Gola - 2019 LIB (NT) Drama

Gola New Testament Translation and Literacy Project © Bible Society in Liberia, 2019.

Wo Jisɛ̀ naŋ ɓɛìŋ wòò anyùùŋ màŋjɛ̀wɛ̀uŋ nyàŋ wààŋ, “Manɛ̀ŋ maŋ nyɛnɛŋ anyùùŋ aŋ sɛ̀ɛ̀ e jùumù sùà maŋ, màŋ kuwa maŋ kaaìŋ. Kɛɛ e keì nyìnga do nàŋ nɔ̀ŋ koɓɛ̀ wo nyùnɔ̀ɔŋ do nàŋ nyɛ̀nɛ̀ŋ wo nyùùŋ màŋjɛ̀wɛ̀ miɔ̀ŋ bà guùŋ wo sɛ̀ɛ̀ e jùumù sùà wɔ. È henàŋ nɔ̀ŋ tɛ̀ɛ̀ wèè aŋ sɛ̀ɛ̀ wo nyùnɔ̀ɔŋ ke duò gbee ke gbèìŋ auŋ gbìàŋ wɔŋ juwoɔ̀ sùà, e nɛ̀ɛŋ nyɛ̀nɛ̀ŋ wo nɔ̀ŋ esaɓù wèè wo tòloòjɔ̀à wɛɛ̀ bà guùŋ wo nyɛ̀nɛ̀ŋ e keì naanààŋ. Weètii, yɛ̀mɛìŋ nyɛ̀iŋ bi diɛŋ.
“Sèè wo wùìya mɔɔ̀ŋ nyɛnɛŋ maŋ kèì jùumù, gbùùyaàuŋ, yèè sèè wò fè maŋ jùumù bi jɛwɛ, jùùyaàuŋ hakɛ̀. Sèè woum ɓèèmè e jùumù diɛŋ e sùà nɔɔnɔŋ le tìyèe ke ɗɔ̀ɔ̀ guùŋ sùà, yèè e teenga gbiŋ wò yaà hìnìè ko nɛ̀ɛ̀ŋ muìŋ wààŋ, ‘Hɔ̀nè, kɔ̀nɛɛ̀ŋ jùùyaàim hakɛ̀,’ mùŋ kuwa mauŋ jùùyà hakɛ̀.”

Aŋ keela nyàŋ naŋ wòò wo Kanaà nyààŋ, “Nyɛnɛ̀ŋ e hààwe wilɛ̀ e nyìngàà sùà.”
Wo Kanaà Jisɛ̀ naŋ nyiŋ fasàì wààŋ, “Sèè naŋ weè kɛ̀ɛ̀nɛ̀ŋ e hààwe e dɛɛ̀ mààŋ ke kaaŋ komaŋ, nàŋ ɓɛ̀nɛ̀ŋ wòò ke nyɔ̀lì kuu yɛɛ̀ nààŋ, ‘Fìè muŋ ka muŋ sie wɔŋ juwoɔ̀ tɛ̀ɛ̀.’ E yèɛ nìŋ naŋ woò lɛ è do nàŋ hɛɛnɛ̀ŋ.

“Sèè wo ɓɔìjɔ̀à tòmo mɔɔ̀ŋ wo weè hnàŋ e yìwìà ko tùmìè dìì ko ɓùi ɔ̀ɔ̀ ko yɛ̀ɛ̀mɛ̀ aŋ ɓaawaa nyàŋ diɛŋ, màuŋ ɓɛ̀nɛ̀ŋ wòo mààŋ, ‘Hnaàŋ muŋ kùwà e nɛ̀ŋje muŋ jè’? Kpele, muŋ naàŋ tii woò. Mùŋ douŋ nàŋ woò mààŋ, ‘Kɔ̀à vɔ̀ɔ̀nɔɔ̀ŋ maŋ deèum màŋ muŋ banebànè e nɛ̀ŋje muŋ kiɛ̀im miŋ jè. E kìlà muŋ fòlàim miŋ kpɛɛyɛ̀ jèe pangàà mùŋ jè e nɛ̀ŋje mɔ̀ɛ̀ maŋ tìà.’ ” Wo kààmɔɔɔ̀ŋ fè gè wò ɓɔìjɔ̀à tòmouŋ nɔɔ̀ŋ kè sɛ̀ wèè è tòmoɛ̀ wò nauŋ woò wèè wo nyɛ̀nɛ̀ŋ lɛ. Yɛi nɔŋ è yaà wèè nyɛ̀iŋ pɛɛ. Sèè nìŋ kpɛɛyɛ̀ nyɛ̀nɛ̀ŋ e tòmoɛ̀ nìŋ kuwa naŋ nyɛ̀nɛ̀ŋ lɛ, wòoiŋ nààŋ “È yààìŋ nɔŋ aŋ ɓɔìjɔ̀à tòmo, è naiŋ nɔŋ nyɛ̀nɛ̀ŋ e tòmoɛ̀ è kuwa eiŋ nyɛ̀nɛ̀ŋ lɛ.”

