ancha kapꞌaxtꞌoꞌapitik qayntaun lapanaki yu lhaꞌanta xkan la ixꞌaqxau. Yucha katꞌapꞌinapitik tus laqa chaqaꞌ taꞌan katanuyanta. 11Ancha kꞌaꞌunitꞌik ni jamachaqaꞌ: “Kijamalaninikꞌan va lhasakminin toꞌoxtaycha lay kalaktꞌavayl ni ixtꞌaltanan ni xakꞌatan Paxku.” 12Ex ni yucha katamasuniyan taꞌan apulaktaun ni chaqaꞌ yu pulajꞌay taꞌan alinꞌojotacha yu axtoqnuꞌ. Ancha kꞌalaꞌoxiyapitik ni lakvayti.
13Ex chuncha ni yuꞌuncha taꞌal, tatemal va chuncha tacha lakjunkal. Ancha talaꞌoxil xalakvayti ni kꞌatan Paxku.
14Ex chuncha tejkan chaꞌalcha ni hora ni Jesús kun ixtꞌaltanan tatanul ni laqa chaqaꞌ, va tataulal laka mesa. 15Ex lakjunil ni Jesús:
—Kitꞌin kun tachun la kelhanuti klatꞌavaynputunau yu uxiknan xavayti ni aniy kꞌatan Paxku tejkan jantukaꞌ ikmaqnikan. 16Kitꞌin klajunau jantucha kajkꞌuchoqoyaꞌ xavayti ni aniy kꞌatan tus tejkan kataqayntsayaꞌ yu naunputun aniy kꞌatan tejkan kalhachimoꞌonunaꞌ ni Dios.
17Ex chuncha chꞌapal laqataun vaso, va xtaqnil lhimalaqpuchuncha ni Dios. Ex va lakjunil:
—Kachꞌapꞌatꞌik ni vaso, kaꞌoqtꞌik tachun uxiknankꞌan. 18Laqsaval klajunau jantucha aqtaun kajkꞌoqchoqoyaꞌ kitꞌin yu aniy xaxkan ni uva tus tejkan kaminaꞌ jalhachimoꞌonuꞌ ni Dios.
19Ex chꞌapal ni pan va xtaqnil lhimalaqpuchuncha ni Dios. Va cheꞌel, laqxtaqnilcha, va lakjunil:
—Yu aniy va kilakatunaj maqxtaqkanta por uxiknankꞌan. Va tsaj chuncha kꞌamakꞌayapitik para kilapupastakvi ni kitꞌin.
20Ex tejkan tavaynꞌol vachu va chuncha chꞌapal ni vaso, va naul:
—Yu aniy vaso masuy ni Dios va taun sastꞌi chivinti jatꞌatamakajun ixlapanakni por kijakꞌalna. Va kataxtuyaꞌ kijakꞌalnan para kꞌalaqtꞌaxtꞌutꞌik ni uxiknan. 21Pero qayntaun yu kintꞌataulay aniy laka mesa yucha kimaqxtaqyaꞌ para kakmaqnikal. 22Chuncha katapasayaꞌ, ni kitꞌin yu kval Sasꞌatꞌa Lapanaki ikpuꞌan lakatin taꞌan kimpaxtoqniy. Pero paynicha ni anchanu lapanaki yu kimaqxtaqyaꞌ para kakmaqnikal.
23Ex yuꞌuncha taꞌaqtayl talaklhichiviniy taꞌayucha kaval yu kamaqxtaqlhi.
Yu apalay ay lapanaki maqskꞌiniy lakatꞌuniy kamakakal
24Ex chuncha taꞌaqtaynilcha talalhisakmiy siya yuꞌuncha taꞌayucha yu apalay ay kaval yu ixpumakautꞌuykꞌan. 25Pero ni Jesús lakjunil:
—Ni lajꞌay xalhachimoꞌonun aniy lakamunukpaꞌ talhichimoꞌonun tacha pꞌas xaꞌukxtinin. Yuꞌuncha tanajun kalaktoꞌoyakal tacha lajꞌoxi lapanakni kataval. 26Pero uxiknan jantu chun kꞌamakꞌakꞌantꞌik. Va knajun yu apalay ay junita yucha kaval tacha yu apalay lakatꞌuniy. Yu lhinajun, yucha kaval tacha qayntaun oqxtamati. 27¿Tas naunatꞌikcha uxiknankꞌan? ¿Taꞌayucha yu apalay ay? ¿Va yu vil laka mesa u va yu jamunuꞌ? Va yu vil laka mesa. Pero ni kitꞌin ikmakakan tacha miꞌoqxtamatkꞌan.
