Palaung, Rumai: Palaung, Rumai (New Testament)

Palaung, Rumai

ႎါည်းဒီးဘူလှာ်န်းဒါင်း တူအီးကဲမာ် ဟည်ဒေဲႈကစုဘိုး ပါ့်စံဝ်ယေဆု။ ဂေါႇမိုႈအာဝ်မေဲႈပံင်ဟိုမ်းဆိ အန်းစံဝ် စီတေဲႇလာ်တပဲအန်းကဲ စီကလာင်းဒါ်ႈ၊ “တူအီးကဲနီး ဂီဂေါ်ည်းတောႇအံဝ်း ဟည်ဘိူန်းအိုည်းဆငည်း။ စာနံင်ဟိုမ်းကဲ စံင်နည် အာဝ်မေဲႈဆိ။ ဂေါႇဘာည်းဇေဲန်း အံဝ်းစီကႎါ်ည်းကဲ။ ဂေါႇမိုႈ တူအီးမာင်ကလံက်မာ် ကဲယာ်ည်ႇပါ့်ဒိုင်းဒေဲႈစာ်မ်း၊ ဆာ်အံဝ်းဘူချှိုင်းဒဲႈကဲဟိုမ်း ဆူည်ႇကဲႎီးဟာဝ်း ပါ့်ခလေဲပ်မာ်၊ ယံဝ်းကဲမံဝ်းဂေႈဒို့ ကဒည်အီုန်ဒါ်န်း။”
တပဲအန်းကဲ စီႎီးဒါ်ႈ “မှေဲနံင်ဘာည်း နှာင်းကံပ်ဘိူန်းပံင်ဟိုမ်း ပါ့်အရာပ်ဘူမေဲႈတူအီးနီး စာနံင်ချှိုင်းတူအီးကဲနီးဟိုမ်း ကံပ်ကျံဝ်းကံပ်ဖည်း။”
စံဝ်ယေဆုမာ် စီႎီးမှောႇတာ့်ကဲ ဒါ်ႈ “ထန်မှေဲ ပဲမေဲႈခမူန်း။”
တပဲအန်းကဲ စီႎီးဒါ်ႈ “ယေးမေဲႈလိူည် ခမူန်းပူးပိုင်း။”
ဘိူန်ဇေဲန်း စံဝ်ယေဆုစီဆူည်ႇလာ် တူအီးကဲပါ်ပည်မေဲႈ အံက်တေဲင်းကတာည်း၊ အန်းစံဝ်စီတေဲႈလာ် ခမူန်းပူးပိုင်းဒီး ခိုည်းတာင်ကေးစူးစံဝ်ဖြား။ ႎါည်းဒီး အန်းစံဝ် စီကဘျဲႈဖာ်ႈခမူန်းဒီး စီဒဲႈတာ့်တပဲအန်းကဲ စာနံင်ကဆာင်းဒဲႈ တူအီးကဲဟိုမ်း။ တပဲအန်းကဲမာ် ကဆာင်းဒဲႈတာ့်တူအီးကဲ ဟိုမ်း။ စီမေဲႈဘိုး ကားအီးချှီုက် တာ့်ကဲ။ ဘိူန်ဇေဲန်း အန်းစံဝ်စီတေဲႈ ကားအီးချှီုက်ဒီး စီခိုည်းတာင်ဖာ်ႈကေးစူးစံဝ်ဖြား စီဆူည်ႇတပဲအန်းကဲ ကဆာင်းဒဲႈ တာ့်တူအီးကဲဒီး။ တူအီးကဲဒီးမာ် ဘိူန်းဒို့ဟိုမ်းဖည်း တော်န်းချှေႈ။ ႎါည်းဟိုမ်းဖည်းတာ် တူအီးကဲဒီး တပဲအန်းစံဝ် ႎီးတကျေဲတ် ပံင်ဟိုမ်းခလိူဝ်းကဲ ႎီးဘိူန်းဘိုး ပူးဂျီုက်ကံပ်နိုက်။ တူအီးကဲအီးဟိုမ်းခမူန်းကဲဒီးပါ်ပည်မေဲႈ ဂေါ်ည်းဘံင်ဖိုန်းဟေင်ႏ။ ႎါည်းဒီး အန်းစံဝ် စီဆူည်ႇဖာ်ႈ ကဲလည်လေႈႎီးဟာဝ်း ပါ့်ခလေဲပ်ကဲ၊ အီးမိုႈအန်းစံဝ် ကာည်းတပဲအန်းကဲမာ် စီဟိုက်တေဲင်းကလေဲႇဟိူဝ်းပေါႇအူစာ်န်း စီလည်လေႈဟာဝ်းဇူးလာ် ပါ့်အရာပ်ဒါလမနုတ။


