San Catholic Edition Bible © Bible Society of Burkina Faso, 2013.

A gialakun bɛ́ á goã lɛawaa sɔrɔ Zuifun *kiɛ̃mala ǹ zɔ́n nə dɔ, Yezu dɔ Betaanii kiwi. A Lazaarɛ mɛn yii kaa á bɔ geren bii, bɛ lɛ na á goã walan. Ǹ nə́ wasamiɛn màn-bii zɛnaa nɛ walan. Marti na á goã màn-bii koɛ tán-a ǹ giulun. Ǹ màn-bii kɔ min mɛnɛn la kun ka Yezu ni, Lazaarɛ na á goã bɛn lɛn min goon lɛa. Mariya donkolon kɔ́n saa á daa nɛ. Nyɔɔ gìĩ kɔɔ̃n ná a nɛ, a giɔ̀mɔ n kaka parsiini, a yii n ka yoreen yoreen, a n zɛnaa ka da mɛn yon ne, a tɔ n naára. Á bɛa nyɔɔ lɛ kaa Yezu gòãn ganaa, á ǹ tuturu ka a din mìi ka nɛ. A gìĩ kion lɛ gɔ́ɔ̃ tumaa si á n kɔ lɛ. Kariyɔtin Zudaasi ke Yezu a kialandɛnaa goon lɛa, die Yezu koe a zɔ́ɔn la, asɛ tɔ́n pɛ mà wàa na á baa ǹ nyɔɔ kɛ lɛ sã lɛawaa biɛsɔɔ (300) a di nya ǹ giɔ̀mɔ ganaa, ǹ ná a wɔrɔ gii doobaan man wa?
Zudaasi bɛ́ á bɛ pɛ, a bie ka a nə n gɔ́ɔ̃ bii doobaan sii-n wa, sɛnɛ, wurumu ni. A giala, a din na á goã wɔrɔ koɛ. Bɛ̀ ǹ nə́ wɔrɔ mɛn kaa màn nɛ, a n bɛ koɛ̃.
Yezu tɔ́n pɛ mà a toa kiĩn ni! Mà a na á bɛ zɛnaa á koa asɛ a biĩ pinaa taman yii. Mà doobaan kɛn, mà bɛn tá kunun ǹ ni biikoo tumaa li, sɛnɛ, mà asɛ bie re goɛ̃ kunun ǹ ni miɛ̃ wa.

Zuifu gigiã bɔ a siére-a mà Yezu tá Betaanii. Bɛ lɛ nɛ, ǹ nə́ woo mà ǹsɛn yii Yezu dinmaa yɛ, a Lazaarɛ mɛn dɔ yii kaa á bɔ geren bii, ǹsɛn nə bɛ dɔ yɛ. A kũ bɛ lɛ ganaa, wúlu-bɔlen goledɛnan nə́ golee la, mà yǎa ǹsɛn nə Lazaarɛ dɔ dii a giɛ̃, a giala, mà a din lɛ a lɛa nɛ, Zuifu gigiã goã ǹ niɛ̃ n boe kunun ǹsɛn nɛ, bɛ̀ ǹ golee Yezu li.


A lɛawaa, zaman gole mɛn nə da kiɛ̃mala ǹ zɔ́n ganaa, bɛn nə́ ma mà Yezu á die Zeruzalɛmu. Ǹ nə́ sèwo luun goa ǹ nə́ woo n da lɛ, ǹ nə́ goã n lɛ dii: «Lawa da ka n bǐɛ̃ nɛ! Min mɛn bɛ́ die ka Dɛnaa tɔ nɛ, Lawa barka wɔ n nɛ! Lawa barka wɔ Izirayelin kii lɛ nɛ!»
Yezu dundun yɛ á dii la, ka a bɛ́ kiɛ̃-n Lawa a boo-n kɛnɛn lɔn:
«Zeruzalɛmu minin,
ka baran nyɛ́ɛ baa wa.
Kaa kii lɛ á ke á dii dundun banɛɛ la á die.»
Sii mɛn bɛ́ á n zɛnaa, a kialandɛnan lɛn na a giala ma a waáraa wa. Sɛnɛ, Lawa bɛ́ á gugurubaa kɔ Yezu la ǹ mɛn waáraa, ǹ yiri gisĩ a nɛ, mà bɛa sii kɛ lɛ na á n kiɛ̃ Yezu din wɔ gɔn la, mà a din lɛ n ke minin lɛn nə́ zɛnaa nɛ.
Min mɛn tumaa goã kun ka Yezu ni, bɛ̀ a bɛ́ lɛ diɛ Lazaarɛ la yala-n ǹ mɛn pinaa, a tá a gere yii kiɛ, bɛn tumaa goã Yezu a zɛnaa ǹ siin laakalɛɛ. Bɛ̀ ń yaa bɛa zaman lɛ woo n da Yezu lɛ, maǹ nə́ bɛa kaãbaa ǹ sii kɛ lɛ boo ma. *Fariziɛ̃n nə́ tɔ́n pɛ kɔn nɛ mà haya! Mà ǹ yii bɛ́ a ganaa, mà ǹ ba re boe sii kɔ́n la wa. Mà min tumaa á ke toɛ̃ koe a kio lɛ!