28’Ni uxiknankꞌan jantu aqtaun ixkilamakaunau tejkan lhitaꞌay xaktapasay. 29Xlhiyucha klaxtaqniyau taun palhachimoꞌon tacha kixtaqnil palhachimoꞌon ni kimPay. 30Para chuncha lay kilatꞌavajiu y kilatꞌaꞌoqvi la kimesa taꞌan kaklhachimoꞌonunaꞌ ni kitꞌin. Kꞌatꞌaulapitik tacha jalhachimoꞌonun. Kꞌalhiꞌunapitik yu oqxlaqkautꞌuykꞌan xalapanakni Israel.
Ni Jesús najun ni Pedro va kanaunaꞌ ni jantu mispay ni yucha
(Mt. 26:31-35; Mr. 14:27-31; Jn.13 :36-38)
31Ex naul ni Jesús, va junil ni Pedro:
—¡Ay, Simón kꞌatꞌi! Ni Satanás taskꞌintancha para katatankꞌalhan uxiknan vachu va tacha tankꞌalhakan ni trigo. 32Pero kitꞌin ikskꞌinil Dios por uxintꞌi para jantu kamaꞌatsꞌanꞌatꞌi milhakapuꞌati. Ex tejkan kꞌintꞌapꞌinchꞌoꞌoyeꞌe kꞌalaqꞌaqtꞌayꞌutꞌi mintꞌalaqaunin para ox katataylhaꞌal.
33Ex ni Pedro va junil:
—Jalhachimoꞌonuꞌ, kitꞌin va klistujcha kunita para kaktꞌaꞌan uxintꞌi mas lakapachꞌin, u mas kaknil kun uxintꞌi.
34Pero ni Jesús va junil:
—Pedro, kitꞌin kunan chavay tsꞌis tejkan jantukaꞌ tꞌasay ni puyux va aqtꞌutu kꞌanauneꞌe ni jantu kꞌimispꞌay.
Katapaxayaꞌ ixputsukukꞌan ixpumakautꞌuykꞌan, la lhitaꞌay kunaꞌ
35Ex chuncha va laklhisakmil ni Jesús, va naul:
—Tejkan klamalaqachau y jantu ixlhipꞌinatꞌik ni mintuminkꞌan nisin mibolsakꞌan nisin misapatojkꞌan, ¿ex va tatsꞌanqaniyan tuꞌuchun?
Ex yuꞌuncha tajunil:
—Jantu.
36Ex ni Jesús lakjunil:
—Pero chavaycha yu alin ixtumin, va kalhaꞌal. Vachuꞌ kalhaꞌal ixbolsa. Yu jantu kalhitsukul ixꞌespada, va kalhiꞌil ixlaqchꞌiti. 37Kitꞌin klajunau va maqskꞌiniy kataqayntsal tacha tsꞌoqkanta la ixchivinti Dios yu kilhichiviniy kitꞌin taꞌan najun: “Ni yucha laqtsꞌinkal tacha jalaktuꞌunuꞌ kaval.” Yu anu yu kilhichiviniy kitꞌin laqsaval katapasayaꞌ.
38Ex va tanaul ni yuꞌuncha:
—Jalhachimoꞌonuꞌ, aniy alin maꞌatꞌuy kiꞌespadakꞌan.
Ex va naul ni Jesús:
—Ka oxicha.
