Babanki - 2017 CABTAL (NT) Non Drama

Babanki - 2017 CABTAL (NT) Drama

Yesò kwen a Jèlikò sə chò fa tsu. Wùtsen ndiʼ a ntə̀ʼ ayì, və dzàŋ wen nə̀ Zàkyòs, Ghə̀ ndiʼ kətʉ kə viʼi vyì a və tinə kənsè, be diʼ wu ghoʼo. Ghə̀ kəŋ əyen la Yesò diʼ ndo lo, sə̀ gho əyen byiʼ ando viʼi nghoʼo, ghə̀ be temsə̀. Ghə̀ nyɨŋ dyʉ̀ ambì ə kuʼ a kwi fəkòʼ ndi Yesò ne sə nchò ghə̀ yenə wen byìʼe Yesò ndiʼì chò fa ji ayì. Yesò ne vì zaʼa tsu ə ki kuʼsə a kwi fəkoʼ ayì ə gàʼ à wen la,“Zàkyòs, zàŋsə shiʼì vì byìʼe ma dìʼì tsi a wu ngə̀ŋ layn.”
Ghə̀ zàŋsə̀ shiʼi lyɨ̀ Yesò nə̀ saŋlə ghə̀ ə dyʉ̀ wenə wen à wen ngə̀ŋ. Viʼi yen sə dèmkə̀ gàʼ à la, “Ghə̀ dyʉ̀ sə̀ diʼ wù ghàyn a wen a ngə̀ŋ wù nè nyʉ̀ byɨvə.”
Zàkyòs lù tɨmə ə gàʼ à Bobo la, “Zhʉtə a, Bobo, mà a gə̀ fo no tsèm a ma kiʼi a kə̀ ntìntìn ə ku viʼi kəmfem. A be sə tsèn ndiʼ la ma nshi li kəfo kə wìʼ kəmùʼ a kədyòʼ mà bwènsə̀ ku kàʼ à wen.”
Yesò gàʼ à wen la, “Viʼi ngə̀ŋ a shə̀ bwoŋ li layn byiʼàndo nkàyntə̀ wen bè diʼ tò wàyn Ablaham. Wàyn Wìʼ nvi ə kəŋ viʼi vyì a və lè li əbwòŋsə̀ vəwenə.”