ဖာရိဆဲကဲမာ် ဒေဲႈကအုပ်ကမိုန်ကထဲင်း တာ့်စံဝ်ယေဆု။ ကဲဆီင်စာမ်းတိူဝ်ႈစံဝ်ယေဆု စီမှာန်း နှာင်းအန်းရေဲန်းနှဲ ပံင်အီးမှေဲမ်အာမ်းအူမျိုးအူလှေ နှာင်းမိုႈဆံက်ဆေ အန်းစံဝ်ယာ်ည်ႇဒေဲႈပါ့်စံဝ်ဖြား။ ႎါည်းဒီး စံဝ်ယေဆု စီတိုႈဖေဲမ်းဒါင်းခေဲင်းနောႈအန်း စီကလာင်းဒါ်ႈတာ့်ကဲ “ဆီမ်ဘာည်း တူအီးကာပ်စံင်နည်နီး ဂီမှာန်းယာဝ်း ပံင်အီးမှေဲမ်အာမ်း။ အံဝ်းနံင်ဒါ်ႈ အီးမိုႈအီးမှာန်အန်း၊ အံဝ်းနံင်အာဝ်ရေဲန်းနှဲမ ပံင်အီးမှေဲမ်အာမ်း တာ့်တူအီးကဲနီး။”
အန်းစံဝ် စီလည်လေႈဟာဝ်းဖာ်ႈ ဒတူအီးကဲဒီး စီဟာဝ်းဟိုက် ဘံက်ကလေဲႇဟိူဝ်း၊ စီခလောႈဟာဝ်း ညျှာဒတီုင်းအေဲမ်းဂါလိလဲ။


တပဲအန်းစံဝ်မာ် ဘီးဒိူည်းဒေဲႈ ပံင်ဟိုမ်း။ တေဲင်းခေဲင်းကလေဲႇဟိူဝ်းဒီး စီမေဲႈလိူည် ခမူန်းအူပိုင်းဟာ့်။ စံဝ်ယေဆုမာ် စီဒဲႈ ကျောႈချဲတ် တာ့်တပဲအန်းကဲ ဒါ်ႈ “အီမိုႈပဲင်ႏ ဖာရိဆဲ ကာည်းဟေရိုတ် စားကဲဒီး ပဲချဲတ်နောႈခည်းခည်းနာ်ႏ။”
တပဲအန်းစံဝ်ကဲမာ် စီလည်ကအုပ်ကမိုန် ဒါ်ႈ “ဂေါႇမိုႈအဲအာဝ်ဒိူည်းဒေဲႈ ပံင်ဟိုမ်းဆိယေဝ်း၊ အန်းစံဝ်စီဒါ်ႈလာ်ဘာည်းညျေဲန်း။”
စံဝ်ယေဆုမာ် ဟည်ယေဲဝ်းနာ်ႇ ဘည်ဘာည်းကဲဂီလည်ကအုပ်ကမိုန်၊ ဘိူန်ဇေဲန်း အန်းစံဝ်စီဒါ်ႈတာ့်ကဲ “ဆီမ်ဘာည်း ပဲဂီလည်ကလာင်းဒါ်ႈ လော်င်ပဲအာဝ်ဒိူည်းဒေဲႈပံင်ဟိုမ်း။ တော်ကံပ်စာ်မ်းစံင်နည်မာ် ပဲညျံမ်ကဘ္လူႈနာ်ႇ ဟီုဝ်။ ဆီမ်ဘာည်း ပဲစီကလာင်းဒည်းပေါႇခည်း။ ပဲမေဲႈငါည်းမာ် ပဲအာဝ်ဆမားတိူဝ်ႈယေဲဝ်း ဟီုဝ်။ ပဲမေဲႈချှိူက်မာ် အာဝ်ဆမားယေဲဝ်းတညာဝ်း ဟီုဝ်။ ပဲအာဝ်ကအာ်မ်းဟီုဝ် ခည်ဒုင်ကဘျဲႈဒဲႈအံဝ်းတာ် ခမူန်းဖာ်န်းပိုင်း ချှိုင်းဒဲႈဒေဲႈ တူအီးကဲဖာ်န်းဟေင်ႏ၊ နှာင်ဂျီုက်နိုက် ပဲဘိူန်းလာ်တကျေဲတ်အူန်း အီးခလိူဝ်းအန်း ႎါည်းဟိုမ်းတူအီးကဲဒီး။”
တပဲအန်းကဲ စီႎီးဒါ်ႈ “ႎီးတကျေဲတ်ဘိူန်းဘိုး အူကိူဝ်းလေႈအယ်ဂျီုက်နိုက်။”
ႎါည်းဒီး အန်းစံဝ် စီႎီးမှောႇဒါ်ႈ တာ့်ကဲ “ခည်မိုႈတာ် အံဝ်းတဘျဲႈဒဲႈ ခမူန်းပူးပိုင်း ချှိုင်းဒဲႈဒေဲႈတူအီး ဖိုန်းဟေင်ႏ၊ နှာင်ဂျီုက်နိုက် ပဲဘိူန်းလာ်တကျေဲတ်အူန်း အီးခလိူဝ်းအန်း ႎါည်းဟိုမ်းတူအီးကဲဒီး။”
တပဲအန်းကဲ စီႎီးဒါ်ႈ “ႎီးတကျေဲတ်ဘိူန်းဘိုး ပူးဂျီုက်နိုက်။”
အန်းစံဝ်မာ် ဒါ်ႈ “တော်ကံပ်စာ်မ်းစံင်နည်မာ် ပဲညျံမ်နာ်ႇ ညျံမ်ကဘ္လူႈဟီုဝ်။”