Nààŋ wo Jisɛ̀ yaà wa kɔ̀ɔ̀yɛ̀ ko Jùlusɛ̀làm, wò naŋ kɔ̀ɛ̀ɛ̀ e fèèmàŋ wɔŋ fùɔ̀ŋ Sàmiliàa yaà wɔŋ fùɔ̀ŋ Galaliì sùà. Nààŋ wò yaà wa kɔ̀ɔ̀yɛ̀ ko vàa bà, wò naŋ dèènè aŋ fèlàà zììyà aŋ yè nyaŋ kuwa wa e sààŋ maŋkùnù. Kɛɛ àŋ naŋ wa sìè e fèemàŋ mùnlaŋ yèè àŋ naŋ kpààŋ nyààŋ, “Jisɛ̀, Kanaà, yɛ̀mɛ̀ wi ke nyowo!”
Wo Jisɛ̀ naŋ nyiŋ yɛmɛ̀ yèè wò naŋ nyiŋ woò wààŋ, “Kɔ̀àaìŋ koɓɛ̀ wo sìèfèìŋ zòòloɔ̀ wo yɛmɛ yɛ̀mɛ̀iŋ.”
Nààŋ àŋ yaà wa kɔɔyɛ, àŋ naŋ jòèyè aŋ zɛ̀nɛ̀ŋ. Nààŋ wo nyùùŋ guùŋ e tɛɛ nyiŋ naŋ wa yɛmɛ̀ kɛ̀ wò jòèyà, wò naŋ kɛ̀ɛ̀ maŋjɛ̀wɛ wò yaà tɛ̀nɛ̀ŋ sùà wo Dayà ke miè gbeeo sùà. Wò naŋ hnè wo gbùwò wo Jisɛ̀ gòlòò dìì wouŋ gè ke sɛ̀. Wo felaaà yewe wa wɔŋ fùɔ̀ŋ Sàmiliàa sùà. Wo Jisɛ̀ nauŋ dawè wààŋ, “Niŋ fè weè ànyùùŋ zììyà nìŋ naŋ jòèyè? Kòò anyùùŋ nɔɔnɔŋ le tiinàŋ gbànaŋ nyàŋ? Wèè kiìŋ wo nyùùŋ fuɔŋ joo wɛɛ̀ guùŋ nɔŋ naŋ kɛ̀ɛ̀ maŋjɛ̀wɛ wèè wo joowò Dayà?” Wo Jisɛ̀ nauŋ woò wààŋ, “Yewà dìì yèè muŋ ka. E hààwe mɔ̀ɛ̀ èum joeyè.”