Ando viʼi mbu zhʉtə gaʼa Yesò a ghenə̀, ghə̀ be mò ngàyn tsen à vəwenə byiʼ ando ghə̀ sə boʼsə dyʉ̀ a Jelusalèm, vəwenə kwòʼtə̀ la Nyìngòŋ zìtə̀ soʼo fòyn wen tò a zhʉ a ghèn. Yesò mò ngàyn ayi la, “Wyè ntuʼ tsen nlù li dyʉ̀ a loʼ tsen ghə̀ no kəghaf ədyʉ̀ shi àdyoʼ fa tsu ə bwènə̀ vì soʼo shə loʼ vəwenə, Ghə̀ dzàŋtə̀ viʼi shyèʼ wen wum ə gə̀tə̀ nkam nkam à vəwenə ə gàʼ la vəwenə nè mbaʼlə̀ tsu əyen la vəwenə a se gho lo əzaʼa fa tʉʼ a ghə̀ lu bwènə̀ vì. A ndiʼ ali, viʼi shə̀ loʼ a vyi bàynə̀ wen ə tɨm viʼi la və dyʉ̀ a kəshi a ghə̀ dyʉ̀ tsu ə gàʼ la vəwenə ko kòŋ la ghə̀ soʼ vəwenə.
“Ghə̀ dyʉ̀ və ku adyòʼ a wen la ghə̀ vì ə soʼ viʼi wen, ghə̀ mù bwènə̀ vì ə dzàŋtə viʼi shwèʼ wen vyì a ghə̀ nku ko à vəwenə li, əzhʉ la vəwenə tə zhʉsə ə baʼlə, ə se gho lo. Ghə̀ mbì vì ə gàʼ la, ‘Tìʼ, nkam yi mùʼ seli nkamsə wum.’ Ghə̀ gàʼ à wù shwèʼ ayi la, ‘Wu ne li nkàyn! Wù diʼ wù shwèʼ jùŋə̀! Wu ne soʼo ntə̀ʼsə wum byiʼ ando ma yenli la wu kɨli ətùʼmə̀ nə̀ məfotə mə tyetə mə.’ Kənkùmtə̀ kə wù shwèʼ vi ə gàʼ la, ‘Tìʼ, nkam yi mùʼ seli, nkamsə tàyn.’ Ghə̀ bwènsə̀ gàʼ à wen la, ‘Wu a soʼo ntə̀ʼsə tàyn.’ Ghə̀ tsen vì ə gàʼ la, ‘Tìʼ, à lè nkam wù yi a mà tə kwìʼtə ə ghʉ kəbàs kə ndisə, byiʼ ando mà tə nfàynə̀ wù. Wu diʼ alə̀ fàynsə, kɨ əlyɨ̀ kəfo a wù ko tə ghʉ, be kɨ əpfì ken la wu tə wye.’ Wyè ntuʼ ayì gàʼ à wen la, ‘Ma soʼo wù tò a ji a wu gàʼà fa tsu, wu diʼ no wù shwèʼ byɨ! Wu ke kɨ la ma fàynsə, lyɨ̀ kèn la mà tə ghʉ, be pfi kenla mà tə wye, à nè ghò la kə wù ghʉ ko ghomə a ngə̀ŋ ko, ndi mà ne sə vì lyɨ̀, ə lyɨ̀ boʼsə wenə se a?’ Ghə̀ mù gàʼ à viʼi vyì a və nti boʼsə tsu la, ‘Ghə̀ŋ shi nkam yì fa wen ə kwʉʼsə̀ à wìʼ yì a ghə̀ kiʼì nkamsə wum lì.’ Vəwenə bèm a wen la, ‘Və be kwʉʼsə tò à wen a tìʼ mu ghə̀ sə̀ kiʼi nkamsə wum?’ Ghə̀ bwènsə̀ gàʼ la, ‘No ndo a kiʼi və a ku ə kwùʼsə̀ a wen, à be gho no ndo, və à myètə̀ shi tè kətyeftə kì a ghə̀ ki lì. A nə̀ viʼi kəbàyn mò a və ko tə kòŋ la və ku adyòʼ la mà nsoʼo vəwenə lə, ghə̀ŋ vì ə zhwi vəwenə tò a mò ashɨ a shə̀.’”


