کیتابٚ معرفی کودن
کلمه‌یٚ «انجیل» ینی «خبرٚ خوش» و اَ خبرٚ خوش کی خودا پیغامه، عیسی مسیح اونَ همه‌یٚ مردومٚ دنیا‌ره بأورده. و بعداً عیسی شاگردأن و پیروأن از اونٚ زندگی و تعلیماتی کی بده کیتابأنی بینیویشتیدی. اَ کیتابأن اناجیل خوأنده به، چونکی هو خبرٚ خوشَ اعلام کونه.
یوحنا یهودی و ایتأ از همراهأنٚ عیسی مسیح بو. اونٚ پئرٚ نام زِبدی و اونٚ برأرٚ نام یعقوب بو. یوحنا پیش از اونکی جزوِ همراهأنٚ عیسی ببه، ماهیگیر و پِطرُسٚ اَمرأ دوست و همکار بو. یوحنا خو انجیلٚ میأن از خودش نامی نبره بلکی خوره «شاگردی کی عیسی اونَ دوست دأشتی» یا «شاگردٚ دیگر» معرفی کونه.
نسخه‌یٚ اصلی‌یٚ اَ کیتاب به زبان یونانی بینیویشته بوبوسته و تا ایمروز انجیلٚ یوحنا، به ویشتر از ۱۵۰۰ زبانٚ جورواجور ترجمه بوبوسته. تا تومامٚ مردومٚ دونیا بتأنید اَ کیتابَ به خوشأنٚ زبان بخوأنید و بفهمید. مدارک و اسنادٚ تاریخی نیشأن دهه کی انجیلٚ یوحنا پیش از قرنٚ چهارمٚ میلادی به زبانٚ فارسی ترجمه بوبوسته کی متأسفانه ایمروزه به او نیویشته دسرسی نأریمی ولی دوواره هو انجیل به زبانٚ فارسی ترجمه بوبوسته. و ایمروز اَمأن اَ افتخارَ دأریمی کی هو انجیلَ به گیلکی، در دسرسٚ شومأن قرار بدیم.
یوحنا خو هدفَ از نیویشتنٚ اَ انجیل در بابٚ ۲۰ آیه ۳۱ بیان بوکوده. اون گه: «ولی اَنقدر بینیویشته بوبوسته تا ایمأن بأورید کی عیسی هو مسیح، و خودا پسره، و به توسطه اَ ایمأن صاحبه زندگی‌یٚ اَبدی بیبید.»
انجیله یوحنا دورون، عیسی مسیح به عنوانه کلمه الهی و اَبدی کی دونیا به توسطه اون ساخته بوبوسته معرفی بوبو. و دینیمی کی در سرتاسره دورانی کی عیسی مسیح اَ دنیایه خاکی دورون ایسه بو بر علیه اَ باور مخالفت و تضاد نهَه‌بو. و اَ تضاد و مخالفت باعثه کوشته بوستن مسیح صلیبه رو بوبوسته. پس با اونه مرگ و قیام بو کی خو مأموریته به انجام و کمال برسأنه. و با انجامٚ اَ مأموریت خودشَ و خودایَ بشنأسأنه. اَ انجیله دورون زندگی‌یٚ عیسی، مسیحه موعود، به صورته ایتأ مجموعه از نیشأنه‌یأن و معجزاته کی ایتفاق دکفته و به صورته سمبلیک به تصویر بکشه بوبوسته. چیزی کی قابله توجه‌یه و انجیله یوحنایه مشخصه کونه به کار بردنه سمبلیک از اشیا و اسامی در زندگی‌یٚ روزمره‌یه. از اَ طریق به حقیقت و واقعیتأنه روحانی ایشاره به. نیشأنه‌یأنی مثلٚ: آب، نان، نور، چوپان و برّه، تاک و اونه میوه.
تقسیمبندی‌یه کلی
۱- الوهیت و شخصیتٚ عیسی مسیح. ۱‏:۱‏-۱۸
۲- یحیی تمید‌دهنده و اوّلی شاگردأنٚ عیسی مسیح. ۱‏:۱۹‏-۵۱
۳- معجزات و تعلیماتٚ عیسی مسیح. بابٚ ۲‏-۱۲
۴- عیسی مسیح خو شاگردأنٚ اَمرأ خوداحافظی کونه و اوشأنَ تشویق کونه و اوشأنٚ‌ره دوعا کونه. بابٚ ۱۳‏-۱۷
۵- دستگیری‌یٚ عیسی مسیح، محاکمه، مصلوب و مردن و دفن بوستن. بابٚ ۱۸ و ۱۹
۶- زنده بوستن و قیامٚ عیسی مسیح. بابٚ ۲۰
۷- ایبار دیگر عیسی مسیح خوره خودشَ به خو شاگردأن ظاهرَ کونه. بابٚ ۲۱

सुनें - یوحنا ‮کیتابٚ معرفی کودن‬