Aŋ Fɛlosiì nyaŋ bà nyiŋ naŋ dàwè wo Jisɛ̀ nyààŋ, “Kiìŋ è teenga e Kànà Dayàa do nàŋ hnè?” Yèè wo Jisɛ̀ naŋ nyiŋ fasàì wààŋ, “E Kànà Dayàa e fè è nɛ̀ŋ wèè e hnàŋ wò nyùùŋ do niŋ yɛmɛ̀. Wo nyùùŋ gbiŋ naàŋ woò wààŋ, ‘Yɛ̀mɛ̀, tiŋ tɛɛ̀ kià!’ ɔ̀ɔ̀, ‘Tiŋ tii kuii!’ Esaɓù kɛ̀ e kànà Dayàa è yààùm ko sùà.”
Kpeiŋ wo Jisɛ̀ naŋ wòò anyùùŋ màŋjɛ̀wɛ̀uŋ nyàŋ wààŋ, “E teenga kòò è yaà hinie nìŋ do nàŋ nyɛ̀nɛ̀ŋ wànàŋ wèè naŋ yɛ̀mɛ̀ ke ɗɔ̀ɔ̀ miàim wo Jɔ̀àfèlàà Nyuùŋ kpùnɔɔ̀ŋ ke bà guùŋ, kɛɛ niŋ naàŋ nyiŋ yɛmɛ̀. Anyùùŋ bà doo nàŋ nɔ̀ŋ aŋ yè nyaŋ douŋ nàŋ woò nyààŋ, ‘Yɛ̀mɛ̀ kuii!’ ɔ̀ɔ̀, ‘Yɛ̀mɛ̀ kià!’ Kɛɛ ɓɔ̀ nìŋ ka kò kaame niŋ. Esaɓù kɛ̀ nààŋ nɔŋ ko fùùiŋ gɛɛ̀ yɛi e yìwìà ko fùlìè gɔɛɛ yèè e gbolòùŋ lɛ e kpɛ̀lɛ̀ e hàì ko jèè gɔɛɛ, yɛi nɔŋ miàim wo Jɔ̀àfèlàà Nyuùŋ Kpùnɔɔ̀ŋ do wa nàwèè nàŋ hnè maŋ ɗɔɔ miiŋ sùà. Kɛɛ jiɛ̀ mìŋ do nàŋ kɔ̀ e mɔ̀ɔ̀nɛ̀ŋ e keì nyìnga dìì e kìlà anyùùŋ nyaŋ e ɗuunyaŋ lɛɛ̀ nàaŋ aim gbàŋ. Màànààŋ nɔŋ è yaà wa lɛ̀ e teengaà wo Nòa yaà wa wɔŋ nyiiŋ gèeɔ̀ sùà lɛ, yɛi nɔŋ è do wa nàwèè nàŋ nɔ̀ŋ maŋ ɗɔ̀ɔ̀ miàim wo Jɔ̀àfèlàà Nyuùŋ Kpùnɔɔ̀ŋ sùà. Anyùùŋ yaà wa jììyè manɛ̀ŋ je yèè àŋ yaà tììyè maŋ mùàŋ, àŋ yaà wa gbììnyɛ̀ŋ maŋ nyɛ̀ɛ̀, e jèèsùà wo Nòa wo jɔ̀à wɔŋ meeèɔ sùà yèè e wuiyè jòwaà naŋ hnè e jìwà aŋ gbiŋ. Yɛi nɔŋ è naŋ wa kaaìŋ e teengaà wo Lɔɔ̀ yaà wa fuɔŋ lɛ̀. Anyùùŋ yaà wa jììyè nɛ̀ŋ yèè àŋ yaà tììyè maŋ mùàŋ, àŋ yaà dìnìè bòli àŋ maàŋ, àŋ yaà nyùùnyɛ̀ŋ maŋ nɛ̀ŋ wuiye yèè àŋ yaà nyìlìè maŋ saaŋ. Ke ɗɔɔɛ̀ wo Lɔɔ̀ naŋ wa yèwè ko Sɔdɔ̀ùŋ lɛ, e hmɔɔ̀ŋ jɛi yaà le dùò e hmɔ̀ɔ̀ŋ naŋ wa fòlò ko àìjɛnɛ̀ŋ yèè è naŋ sɔ̀ɔ̀ ko jawaì e jìwà aŋ gbiŋ. Yɛi nɔŋ e kèì guùŋ bi do nàŋ nɔ̀ŋ sèè miàim wo Jɔ̀àfèlàà Nyuùŋ Kpùnɔɔ̀ŋ hnàŋ wa nàwèè.
“Ke ɗɔɔ yii wo nyùnɔ̀ɔŋ gbiŋ nɔ̀ŋ ke saaŋ dìmɛ̀ wɔ, ɓɔ̀ wò dè wèè wo jɔ̀à ko saaìŋ wèè woo gè è nɛ̀ŋ gbiŋ. E tèèngà guùŋ bi wo nyùnɔ̀ɔŋ gbiŋ naŋ nɔ̀ŋ ko ɓùi wɔ̀, ɓɔ̀ wò kɛɛ̀ ɓɛìŋ kò gboouŋ noo kò ɓèèmè è nɛ̀ŋ gbiŋ. Kɛ̀ɛ̀nɛìŋ jii jàa wèè e nɛ̀ɛŋ naŋ wa kààìŋ wo jàwè Lɔɔ̀ɔ lɛ̀. Wo nyùnɔ̀ɔŋ gbiŋ kamàŋ ɗewe wèè wo jòèyè wɔŋ nyììŋ wuŋ biɔ̀ wɔ, wɔ̀ŋ douŋ nàŋ gbɛ̀nɛ̀ŋ wèè julɔfɔ. Kɛɛ wo nyùnɔ̀ɔŋ gbiŋ naŋ nyimèè wèè wo fà wèè esaɓù mɛ̀ wɔ, wò do nàŋ kɛ̀ɛ̀nɛ̀ŋ wɔŋ nyiiŋ gèe gò jùà. Tɔ̀ miŋ woòiŋ tɛɛ̀, wɔŋ dùùm wiiŋ sèè mìŋ kɛɛ̀ maŋjɛ̀wɛ, anyùùŋ tìyèe do nàŋ nɔ̀ŋ maŋ jàwè ko gbùmàŋ guùŋ, àŋ do nàŋ ɓèmè wò guùŋ, yèè aŋ jòà wo bàa jɛ̀wɛ̀. Aŋ jɔ̀ùŋ tìyèe do nàŋ nɔ̀ŋ koɓɛ̀ guùŋ àŋ yaà gèètà gbàlà, kɛɛ àŋ do nàŋ ɓèmè wò guùŋ, yèè wo gbànaàŋ doo nàŋ joo. [Aŋ fèlàà tìyèe do nàŋ nɔ̀ŋ toomo ko ɓùi, àŋ do nàŋ ɓèmè wò guùŋ, yèè wo gbànaàŋ doo nàŋ joo.]”
Anyùùŋ màŋjɛ̀wɛ̀ nyaŋ naŋ dawè nyààŋ, “Kɛɛ Kanaà, kòò tɛɛ̀ do nàŋ kaaìŋ?”
Wo Jisɛ̀ naŋ fasàì wààŋ, “Koɓɛ̀i gbiŋ e dieɛ̀ nɔ̀ŋ lɛ, kuŋ aŋ gɔ̀ɔngɔ̀ɔŋ nyàŋ gbonàŋ koɓɛ̀ guùŋ.”

सुनें - Luù 17