Yesò ngàʼa alì mù lù sə kuʼ dyʉ̀ a Jelusalèm a mbì. Ando dyʉ̀ boʼsə a ntə̀ʼsə shì a və ndzàŋ nə̀ Bephag bènə̀ Betanì, a pfen a və ndzàŋ nə̀ Olìf ə tɨm ndzɨ̀mtə̀sə bàm wen sə bò gaʼa vəwenə la, “Ghə̀ŋ kwen dyʉ̀ tyì ntə̀ʼ ghèn à ghə̀ŋ ashɨ lə, ghə̀ŋ ne sə kwenə dyʉ̀ yen wàyn jàkas a və chuŋə̀, kenla wìʼ ntəmə kuʼ a yì a kətʉ, ghə̀ŋ zàs ə vì nə̀ wen a shə̀. Ghə̀ŋ ne sə zàsə̀, tsèn wìʼ bèm la ghə̀ŋ zàsə̀ ənè gho tsu lo? Ghə̀ŋ gàʼa wen la, ‘Bobo kiʼi kənyʉ̀ ənè nə̀ wen lo.’”
Viʼi vyì a ghə̀ tɨmə li lù dyʉ̀ ə yen jàkas yì ando ghə̀ yi gàʼ. Vəwenə dyʉ̀ sə zàytə̀ jàkas ayì, viʼi a və nkiʼi jàkas ayi bèm à vəwenə la, “Byìʼì ghò a ghə̀ŋ zàytə̀ jàkas ghèn a?” Vəwenə gàʼ la, “Bobo kiʼi kənyʉ̀ ənè nə̀ wen.” Vəwenə gàʼ alì ə lyɨ̀ jàkas ayì ə vì nə̀ wen a Yesò ə làfsə wen, ə kuʼsə Yesò à yi kətʉ. Yesò ne sə njèʼè a kwi jàkas ayì, viʼi tsuʼtə ndisə vəwenə ə moʼo dyʉ̀ a ji, ghə̀ tuʼu chò fà yi a kətʉ.
Ghə̀ nè boʼsə a Jelusalèm mù sə shiʼi fa ji a ghə̀ shiʼi fa wye pfen Olìf, nòyn ndzɨ̀mtə̀sə bàm wen no sətsèm, sə saŋlə kuʼsə Nyìngòŋ a gɨsə tosə byìʼì nyʉ̀ kaynə və vyi a vəwenə diʼ mu və yen li. La, “Mbwaʼmə à fòyn yi a ghə̀ vì a zhìʼ Bobo. Mbwaʼmə ndiʼ a kàŋ. Nyìngòŋ nkiʼ kuʼsə ghoʼghə a kəshi yì a kə ŋaŋtə̀li nkwʉʼ!”
Və Falàsi vətsen və a və njèʼè tò tyì nòyn ayì mù gàʼ à Yesò la, “Chiʼi ndzɨ̀mtə̀sə bàm wù sènsə a ndìʼsə̀.”
Ghə̀ gàʼ à vəwenə la, “Vəwenə sə tsèn chɨmə tè chɨmə, nguʼsə a nkuʼsə Nyìngòŋ a ghèn.”
Ghə̀ ne sə boʼsə dyʉ̀ ntə̀ʼ Jelusalèm ə kyi dyʉ̀sə̀ nə̀ ntə̀ʼ ayì, nshinsə ku wen, ghə̀ dì, ə gàʼ la, “Ndò ku la mo ghə̀ŋ, viʼi Jelusalèm kɨli kənyʉ̀ kyì a kə vì nə̀ mbwaʼmə layn a, luwen ghə̀ŋ zì kò ghə̀ŋ lə yen! Mətsi mə byɨmə sə boʼsə vì à ghə̀ŋ. Viʼi kəbàyn ghə̀ŋ nè kwìʼ mbàyn, ghə̀ nyɨŋ kaʼ ghə̀ŋ ə shwin ghə̀ŋ tò məshə̀ tsèm, ken ghə̀ŋ. Vəwenə lu tsə̀ʼsə ghə̀ŋ no vətsèm boʼsə nə̀ vunə vəŋə. Ngùʼ ko lə faŋ a kətʉ ghə̀ tsen a shə̀ byiʼ ando ghə̀ŋ nko nkɨ zhʉ yi a Nyìngòŋ nvì əbwàʼsə ghə̀ŋ.”


Yesò dyʉ̀ kwen a ngə̀ŋ Nyìngòŋ ghoʼo ə dzɨ̀mə̀ viʼi vyì a və nə̀ baʼlə fo tsu, gàʼ à vəwenə la, “Və nyoʼ li a Ŋwàʼlə̀ Nyìngòŋ la, ‘Ngə̀ŋ ghom lu ndiʼ ngə̀ŋ jɨ̀m’ alì ghə̀ŋ kaʼsə a sə diʼ kəshi kə vətsoŋ.”
Yesò zìtə̀ mù sə zhʉsə ziʼi a ngə̀ŋ Nyìngòŋ tò mətsi tsèm. Tʉtʉ vəpfèm və ngə̀ŋ Nyìngòŋ nə̀ ndìʼsə̀ sə təsoʼ bènə̀ vəchəʼ və loʼ mù sə kəŋ jì əzhwi wen, alì kò vəwenə lu yen kənyʉ̀ əcho fa yi a bàm byiʼ ando viʼi nko kòŋ əshwè kənyʉ̀ kə muʼ fà wen ziʼi.

सुनें - Luk 19