Mateo 1
1
To Napuunan ni Jesu-Cristo
(Lucas 3:23-38)
1Seini to napuunan ni Jesu-Cristo no Kaliwat ni David dow ni Abraham.
2Si Abraham amoy ni Isaac.
Si Isaac amoy ni Jacob.
Si Jacob amoy ni Juda dow to mgo suun din.
3Si Juda amoy ni Fares dow ni Zera, si Tamar to inoy dan.
Si Fares amoy ni Esrom. Si Esrom amoy ni Aram.
4Si Aram amoy ni Aminadab.
Si Aminadab amoy ni Naason.
Si Naason amoy ni Salmon.
5Si Salmon amoy ni Boos, si Rahab to inoy din.
Si Boos amoy ni Obed, si Ruth to inoy din.
Si Obed amoy ni Isai.
6Si Isai amoy ni Hari David.
Si David amoy ni Salomon.
To inoy din, asawa ni Urias notoduon no naasawa on isab ni David.
7Si Salomon amoy ni Roboam.
Si Roboam amoy ni Abias.
Si Abias amoy ni Asa.
8Si Asa amoy ni Josafat.
Si Josafat amoy ni Joram.
Si Joram amoy ni Usias.
9Si Usias amoy ni Jotam.
Si Jotam amoy ni Acas.
Si Acas amoy ni Ezequias.
10Si Ezequias amoy ni Manases.
Si Manases amoy ni Amon.
Si Amon amoy ni Josias.
11Si Josias amoy ni Jeconias dow mgo suun din. Sikan to panahon no pigbihag to mgo Hibru#1:11 To mgo Hibru og-ilingon isab to mgo Judeo su to duma kandan diya ugpa to banwa no Judea. aw daeha diya to Babilonia.
12Tapus sikandan daeha diya to Babilonia, mey anak ni Jeconias, si Salatiel.
Si Salatiel amoy ni Sorobabel.
13Si Sorobabel amoy ni Abiud.
Si Abiud amoy ni Eliaquim.
Si Eliaquim amoy ni Asor.
14Si Asor amoy ni Sadoc.
Si Sadoc amoy ni Aquim.
Si Aquim amoy ni Eliud.
15Si Eliud amoy ni Eleasar.
Si Eleasar amoy ni Matan.
Si Matan amoy ni Jacob.
16Si Jacob amoy ni Jose.
Si Jose bana ni Maria no inoy ni Jesus no og-ilingon to Insaad no Manyuyuwas.#1:16 To Grigu no inikagihan: Cristo. To kahuyugan to Cristo, Insaad no Manyuyuwas no ogpaharion to Diyus to kaotawan din.
17Na, sugud ki Abraham pailing diya ki Hari David, meyduon sampuyu-tag-upat no ka kaliwatan. Sugud ki David kotob no bihagon to mgo Hibru diya to Babilonia, meyduon isab sampuyu-tag-upat no ka kaliwatan. Sugud duon kotob no i-anak si Cristo, meyduon manda sampuyu-tag-upat no ka kaliwatan.
To Pagkaotow ni Jesus
(Lucas 2:1-21)
18Nailing to seini to pagkaotow ni Jesu-Cristo. Si Maria no inoy din asawahon ni Jose. Di no wada pad sikandan kaminyo, namaan on si Maria no nabodos sikandin pinaagi to gahom to Ispiritu Santu. 19Na, si Jose matinumanon yagboy to mgo balaod to Diyus, di kona sikandin ogkaliyag no masikawan si Maria.#1:19 Diya to mgo Hibru, to otow no ogpanghonay ogpahamtangan to maagbot no kastigu. Kaling mighona-hona sikandin no og-ojowan din si Maria no kona ogkamaanan to duma.
20Anoy man no mighona-hona pad si Jose to sikan, pigpatagainop sikandin to anghil to Ginuu no mig-ikagi, “Jose no kaliwat ni Hari David, kona ka ogduwa-duwa to pag-asawa ki Maria, su sikan pagkabodos din pigbootan to Ispiritu Santu. 21Yukos to ig-anak din, aw Jesus to ihingadan nu kandin su ogyuwason din to kaotawan din to mgo sae dan.”#1:21 To kahan-inan no mgo ngadan to mgo Hibru meyduon kahuyugan. To kahuyugan to ngadan no Jesus, Manyuyuwas. 22Nailing to sikan agun matuman to diya impatag-an to Diyus to otow no kibali ba-ba din no pig-iling, 23“Meyduon daega no wada buling no ogkabodos, aw yukos to ig-anak din. Sikan bata oghingadanan to Emmanuel, no ko ita pa, to Diyus duma ita.”#1:23 Isaias 7:14 24Pagkabuyat ni Jose, pigtuman din sikan insugu to diya anghil to Ginuu. Pig-asawa din si Maria, 25di wada din dajun hulidi. Pigtagad din no muanak on. Na, anoy man no i-anak on sikan bata, Jesus to inngadan ni Jose.
© 1999, Wycliffe Bible Translators, Inc. All rights reserved.