Ixtꞌaltanan taltatal tejkan ixtꞌajun skꞌiniꞌ Dios ni Jesús
(Mt. 26:36-46; Mr. 14:32-42)
39Ex chuncha ni Jesús taxtul ni laqa chaqaꞌ, va anchoqopal ni aspajun yu junkan Olivos, va tatꞌaꞌal ixtꞌaltanan. 40Ex tejkan ancha tachaꞌal, va lakjunil:
—Kaskꞌintꞌik Dios para jantu kꞌamakꞌanukꞌantꞌik y kamakꞌatꞌik yu jantu lajꞌox.
41Ex chuncha va al ixlhimaqati tacha kꞌatꞌanꞌalhutꞌi chiyux. Ancha taꞌaqtsoqoqtal, aqtayl skꞌin Dios. 42Va naul:
—KimPay kꞌatꞌi, incha va naꞌun uxintꞌi ex kꞌamakꞌatꞌi para jantu kaktapasal ni maqanlqajnati. Pero jantu kꞌamakꞌatꞌi tacha iknajun kitꞌin, va kamakꞌatꞌi tacha naꞌun uxintꞌi.
43Ex ancha tasul taun xamayul laktꞌiyan va xtaqnil tapꞌasta ni Jesús. 44Va ayaj ixmajkꞌatsay va la pꞌas iskꞌin Dios. Ixchanita xtꞌajlhi tacha jakꞌalnan ixjunita, va taꞌeltajul laka tꞌun. 45Ex chuncha skꞌinꞌol va tayachoqolcha, jalaqꞌal ixtꞌaltanan, va jalaqtsꞌil va ixtaltatay. Va tamaqaninil yuꞌuncha. 46Ex va lakjunil:
—¿Valiꞌiycha ltꞌatꞌayatꞌik? Kaꞌostꞌaulatꞌik, kaskꞌintꞌik Dios para jantu kꞌamakꞌanukꞌantꞌik y kamakꞌatꞌik yu jantu lajꞌox.
Ni Judas Iscariote maqxtaqlhi ni Jesús para katachꞌil
(Mt. 26:47-56; Mr. 14:43-50; Jn.18 :2-11)
47Ex chuncha tejkan vananaj ixtꞌajun chivin, va tachaꞌal lhuu lapanakni. Xaqayntaun ixpumakautꞌuykꞌan ixtꞌaltanan ni Jesús yu ixjunkan Judas, yucha japꞌulatal. Va taꞌuktsꞌuniniycha taꞌan ixyal ni Jesús, va laqmil para kakiltastuklhi. 48Pero ni Jesús va lhisakmil:
—Judas, ¿uxintꞌi kꞌinkꞌiltꞌastꞌukꞌa vamun para kꞌimpꞌumaqxtꞌaqyeꞌe ni kitꞌin yu Sasꞌatꞌa Lapanaki?
49Ex yu ixtatꞌavilanal ni Jesús tejkan takꞌatsal yu va laycha katapasal, va talhisakmil:
—Jalhachimoꞌonuꞌ, ¿tas naꞌuncha? ¿Va kalakchꞌapayaucha kun espada u jantu?
50Ex qayntaun maxtul ixꞌespada, va chaqxlhi ixꞌoqxtamati yu xaꞌukxtin ni kuras, va chaqxpꞌuxnil ixlhijakanaj aqaxqol. 51Ex jaqaltayl ni Jesús, va naul:
—Ancha katamaktalcha.
Ex ni Jesús va saknil ni ixꞌaqaxqol, va mukꞌanichoqol. 52Yu ixtachaꞌanta para katachꞌapal va ni xaꞌukxtinin kuras ali yu xaꞌukxtinin policias lakatajtan ali yu xalajꞌaynin. Ex chuncha ni Jesús va lakjunil:
—¿Va tacha alhavanacha kakval ni kilalaqminau kun kꞌiu ali espada? 53Mas va lhilhiy xaklatꞌataulau lakatajtan jantu aqtaun kilachꞌapau. Pero chavay va putsꞌista y va chuncha kilamakayau va por tapaxtoqniyan yu xalhachimoꞌon putsꞌista.