ႎါည်းဒီး စံဝ်ယေဆုကာည်း တပဲအန်းကဲမာ် ဟည်ဟာဝ်းစာ်မ်းဘိုး ပါ့်ကဇိုင်းဘတ်ဆဲဒ။ ဘိူန်ဇေဲန်း တူအီးကလံက် စီယိုင်းဒေဲႈ တူအီးငါည်းအာ်ႇအူချှေႈ၊ စီမှာန်းတာ့်အန်းစံဝ် နှာင်းအန်း ဒါးတည်းအန်း စုတေဲင်းချှေႈဒီး။ ဘိူန်ဇေဲန်း စံဝ်ယေဆု စီတီုတ်ႏတည်းချှေႈငါည်းအာ်ႇဒီး၊ စီအောအန်းလည်လေႈဟာဝ်း ညျှာရာ်ည်ႇကဇိုင်း။ ႎါည်းဒီး အန်းစံဝ် စီဘတ်ဟပ်ဖာ်ႈ အေဲမ်းဘတ်အန်း တံင်ငါည်းချှေႈဒီး စီတာင်တည်းအန်း တေဲင်းချှေႈဒီး၊ စီမှောႇဒါ်ႈ “မည်းယေဲဝ်းဟာ့်တိူဝ်ႈ အူမျိုးအူလှေ။”
ချှေႈဒီးမာ် စီတိူဝ်ႈကပါ်ႇကပါ်န်းဖာ်ႈ စီဒါ်ႈ “အံဝ်းယေဲဝ်းအိူဝ်တိူဝ်ႈ တူအီး။ ဘည်ဘာည်းမာ် ကဲဂီနှေးလိူည် တင်းဟာ်ည်း ႎီးႎီးဟာဝ်းဟာဝ်း။”
အန်းစံဝ် စီႎီးတာင်ဘိုးတည်းအန်း တေဲင်းငါည်းချှေႈဒီး။ ဘိူန်ဇေဲန်း ချှေႈဒီးစီကပ္လါႈတိူဝ်ႈချှီႇချှီႇ၊ ငါည်းအန်းမာ် ဟည်ဘာည်းဒို့ အီးပျီမ်း၊ ဟည်ယေဲဝ်း စဲင်ချှီႇဒို့တော်န်းလှေ။ အန်းစံဝ် စီဒါ်ႈ တာ့်ချှေႈဒီး “မည်းခူလေဲပ် ခေဲင်းကဇိုင်းနာ်ႏ”၊ စီဆူည်ႇလာ် အန်းႎီးဟာဝ်း ပါ့်ခလေဲပ်အန်း။


ႎါည်းဒီး စံဝ်ယေဆု ကာည်း တပဲအန်းကဲမာ် စီလေဲပ်ဟာဝ်းလာ် ပါ့်ကဇိုင်းကဲတရိဖိလိပုရီမ်းကဲဒီး။ ဘိူဝ်စာ်မ်းတာ် ကဒည်အီုန်ဒါ်န်း အန်းစံဝ် စီမှောႇ လာ်တပဲအန်းကဲ စီဒါ်ႈ “ဆီအီးဒါ်ႈ အံဝ်းမိုႈ။”
တပဲအန်းကဲမာ် စီႎီးကလာင်းဒါ်ႈ “တူအီးကလံက်မာ်ဒါ်ႈ မည်းစံဝ်မိုႈ ဆြာဘပ်တိစမ်ယောဟာန်။ မာင်ကလံက်မာ် ဒါ်ႈမည်းစံဝ် မိုႈ ပရောဖဲတ်အေးလိယ။ မာင်ကလံက်မာ် ဒါ်ႈမည်းစံဝ် မိုႈ ခေဲင်းပရောဖဲတ်ကဲအီးဟည်း အူချှေႈ၊ အီးဂီလည်ကလာင်းဒါ်ႈ ဘာည်းဇေဲန်း။”
ဘိူန်ဇေဲန်း အန်းစံဝ် စီႎီးမှောႇဒါ်ႈ “ပဲမာ် ဆီပဲဒါ်ႈ အံဝ်းမိုႈ။”
ပေတရု စီႎီးဒါ်ႈ “မည်းစံဝ်မိုႈ မေဆိယဟာ့်။”
ဘိူန်ဇေဲန်း အန်းစံဝ် စီတာ်မ်းအူန်း တာ့်ကဲ နှာင်းကဲဘူကလာင်းလော်င်ကဲဒီး တာ့်ဆိ။