Min mɛnɛn nə da Lawa guguru kɔ zɔ́n lɛ li, Grɛkin kɔnɔn nə́ goã kunun ǹ ni. Filipi mɛn bɛ́ boe Bɛtsayidaa kiwi Galilee gána nɛ, ǹ nə́ pɛ bɛ-n kɛnɛn: «Giĩ lɛɛ, wɔsɛn man giɛ li wɔ Yezu yɛ.»
Filipi woo pɛ Andre ne, ǹ nə́ n ti kun ǹ nə́ woo pɛ Yezu ni. Yezu tɔ́n pɛ ǹ nɛ: «Lawa doamaa bɛ́ nɛ a gugurubaa kɔ Min a Nɛgiĩ la ǹ mɛn waáraa, a biikoo dɔ. Masɛ n taãn pii ka nɛ, bɛ̀ *belee nàn mɛnaa tii li á gã wa, a n goɛ̃ a dinsɔɔ̃. Sɛnɛ, bɛ̀ á gã, a n nàn gigiã boe. Bɛ̀ min mɛn yii á boe a din ganaa wa, bɛa dɛnaa á die bɔ̀n biɛ. Sɛnɛ, bɛ̀ min mɛn nə́ n yii bɔ a din ganaa kanaa kɛ gɔ́ɔ̃ nɛ, bɛa dɛnaa á die nyin nyabaã yii. Bɛ̀ min mɛn tá li a dí nya masɛ nɛ, yǎa ǹ dɛnaa koe masɛ kio lɛ; ma bɛ́ bǎã mɛn nɛ, maa dí-nyali dɔ á re goɛ̃ walan. Bɛ̀ min mɛn tá dí nyɛɛ masɛ nɛ, maa Díi á re bɛa dɛnaa guguru koe.

«Masɛ gɔ́ɔ̃ wɛ̃maa-n sisia, man die pii máa wàa? Ma pɛ máa maa Díi ma kanbaa biikoo kɛa nɔmaa kɛ ganaa? Sɛnɛ, ma bɛ́ n má daa bɛa nɔmaa kɛ lɛ a wɔ taman yii. Maa Díi, n din tɔ bɔ.»
Lawa a boo-diɛ lɛ tɔ́n bɔ lon kɛnɛn: «Má a tɔ bɔ, man die wusii ma a tɔ bɔ doo.»
Zaman mɛn nə goã walan ǹ nə́ bɛa boo lɛ ma, bɛn mà la a ginii wuu ni.
Min tɛn dɔ mà lon a dia dí-a wole kɔ́n na á boo da nɛ.
Yezu tɔ́n pɛ ǹ nɛ: «Boo-diɛ lɛn kɛ lɛ bie á bɔ masɛ taman yii wa, ka dinin kɛn lɛn lɛa nɛ. Lawa n die kiri kuri kanaa lɛ la sisia. Sisia kəni, kanaa lɛ a mìilandɛnaa a bɔ a daa biikoo n ke. Bɛ̀ ǹ nə́ masɛ saa lon ǹ nə́ ma bɔ tán biikoo mɛn li, ma á die min tumaa bíi ma da nɛ ma din li.»
(A na á goã a din a gɛ̀ wɔ ǹ gɔn nyɛɛ ka bɛa boon lɛn nɛ.) Zaman lɛ tɔ́n pɛ Yezu ni: «Wɔ́ yɛ dí-pɛn sɛ́wɔ nɛ, mà Minin Nyin-sili lɛ n die goɛ̃ a yii n koo miɛ̃ a ná a ba giɛ̃ wa. Wàa na á baa nsɛ dɔ á pii, mà yǎa ǹ Min a Nɛgiĩ siɛ lon? Bɛa Min a Nɛgiĩ lɛ, die n ka bɛ nɛ?»
Yezu tɔ́n pɛ ǹ nɛ: «Wɔlɔ fúlu tá ka bii bɔrɔ, sɛnɛ, a die beleboe wa. Wɔlɔ fúlu bɛ́ ka li ǹ mɛn waáraa, ka tɔ wɔ bɛa biikoo li, màn mɛn bɛ́ toɛ, wɔlɔ tì baran da ka tɔwaa wa. A giala, min mɛn bɛ́ tɔ we wɔlɔ tì li, bɛa dɛnaa ba a din a woo ǹ bǎã doɛ̃ wa. Wɔlɔ fúlu bɛ́ ka li ǹ mɛn waáraa, ka golee bɛ lɛ li, màn mɛn bɛ́ toɛ, ka n baa minin lɛa, min mɛnɛn bɛ́ tɔ we wɔlɔ fúlu li.»