Ni Pedro naul jantu mispay ni Jesús
(Mt. 26:57-58, 69-75; Mr. 14:53-54, 66-72; Jn.18 :12-18, 25-27)
54Ex chuncha tachꞌapal ni Jesús, va talhaꞌal, va tamanul la ixchaqaꞌ yu xaꞌukxtin kura. Ni Pedro va paqmaqati ixtixkaulhaꞌanta. 55Ancha ixtamalkulata taꞌan malaqachoqoxnuta ni chaqaꞌ, valiꞌiy ixvilin ixtavilanal. Vachu laktꞌataulal ni Pedro. 56Ex qayntaun maqtsukuꞌ laqtsꞌil laka jikmi va aqtayl oqspulaqtsꞌin va naul:
—Yu aniy lapanaki va ixtꞌaltanaꞌ ni Jesús.
57Pero ni Pedro va naul ni jantu, va junil ni maqtsukuꞌ:
—Xanati, kitꞌin jantu kmispay ni yucha.
58Ex taun panchꞌix val, aqayntaun laqtsꞌil, va naul, junkal ni Pedro:
—Uxintꞌi vachuꞌ ixtꞌaltanaꞌ kꞌatꞌi.
Pero ni Pedro va junil:
—Joꞌati, jantu kitꞌin.
59Ex taun hora val, aqayntaun va pꞌas chivinil, va naul:
—Laqsaval, yu aniy lapanaki va ixtꞌaltanaꞌ, va machaqaꞌ Galilea.
60Ex va naul ni Pedro:
—Joꞌati, jantu laqsaval kaval yu naꞌun.
Ex tejkan vananaj ixtꞌajun chivin va tꞌasal ni puyux. 61Ex ni Jesús talaqaspꞌiklhi, laqtsꞌil ni Pedro. Ex va pastaklhi ni Pedro tacha naul ni Jesús: “Va aqtꞌutu kꞌanauneꞌe ni jantu kꞌimispꞌay tejkan jantukaꞌ istꞌasay ni puyux.” 62Ex taxtul ni Pedro, va la pꞌays qalhul.
Laktuꞌukan ni Jesús
(Mt. 26:67-68; Mr. 14:65)
63Taval ni lapanakni yu ixtachꞌapata ni Jesús va talaktuꞌul, va tanaqlhi. 64Ex talaqpuchꞌil, tanaqlhi, va tajunil:
—Kilajuniu taꞌayucha yu naqnicha.
65Va pulhuu laqxtoqnuꞌ chivinti tapulaktuꞌul.
Ni Jesús lhaꞌankal taꞌan talhachimoꞌonun yu lajꞌay lapanakni
(Mt. 26:59-66; Mr. 14:55-64; Jn.18 :19-24)
66Ex va tunkulcha tataqxtoqlhi yu lajꞌay xapaynin yu xaꞌukxtinin kuras kun yu ixtamasuy ixlhachimoꞌonkꞌan ni israelitas. Yuꞌuncha ixtalhichimoꞌoy ixputsukkꞌan. Ancha lhiminkal ni Jesús. 67Ex va tajunil:
—Kilajuniu incha laqsaval ni Cristo kꞌatꞌi, yu ixtanajun kamalaqachayaꞌ ni Dios.
Ex ni Jesús va lakjunil:
—Mas va kaklajuniu, jantu kilalhakapuꞌau. 68Mas va kaklalhisakmiu jantu kꞌaꞌaltꞌayanantꞌik nisin jantu kilaxꞌotau. 69Pero chavay y mas va tavanancha, kitꞌin yu kval Sasꞌatꞌa Lapanaki kaktaulaꞌ la ixlhijakanaj Dios, kaklhitsukuyaꞌ ixtapꞌasta.
70Ex tachun ni anchanu lajꞌay lapanakni va tanaul:
—¿Ex uxintꞌi Sasꞌatꞌa Dios kꞌatꞌi?
Ex ni Jesús lakjunil:
—Chun, tacha uxiknan naunatꞌik.
71Ex chuncha ni yuꞌuncha va tanaul:
—¿Tisuncha alati chivinti maqskꞌiniyau para kamukꞌaniu ixlaqtaqal? Oxicha kun yu xanajun.
נבחרו כעת:
SAN LUCAS 22: tpt
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2004,Wycliffe Bible Translators, Inc. All rights reserved.