ႎါည်းဒီး စံဝ်ယေဆု စီပနံဝ်းဒဲႈ တာ့်တပဲအန်းကဲ ဒါ်ႈ “ကော်န်းတူအီးနီး နံင်ကတူႈကညားကီန်းဒည်းဂည်မျိုး၊ နံင်ကတူႈ တူအီးဒါင်းကဲ၊ တားစော်င်းဒါင်းကဲ၊ ဆြာကံတ်ကျာမ်းကဲ ပႎဲႈႎီုန်၊ စီနံင်ကညားဘိုး အီးပယာ်မ်းႎီုန်၊ ဆာ်ဘိူန်းအိုည်းဆငည်း စီနံင် ႎီးယာ်ည်ႇအီမ်းဒေဲႈဘိုး။” အန်းစံဝ်စီကလာင်းနှဲဒို့ လော်င်ကဲဒီး ဘည်မိုႈဘည်ဘာည်းအန်းပါ်ပည်မေဲႈ တာ့်တပဲအန်းကဲ။ ဂေါႇဘာည်းဇေဲန်း ပေတရုစီတေဲႇဟာဝ်းလာ် စံဝ်ယေဆု ပါ့်အူဒီ စီဆူးဒါ်ႈတာ့်အန်းစံဝ်။
ဘိူန်ဇေဲန်း အန်းစံဝ် စီကႎီင်တိူဝ်ႈတပဲအန်းကဲ စီဆူးဒါ်ႈ တာ့်ပေတရု “အိူဝ် ခူန်ဆိုင် လည်လေႈဒဲဝ်း ဒအံဝ်း။ ပံင်တဂေန်းမည်း အာဝ်တောႇမ နောႈစံဝ်ဖြား၊ ပံင်တဂေန်းမည်း မိုႈလိူည် ပံင်ရေဲန်းတူအီး၊ ပံင်တဂေန်းတူအီး။”
စံဝ်ယေဆု စီတေဲႇတပဲအန်း ကာည်း တူအီးကဲ ဒေဲႈဇူးပါ့်အန်းစံဝ်၊ စီကလာင်းဒါ်ႈ “ချှေႈမှေဲ့ဘူဒါ်ႈ ဆာ်ဆီင်တောႇလဘာ်န်းအံဝ်း အန်းလိုပ္လေႈႎီုန် ဘာည်းမေဲႈနောႈအန်း၊ အန်းလိုကောႇရံင်းတာ်ႇတည်းအန်း၊ အန်းလိုတောႇဒေဲႈ လဘာ်န်းအံဝ်း။ ချှေႈမှေဲ့မာ် ဆာ်ဆီင်ချော်တ်လာည်းအဆာက်အန်း အန်းနံင်ကညားလိူည် ဆိုမ်းအဆာက်။ ချှေႈမှေဲ့ ဆာ်ဆိုမ်းအဆာက် စာအံဝ်း ကာည်း ဂေါႇခါဝ်ဆတာင်းအီးမှေဲမ်ခိုည်း၊ ချှေႈဒီး နံင်ႎီးဘိူန်း ချော်တ်လာည်းအဆာက်အန်း။ တူအီးနီး ဘိူန်းစံမ့် ပါ်ကံမ်ဖာနီးမာ်၊ ဆာ်အဆာက်ႎိညေန်အန်း ဆိုမ်းဟာဝ်း၊ အကျိုး ဆီနံင်မေဲႈ။ နံင်ဒါးဆီ စာနံင်ႎီးကရောႈလာည်း အဆာက်ႎိညေန်အန်း။ ချှေႈမှေဲ့ဘူဒါ်ႈ ဆာ်အန်းဆာည်း ဂေါႇအံဝ်းကာည်း ဂေါႇကျောႈတြားအံဝ်း လအာည်ႇကဲအီးဘူမေဲႈကတိဆတ်စာ ကာည်း တူအီးမေဲႈပံင်ကလူည်ႇဂီုန်းကဲနီး၊ ဆာ်ကော်န်းတူအီးနီး ဒါးဖုင်းဆရေကူန်စံဝ် ဒေဲႈတံန်တောႇ အီးမိုႈစံင်နာင်းပါ့်ပ္လါ်န်းအီးချှီႇဆငါး၊ အံဝ်းမာ် နံင်ဆာည်း ဂေါႇချှေႈဒီး။”

सुनें - မာကု 8