Bɛa boon lɛn diɛ kio, Yezu kiɛ̃ á n bɔ ǹ li, á n duru ǹ la. A laanɛ Yezu kaãbaa ǹ sii gigiã zɛnaa ǹ yɔrɔ-a, ǹ golee li wa. Lawa a boo gii-dali Izayii boo mɛn pɛ, a na á kaa bɛ lɛ lɛ:
«Dɛnaa, ǹ boo mɛn ma wɔ lɛ-n,
die na á golee li?
Dɛnaa na á ná a boo sii la nyaa die ne?»
Màn mɛn bɛ́ á toa ǹ nə́ ǹ ba golee li wa, a din Izayii lɛ na á bɛ dɔ pɛ:
«Lawa na á ǹ yiin tã,
màn mɛn bɛ́ toɛ,
ǹ baran wɔlɔ yɛ wa.
Á ǹ yiri tã,
màn mɛn bɛ́ toɛ,
ǹ baran boo giala ma wa,
màn mɛn bɛ́ toɛ,
ǹ baran ǹ lɛ-mui sii kaa
ǹ wusoo ǹ da masɛ Lawa li wa.
Bɛ̀ maǹ kiɛ,
bɛ̀ má ǹ busu nya!»
Izayii na á kɛ lɛ pɛ Yezu wɔ gɔn la, a giala á goã á Yezu a gugurubaa yɛ.
A laan ka bɛ nɛ, nyɛɛnaandɛnan lɛn dininmaan bii, min gigiã golee li. Sɛnɛ, Fariziɛ̃n lɛn taman yii, ǹ yii wɔ ǹ nə nyaa minin yɔrɔ-a wa, màn mɛn bɛ́ toɛ, ǹ baran ǹ loo ǹ nə ǹ bɔ lɛsɔkɔn kion wa. A giala, minbuiinin nə ǹ tɔ bɔ, bɛ́ kɔɔ̃n kɔ ǹ ganaa á la Lawa wɔ nɛ.

Yezu nə́ n lɛn saa lon, á pɛ: «Bɛ̀ min mɛn golee masɛ li, bɛa dɛnaa bie á golee masɛ dinsɔɔ̃ li wa, min mɛn ma dia, a na á golee bɛ dɔ li. Bɛ̀ min mɛn masɛ yɛ, min mɛn ma dia, ǹ dɛnaa na á bɛ dɔ yɛ. Man má daa kanaa kɛ gɔ́ɔ̃ nɛ, ka wɔlɔ fúlu bɛ́ lɔn, màn mɛn bɛ́ toɛ, bɛ̀ min mɛn golee masɛ li, bɛa dɛnaa baran goã wɔlɔ tì li doo wa. Bɛ̀ min mɛn tá maa boon kɛn miɛ, a ná a ba ǹ sii wa, ma bie kiri kuri bɛa dɛnaa la wa; a giala, ma bie ma daa kiri kuru kanaa minbuiinin la wa, man má daa ǹ kirisibaa. Bɛ̀ min mɛn nə́ n piã ka masɛ nɛ, a ná a lɛ kɔ maa boo kɛ dɔ-a wa, bɛa dɛnaa a kiri-wɔle tan. Ma boo mɛn da, bɛ lɛ n die kiri kuri la kanaa a nya pinaa. Ma bie má boo da ma din gɔn wìi a lɛa wa, sɛnɛ, maa Díi mɛn nə ma dia, bɛ màn mɛn pɛ ma nɛ, man bɛ lɛ pii, man minin darɛɛ bɛ lɛ ganaa. Ma á doɛ̃, máa a bɛ́ màn mɛn pii, bɛ lɛ n nyin nyabaã koe minbuiinin la. Bɛ lɛ nɛ, ma bɛ́ boo mɛn pii, maa Díi pɛ ma-n lɔn, ma dɔ n pii miɛ̃.»

सुनें - Zaã 12